Daniel 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Jawˇmawˇ Beˍlaˍshaˍzaˍ Baˍbuˍlonˍ mvuhˇmiˬ hta‸ tanˬ uˉ peunˍ ve teˇ hkʼaw‸ htaˇ, ngaˬ awˬ ha hkʼaw zuh‸ maˆ teˇ maˬ gʼa mawˬ ve yoˬ. Hkʼe te leh, ngaˬ hkʼa deh‸ bvuh‸ keu taˍ ve yoˬ.

2Ngaˬ gʼa mawˬve zuh‸ maˆ oˇ ve chi hkʼe yoˬ. Laˇ tsuhˇ gʼuiˬ hkʼoˆ lo mvuhˇ haw lonˉ meuˆ chehˇ ve yoˬ.

3Oˇ htaˇ, uiˍ jaˇ ve to nuˇ to shaˆ awˇ hkeh laˇ tsuhˇ gʼuiˬ hkʼaw tawˆ la ve yoˬ. To nuˇ to shaˆ oˇ ve teˇ hpaˍ, teˇ hkeh leh teˇ hkeh maˇ shuˍ da‸.

4Awˉ lawˉ peuˇ ve teˇ hkeh lehˬ, laˇ caˬ shiˉ hta‸ shuˍ ve yoˬ. Ya‸ hkʼaˇ, aˉ ceˬ hkʼa shuˍ toˍ la‸ kʼuˉ naw‸ ve yoˬ. Ngaˬ nyi chehˇ ve teˇ yanˇ, toˍ la‸ kʼuˉ oˇ ve teˇ hpaˍ cheˆ ce sheˍ ve yoˬ. To nuˇ to shaˆ oˇ ve tu la leh, chaw hkʼa shuˍ huˉ chehˇ ve yoˬ. Hkʼe te leh, yawˇ chaw yaˇ ve nyi ma cawˬ la ve yoˬ.

5To nuˇ to shaˆ nyiˇ hkeh teˇ hkeh lehˬ, yehˬ miˉ tawˍ hta‸ shuˍ leh tu huˉ chehˇ taˍ ve yoˬ. Yawˇ ve maw‸ kʼaw hkʼaw nyi kuˇ shehˆ maˬ geu‸ chiˇ taˍ ve yoˬ. Oˇ htaˇ, awˬ hkawˇ teˇ hkawˇ bvuhˬ tawˆ la leh, Nawˬ caˇ gʼa ve hkʼe caˇ-oˆ, teh‸ yawˇ hta‸ kʼoˆ piˇ ve yoˬ.

6Ngaˬ nyi chehˇ ve teˇ yanˇ, awˬ nu ve to nuˇ to shaˆ teˇ hkeh kʼaw‸ tawˆ la ve yoˬ. To nuˇ to shaˆ oˇ ve lehˬ, laˇ ku-i hta‸ shuˍ ve yoˬ. Ya‸ hkʼaˇ, yawˇ ve caw‸ hkʼoˆ lo, ngaˆ ve toˍ la‸ kʼuˉ hta‸ shuˍ ve toˍ la‸ kʼuˉ awˇ maˬ cawˬ leh, oˉ kʼoˍ 4 shiˍ cawˬ ve yoˬ. Uˉ peunˍ tuˬ kanˇ paˆ gʼa taˍ ve hta‸ shuˍ ve yoˬ.

7Ngaˬ kʼaw‸ nyi chehˇ ve teˇ yanˇ, to nuˇ to shaˆ awˇ hkeh teˇ hkeh kʼaw‸ tawˆ la ve yoˬ. Kanˇ paˆ cawˬ leh kawˆ law‸ law‸ ve to nuˇ to shaˆ hpeh‸ ve yoˬ. Yawˇ lehˬ uiˍ jaˇ ve sho ciˬ teˇ hpaˍ cawˬ leh, to nuˇ to shaˆ teˇ hpaˍ hta‸ che‸ caˇ peuˬ hkʼaw‸ nawˉ, naˆ nehˆ piˇ taˉ ve yoˬ. Yawˇ lehˬ awˬ hkaw teˇ chi maˬ cawˬ ve yoˬ.

8Awˬ hkaw oˇ ve teˇ hpaˍ hta‸ ngaˬ nyi chehˇ ve teˇ yanˇ, awˬ hkaw oˇ ve teˇ hpaˍ awˬ kaˍ lo, awˬ hkaw ehˉ teˇ maˬ kʼaw‸ tawˆ la ve yoˬ. Awˬ hkaw ehˉ oˇ ve lehˬ, aw nu ve awˬ hkaw shehˆ maˬ hta‸ te hteh piˇ ve yoˬ. Yawˇ lehˬ chaw yaˇ ve mehˆ shiˍ cawˬ leh, tawˇ uiˍ tawˇ mvuh yaw chehˇ ve yoˬ.

9Ngaˬ nyi chehˇ ve teˇ yanˇ, kʼaw jaw teˇ hpaˍ hta‸ gʼa kʼaw‸ mawˬ ve yoˬ. Kʼaw jaw teˇ maˬ awˬ hkʼoˆ lo, co co taiˍ taiˍ te‸ chehˇ ve awˬ shehˍ hpaˇ teˇ gʼaˇ mui chehˇ ve yoˬ. Yawˇ ve veu‸ kʼaˇ lehˬ vaˇ meu-e hkʼe hpu leh, yawˇ ve uˉ hkeh mvuh lehˬ yawˬ mvuh hkʼe hpeh‸ ve yoˬ. Kaw jaw oˇ ve lehˬ, aˬ miˍ ha yuˬ te taˍ ve gaˉ yaw hkʼoˆ lo teh taˍ leh, aˬ miˍ ha hkʼa biˇ tawˆ la chehˇ ve yoˬ.

10Kʼaw jaw oˇ ve awˬ hkʼaw lo iˉ kaˆ lawˬ hkʼa shuˍ aˬ miˍ ha teˇ dawˇ lonˉ tawˆ la chehˇ ve yoˬ. Suhˉ jehˬ tuˬ ve awˬ yanˇ gaˬ la peuˬ leh, li‸ daw teˇ hpaˍ hta‸ ka‸ hpeu‸ teh taˍ ve yoˬ.

11Ngaˬ nyi chehˇ ve teˇ yanˇ, awˬ hkaw ehˉ oˇ ve tawˇ uiˍ tawˇ mvuh yaw chehˇ ve awˬ hkawˇ hta‸ ka‸, ngaˬ gʼa kaˇ chehˇ ve yoˬ. Oˇ htaˇ, to nuˇ to shaˆ awˇ hkeh teˇ hkeh lehˬ, tiˇ pehˍ ve hta‸ gʼa hkanˍ leh yawˇ ve awˬ to hta‸ aˬ miˍ hkʼaw lo baˬ keu piˇ ve yoˬ.

12Awˬ nu ve to nuˇ to shaˆ teˇ hpaˍ geh cawˬ taˍ ve kanˇ paˆ hta‸ htawˇ kʼaw‸ yuˬ hkʼaw‸ ve yoˬ. Ya‸ hkʼaˇ, yawˇ hui hta‸ teˇ hkui teˇ yanˇ te‸ chehˇ tuˬ a hkaw-anˬ piˇ ve yoˬ.

13Oˇ ve hkʼaw‸ nawˉ, chaw yaˇ hta‸ shuˍ ve chaw teˇ gʼaˇ hta‸ ngaˬ gʼa mawˬ ve yoˬ. Yawˇ hta‸ moˬ hkʼa caw zuhˇ hoˆ beh taˍ ve yoˬ. Yawˇ lehˬ co co taiˍ taiˍ te‸ chehˇ ve aw shehˍ hpaˇ geh kʼai leh, yawˇ ve awˬ to hta‸ chiˇ a‸ piˇ ve yoˬ.

14Miˬguiˬ chaw yaˇ hkʼa peu-eˬ yawˇ ve awˬ ceˬ te tuˬ, yawˇ hta‸ awˬ me‸ awˬ hponˇ leh kanˇ paˆ chiˇ a‸ piˇ ve yoˬ. Yawˇ ve kanˇ paˆ leh yawˇ ve mvuhˇmiˬ co co taiˍ taiˍ yeˬ chehˇ tuˬ ve yoˬ.

15Ngaˬ lehˬ awˬ ha hkʼaw awˬ ceuˬ oˇ ve teˇ hpaˍ hta‸ gʼa mawˬ peuˬ hkʼaw‸ nawˉ, kawˆ jaˇ leh nyi ma sho‸ sha‸ jaˇ ve yoˬ.

16Hkʼe te leh, oˇ kaˬ lo huˉ chehˇ ve chaw teˇ gʼaˇ geh kʼai leh, ngaˬ hta‸ tcuhˉ kuiˬ a ciˉ kʼoˆ maˍ laˇ tuˬ, yawˇ hta‸ ca kʼoˆ piˇ ve yoˬ. Hkʼe te leh yawˇ ngaˬ hta‸ kʼoˆ maˍ laˇ ve yoˬ.

17Yawˇ kʼoˆ ve, Uiˍ jaˇ ve to nuˇ to shaˆ chi ve awˇ hkeh lehˬ, awˬ hkʼaw‸ nawˉ cawˬ la tuˬ ve mvuhˇmiˬ lonˉ awˇ peˆ hpeh‸ ve yoˬ.

18Ya‸ hkʼaˇ, awˬ leh meuˇ teˇ nyi gaˬ kʼo, Gʼuiˬsha ve chaw teˇ hpaˍ gʼaˇ shehˍ hpaˇ hpeh‸ leh co co taiˍ taiˍ gʼa uˉ peunˍ tuˬ yoˬ, teh‸ ngaˬ hta‸ kʼoˆ laˇ ve yoˬ.

19Oˇ htaˇ, ngaˬ lehˬ awˬ nu ve to nuˇ to shaˆ hta‸ peun da‸ jaˇ ve to nuˇ to shaˆ awˇ hkeh teˇ hkeh awˬ lawn hta‸ shiˍ gaˇ jaˇ ve yoˬ. To nuˇ to shaˆ oˇ ve lehˬ, kuiˇ hkui shiˍ kʼuˉ, sho ciˬ cawˬ leh, chaw yaˇ teˇ hpaˍ hta‸ che‸ caˇ peuˬ hkʼaw‸ nawˉ, naˆ nehˆ piˇ ve yoˬ.

20Chi hkʼoˆ ka‸, awˬ hkaw teˇ chi maˬ awˬ lawn maˇ kʼoˆ, awˬ hkʼaw‸ nawˉ kʼaw‸ tawˆ la leh, awˬ hkaw shehˆ maˬ hta‸ te hteh piˇ ve awˬ hkaw ehˉ oˇ ve awˬ lawn hta‸ maˇ kʼoˆ, ngaˬ shiˍ gaˇ jaˇ ve yoˬ. Awˬ hkaw ehˉ oˇ ve mehˆ shiˍ, maw‸ kʼaw cawˬ leh, tawˇ uiˍ tawˇ mvuh yaw chehˇ ve yoˬ. To nuˇ to shaˆ oˇ ve lehˬ, awˬ nu ve to nuˇ to shaˆ teˇ hpaˍ a‸ kehˉ kawˆ tuˬ cawˬ ve yoˬ.

21Ngaˬ nyi chehˇ ve teˇ yanˇ awˬ hkaw ehˉ oˇ ve lehˬ, Gʼuiˬsha ve chaw teˇ hpaˍ hta‸ ma‸ bawˆ leh, gʼaˇ sheˬ ve yoˬ.

22Oˇ htaˇ, co co taiˍ taiˍ te‸ chehˇ ve awˬ shehˍ hpaˇ laˬ leh, Gʼuiˬsha ve chaw hui hpawˇ lo chehˇ leh suhˉ jehˬ piˇ ve yoˬ. Gʼuiˬsha ve chaw teˇ hpaˍ kanˇ paˆ gʼa tuˬ ve awˬ yanˇ gaˬ la peuˬ.

23Chaw oˇ ve ngaˬ hta‸ chi hkʼe kʼoˆ maˍ laˇ ve yoˬ. To nuˇ to shaˆ oˇ ve awˇ hkeh teˇ hkeh lehˬ, mvuhˇmiˬ awˇ peˆ teˇ peˆ hpeh‸ leh, awˬ nu ve mvuhˇmiˬ hta‸ peun da‸ jaˇ ve mvuhˇmiˬ lonˉ hpeh‸ ve yoˬ. Mvuhˇmiˬ oˇ ve lehˬ, miˬguiˬ hkʼa peu-eˬ hta‸ te lu te sheˆ leh, naˆ nehˆ piˇ ve yoˬ.

24Awˬ hkaw oˇ ve teˇ chi maˬ lehˬ jawˇmawˇ teˇ chi gʼaˇ hpeh‸ leh, mvuhˇmiˬ oˇ ve hta‸ uˉ peunˍ tuˬ yoˬ. Oˇ ve hkʼaw‸ nawˉ, jawˇmawˇ awˬ suhˉ teˇ gʼaˇ kʼaw‸ tawˆ la tuˬ yoˬ. Yawˇ lehˬ, awˬ nu ve jawˇmawˇ teˇ hpaˍ hta‸ peun da‸ jaˇ leh, jawˇmawˇ shehˆ gʼaˇ teˇ gʼaˇ hta‸ te luˬ piˇ tuˬ yoˬ.

25Yawˇ lehˬ, uiˍ jaˇ mvuh jaˇ ve Gʼuiˬsha hta‸ maˇ shawˍ maˇ caˆ kʼoˆ leh, Gʼuiˬsha ve chaw teˇ hpaˍ hta‸ fawˉ mehˍ piˇ tuˬ yoˬ. Yawˇ lehˬ, yawˇ hui ve oˉ kʼoˍ pui ve awˬ liˇ teˇ hpaˍ hta‸ kʼaw‸ pa piˇ leh, Gʼuiˬsha ve chaw teˇ hpaˍ yawˇ uˉ peunˍ ve awˬ hawˉ lo shehˆ hkʼaw‸ leh ha pa hkaw‸ maˬ gʼa chehˇ tuˬ yoˬ.

26Oˇ ve hkʼaw‸ nawˉ, Gʼuiˬsha yawˇ hta‸ suhˉjehˬ leh, te luˬ te sheˆ piˇ tuˬ yoˬ.

27Miˬguiˬ ve kanˇ paˆ leh awˬ me‸ awˬ hponˇ hkʼa peu-eˬ, uiˍ jaˇ mvuh jaˇ ve Gʼuiˬsha ve chaw teˇ hpaˍ hta‸ kʼaw‸ piˇ tuˬ yoˬ. Yawˇ hui ve kanˇ paˆ co co taiˍ taiˍ yeˬ chehˇ leh, miˬguiˬ jawˇmawˇ hkʼa peu-eˬ yawˇ hui ve awˬ ceˬ gʼa te tuˬ yoˬ.

28Chi ve lehˬ, ngaˬ gʼa mawˬ ve zuh‸ maˆ hpeh‸ ve yoˬ. Ngaˬ kawˆ jaˇ leh, chaw suh hkʼe hpeh‸ la ve yoˬ. Awˬ lawn chi ve chaw teˇ gʼaˇ hta‸ ka‸ ngaˬ maˇ hto piˇ.

← Chapter 6 Jump to: Chapter 8 →