Daniel 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Beˍlaˍshaˍzaˍ jawˇmawˇ te ve shehˆ hkʼaw‸ teˇ hkʼaw‸ htaˇ, ngaˬ zuh‸ maˆ nyiˇ maˬ teˇ maˬ hta‸ gʼa kʼaw‸ mawˬ ve yoˬ.

2Zuh‸ maˆ oˇ ve hkʼaw, ngaˬ lehˬ Eˇlanˍ mvuhˇmiˬ hkʼaw cawˬ ve Suˇsanˍ venˇ lonˉ hkʼaw chehˇ taˍ ve yoˬ. Ngaˬ lehˬ Uˆlehˇ iˉ kaˆ lawˬ paˇ lo huˉ chehˇ taˍ ve yoˬ.

3Iˉ kaˆ lawˬ oˇ ve awˬ paˇ lo yawˬ paˍ lonˉ teˇ hkeh chehˇ taˍ ve yoˬ. Yawˬ oˇ ve awˬ hkaw nyiˇ maˬ cawˬ leh, awˬ hkaw teˇ maˬ lehˬ awˬ nu ve teˇ maˬ a‸ kehˉ zuhˬ leh awˬ suhˉ hkʼe hpeh‸ ve yoˬ.

4Yawˬ paˍ lonˉ oˇ ve lehˬ, yawˇ guˆ gaˇ ve awˬ ceuˬ hta‸ hkʼaˬ hpawˇ chi hpawˇ ca pawˆ guˆ chehˇ leh, awˬ kaˍ awˬ nu to nuˇ to shaˆ teˇ ceuˬ ka‸, yawˇ hta‸ tawˍ da‸ maˇ gʼa ve yoˬ.

5Aˬ hto‸ ma pa taw yawˬ paˍ lonˉ oˇ ve oˇ hkʼe te chehˇ ve awˬ lawn hta‸ ngaˬ dawˇ nyi chehˇ ve teˇ yanˇ, mvuhˇ nyi kʼehˬ hpawˇ lo aˉ che‸ teˇ hkeh gʼaˇ hte‸ gʼuiˇ laˬ chehˇ ve hta‸ ngaˬ gʼa mawˬ ve yoˬ. Aˉ che‸ oˇ ve lehˬ, mehˆ shiˍ nyiˇ paˉ awˬ kaˍ lo, awˬ hkaw teˇ maˬ cawˬ ve yoˬ.

6Aˉ che‸ oˇ ve gʼaˇ hte‸ gʼuiˇ laˬ leh, yawˬpaˍ lonˉ oˇ ve hta‸ guˆ hpehˇ ve yoˬ.

7Hkʼe te leh, yawˬ paˍ lonˉ ve awˬ hkaw nyiˇ paˉ paˉ hteh sheˬ ve yoˬ. Yawˬ paˍ lonˉ oˇ ve lehˬ, aˉ che‸ hta‸ tawˍ da‸ tuˬ awˬ gʼaˇ maˇ cawˬ. Yawˇ miˬ chaˇ hkʼoˆ lo paiˍ leh, aˉ che‸ taˆ naˆ ve hta‸ gʼa hkanˍ ve yoˬ. Yawˇ hta‸ ga piˇ paˍ teˇ gʼaˇ ka‸ maˇ caw.

8Aˉ che‸ oˇ ve shaˬ te shaˬ nyi ma uiˍ la leh, caˆ muiˬ jaˇ ve yoˬ. Oˇ htaˇ, yawˇ ve awˬ hkaw kʼehˆ ce sheˬ leh, oˇ kaˬ lo awˬ hkaw awˇ maˬ kʼaw‸ tawˆ la ve yoˬ. Awˬ hkaw oˇ ve teˇ hpaˍ, teˇ maˬ teˇ hpawˇ lo mawˍ taˍ ve yoˬ.

9Awˬ hkaw oˇ ve teˇ maˬ awˬ hkʼoˆ lo, awˬ hkaw ehˉ teˇ maˬ kʼaw‸ tawˆ la leh, yawˇ ve kanˇ paˆ lehˬ, awˬ hawˉ hpawˇ, mvuhˇ nyi tawˆ hpawˇ leh Hkaˍnanˍ mvuhˇmiˬ lo hkʼa gaˬ uiˍ kʼai ve yoˬ.

10Yawˇ ve kanˇ paˆ shaˬ te shaˬ kʼaw‸ uiˍ la leh, mvuhˇ naw ma ve ma‸ moˍ hta‸ maˇ kʼoˆ, meu‸ keu shiˍ teˇ hpaˍ hta‸ maˇ kʼoˆ, bawˆ yuˬ gʼa law‸ law‸ ve awˬ gʼaˇ cawˬ la ve yoˬ. Yawˇ lehˬ meu‸ keu shiˍ teˇ hpaˍ hta‸ miˬ chaˇ hkʼoˆ lo gʼawˬ ce leh naˆ nehˆ piˇ ve yoˬ.

11Mvuhˇ naw ma ma‸ moˍ ve ma‸ poˍ lonˉ hta‸ htawˇ, yawˇ maˇ shawˍ maˇ caˆ kʼoˆ leh, yawˇ hta‸ maˇ gʼa kʼaw‸ tuˉ tanˇ tuˬ tawˍ taˍ ve yoˬ. Yawˇ ve bon yehˬ hta‸ htawˇ, cha‸ chiˆ tuˬ te piˇ ve yoˬ.

12Chaw yaˇ teˇ hpaˍ oˇ kaˬ lo venˇbaˆ te leh, yawˇ hta‸ maˇ kʼaw‸ tuˉ tanˇ piˇ ve yoˬ. Gʼuiˬsha hta‸ oˉ kʼoˍ pui ve awˬ liˇ chi hta‸ yawˇ miˬ chaˇ hkʼoˆ lo yuˬ baˬ leh, yawˇ te gaˇ ve hkʼe te chehˇ ve yoˬ.

13Oˇ htaˇ, mvuhˇ naw ma tcuh yaˇ teˇ gʼaˇ lehˬ, Awˬ ha hkʼaw lo gʼa mawˬ chehˇ ve awˬ ceuˬ chi teˇ hpaˍ hkʼaˬ maw maw chi hkʼe hpeh‸ chehˇ tuˬsheˍ ve le. Hkʼaˬ maw maw chaw yaˇ chi teˇ hpaˍ venˇbaˆ te leh, Gʼuiˬsha hta‸ maˇ kʼaw‸ tuˉ tanˇ piˇ tuˬ sheˍ ve le. Mvuhˇ naw ma ve ma‸ moˍ leh, bon yehˬ lehˬ hkʼaˬ maw maw shu naˆ toˇ ve hta‸ gʼa hkanˍ tuˬ sheˍ ve le, teh‸ awˬ nu ve mvuhˇ naw ma tcuh yaˇ teˇ gʼaˇ hta‸ na nyi chehˇ ve awˬ hkawˇ hta‸ ngaˬ gʼa kaˇ ve yoˬ.

14Mvuhˇ naw ma tcuh yaˇ oˇ ve kʼaw‸ yaw hkʼaw‸ leh kʼoˆ ve, 1,150 nyi hkʼa gaˬ chi hkʼe hpeh‸ chehˇ tuˬ sheˍ ve yoˬ. Awˬ nyi chi ve maˇ peuˬ sheˍ ve ceh ceh, shu Gʼuiˬsha hta‸ tuˉ tanˇ tuˬ ve maˇ heˆ. Oˇ ve hkʼaw‸ nawˉ, bon yehˬ hta‸ kʼaw‸ gu te piˇ tuˬ yoˬ, teh‸ kʼoˆ ve yoˬ.

15Ngaˬ lehˬ, awˬ ha hkʼaw gʼa mawˬ ve awˬ ceuˬ oˇ ve teˇ hpaˍ hta‸ dawˇnyi chehˇ ve teˇ yanˇ, ngaˬ gʼuˇ suhˍ lo chaw teˇ gʼaˇ huˉ chehˇ taˍ ve hta‸ gʼa mawˬ ve yoˬ.

16Oˇ htaˇ, Gaˍbeˍlaˆ-oˬ, yawˇ gʼa mawˬ ve zuh‸ maˆ oˇ ve tcuhˉ kuiˬ hpeu‸ maˍ piˇ-oˆ, teh‸ Uˆlehˇ iˉ kaˆ lawˬ hkʼoˆ lo bvuhˬ tawˆ la ve awˬ hkawˇ hta‸ ngaˬ gʼa kaˇ ve yoˬ.

17Hkʼe te leh, Gaˍbeˍlaˆ ngaˬ geh laˬve yoˬ. Oˇ htaˇ, ngaˬ kawˆ jaˇ leh miˬ chaˇ hkʼoˆ lo paiˍ ve yoˬ. Hkʼe te leh, yawˇ ngaˬ hta‸ chi hkʼe kʼoˆ laˇ ve yoˬ. Chaw yaˇ-oˬ chi hta‸ shiˍ-o‸. Nawˬ gʼa mawˬ ve zuh‸ maˆ chi lehˬ, miˬguiˬ awˬ yanˇ leh htaˇ heh‸ hpeh‸ la tuˬ ve yoˬ, teh‸ ngaˬ hta‸ kʼoˆ laˇ ve yoˬ.

18Yawˇ tawˇ yaw chehˇ ve teˇ yanˇ, ngaˬ lehˬ maˇ nawˇ maˇ hteh miˬ chaˇ hkʼoˆ lo paiˍ taˍ ve yoˬ. Ya‸ hkʼaˇ, yawˇ ngaˬ hta‸ kʼaw‸ cawˍ tu laˇ leh chi hkʼe kʼaw‸ kʼoˆ laˇ ve yoˬ.

19Gʼuiˬsha nyi ma zuhˆ ve teˇ yanˇ, hkʼaˬ hkʼe hpeh‸ la tuˬ ve awˬ lawn, ngaˬ nawˬ hta‸ kʼoˆ laˇ chehˇ ve yoˬ. Nawˬ gʼa mawˬ ve zuh‸ maˆ chi lehˬ, miˬguiˬ awˬ yanˇ leh htaˇ heh‸ hpeh‸ la tuˬ ve yoˬ.

20Awˬ hkaw nyiˇ maˬ cawˬ ve yawˬ paˍ lonˉ oˇ ve lehˬ, Meˍdiˆ leh Paˇshaˇ mvuhˇmiˬ hta‸ tcuhˉ taˍ ve yoˬ.

21Aˉ che‸ paˍ lonˉ oˇ ve lehˬ, Heˍlaˍsaˆ mvuhˇmiˬ hta‸ tcuhˉ taˍ ve yoˬ. Mehˆ shiˍ nyiˇ paˉ awˬ kaˍ lo cawˬ ve awˬ hkaw oˇ ve lehˬ, Heˍlaˍsaˆ jawˇmawˇ hta‸ kʼoˆ gaˇ ve yoˬ.

22Awˬ hkaw oˇ ve hteh kʼai peuˬ hkʼaw‸ nawˉ, awˬ suhˉ kʼaw‸ tawˆ la ve awˬ hkaw oˇ ve awˇ maˬ lehˬ, Heˍlaˍsaˆ mvuhˇmiˬ awˇ tawn pehˬ kʼai tuˬ ve hta‸ tcuhˉ taˍ ve yoˬ. Ya‸ hkʼaˇ, mvuhˇmiˬ ehˉ chi ve awˇ peˆ lehˬ, ponˬ la htaˇ ve mvuhˇmiˬ hkʼe taw awˬ gʼaˇ maˇ cawˬ.

23Mvuhˇmiˬ yaˇ oˇ ve teˇ hpaˍ haiˬ jaˇ leh, yawˇ hui hta‸ ciˍ yanˍ piˇ tuˬ ve awˬ yanˇ gaˬ la htaˇ, haiˬ jaˇ ve jawˇmawˇ teˇ gʼaˇ tawˆ la tuˬ yoˬ.

24Yawˇ awˬ gʼaˇ uiˍ la tuˬ yoˬ. Ya‸ hkʼaˇ, yawˇ ve awˬ gʼaˇ awˬ shaˉ hta‸ pa taw maˇ heˆ. Yawˇ lehˬ mvuhˇmiˬ laiˉ peˆ ve hta‸ te luˬ piˇ leh yawˇ dawˇ taˍ ve hkʼe te gʼa tuˬ yoˬ. Yawˇ lehˬ awˬ gʼaˇ uiˍ ve chaw leh, Gʼuiˬsha ve chaw teˇ hpaˍ hta‸ te luˬ te sheˆ piˇ tuˬ yoˬ.

25Yawˇ lehˬ hai ve jawˇmawˇ hpeh‸ ve pa taw, hai ve kanˉ hta‸ tiˉ te tuˬ yoˬ. Yawˇ lehˬ caˆ muiˬ puiˉ jaˇ leh, chaw yaˇ teˇ hpaˍ hta‸ la‸ haˉ tiˇ pehˍ piˇ tuˬ yoˬ. Yawˇ lehˬ uiˍ jaˇ mvuh jaˇ ve Jawˇmawˇ hta‸ htawˇ, maˇ shawˍ maˇ caˆ te piˇ tu yoˬ. Ya‸ hkʼaˇ, yawˇ lehˬ Gʼuiˬsha te luˬ te sheˆ piˇ ve hta‸ gʼa hkanˍ tuˬ yoˬ.

26Teˇ nyi le le mvuhˇ shawˉ mvuhˇ hpeu‸ Gʼuiˬsha hta‸ tuˉ tanˇ piˇ tuˬ ve awˬ lawn lehˬ, nawˬ hta‸ kʼoˆ maˍ piˇ taˍ peuˬ ve hkʼe awˬ tehˬ awˬ na hpeh‸ la tuˬ yoˬ. Ya‸ hkʼaˇ, chi beu‸ la‸ haˉ maˇ hpeh‸ la taˬ sheˍ ve pa taw, chaw teˇ gʼaˇ hta‸ ka‸ nawˬ taˇ hto piˇ sheˍ, teh‸ ngaˬ hta‸ kʼoˆ laˇ ve yoˬ.

27Oˇ htaˇ, ngaˬ gʼaˇ nuˇ jaˇ leh awˬ yanˇ maw chaweh naˬ chehˇ taˍ ve yoˬ. Oˇ ve hkʼaw‸ nawˉ, ngaˬ tu la leh hawˉ yehˬ hkʼaw ngaˬ ve kanˉ hta‸ ca kʼaw‸ te kʼai ve yoˬ. Ya‸ hkʼaˇ, ngaˬ gʼa mawˬ ve awˬ ha oˇ ve hta‸ pa taw, ngaˬ ve nyi ma sho‸ sha‸ jaˇ leh dawˇ maˇ tawˆ hpeh‸ chehˇ ve yoˬ.

← Chapter 7 Jump to: Chapter 9 →