Proverbs 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Afa afa ma nziza o’bizu inzoruri eri afa Yehovani ngule onziri’i, te oni afa nziza o’bizu kililiruri ayiko fe eri drini.

2Afu ka enga ra, drinzani enga alu indi; te ondua ovu ’ba e’yere ’diyi be.

3’Ba acipi kililiru ’diyini ma e’yo kililiruri nga yi dri ceni, te ’ba lokiri be ’diyi ma amboni nga yi dri jani.

4Lonyi koni ’ba ma aza o’du aokonirisi ku, te onyini nga ’ba pa dra siani.

5’Ba e’yo kokoru ’diyi ma onyini nga yi ma geri ede kililiruni, te ’ba onzini nga e’de va e’yo onzi i ma ngulupinisi.

6’Ba kililiru ’diyi ma onyini nga yi ari ra, te li ’ba ’yepi lokirisi ’diyinini nga yi obini.

7’Ba onziri ka nga dra ra e’yo teza eriniri nga avi ra, azini e’yo teza ’ba Mungu rupi ku ’diyini nga dri ja ra.

8Yi pa ’ba onyiruri candi erini ma aliasi ra, te ’ba onziri fi pariniani.

9’Ba Mungu rupi kuri agyi ma dri ja i tisi, te ’ba onyiru ’diyi nga yi opa nitasi.

10’Ba onyiru ’diyini drileba isuria, aku amboru ovu ani ayikosi; azini ’ba e’yo onzi ’yepi ’diyini dri aria, ’ba yi otre ani otre,

11Asi ndriza ’ba onyiru ’diyini fe ’bani aku amboruri ma ru iduzuni, te ’ba onzi ’diyi ma tini fe akuni i oguzu vani.

12’Ba agyini edepi edematarasiri eri ondua kokoru, te ’ba e’yo vaza beri nga adri ini ciri.

13’Ba acipi ’ba eselia e’yo ndropi ’ba ruaari eri e’yo ozizaru ’diyi ece, te ’ba ovupi asi ada beri nga e’yoni ’ba ku ci i asia.

14Dri ceza onduaruri ka ovu yo, suruni e’de va; te ’ba e’yo amapi ’diyi ka ovu o’biru, pata indi.

15’Ba afa toboru fepi ’ba jururu ma e’yosiri nga candi isu ani beni, te ’ba tobo feza ngupi onziri nga adri e’yo ’yaasi.

16Oku adieyaruri adri inzita isuni, azini ’ba e’yo ’yepi eganasi ’diyi adri lonyi isu.

17’Ba yiki ’bapiri eri ’di onyi ’ye i ngulupi dri, te ’ba yiki kokoruri candi fe i ma ngulupi ma rua dri.

18’Ba onziri eri oya lokiri beri bi’i, te ’ba onyi ripiri nga orodri adari ecekokoru.

19’Ba pa sopi okporu onyi ma aliari nga ca kpere idri vu, te ’ba e’yo onzi ma vuti bipiri eri ’di dra ma vuti bi’i.

20’Ba asi mbaza be ’diyi yi afa Yehovani ngule onziri’i, te ’ba e’yo kokoru geri yinia ’diyi yi ayiko fe eri drini.

21Ndi ndi ’ba e’yo onzi ’yepiri ngani ovu panga kokoru ku, te yi nga ’ba onyiru ’diyi ma ori opa ra.

22Oku ndrizaru te ondua kokoruri si ekile mele ndrizaru onyiafaru ezoaroni omvuarile.

23E’yo ’ba kililiru ’diyini leleri eri kiri onyini, te e’yo ’ba onzi ’diyini teleri nga ofu aokoru.

24’Ba azini ci eri afa fe tu, te eri ma afani ezu aga ra; te aziniri ci endraru afa fepi kuri’i, te eri ma afani anu anu.

25’Ba afa fepi turi nga a’bu ra, azini ’ba nga yi obe ’ba yi obepiri dri.

26’Ba yi nga ’ba anya fepi jepi kuri o’da, te asi ndriza nga adri ’ba anya ozipiri ma dria.

27’Ba e’yo onyiru ndapi asi driasiri asi ndriza ndani, te e’yo onzi nga emu ’ba eri ndrupiri vuni.

28’Ba asi ’bapi lonyi ini ma driari nga e’de va, te ’ba onyiruri nga zo ekile patibi roza ibirurile.

29’Ba candi fepi ’ba i vile akua ’diyi driri, awita erini oli’i, azini ’ba ondua kokoru nga ovu ati’boru ’ba ondua beri dri.

30Efi kaza ’ba onyirurini eri pati idriniri, te ’ba ondua beri eri ’ba ma orindi ese ra.

31Mi ndre, yi nga ’ba onyiruri ma ruaa arioti ofe nyakua; ka’dini yi ngani ofe ’ba onziri pi ma ruaa ’ba ezapiri be aza ra ku va?

← Chapter 10 Jump to: Chapter 12 →