Daniel 2

Lahu Bible Edited © Thailand Bible Society and Bible Society of Myanmar, 2010, 2020.

1Neˍbuˍhkaˍneˍzaˍ jawˇmawˇ te ve nyiˇ hkʼaw‸ teˇ hkʼaw‸ gaˬ htaˇ, yawˇ zuh‸ maˆ teˇ maˬ mawˬ ve yoˬ. Zuh‸ maˆ oˇ ve yawˇ hta‸ dawˇ haˍ piˇ lawˬ ve pa taw, yawˇ zuh‸ muiˉ kʼa maˇ gʼa.

2Hkʼe te leh, yawˇ ve mawˉ paˍ hkʼa peu-eˬ hta‸ kuˬ yuˬ leh, zuh‸ maˆ oˇ ve tcuhˉ kuiˬ hta‸ yuˬ tawˆ tcuh ve yoˬ. Yawˇ hui gaˬ la htaˇ, jawˇmawˇ yawˇ hui hta‸ chi hkʼe kʼoˆ piˇ ve yoˬ.

3Ngaˬ zuh‸ maˆ teˇ maˬ maw leh, a ciˉ ka‸ nyi ma maˇ sha. Zuh‸ maˆ oˇ ve hta‸ ka‸ ngaˬ leunˇ kʼai peuˬ. Zuh‸ maˆ oˇ ve tcuhˉ kuiˬ hta‸ ngaˬ shiˍ gaˇ jaˇ ve yoˬ, teh‸ yawˇ hui hta‸ kʼoˆ piˇ ve yoˬ.

4Oˇ htaˇ yawˇ hui lehˬ, Jawˇmawˇ-oˬ, nawˬ co zuh ha zuhˬ cawˬ piˇ-oˆ. Zuh‸ maˆ oˇ ve ngaˬ hui hta‸ kʼoˆ maˍ laˇ-oˆ. Ngaˬ hui tcuhˉ kuiˬ yuˬ tawˆ laˇ tuˬ yoˬ, teh‸ yawˇ hui Aˍraˍmiˆ hkawˇ yaw leh jawˇmawˇ hta‸ kʼoˆ piˇ ve yoˬ.

5Oˇ htaˇ, jawˇmawˇ yawˇ hui hta‸ chi hkʼe kʼoˆ piˇ ve yoˬ. Zuh‸ maˆ oˇ ve ngaˬ hta‸ kʼoˆ maˍ laˇ leh, tcuhˉ kuiˬ ka‸ yuˬ tawˆ laˇ-oˆ. Nawˬ hui oˇ hkʼe te laˇ maˇ gʼa ve kʼo, ngaˬ nawˬ hui ve awˬ tcuhˉ teˇ hpaˍ hta‸ tawˆ cheˆ leh, nawˬ hui ve yehˬ teˇ hpaˍ hta‸ te luˬ laˇ tuˬ yoˬ.

6Ya‸ hkʼaˇ, nawˬ hui ngaˬ mawˬ ve zuh‸ maˆ oˇ ve leh tcuhˉ kuiˬ hta‸ htawˇ yuˬ tawˆ laˇ gʼa ve kʼo, ngaˬ nawˬ hui hta‸ la‸ shawnˍ maˇ maˇ piˇ laˇ tuˬ yoˬ. Chi beu‸ zuh‸ maˆ oˇ ve leh, tcuhˉ kuiˬ ngaˬ hta‸ hto maˍ laˇ-oˆ, teh‸ yawˇ hui hta‸ kʼoˆ piˇ ve yoˬ.

7Yawˇ hui kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ gʼa mawˬ ve zuh‸ maˆ ngaˬ hui hta‸ awˉ lawˉ peuˇ kʼoˆ laˇ htaˇ heh‸ ngaˬ hui tcuhˉ kuiˬ yuˬ tawˆ laˇ gʼa tuˬ yoˬ, teh‸ yawˇ hta‸ kʼoˆ piˇ ve yoˬ.

8Oˇ htaˇ jawˇmawˇ kʼoˆ ve, Naw hui chi hkʼe kʼoˆ laˇ tuˬ yoˬ, teh‸ ngaˬ shiˍ taˍ ve yoˬ. Ngaˬ gʼa mawˬ ve zuh‸ maˆ oˇ ve hta‸ kʼoˆ laˇ maˇ gʼa ve kʼo,

9ngaˬ ciˍ yanˍ laˇ tuˬ ve hta‸ nawˬ hui shiˍ taˍ ve pa taw, nawˬ hui awˬ yanˇ hta‸ hkʼe leˇ te peuˬ piˇ chehˇ ve yoˬ. Laˬtuˬ ve awˬ yanˇ awˬ hkʼaw lo, chi hkʼe oˇ hkʼe hpeh‸ la tuˬ yoˬ, teh‸ nawˬ hui ngaˬ hta‸ heˍ laˇ tuˬ dawˇ nyi chehˇ taˍ ve yoˬ. Zuh‸ maˆ oˇ ve ngaˬ hta‸ hto laˇ-oˆ. Oˇ htaˇ heh‸, nawˬ hui zuh‸ maˆ tcuhˉ kuiˬ yuˬ tawˆ puiˉ ve hta‸ ngaˬ shiˍ la tuˬ yoˬ, teh‸ yawˇ hui hta‸ kʼoˆ piˇ ve yoˬ.

10Chaw oˇ ve teˇ hpaˍ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ shiˍ gaˇ ve awˬ ceuˬ chi hta‸ hto laˇ gʼa ve miˬguiˬ hkʼoˆ chaw teˇ gʼaˇ ka‸ maˇ cawˬ. Awˬ me‸ awˬ hponˇ uiˍ ve jawˇmawˇ hkʼaˬ ve te gʼaˇ maˇ kʼoˆ, yawˇ ve mawˉpaˍ teˇ hpaˍ hta‸ awˬ ceuˬ chi hkʼe ve teˇ pawˆ ka‸ maˇ na nyi jaw.

11Jawˇmawˇ nawˬ na nyi laˇ ve tawˇ chi hta‸ gʼuiˬsha maˇ heˆ ve kʼo, chaw teˇ gʼaˇ ka‸ yaw hkʼaw‸ laˇ gʼa tuˬ ve maˇ heˆ. Gʼuiˬsha chi teˇ hpaˍ ka‸, chaw yaˇ hui geh maˇ chehˇ, teh‸ jawˇmawˇ hta‸ kʼaw‸ yaw hkʼaw‸ piˇ ve yoˬ.

12Jawˇmawˇ lehˬ, yawˇ hui kʼaw‸ yaw hkʼaw‸ piˇ ve tawˇ oˇ ve hta‸ gʼa kaˇ ve teˇ yanˇ, nyi ma zuhˆ jaˇ leh yawˇ hui hkʼa peu-eˬ hta‸ tiˇ pehˍ tuˬ tawˇ piˇ ve yoˬ.

13Jawˇmawˇ tiˇ pehˍ tcuh ve mawˉ paˍ chi teˇ hpaˍ hkʼaw, Daˍyeˍlaˆ leh yawˇ ve awˬ chawˇ teˇ hpaˍ htawˇ lo‸-e taˍ ve yoˬ.

14Oˇ htaˇ, Daˍyeˍlaˆ lehˬ jawˇmawˇ a sha‸ shaw shehˍ hpaˇ Aˍroˆ geh kʼai ve yoˬ. Jawˇmawˇ lehˬ, mawˉ paˍ oˇ ve teˇ hpaˍ hta‸ tiˇ pehˍ piˇ tuˬ Aˍroˆ hta‸ tawˇ piˇ taˍ ve yoˬ.

15Daˍyeˍlaˆ hkʼa deh‸ dawˇ nyi peuˬ hkʼaw‸ nawˉ, aˬ hto‸ ma pa taw jawˇmawˇ mawˉ paˍ oˇ ve teˇ hpaˍ hta‸ tiˇ pehˍ tcuh ve awˬ lawn na nyi ve yoˬ. Hkʼe te leh, hpeh‸ la peuˬ ve awˬ lawn hkʼa peu-eˬ Aˍroˆ Daˍyeˍlaˆ hta‸ hto maˍ piˇ ve yoˬ.

16Oˇ htaˇ, Daˍyeˍlaˆ teˇ cawˬ haˉ jawˇmawˇ geh kʼai leh, zuh‸ maˆ ve tcuhˉ kuiˬ yuˬ tawˆ laˇ gʼa tuˬ, yawˇ hta‸ awˬ yanˇ a ciˉ kʼaw‸ piˇ laˇ tuˬ, jawˇmawˇ geh a hkaw-anˬ ca lawˬ ve yoˬ.

17Oˇ hkʼe te peuˬ hkʼaw‸ nawˉ, yawˇ ve awˬ chawˇ Haˍnaˍniˆ, Miˆsheˍlaˆ, leh Aˍzaˍriˆ hui geh kʼai leh, hpeh‸ la peuˬ ve awˬ lawn chi hkʼa peu-eˬ yawˇ hui hta‸ kʼoˆ maˍ piˇ ve yoˬ.

18Yawˇ hui awˬ nu ve mawˉ paˍ hui geh teˇ geh tiˇ pehˍ ve hta‸ maˇ gʼa hkanˍ tuˬ, leh Gʼuiˬsha yawˇ hui hta‸ ha kʼaˉ laˇ leh zuh‸ maˆ oˇ ve Gʼuiˬsha yawˇ hui hta‸ hpeu‸ maˍ laˇ tuˬ, Gʼuiˬsha geh bon lawˬ-o‸, teh‸ Yawˇ hui hta‸ kʼoˆ piˇ ve yoˬ.

19Hkʼe te leh, oˇ ve teˇ haˉ Gʼuiˬsha lehˬ awˬ ha hkʼaw Daˍyeˍlaˆ hta‸ zuh‸ maˆ oˇ ve tcuhˉ kuiˬ hpeu‸ maˍ piˇ ve yoˬ. Oˇ htaˇ, Daˍyeˍlaˆ Gʼuiˬsha hta‸ chiˇ mvuh leh kʼoˆ ve,

20Gʼuiˬsha lehˬ, cuˇ yiˍ cawˬ leh kanˇ paˆ uiˍ jaˇ ve yoˍ. Yawˇ hta‸ co co taiˍ taiˍ chiˇ mvuh-o.

21Yawˇ lehˬ awˬ tcuhˉ awˬ yanˇ teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ. Yawˇ leh, jawˇmawˇ teˇ gʼaˇ hta‸ yuˬ baˬ leh, awˬ nu ve teˇ gʼaˇ hta‸ kʼaw‸ taˆ la piˇ ve yoˬ. Yawˇ lehˬ chaw yaˇ teˇ hpaˍ hta‸ shiˍ puiˉ ve cuˇ yiˍ piˇ taˍ ve yoˬ.

22Faˉ taˍ ve leh, naˉ jaˇ ve awˬ ceuˬ teˇ hpaˍ hta‸Yawˇ hpeu‸ tawˆ la piˇ ve yoˬ. Naˆ ho‸ kuiˬ lo faˉ taˍ ve mawˇ hta‸ Yawˇ mawˬ chehˇ leh, Yawˇ awˬ paˇ awˬ kui lo awˬ gʼeuˆ hkʼa caw zuhˇ cawˬ taˍ ve yoˬ.

23Ngaˬ puˍ ngaˬ pi hui ve Gʼuiˬsha-oˬ, ngaˬ nawˬ hta‸ yawˆ yan leh chiˇ mvuh ve yoˬ. Nawˬ ngaˬ hta‸ cuˇ yiˍ maˍ yiˍ leh, awˬ gʼaˇ awˬ shaˉ piˇ laˇ ve yoˬ. Nawˬ lehˬ, ngaˬ ve bon lawˬ hkawˇ hta‸ na yuˬ leh, jawˇmawˇ hta‸ hkʼaˬ hkʼe gʼa kʼoˆ piˇ tuˬ, nawˬ ngaˬ hta‸ hpeu‸ maˍ laˇ taˍ peuˬ, teh‸ kʼoˆ ve yoˬ

24Oˇ ve hkʼaw‸ nawˉ, Daˍyeˍlaˆ lehˬ mawˉ paˍ teˇ hpaˍ hta‸ tiˇ pehˍ piˇ tuˬ gu chehˇ ve Aˍroˆ geh kʼai leh, Yawˇ hui hta‸ taˇ tiˇ pehˍ sheˍ. Jawˇmawˇ ve zuh‸ maˆ hta‸ tcuhˉ kuiˬ yuˬ tawˆ piˇ tuˬ, ngaˬ hta‸ jawˇmawˇ geh shiˍ kʼai laˇ-oˆ, teh‸ yawˇ hta‸ kʼoˆ piˇ ve yoˬ.

25Hkʼe te leh, Aˍroˆ yawˇ hta‸ jawˇmawˇ geh teˇ cawˬ haˉ shiˍ kʼai piˇ leh, Jawˇmawˇ-oˬ, nawˬ zuh‸ maˆ ve hta‸ tcuhˉ kuiˬ yuˬ tawˆ laˇ gʼa ve Yuˇda‸ chaw teˇ gʼaˇ hta‸ ngaˬ ca mawˬ taˍ peuˬ, teh‸ jawˇmawˇ hta‸ kʼoˆ piˇ ve yoˬ.

26Oˇ htaˇ jawˇmawˇ lehˬ, Ngaˬ gʼa mawˬ ve zuh‸ maˆ oˇ ve leh tcuhˉ kuiˬ nawˬ ngaˬ hta‸ hto laˇ hpeh‸-aw laˇ, teh‸ Daˍyeˍlaˆ hta‸ kʼoˆ piˇ ve yoˬ.

27Daˍyeˍlaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, mawˉ paˍ teˇ gʼaˇ ka‸ nawˬ ve zuh‸ maˆ oˇ ve tcuhˉ kuiˬ hta‸ yuˬ tawˆ laˇ gʼa tuˬ ve maˇ heˆ.

28Ya‸ hkʼaˇ, tcuhˉ kuiˬ hkʼa peu-eˬ hta‸ shiˍ shehˍ hpaˇ Gʼuiˬsha teˇ gʼaˇ mvuhˇ naw ma hkʼoˆ chehˇ taˍ ve yoˬ. Laˬ tuˬ ve awˬ yanˇ awˬ hkʼaw lo hkʼaˬ hkʼe hpeh‸ la tuˬ ve awˬ lawn, Yawˇ nawˬ hta‸ hpeu‸ maˍ laˇ chehˇ ve yoˬ. Nawˬ gʼa mawˬ ve zuh‸ maˆ oˇ ve ngaˬ chi beu‸ nawˬ hta‸ kʼoˆmaˍ laˇ tuˬ yoˬ.

29Nawˬ zuh‸ muiˉ kʼa chehˇ ve teˇ yanˇ, laˬ tuˬve awˬ yanˇ hkʼaw hpeh‸ la tuˬ ve awˬ lawn hta‸ nawˬ zuh‸ maˆ mawˬ chehˇ ve yoˬ. Hkʼe te leh, hkʼa peu-eˬve hta‸ shiˍ shehˍ hpaˇ Gʼuiˬsha lehˬ, nawˬ hta‸ hpeh‸ la tuˬ ve awˬ ceuˬ oˇ ve teˇ hpaˍ hpeu‸ maˍ laˇ chehˇ ve yoˬ.

30Chi beu‸ tcuhˉ kuiˬ oˇ ve Yawˇ ngaˬ hta‸ hpeu‸ maˍ laˇ taˍ peuˬ. Yawˇ ngaˬ hta‸ chi hkʼe hpeu‸ maˍ laˇ ve lehˬ, awˬ nu ve chaw teˇ hpaˍ a‸ kehˉ ngaˬ cuˇ yiˍ cawˬ ve chaw hpeh‸ ve hta‸ pa taw maˇ heˆ. Jawˇmawˇ nawˬ gʼa mawˬ ve zuh‸ maˆ oˇ ve tcuhˉ kuiˬ hta‸ nawˬ gʼa shiˍ tuˬ awˬ pon hpeh‸ ve yoˬ.

31Jawˇmawˇ nawˬ gʼa mawˬ ve zuh‸ maˆ oˇ ve lehˬ chi hkʼe yoˬ. Nawˬ gʼuˇ suhˍ lo chaw awˬ han lonˉ teˇ maˬ huˉ chehˇ ve hta‸ nawˬ gʼa mawˬ ve yoˬ. Yawˇ lehˬ awˬ gʼeuˆ ba chehˇ leh, kawˆ law‸ law‸ cawˬ ve yoˬ.

32Yawˇ ve oˉ kʼoˍ lehˬ shi hpeh‸ leh, yawˇ ve nyi ma pui leh la‸ sheh teˇ hpaˍ lehˬ hpu hpeh‸ ve yoˬ. Yawˇ ve caw‸ cehˍ nyi leh pfuhˬ tehˉ kʼu lehˬ kuiˇ hpeh‸ leh,

33yawˇ ve hkui sheh lehˬ, sho teˇ tawn leh je‸ teˇ tawn hpeh‸ ve yoˬ.

34Nawˬ chaw awˬ han lonˉ oˇ ve hta‸ nyi chehˇ htaˇ, haˉ hpawˇ hkʼoˆ lo haˉ pui shiˍ teˇmaˬ pu ya‸ la leh, chaw awˬ han lonˉ oˇ ve hkui sheh hta‸ pu teˍ ve yoˬ. Hkʼe te leh, hkui sheh hteh leh chaw awˬ han lonˉ oˇ ve paiˍ ve yoˬ.

35Oˇ htaˇ, sho, je‸, kuiˇ, hpu leh shi oˇ ve hkʼa peu-eˬ je‸ meu-e hkʼa shuˍ hpeh‸ kʼai ve yoˬ. Mvuhˇ haw lonˉ meuˆ laˬ leh, oˇ ve hkʼa peu-eˬ hta‸ meuˆ baˬ sheˬ ve yoˬ. Ya‸ hkʼaˇ, haˉ pui shiˍ oˇ ve shaˬ te shaˬ uiˍ la leh, miˬguiˬ hkʼa peu-eˬ hta‸ hoˆ beh sheˬ ve yoˬ.

36Chi ve lehˬ, nawˬ gʼa mawˬ ve zuh‸ maˆ hpeh‸ ve yoˬ. Chi beu‸ zuh‸ maˆ oˇ ve tcuhˉ kuiˬ ngaˬ nawˬ hta‸ hto laˇ shaˍ.

37Jawˇmawˇ-oˬ, nawˬ lehˬ aw nu ve jawˇmawˇ teˇ hpaˍ a‸ kehˉ uiˍ jaˇ ve jawˇmawˇ lonˉ hpeh‸ ve yoˬ. Mvuhˇ naw ma ve Gʼuiˬsha lehˬ nawˬ hta‸ jawˇmawˇ lonˉ hpeh‸ la piˇ leh, awˬ me‸ awˬ hponˇ leh kanˇ paˆ hkʼa biˇ piˇ laˇ taˍ ve yoˬ.

38Miˬguiˬ chaw yaˇ leh to nuˇ to shaˆ hkʼa peu-eˬ ve hta‸ uˉ peunˍ tuˬ, Yawˇ nawˬ hta‸ leuˆ yuˬ taˍ ve yoˬ. Nawˬ lehˬ shi oˉ kʼoˍ hpeh‸ ve yoˬ.

39Nawˬ awˬ hkʼaw‸ nawˉ, nawˬ ve mvuhˇmiˬ hkʼe taw maˇ uiˍ ve mvuhˇmiˬ teˇ peˆ kʼaw‸ tawˆ la tuˬ yoˬ. Oˇ ve hkʼaw‸ nawˉ, kuiˇ hkʼe ve mvuhˇmiˬ shehˆ peˆ teˇ peˆ kʼaw‸ tawˆ la leh, miˬguiˬ hkʼa peu-eˬ ve hta‸ uˉ peunˍ tuˬ yoˬ.

40Oˇ ve hkʼaw‸ nawˉ, sho hkʼe heh ve mvuhˇmiˬ awˇ peˆ teˇ peˆ kʼaw‸ tawˆ la leh, awˬ ceuˬ hkʼa peu-eˬ ve hta‸ te luˬ te sheˆ piˇ tuˬyoˬ. Sho lehˬ awˬ nu ve mawˇ teˇ hpaˍ hta‸ te luˬ piˇ ve hkʼe, mvuh ˇ miˬ oˇ ve lehˬ awˬ nu ve mvuhˇmiˬ teˇ hpaˍ hta‸ te luˬ piˇ tuˬ yoˬ.

41Chaw awˬ han lonˉ oˇ ve hkui sheh leh hkui naw teˇ hpaˍ lehˬ, sho teˇ tawn leh je‸ teˇ tawn te taˍ ve hta‸ nawˬ gʼa mawˬ ve yoˬ. Chi ve lehˬ, mvuhˇmiˬ pehˬ da‸ kʼai ve hta‸ tcuhˉ taˍ ve yoˬ. Mvuhˇmiˬ teˇ hpaˍ hpaˍ sho hkʼe awˬ gʼaˇ cawˬ leh, teˇ hpaˍ hpaˍ je‸ hkʼe awˬ gʼaˇ nuˇ kʼai tuˬ yoˬ.

42Hkui naw teˇ hpaˍ sho teˇ tawn leh je‸ teˇ tawn hpeh‸ ve hkʼe, mvuhˇmiˬ oˇ ve teˇ hpaˍ hpaˍ sho hkʼe awˬ gʼaˇ cawˬ leh, teˇ hpaˍ hpaˍ je‸ hkʼe awˬ gʼaˇ nuˇ kʼai tuˬ yoˬ.

43Hkui sheh oˇ ve sho teˇ tawn leh je‸ teˇ tawn hpeh‸ ve hta‸ nawˬ gʼa mawˬ ve yoˬ. Tcuhˉ kuiˬ lehˬ chi hkʼe yoˬ. Mvuhˇmiˬ oˇ ve teˇ hpaˍ hta‸ uˉ peunˍ chehˇ ve jawˇmawˇ teˇ hpaˍ lehˬ, chaw ceuˬ teˇ ceuˬ leh teˇ ceuˬ heuˆ da‸ tcuh leh, nyi ma teˇ shiˍ tiˉ hpeh‸ la tuˬ te tuˬ yoˬ. Ya‸ hkʼaˇ, sho leh je‸ hkaw‸ da‸ maˇ gʼa ve hkʼe, yawˇ hui dawˇ taˍ ve hkʼe hpeh‸ la tuˬ ve maˇ heˆ.

44Awˬ yanˇ oˇ ve hkʼaw, mvuhˇ nawˬ ma Gʼuiˬsha lehˬ, mvuhˇmiˬ lonˉ teˇ peˆ kʼaw‸ cawˬ la piˇ tuˬ yoˬ. Mvuhˇmiˬ chi ve awˬ gʼaˇ uiˍ jaˇ leh, awˬ nu ve mvuhˇmiˬ teˇ hpaˍ hta‸ te luˬ te sheˆ piˇ tuˬ yoˬ.

45Haˉ hpawˇ hkʼoˆ lo haˉ pui shiˍ teˇ maˬ pu ce la leh, shi, hpu, kuiˇ leh je‸ yuˬ te taˍ ve chaw awˬ han lonˉ oˇ ve hta‸ ce teˍ piˇ ve hta‸ nawˬ gʼa mawˬ ve yoˬ. Uiˍ jaˇ ve Gʼuiˬsha chi teˇ gʼaˇ lehˬ, laˬ tuˬ ve awˬ yanˇ hkʼaw hkʼaˬ hkʼe hpeh‸ la tuˬ, jawˇmawˇ nawˬ hta‸ hpeu‸ maˍ laˇ chehˇ ve yoˬ. Nawˬ gʼa mawˬ ve zuh‸ maˆ oˇ ve leh tcuhˉ kuiˬ chi beu‸ ngaˬ nawˬ hta‸ hteˇ lehˍ hto laˇ ve yoˬ, teh‸ Daˍyeˍlaˆ jawˇmawˇ hta‸ kʼoˆ piˇ ve yoˬ.

46Oˇ htaˇ jawˇmawˇ Neˍbuˍhkaˍneˍzaˍ miˬ chaˇ hkʼoˆ boˆ sheˬ leh, Daˍyeˍlaˆ hta‸ tanˇ piˇ tuˬ awˬ pon, tanˇ tuˬ teˇ hpaˍ yuˬ laˇ tuˬ tawˇ piˇ ve yoˬ.

47Oˇ ve hkʼaw‸ nawˉ, yawˇ Daˍyeˍlaˆ hta‸ chi hkʼe kʼoˆ piˇ ve yoˬ. Nawˬ ve Gʼuiˬsha lehˬ, awˬ kaˍ awˬ nu gʼuiˬsha teˇ hpaˍ a‸ kehˉ uiˍ jaˇ leh, jawˇmawˇ hkʼa peu-eˬ hkʼoˆ jawˇmawˇ hpeh‸ ve yoˬ. Yawˇ teˇ gʼaˇ ceh tiˉ awˬ ceuˬ chi hkʼe ve hta‸ hpeu‸ maˍ laˇ gʼa ve yoˬ. Nawˬ ngaˬ hta‸ chi hkʼe hpeu‸ maˍ laˇ gʼa ve pa taw, nawˬ ve Gʼuiˬsha lehˬ chi hkʼe ve Gʼuiˬsha hpeh‸ ve hta‸ ngaˬ gʼa shiˍ ve yoˬ, teh‸ Daˍyeˍlaˆ hta‸ kʼoˆ piˇ ve yoˬ.

48Yawˇ oˇ hkʼe kʼoˆ peuˬ hkʼaw‸ nawˉ, Daˍyeˍlaˆ hta‸ uiˍ jaˇ mvuh jaˇ ve aˉ yaˇ piˇ leh, awˬ hpfuhˇ hkʼaˆ ve la‸ shawnˍ maˇ maˇ piˇ ve yoˬ. Chi hkʼoˆ ka‸, Baˍ buˍlonˍ mvuhˇmiˬ hkʼa peu-eˬ yawˇ hta‸ uˉ peunˍ tcuh leh, jawˇmawˇ hta‸ dawˇ hkʼaˇ piˇ paˍ awˬ hoˉ lonˉ te tcuh ve yoˬ.

49Daˍyeˍlaˆ lawˬ ve hkʼe, jawˇmawˇ lehˬ Shaˆdraˆ, Meˍshehˆ, leh Aˍbeˍdaˍneˍ goˍ hui hta‸ htawˇ, Baˍbuˍlonˍ mvuhˇmiˬ ve awˬ hoˉ awˬ naˬ te tcuh ve yoˬ. Hkʼe te leh, Daˍyeˍlaˆ lehˬ hawˉ yehˬ hkʼaw lo tiˉ chehˇ taˍ ve yoˬ.

← Chapter 1 Jump to: Chapter 3 →