Daniel 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Jawˇmawˇ Daˍriˆ lehˬ, yawˇ awˬ hawˉ lo kanˉ te tuˬ a ma‸ lonˉ 120 gʼaˇ hta‸ leuˆ yuˬ taˍ ve yoˬ.

2Chi hkʼoˆ ka‸, yawˇ lehˬ a ma‸ lonˉ oˇ ve teˇ hpaˍ hta‸ awˬ hoˉ te leh, mvuhˇmiˬ ve kanˉ hta‸ te kʼai tuˬ, Daˍyeˍlaˆ leh awˬ nu ve chaw nyiˇ gʼaˇ hta‸ htawˇ leuˆ yuˬ taˍ ve yoˬ.

3Daˍyeˍlaˆ lehˬ awˬ nu ve a ma‸ lonˉ teˇ hpaˍ a‸ kehˉ cuˇ yiˍ cawˬ leh kanˉ te puiˉ jaˇ ve hta‸ jawˇmawˇ gʼa mawˬ ve yoˬ. Hkʼe te leh, mvuhˇmiˬ hkʼa peu-eˬ hkʼoˆ yawˇ hta‸ uˉ peunˍ tcuh tuˬ jawˇmawˇ dawˇ nyi chehˇ ve yoˬ.

4Oˇ htaˇ, awˬ nu ve a ma‸ lonˇ teˇ hpaˍ lehˬ Daˍyeˍlaˆ te ya‸ kuiˬ hta‸ gʼaˇ hte‸ gʼa‸ ca chehˇ ve yoˬ. Ya‸ hkʼaˇ, yawˇ hui ca maˇ mawˬ. Awˬ lawn kʼo, Daˍyeˍlaˆ lehˬ maˇ hteˇ maˇ cawˇ ve kanˉ hta‸ a ciˉ ka‸ maˇ te ve pa taw yoˬ.

5Oˇ htaˇ yawˇ hui lehˬ, Daˍyeˍlaˆ te ya‸ kuiˬ hta‸ ngaˬ hui te‸ chiˉ ca maˇ mawˬ. Yawˇ oˉ kʼoˍ pui ve awˬ liˇ hta‸ tawˍ taˍ piˇ ve teˇ ceuˬ ceh tiˉ cawˬ ve yoˬ, teh‸ yawˇ hui teˇ gʼaˇ leh teˇ gʼaˇ kʼoˆ da‸ ve yoˬ.

6Oˇ hkʼe kʼoˆ da‸ peuˬ hkʼaw‸ nawˉ, yawˇ hui jawˇmawˇ hta‸ chi hkʼe ca kʼoˆ piˇ ve yoˬ. Jawˇmawˇ Daˍriˆ-oˬ, nawˬ co zuhˬ ha zuhˬ cawˬ piˇ-oˆ.

7Ngaˬ hui a ma‸ lonˉ hkʼa peu-eˬ, nawˬ hta‸ chi hkʼe lawˬ gaˇ ve yoˬ. Shehˆ chi nyi hkʼa gaˬ, chaw teˇ gʼaˇ ka‸ nawˬ hta‸ maˇ heˆ kʼo, awˬ nu ve gʼuiˬsha teˇ gʼaˇ hta‸ ka‸ maˇ gʼa lawˬ hkawˉ tuˬ, leh nawˬ ve tawˇ chi hta‸ ponˬ leuˉ ve chaw hta‸ laˇ caˬ shiˉ hkawˆ hkʼaw baˬ keu piˇ tuˬ tawˇ piˇ-oˆ.

8Meˍdiˆ leh Paˇshaˇ mvuhˇmiˬ hkʼaw awˬ liˇ teh taˍ ve hkʼe, nawˬ ve tawˇ chi hta‸ kʼaw‸ pa maˇ gʼa tuˬ, nawˬ ve yinˉ hkʼa deh‸ tcuhˉ taˍ-o‸, teh‸ jawˇmawˇ hta‸ kʼoˆ piˇ ve yoˬ.

9Hkʼe te leh, jawˇmawˇ Daˍriˆ lehˬ yawˇ hui kʼoˆ ve hkʼe te leh yinˉ tcuhˉ taˍ ve yoˬ.

10Jawˇmawˇ tawˇ oˇ hkʼe piˇ taˍ peuˬ ve hta‸ Daˍyeˍlaˆ gʼa shiˍ ve teˇ yanˇ, yawˇ aˉ hkʼaw kʼo‸-e ve yoˬ. Yawˇ ve yehˬ awˬ na teˇ bawehˇ hkʼaw, Yeˍruˆsaˍlehnˍ venˇ hpawˇ lo hpaw taˍ ve yehˬ miˉ ehˉ teˇ maˬ cawˬ ve yoˬ. Teˇ nyi le le te jaw ve hkʼe, yawˇ oˇ kaˬ lo kʼai leh teˇ nyi shehˆ pawˆ bon lawˬ ve yoˬ.

11Daˍyeˍlaˆ Gʼuiˬsha geh bon lawˬ chehˇ ve hta‸ yawˇ ve canˇ paˍ teˇ hpaˍ gʼa mawˬ ve teˇ yanˇ,

12yawˇ hui jawˇmawˇ hta‸ ca hto piˇ tuˬ jawˇmawˇ ve hawˉ yehˬ lo kʼai ve yoˬ. Yawˇ hui kʼoˆ ve, Jawˇmawˇ-oˬ, shehˆ chi nyi hkʼa gaˬ nawˬ hta‸ maˇ heˆ kʼo, awˬ kaˍ awˬ nu gʼuiˬsha hta‸ ca lawˬ hkawˉ ve chaw hta‸, laˇ caˬ shiˉ hkawˆ hkʼaw baˬ keu piˇ tuˬ nawˬ tawˇ piˇ taˍ peuˬ ve yoˬ, teh‸ jawˇmawˇ hta‸ kʼoˆ piˇ ve yoˬ. Yoˬ, tawˇ piˇ taˍ peuˬ ve yoˬ. Meˍdiˆ leh Paˇshaˇ mvuhˇmiˬ hkʼaw awˬ liˇ cawˬ ve hkʼe, tawˇ oˇ ve hta‸ kʼaw‸ pa maˇ gʼa, teh‸ jawˇmawˇ yawˇ hui hta‸ kʼoˆ piˇ ve yoˬ.

13Oˇ htaˇ yawˇ hui kʼoˆ ve, Yuˇda‸ chaw Daˍyeˍlaˆ lehˬ nawˬ ve tawˇ hta‸ maˇ na yuˬ. Yawˇ lehˬ teˇ nyi shehˆ pawˆ awˬ yanˇ cawˇ cawˇ bon lawˬ chehˇ ve yoˬ, teh‸ jawˇmawˇ hta‸ kʼoˆ piˇ ve yoˬ.

14Tawˇ oˇ ve hta‸ jawˇmawˇ gʼa kaˇ htaˇ, yawˇ hpeh‸ bawˬ jaˇ leh mvuhˇ nyi lo‸-e htaˇ hkʼa gaˬ, Daˍyeˍlaˆ hta‸ hkʼaˬ hkʼe te ponˬ piˇ gʼa tuˬ dawˇ nyi chehˇ ve yoˬ.

15Oˇ ve hkʼaw‸ nawˉ, yawˇ hui jawˇmawˇ geh teˇ pawˆ kʼaw‸ lo‸ la leh, Meˍdiˆ leh Paˇshaˇ mvuhˇmiˬ hkʼaw awˬ liˇ teh taˍ ve hkʼe, nawˬ ve tawˇ oˇ ve hta‸ kʼaw‸ pa maˇ hpeh‸ ve hta‸ jawˇmawˇ nawˬ shiˍ taˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

16Hkʼe te leh, jawˇmawˇ lehˬ Daˍyeˍlaˆ hta‸ hpeh yuˬ leh laˇ caˬ shiˉ hkawˆ hkʼaw baˬ keu piˇ tuˬ tawˇ piˇ ve yoˬ. Oˇ htaˇ jawˇmawˇ lehˬ, Nawˬ gʼaˇ va chehˇ ve Gʼuiˬsha nawˬ hta‸ htaiˍ hkʼaw‸ laˇ piˇ-oˆ, teh‸ Daˍyeˍlaˆ hta‸ kʼoˆ piˇ ve yoˬ.

17Oˇ hkʼe kʼoˆ peuˬ hkʼaw‸ nawˉ, chaw teˇ gʼaˇ ka‸ Daˍyeˍlaˆ hta‸ yuˬ tawˆ piˇ maˇ gʼa tuˬ, miˬ kʼoˍ oˇ ve awˬ hkʼoˇ meuˇ lo haˉ pui shiˍ lonˉ teˇ maˬ hpfuhˆ tsuhˇ leh, jawˇmawˇ ve yinˉ tcuhˉ taˍ ve yoˬ.

18Oˇ hkʼe te peuˬ hkʼaw‸ nawˉ, jawˇmawˇ hawˉ yehˬ lo kʼo‸-e ve yoˬ. Oˇ ve teˇ haˉ jawˇmawˇ te‸ chiˉ maˇ caˇ maˇ dawˬ leh, zuh‸ muiˉ ka‸ kʼa maˇ gʼa ve yoˬ.

19Shawˉ pawˍ mvuhˇ htiˇ la htaˇ, jawˇmawˇ teˇ na‸ tu leh laˇ caˬ shiˉ hkawˆ lo kʼai ve yoˬ.

20Yawˇ oˇ kaˬ lo gaˬ htaˇ, Te‸ chehˇ ve Gʼuiˬsha ve awˬ ceˬ Daˍyeˍlaˆ-oˬ, nawˬ oˉ kʼoˍ pui chehˇ ve Gʼuiˬsha nawˬ hta‸ laˇ caˬ shiˉ ve maw‸ kʼaw hkʼaw lo htaiˍ hkʼaw‸ laˇ gʼa-aw laˇ, teh‸ kuˬ na nyi ve yoˬ.

21Daˍyeˍlaˆ kʼaw‸ yaw hkʼaw‸ leh kʼoˆ ve, Jawˇmawˇ nawˬ co zuhˬ ha zuhˬ cawˬ piˇ-oˆ.

22Laˇ caˬ shiˉ teˇ hpaˍ ngaˬ hta‸ maˇ gʼa che‸ caˇ tuˬ, Gʼuiˬsha lehˬ mvuhˇ naw ma tcuh yaˇ teˇ gʼaˇ peu laˇ leh, laˇ caˬ shiˉ teˇ hpaˍ ve maw‸ kʼaw hta‸ hoˆ piˇ taˍ ve yoˬ. Jawˇmawˇ-oˬ, ngaˬ nawˬ hta‸ te‸ chiˉ te ya‸ kuiˬ maˇ cawˬ ve hta‸Yawˇ shiˍ ve pa taw, chi hkʼe te laˇ ve yoˬ, teh‸ jawˇmawˇ hta‸ kʼaw‸ yaw hkʼaw‸ piˇ ve yoˬ.

23Jawˇmawˇ ha lehˬ jaˇ leh, Daˍyeˍlaˆ hta‸ gʼawˬ tawˆ piˇ tuˬ tawˇ piˇ ve yoˬ. Hkʼe te leh, yawˇ hui yawˇ hta‸ gʼawˬ tawˆ piˇ ve yoˬ. Yawˇ Gʼuiˬsha hta‸ gʼaˇ va chehˇ ve pa taw, yawˇ te‸ chiˉ maˇ hpeh‸ ve hta‸ yawˇ hui gʼa mawˬ ve yoˬ.

24Oˇ htaˇ, jawˇmawˇ lehˬ Daˍyeˍlaˆ hta‸ te luˬ piˇ gaˇ ve chaw oˇ ve hkʼa peu-eˬ hta‸ hpeh yuˬ tuˬ tawˇ piˇ leh, yawˇ hui ve miˇ yaˇ teˇ hpaˍ geh teˇ geh laˇ caˬ shiˉ hkawˆ hkʼaw baˬ keu tcuh ve yoˬ. Yawˇ hui miˬ chaˇ lo maˇ gaˬ sheˍ htaˇ ka‸, laˇ caˬ shiˉ teˇ hpaˍ mvuhˇ hpe lo ceh yawˇ hui hta‸ tzuh‸ suhˍ sheˬ ve yoˬ.

25Oˇ hkʼe te peuˬ hkʼaw‸ nawˉ, jawˇmawˇ Daˍriˆ lehˬ miˬguiˬ chaw ceuˬ teˇ hpaˍ hta‸ li‸ chi hkʼe bvuh‸ piˇ ve yoˬ. Nawˬ hui hkʼa peu-eˬ geh ha lehˬ dawˇ sha tuˬ cawˬ piˇ-oˆ.

26Ngaˬ ve mvuhˇmiˬ hkʼaw hkʼa chehˇ ve chaw teˇ gʼaˇ le le, Daˍyeˍlaˆ ve Gʼuiˬsha hta‸ kawˆ leh yawˆ yan tuˬ ngaˬ tawˇ pe‸ laˇ ve yoˬ. Yawˇ lehˬ te‸ chehˇ ve Gʼuiˬsha hpeh‸ leh, co co taiˍ taiˍ uˉ peunˍ chehˇ ve yoˬ. Yawˇ ve mvuhˇmiˬ teˇ pawˆ ka‸ luˬ kʼai tuˬ ve maˇ heˆ.

27Yawˇ lehˬ htaiˍ hkʼaw‸ puiˉ ve yoˬ. Mvuhˇ naw ma hkʼoˆ leh miˬguiˬ hkʼoˆ lo, yawˇ anˇ tuˬ te puiˉ ve yoˬ. Laˇ caˬ shiˉ teˇ hpaˍ ve maw‸ kʼaw hkʼaw lo, Yawˇ Daˍyeˍlaˆ hta‸ ponˬ piˇ taˍ peuˬ, teh‸ li‸ bvuh‸ feu piˇ ve yoˬ.

28Daˍyeˍlaˆ lehˬ, Daˍriˆ jawˇmawˇ te chehˇ ve awˬ yanˇ leh, Paˇshaˇ chaw Kuˇruˆ jawˇmawˇ te ve awˬ yanˇ hkʼa gaˬ, aˉ yaˇ uiˍ ve chaw teˇ gʼaˇ hpeh‸ chehˇ taˍ ve yoˬ.

← Chapter 5 Jump to: Chapter 7 →