bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
Daniel 5
Daniel 5
Lahu Bible Edited © Thailand Bible Society and Bible Society of Myanmar, 2010, 2020.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
1
Teˇ haˉ htaˇ, jawˇmawˇ Beˍlaˍshaˍzaˍ lehˬ, yawˇ ve mvuhˇmiˬ hkʼaw chehˇ ve chaw uiˍ chaw mvuh teˇ hinˉ gʼaˇ hta‸ kuˬ yuˬ leh, ha lehˬ ha kʼa hti caˇ hti dawˬ chehˇ ve yoˬ.
2
Yawˇ hui oˇ hkʼe te chehˇ htaˇ, Beˍlaˍshaˍzaˍ lehˬ yawˇ ve awˬ viˉ paˍ Neˍbuˍhkaˍneˍzaˍ Yeˍruˆsaˍlehnˍ bon yehˬ lonˉ hkʼaw yuˬ veu laˇ ve hpu kawˆ shi kawˆ teˇ hpaˍ yuˬ veu laˇ tuˬ tawˇ piˇ ve yoˬ. Awˬ lawn kʼo, kawˆ oˇ ve teˇ hpaˍ hkʼaw a pehˉ meuˇ gʼuiˬ keu dawˬ gaˇ ve pa taw yoˬ.
3
Hkʼe te leh, kawˆ oˇ ve teˇ hpaˍ hta‸ oˇ kaˬ lo yuˬ veu laˇ ve yoˬ. Yawˇ hui lehˬ, kawˆ oˇ ve teˇ hpaˍ hkʼaw a pehˉ meuˇ gʼuiˬ keu dawˬ leh,
4
hpu, shi, kuiˇ, sho, suhˆ leh haˉ pui shiˍ yuˬ te taˍ ve gʼuiˬsha teˇ hpaˍ hta‸ chiˇ mvuh chehˇ ve yoˬ.
5
Oˇ htaˇ la‸ sheh teˇ paˉ tawˆ la leh, awˬ gʼeuˆ hkʼa deh‸ ba da‸ jaˇ ve gʼo‸ pa hkʼoˆ lo li‸ bvuh‸ sheˬ ve yoˬ. Jawˇmawˇ lehˬ, li‸ bvuh‸ chehˇ ve la‸ sheh oˇ ve hta‸ gʼa mawˬ ve yoˬ.
6
Teˇ cawˬ haˉ yawˇ lehˬ chaw suh hkʼe hpeh‸ la ve yoˬ. Yawˇ kawˆ jaˇ ve pa taw, cheˇ cheˇ veˆ veˆ hpeh‸ chehˇ ve yoˬ.
7
Hkʼe te leh, yawˇ lehˬ cuˇ yiˍ cawˬ paˍ leh mawˉ paˍ teˇ hpaˍ hta‸ ca kuˬ tcuh ve yoˬ. Yawˇ hui gaˬ la ve teˇ yanˇ, jawˇmawˇ yawˇ hui hta‸ chi hkʼe kʼoˆ piˇ ve yoˬ. Li‸ oˇ ve hta‸ gʼaw gʼa leh, ngaˬ hta‸ tcuhˉ kuiˬ yuˬ tawˆ laˇ gʼa ve chaw hta‸, da‸ jaˇ ve veu‸ kʼaˇ feuˉ piˇ leh, yawˇ ve kʼawˍ peˍ hta‸ shi caˆ teˇ maˬ pfuhˍ piˇ tuˬ yoˬ. Chi awˬ hkʼoˆ, ngaˬ yawˇ hta‸ mvuhˇmiˬ hkʼaw lo uiˍ jaˇ ve chaw shehˆ gʼaˇ teˇ gʼaˇ te tcuh tuˬ yoˬ, teh‸ yawˇ hui hta‸ kʼoˆ piˇ ve yoˬ.
8
Cuˇ yiˍ cawˬ paˍ oˇ ve teˇ hpaˍ gʼuˇ suhˍ lo jiˆ laˬ ve yoˬ. Ya‸ hkʼaˇ, yawˇ hui teˇ gʼaˇ ka‸ li‸ oˇ ve hta‸ gʼaw maˇ gʼa.
9
Hkʼe te leh, jawˇmawˇ shaˬ te shaˬ kawˆ jaˇ la ve yoˬ. Yawˇ ve a ma‸ lonˉ te hpaˍ htawˇ, jawˇmawˇ hta‸ hkʼaˬ hkʼe gʼa te piˇ tuˬ ca dawˇ maˇ tawˆ ve yoˬ.
10
Oˇ htaˇ, jawˇmawˇ ve awˬ e lehˬ, bawehˇ lonˉ hkʼaw duiˆ-ehˍ shaˇ-ehˍ hpeh‸ chehˇ ve awˬ hkawˇ hta‸ gʼa kaˇ leh, ca lo‸ nyi ve yoˬ. Hkʼe te leh yawˇ kʼoˆ ve, Jawˇmawˇ nawˬ co zuhˬ ha zuhˬ cawˬ piˇ-oˆ. Chi taw taw taˇ kawˆ.
11
Nawˬ ve mvuhˇmiˬ hkʼaw Gʼuiˬsha ve Awˬ ha hpu chehˇ ve chaw teˇ gʼaˇ cawˬ ve yoˬ. Nawˬ pa jawˇmawˇ lonˉ te chehˇ htaˇ, anˇ law‸ law‸ ve cuˇ yiˍ hpeu‸ maˍ laˇ gʼa ve yoˬ. Hkʼe te leh, nawˬ pa yawˇ hta‸ mawˉ paˍ hkʼa peu-eˬ awˬ hkʼoˆ awˬ hoˉ lonˉ te tcuh taˍ ve yoˬ.
12
Yawˇ lehˬ cuˇ yiˍ uiˍ jaˇ leh, zuh‸ maˆ ve tcuhˉ kuiˬ ka‸ yuˬ tawˆ puiˉ ve yoˬ. Chi hta‸ pa taw, Daˍyeˍlaˆ teh‸ kʼoˆ ve chaw oˇ ve hta‸ ca kuˬ tcuh-o. Nawˬ pa yawˇ hta‸ Beˍlaˍtaˍshaˍzaˍ teh‸ awˬ meh awˬsuhˉ kʼaw‸ meh piˇ taˍ ve yoˬ. Li‸ mehˆ oˇ ve tcuhˉ kuiˬ yawˇ nawˬ hta‸ hto maˍ laˇ gʼa tuˬ yoˬ, teh‸ jawˇmawˇ hta‸ kʼoˆ piˇ ve yoˬ.
13
Hkʼe te leh, jawˇmawˇ Daˍyeˍlaˆ hta‸ haˆ haˆ ca kuˬ tcuh ve yoˬ. Yawˇ gaˬ la ve teˇ yanˇ, jawˇmawˇ yawˇ hta‸ chi hkʼe kʼoˆ piˇ ve yoˬ. Nawˬ lehˬ, ngaˬ pa Yuˇ da‸ mvuhˇmiˬ hkʼaw shiˍ veu laˇ taˍ ve Yuˇda‸ chaw Daˍyeˍlaˆ yoˬ laˇ.
14
Gʼuiˬsha ve Awˬ ha hpu nawˬ geh chehˇ leh, nawˬ lehˬ cuˇ yiˍ uiˍ jaˇ ve chaw hpeh‸ ve awˬ hkawˇ hta‸ ngaˬ gʼa kaˇ ve yoˬ.
15
Ngaˬ lehˬ cuˇ yiˍ cawˬ paˍ leh mawˉ paˍ teˇ hpaˍ hta‸ kuˬ yuˬ leh, liˆ mehˆ oˇ ve hta‸ gʼaw tcuh ve htawˇ, yawˇ hui teˇ gʼaˇ ka‸ gʼaw maˇ gʼa.
16
Nawˬ lehˬ, tcuhˉ kuiˬ naˉ ve tawˇ teˇ hpaˍ hta‸ tcuhˉ kuiˬ yuˬ tawˆ maˍ laˇ gʼa ve kʼo, ngaˬ nawˬ hta‸ da‸ jaˇ ve veu‸ kʼaˇ feuˉ laˇ leh, nawˬ ve kʼawˍ peˍ hta‸ shi caˆ pfuhˍ laˇ tuˬ yoˬ. Chi hkʼoˆ ka‸, ngaˬ ve mvuhˇmiˬ hkʼaw lo shu a‸ kehˉ uiˍ jaˇ ve chaw shehˆ gʼaˇ teˇ gʼaˇ te tcuh laˇ tuˬ yoˬ, teh‸ Daˍyeˍlaˆ hta‸ kʼoˆ piˇ ve yoˬ.
17
Oˇ htaˇ, Daˍyeˍlaˆ kʼaw‸ yaw hkʼaw‸ leh kʼoˆ piˇ ve, Nawˬ ve la‸ shawnˍ teˇ hpaˍ hta‸ nawˬ hkʼa deh‸ ha‸ shaˉ taˍ-o‸. Maˇ heˆ kʼo, awˬ nu ve chaw teˇ gʼaˇ gʼaˇ hta‸ piˇ-oˆ. Oˇ kaˬ lo bvuh‸ taˍ ve li‸ mehˆ ngaˬ nawˬ hta‸ gʼaw maˍ laˇ leh, tcuhˉ kuiˬ yuˬ tawˆ laˇ tuˬ yoˬ.
18
Kanˇ paˆ uiˍ jaˇ ve Gʼuiˬsha lehˬ nawˬ pa Neˍbuˍhkaˍneˍzaˍ hta‸ jawˇmawˇ lonˉ hpeh‸ la piˇ leh, awˬ me‸ awˬ hponˇ maˇ maˇ cawˬ la piˇ taˍ ve yoˬ.
19
Yawˇ lehˬ chi hkʼe ve jawˇmawˇ lonˉ teˇ gʼaˇ hpeh‸ ve pa taw, awˬ nu ve chaw ceuˬ teˇ hpaˍ yawˇ hta‸ kawˆ jehˇ chehˇ ve yoˬ. Chaw teˇ gʼaˇ gʼaˇ hta‸ yawˇ tiˇ pehˍ gaˇ ve kʼo tiˇ pehˍ piˇ ve yoˬ. Chaw teˇ gʼaˇ gʼaˇ hta‸ yawˇ te‸ chehˇ piˇ lawˬ gaˇ ve kʼo, te‸ chehˇ piˇ lawˬ ve yoˬ. Yawˇ taˍ uiˍ piˇ gaˇ ve chaw hta‸ yawˇ taˍ uiˍ piˇ leh, yawˇ te luˬ piˇ gaˇ ve chaw hta‸ te luˬ piˇ ve yoˬ.
20
Ya‸ hkʼaˇ, yawˇ nyi ma uiˍ leh caˆ muiˬ puiˉ jaˇ ve pa taw, yawˇ lehˬ hawˉ yehˬ hkʼaw gʼa‸ kʼoˬ piˇ ve hta‸ gʼa hkanˍ leh, awˬ me‸ awˬ hponˇ luˬ kʼai ve yoˬ.
21
Hkʼe te leh, yawˇ lehˬ to nuˇ to shaˆ ve nyi ma cawˬ la leh, nuˇ hkʼa shuˍ mvuh‸ hta‸ caˇ ve yoˬ. Yawˇ heh puiˉ hkʼaw lo chehˇ taˍ leh, ciˬ gʼuiˬ yawˇ awˬ hkʼoˆ ce la ve yoˬ. Awˬ leh meuˇ gaˬ htaˇ, Gʼuiˬsha lehˬ mvuhˇmiˬ hkʼa peu-eˬ ve hta‸ uˉ peunˍ tuˬ kanˇ paˆ cawˬ ve hta‸ maˇ kʼoˆ, mvuhˇmiˬ oˇ ve teˇ hpaˍ yawˇ piˇ gaˇ ve chaw hta‸ yawˇ piˇ gʼa ve hta‸ maˇ kʼoˆ, yawˇ shiˍ la ve yoˬ.
22
Ya‸ hkʼaˇ, nawˬ lehˬ awˬ lawn chi teˇ hpaˍ hta‸ shiˍ taˍ ve htawˇ, nyi ma nuˇ nehˬ ve maˇ cawˬ.
23
Mvuhˇ naw ma Gʼuiˬsha hta‸ nawˬ maˇ yawˆ maˇ yan te leh, bon yehˬ hkʼaw lo yuˬ veu laˇ taˍ ve kawˆ oˇ ve teˇ hpaˍ hkʼaw a pehˉ meuˇ gʼuiˬ keu dawˬ leh maˇ mawˬ puiˉ, maˇ kaˇ puiˉ, leh te‸ chiˉ maˇ shiˍ puiˉ ve, hpu, shi, kuiˇ, suhˆ, leh haˉ pui yuˬ te taˍ ve shaˉ ho‸ teˇ hpaˍ hta‸ chiˇ mvuh piˇ chehˇ ve yoˬ. Ya‸ hkʼaˇ, nawˬ hta‸ te‸ chehˇ piˇ lawˬ tuˬ maˇ kʼoˆ, suh piˇ lawˬ tuˬ maˇ kʼoˆ te laˇ gʼa ve Gʼuiˬsha hta‸ nawˬ maˇ taˍ uiˍ.
24
Hkʼe te leh, Gʼuiˬsha lehˬ la‸ sheh oˇ ve hta‸ peu laˇ leh, li‸ mehˆ oˇ ve teˇ hpaˍ hta‸ bvuh‸ tcuh taˍ ve yoˬ.
25
Li‸ oˇ ve chi hkʼe kʼoˆ ve yoˬ. Meˍneˍ, meˍneˍ, teˍkeˍlaˆ uˆpaˍsenˍ, teh‸ bvuh‸ taˍ ve yoˬ.
26
Meˍneˍ kʼoˆ ve tcuhˉ kuiˬ lehˬ, Gʼaw nyi taˍ peuˬ, teh‸ kʼoˆ gaˇ ve yoˬ. Gʼuiˬsha lehˬ nawˬ jawˇmawˇ te chehˇ ve awˬ nyi teˇ hpaˍ hta‸ gʼaw nyi taˍ peuˬ leh, awˬ leh meuˇ gaˬ la peuˬ.
27
Teˍkeˍlaˆ teh‸ kʼoˆ ve tcuhˉ kuiˬ lehˬ, Tsuh nyi taˍ peuˬ, teh‸ kʼoˆ gaˇ ve yoˬ. Gʼuiˬsha nawˬ hta‸ tsuh tu hkʼaw keu tsuh nyi leh, lawˬ jaˇ ve hta‸Yawˇ gʼa mawˬ ve yoˬ.
28
Uˆpaˍsenˍ teh‸ kʼoˆ ve lehˬ, Pehˬ da‸ piˇ ve, teh‸ kʼoˆ gaˇ ve yoˬ. Gʼuiˬsha lehˬ nawˬ ve mvuhˇ miˬ hta‸ pehˬ leh, Meˍdiˆ chaw leh Paˇshaˇ chaw hui hta‸ piˇ taˍ peuˬ ve yoˬ, teh‸ jawˇmawˇ hta‸ kʼoˆ piˇ ve yoˬ.
29
Oˇ htaˇ, jawˇmawˇ Beˍlaˍshaˍzaˍ lehˬ, Daˍyeˍlaˆ hta‸ da‸ jaˇ ve veuˬ kʼaˇ feuˉ piˇ leh, yawˇ ve kʼawˍ peˍ hta‸ shi caˆ pfuhˍ piˇ tuˬ, yawˇ ve awˬ ceˬ teˇ hpaˍ hta‸ tawˇ piˇ ve yoˬ. Hkʼe te peuˬ hkʼaw‸ nawˉ, yawˇ hta‸ mvuhˇmiˬ hkʼaw lo shu a‸ kehˉ uiˍ jaˇ ve a ma‸ lonˉ shehˆ gʼaˇ teˇ gʼaˇ te tcuh ve yoˬ.
30
Oˇ ve teˇ haˉ, Baˍbuˍlonˍ jawˇmawˇ Beˍlaˍshaˍzaˍ lehˬ tiˇ pehˍ ve hta‸ gʼa hkanˍ ve yoˬ.
31
Hkʼe te leh, a sha‸ hkaw‸ chi nyiˇ hkʼaw‸ gaˬ peuˬ ve Meˍdiˆ chaw Daˍriˆ jawˇmawˇ kʼaw‸ te ve yoˬ.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
All chapters:
1
2
3
4
5
6
7
8
9
10
11
12