Daniel 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Baˍbuˍlonˍ mvuhˇmiˬ hta‸ Meˍdiˆ chaw jaw mawˇ Aˍshaˍruˆ ve yaˇ Daˍriˆ uˉ peunˍ chehˇ ve yoˬ.

2Yawˇ mvuhˇmiˬ hta‸ tanˬ uˉ peunˍ ve teˇ hkʼaw‸ htaˇ, ngaˬ lehˬ da‸ kehˬ ve li‸ daw teˇ hpaˍ hta‸ gʼaw leh, Gʼuiˬsha Yeˍraˍmiˆ hta‸ kʼoˆ piˇ taˍ peuˬ ve hkʼe Yeˍruˆsaˍlehnˍ venˇ 70 hkʼaw‸ hkʼa gaˬ gʼa luˬ gʼa sheˆ chehˇ taˍ tuˬ ve awˬ lawn hta‸ dawˇ nyi chehˇ ve yoˬ.

3Hkʼe te leh, ngaˬ lehˬ meh htuˉ pui hpa veu‸ deh peuˬ hkʼaw‸ nawˉ, je‸ meu-e hkʼaw mui taˍ leh, Gʼuiˬsha hta‸ gʼaˇ hte‸ lawˬ hkawˉ chehˇ ve yoˬ.

4Ngaˬ ve chaw teˇ hpaˍ ve venˇbaˆ ngaˬ Yawˇ hta‸ hpeu‸ maˍ piˇ leh, bon chi hkʼe lawˬ ve yoˬ. Gʼuiˬsha-oˬ, nawˬ lehˬ uiˍ jaˇ mvuh jaˇ ve Gʼuiˬsha hpeh‸ ve pa taw, ngaˬ hui nawˬ hta‸ yawˆ yan ve yoˬ. Nawˬ lehˬ ka ti‸ yeˬ jaˇ leh, nawˬ hta‸ ha‸ leh nawˬ ve tawˇ hta‸ na yuˬ chehˇ ve chaw hui hta‸ hkʼaˬ htaˆ ka‸ ha kʼaˉ piˇ chehˇ ve yoˬ.

5Ngaˬ hui lehˬ haiˬ jaˇ leh, venˇbaˆ te peuˬ ve yoˬ. Nawˬ te tcuh laˇ ve kanˉ hta‸ ngaˬ hui maˇ te leh, nawˬ beˆ maˍ laˇ ve cawˇ ve ya‸ kʼaw hta‸ ngaˬ hui baˬ taˉ ve yoˬ.

6Ngaˬ hui ve jawˇmawˇ, awˬ hoˉ awˬ naˬ, awˬ puˍ awˬ pi leh ngaˬ hui hkʼa peu-eˬ hta‸, nawˬ ve awˬ meh hkʼaw tawˇ yaw laˇ chehˇ ve nawˬ ve awˬ ceˬ tcuh kaˍ paˍ teˇ hpaˍ ve tawˇ hta‸ ka‸ ngaˬ hui maˇ na yuˬ.

7Gʼuiˬsha-oˬ, nawˬ lehˬ hkʼaˬ htaˆ ka‸ hteˇ ve cawˇ ve kanˉ hta‸ tiˉ te ve yoˬ. Ya‸ hkʼaˇ, ngaˬ hui lehˬ hkʼaˬ htaˆ ka‸ a shu yawˇ ve awˬ me‸ awˬ hponˇ luˬ kʼai tuˬ tiˉ te chehˇ ve yoˬ. Yuˇda‸ chaw leh Yeˍruˆsaˍlehnˍ venˇ yaˇ teˇ hpaˍ maˇ kʼoˆ, awˬ nu ve mvuhˇmiˬ teˇ hpaˍ lo nawˬ hta‸ ka ti‸ maˇ yeˬ ve pa taw nawˬ hpaˆ da‸ guiˇ da‸ kʼai piˇ taˍ ve Iˉsaˍreˍlaˆ chaw teˇ hpaˍ maˇ kʼoˆ, hkʼa peu-eˬ oˇ hkʼe tiˉ te chehˇ ve yoˬ.

8Gʼuiˬsha-oˬ, ngaˬ hui ve jawˇmawˇ, awˬ hoˉ awˬ naˬ, leh awˬ puˍ awˬ pi teˇ hpaˍ lehˬ, ya‸ taw hkawˇ maˇ nawˇ leh nawˬ hta‸ te ya‸ jaˇ peuˬ ve yoˬ.

9Ngaˬ hui nawˬ hta‸ kʼaw‸ hpfuhˆ peuˬ ve htawˇ, nawˬ leh ha kʼaˉ puiˉ jaˇ leh, venˇbaˆ hpehˇ laˇ puiˉ ve yoˬ.

10Ngaˬ hui ve Gʼuiˬsha-oˬ, nawˬ ve tcuh kaˍ paˍ teˇ hpaˍ hta‸ cuˇ leh nawˬ ngaˬ hui hta‸ piˇ laˇ taˍ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ tuˬ, nawˬ ngaˬ hui hta‸ kʼoˆ laˇ taˍ ve htawˇ, ngaˬ hui maˇ na yuˬ.

11Iˉsaˍreˍlaˆ chaw hkʼa peu-eˬ nawˬ ve awˬliˇtawˇhkawˇ teˇ hpaˍ hta‸ ponˬ leuˉ leh, nawˬ ve tawˇ hta‸ maˇ na yuˬ. Ngaˬ hui nawˬ hta‸ te ya‸ jaˇ peuˬ ve yoˬ. Chi hta‸ pa taw, Moˉseˍ ve awˬliˇtawˇhkawˇ li‸ daw awˬ hkʼaw lo bvuh‸ taˍ ve hkʼe, hkeu ve teˇ ceuˬ nawˬ ngaˬ hui awˬ hkʼoˆ la gaˬ la piˇ taˍ ve yoˬ.

12Nawˬ kʼoˆ taˍ peuˬ ve hkʼe, ngaˬ hui leh ngaˬ hui ve awˬ hoˉ awˬ naˬ teˇ hpaˍ hta‸ ciˍ yanˍ laˇ taˍ peuˬve yoˬ. Yeˍruˆsaˍlehnˍ venˇ hta‸ awˬ nu ve venˇ teˇ hpaˍ a‸ kehˉ nawˬ gʼa hkanˍ jaˇ piˇ lawˬ ve yoˬ.

13Moˉseˍ ve awˬliˇtawˇhkawˇ li‸ daw hkʼaw kʼoˆ taˍ ve ciˍ yanˍ tuˬ awˬ ceuˬ hkʼa peu-eˬ, ngaˬ hui awˬ hkʼoˆ lo gaˬ la piˇ ve yoˬ. Ngaˬ hui ve Jawˇmawˇ Gʼuiˬsha-oˬ, ya‸ nyi hkʼa gaˬ ngaˬ hui lehˬ venˇbaˆ maˇ dawˇ hpfuhˆ sheˍ.

14Nawˬ lehˬ hkʼaˬ htaˆ ka‸ hteˇ ve cawˇ ve kanˉ hta‸ tiˉ te ve yoˬ. Ngaˬ hui nawˬ ve tawˇ hta‸ maˇ na yuˬ ve pa taw, nawˬ gu taˍ ve hkʼe ngaˬ hui hta‸ ciˍ yanˍ laˇ taˍ peuˬ ve yoˬ.

15Ngaˬ hui ve Gʼuiˬsha-oˬ, nawˬ lehˬ kanˇ paˆ hta‸ yehˇ leh, nawˬ ve chaw teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ Nawˬ ve kanˇ paˆ hta‸ ya‸ nyi hkʼa gaˬ dawˇ nawˇ chehˇ sheˍ ve yoˬ. Ngaˬ hui nawˬ hta‸ te ya‸ jaˇ peuˬ.

16Ponˬ laˬ htaˇ, nawˬ ngaˬ hui hta‸ ha‸ shaˉ laˇ chehˇ ve yoˬ. Chi hta‸ pa taw, Yeˍruˆsaˍlehnˍ venˇ hta‸ nyi ma taˇ kʼaw‸ zuhˆ-oˆ. Venˇ oˇ ve lehˬ, nawˬ ve venˇ hpeh‸ leh, nawˬ ve da‸ kehˬ ve hkʼaw pui hpeh‸ ve yoˬ. Ngaˬ hui leh ngaˬ hui ve awˬ puˍ awˬ pi hui ve venˇbaˆ hta‸ pa taw, ngaˬ hui awˬ paˇ awˬ kui lo chehˇ ve chaw teˇ hpaˍ lehˬ Yeˍruˆsaˍlehnˍ venˇ hta‸ maˇ kʼoˆ, nawˬ ve chaw teˇ hpaˍ hta‸ maˇ kʼoˆ, hkʼa mvuhˇ hkʼa na kʼoˆ chehˇ ve yoˬ.

17Gʼuiˬsha-oˬ, ngaˬ ve bon lawˬ hkawˇ hta‸ a ciˉ na yuˬ laˇ-oˆ. Nawˬ Gʼuiˬsha hpeh‸ ve hta‸ chaw hkʼa peu-eˬ gʼa shiˍ tuˬ, bon yehˬ oˇ ve hta‸ a ciˉ kʼaw‸ gu te-o.

18Gʼuiˬsha-oˬ, ngaˬ hui ve bon lawˬ hkawˇ hta‸ a ciˉ na yuˬ laˇ-oˆ. Ngaˬ hui hkʼaˬ ma gʼa hkanˍ chehˇ ve leh, nawˬ ve awˬ meh hkʼaw te taˍ ve venˇ oˇ ve hkʼaˬ hkʼe hpeh‸ chehˇ ve hta‸ a ciˉ nyi laˇ-oˆ. Nawˬ lehˬ ha kʼaˉ puiˉ jaˇ ve pa taw, ngaˬ hui nawˬ hta‸ lawˬ hkawˉ chehˇ ve yoˬ. Ngaˬ hui hteˇ ve cawˇ ve kanˉ hta‸ te ve pa taw maˇ heˆ.

19Gʼuiˬsha‸oˬ, ngaˬ hui ve bon lawˬ hkawˇ hta‸ na yuˬ leh, ngaˬ hui ve venˇbaˆ hta‸ a ciˉ hpehˇ laˇ-oˆ. Ngaˬ hui lawˬ ve hkʼe a ciˉ te la-oˆ. Nawˬ Gʼuiˬsha hpeh‸ ve hta‸ chaw hkʼa peu-eˬ gʼa shiˍ tuˬ, ngaˬ hui lawˬ ve hkʼe a ciˉ te laˇ-oˆ. Awˬ lawn kʼo, venˇ chi lehˬ nawˬ ve venˇ hpeh‸ leh, chaw chi teˇ hpaˍ htawˇ nawˬ ve chaw hpeh‸ ve yoˬ, teh‸ Daˍyeˍlaˆ kʼoˆ ve yoˬ.

20Ngaˬ lehˬ, ngaˬ ve venˇbaˆ maˇ kʼoˆ, ngaˬ ve chaw teˇ hpaˍ ve venˇbaˆ maˇ kʼoˆ, Gʼuiˬsha hta‸ hpeu‸ maˍ piˇ leh bon gʼaˇ hte‸ lawˬ ve yoˬ. Yawˇ ve da‸ kehˬ ve bon yehˬ hta‸ htawˇ kʼaw‸ gu te laˇ tuˬ, ngaˬ Gʼuiˬsha hta‸ lawˬ hkawˉ chehˇ ve yoˬ.

21Ngaˬ bon lawˬ chehˇ ve teˇ yanˇ, ponˬ laˬ htaˇ awˬ ha hkʼaw ngaˬ gʼa mawˬ jaw ve Gaˍbeˍlaˆ ngaˬ geh lo poˬ ya‸ la chehˇ ve hta‸ gʼa mawˬ ve yoˬ. Awˬ yanˇ oˇ ve lehˬ, mvuhˇ hpeu‸ hpawˇ Gʼuiˬsha hta‸ tuˉ tanˇ piˇ ve aw yanˇ hpeh‸ ve yoˬ.

22Yawˇ ya‸ la leh, ngaˬ hta‸ chi hkʼe kʼoˆ maˍ laˇ ve yoˬ. Daˍyeˍlaˆ-oˬ, Gʼuiˬsha ve tawˇ nawˬ hta‸ kʼoˆ maˍ laˇ tuˬ ngaˬ choˬ kaˬ lo laˬ taˍ ve yoˬ.

23Nawˬ lawˬ hkawˉ chehˇ ve awˬ hkawˇ hta‸ Gʼuiˬsha gʼa kaˇ peuˬ. Yawˇ nawˬ hta‸ ha‸ jaˇ ve yoˬ. Hkʼe te leh, ngaˬ nawˬ hta‸ tawˇ ca yaw piˇ la ve yoˬ. Nawˬ awˬ ha hkʼaw gʼa mawˬ ve zuh‸ maˆ oˇ ve tcuhˉ kuiˬ, ngaˬ nawˬ hta‸ kʼoˆ maˍ laˇ shaˍ. Hkʼa deh‸ na taˍ-o‸.

24Suhˍ chi hkʼaw‸ suhˍ chi pawˆ ve awˬ yanˇ oˇ ve lehˬ, nawˬ ve chaw leh nawˬ ve da‸ kehˬ ve venˇ oˇ ve hta‸ venˇbaˆ hkʼaw ponˬ piˇ tuˬ, Gʼuiˬsha teh taˍ ve awˬ yanˇ hpeh‸ve yoˬ. Nawˬ gʼa mawˬ ve zuh‸ maˆ oˇ ve biˇ la leh, da‸ kehˬ ve bon yehˬ hta‸ kʼaw‸ gu te piˇ tuˬ, venˇbaˆ hkʼa peu-eˬ ve hta‸ hpehˇ hkʼa piˇ leh, co co taiˍ taiˍ hteˇ ve cawˇ ve awˬ ceu‸ kʼaw‸ cawˬ la tuˬ yoˬ.

25Chi ve hta‸ hkʼa deh‸ tawnˇ taˍ-o‸. Yeˍruˆsaˍlehnˍ venˇ hta‸ kʼaw‸ gu te tuˬ tawˇ piˇ ve awˬ yanˇ hta‸ te leh, Gʼuiˬsha leuˆ yuˬ taˍ ve awˬ hoˉ awˬ naˬ teˇ gʼaˇ tawˆ la htaˇ hkʼa gaˬ, suhˍ yanˇ suhˍ hkʼaw‸ ve awˬ yanˇ chi ponˬ kʼai tuˬ yoˬ. Yeˍruˆsaˍlehnˍ venˇ hta‸ kʼaw‸ gu te piˇ leh, ya‸ kʼaw teˇ hpaˍ leh lanˇ venˇ teˇ hpaˍ kʼaw‸ da‸ la tuˬ yoˬ. Venˇ oˇ ve hkaw‸ chi nyiˇ hkʼaw‸ suhˍ pawˆ hkʼa gaˬ yeˬ chehˇ tuˬ yoˬ. Ya‸ hkʼaˇ, awˬ yanˇ oˇ ve lehˬ dawˇ haˍ ve awˬ yanˇ hpeh‸ tuˬ yoˬ.

26Awˬ yanˇ oˇ ve hkʼaw, Gʼuiˬsha leuˆ yuˬ taˍ ve awˬ hoˉ awˬ naˬ oˇ ve lehˬ, maˇ hteˇ maˇ cawˇ ve hkʼaw shu tiˇ pehˍ ve hta‸ gʼa hkanˍ tuˬ yoˬ. Venˇ oˇ ve leh bon yehˬ lonˉ lehˬ, awˬ gʼaˇ uiˍ ve jawˇmawˇ teˇ gʼaˇ te luˬ te sheˆ ve hta‸ gʼa hkanˍ tuˬ yoˬ. Gʼuiˬsha lehˬ, yawˇ gu taˍ ve luˬ ve sheˆ ve awˬ ceuˬ hta‸, iˉ kaˆ uiˍ taˆ la ve hkʼe awˬ yanˇ oˇ ve hkʼaw gaˬ la piˇ tuˬ yoˬ.

27Awˬ hoˉ awˬ naˬ oˇ ve lehˬ, suhˍ hkʼaw‸ hkʼa biˇ chaw yaˇ teˇ hpaˍ hta‸ ka ti‸ te da‸ tuˬ yoˬ. Awˬ yanˇ oˇ ve teˇ hkoˇ peuˬ kʼai ve teˇ yanˇ, tuˉ tanˇ tuˬ awˬ ceuˬ hkʼa peu-eˬ hta‸ Yawˇ yuˬ laˬ tuˬ yoˬ. Oˇ ve hkʼaw‸ nawˉ, haiˬ ve chaw teˇ gʼaˇ bon yehˬ lonˉ oˇ ve awˬ hkʼoˆ lo cha‸ chiˆ ve awˬ ceuˬ teh taˍ tuˬ yoˬ. Ya‸ hkʼaˇ, Gʼuiˬsha lehˬ awˬ leh meuˇ teˇ nyi gaˬ kʼo, haiˬ ve chaw oˇ ve hta‸ te luˬ te sheˆ piˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

← Chapter 8 Jump to: Chapter 10 →