Hebrews 1

Lao Bible 2012 (ພຣະຄຳພີສັກສິ)

Jump to: Chapter 2 →

1ໃນອະດີດຕະການນັ້ນ ພຣະເຈົ້າຊົງກ່າວແກ່ບັນພະບຸລຸດຂອງພວກເຮົາຫລາຍເທື່ອດ້ວຍວິທີຕ່າງໆ ໂດຍທາງບັນດາຜູ້ທຳນວາຍ,

2ແຕ່ໃນຍຸກສຸດທ້າຍນີ້ ພຣະອົງໄດ້ຊົງກ່າວແກ່ເຮົາທັງຫລາຍທາງພຣະບຸດ ຜູ້ຊຶ່ງພຣະອົງໄດ້ຊົງຕັ້ງໃຫ້ເປັນຜູ້ຮັບສັບພະທຸກສິ່ງທັງປວງເປັນມໍຣະດົກ ແລະດ້ວຍພຣະບຸດນັ້ນພຣະອົງໄດ້ຊົງສ້າງໂລກທັງຫລາຍ.

3ພຣະບຸດນັ້ນ ເປັນແສງສະທ້ອນພຣະສະຫງ່າຣາສີຂອງພຣະເຈົ້າ ແລະມີສະພາບເປັນແບບພິມດຽວກັນກັບພຣະອົງ ແລະຊົງຄໍ້າຊູພິພົບໂລກໄວ້ດ້ວຍພຣະທຳອັນຊົງຣິດຂອງພຣະອົງ, ເມື່ອພຣະອົງຊົງຊຳລະບາບກຳແລ້ວ ກໍຊົງປະທັບຢູ່ເບື້ອງຂວາຂອງຜູ້ຊົງຣິດທານຸພາບໃນທີ່ສູງສຸດ.

4ອັນໜຶ່ງ, ພຣະເຈົ້າໄດ້ຊົງປະທານພຣະນາມອັນປະເສີດເລີດລໍ້າກວ່າເທວະດາໃຫ້ພຣະອົງຢ່າງໃດ ພຣະອົງກໍຊົງເກີດເປັນຜູ້ປະເສີດເລີດລໍ້າກວ່າເທວະດາຢ່າງນັ້ນ.

5ເພາະພຣະເຈົ້າບໍ່ເຄີຍກ່າວແກ່ເທວະດາຂອງພຣະອົງຕົນໃດວ່າ, “ທ່ານເປັນບຸດຂອງເຮົາ ວັນນີ້ເຮົາໃຫ້ກຳເນີດແກ່ທ່ານ.” ແລະກ່າວອີກວ່າ, “ເຮົາຈະເປັນບິດາຂອງທ່ານ ຝ່າຍທ່ານກໍຈະເປັນບຸດຂອງເຮົາ.”

6ແລະອີກຄັ້ງໜຶ່ງ ພຣະເຈົ້າໄດ້ສົ່ງພຣະບຸດກົກຂອງພຣະອົງເຂົ້າມາໃນໂລກນັ້ນ ພຣະອົງໄດ້ຊົງກ່າວວ່າ, “ໃຫ້ບັນດາເທວະດາຂອງພຣະເຈົ້າທຸກຕົນ ຕ້ອງນ້ອມນະມັດສະການ ຂາບໄຫວ້ພຣະອົງ.”

7ສ່ວນກ່ຽວກັບບັນດາເທວະດາເຫຼົ່ານັ້ນ ພຣະອົງຊົງກ່າວວ່າ, “ພຣະເຈົ້າບັນດານໃຫ້ ຝູງເທວະດາຂອງພຣະອົງເປັນລົມ ແລະໃຫ້ບັນດາຜູ້ຮັບໃຊ້ຂອງພຣະອົງ ເປັນແປວໄຟອັນຮ້ອນກ້າ.”

8ແຕ່ສ່ວນພຣະບຸດນັ້ນ ພຣະເຈົ້າຊົງກ່າວວ່າ, “ຂ້າແດ່ພຣະເຈົ້າ ຣາຊບັນລັງຂອງພຣະອົງນັ້ນ ກໍຕັ້ງໝັ້ນຄົງຕະຫລອດໄປ ພຣະອົງຈະຊົງປົກຄອງອານາຈັກ ຂອງພຣະອົງ ດ້ວຍຄວາມຍຸດຕິທຳ.

9ພຣະອົງຊົງຮັກຄວາມຊອບທຳ ແລະຊົງກຽດຊັງສິ່ງອະທຳ ເພາະສະນັ້ນ ພຣະເຈົ້າ, ພຣະເຈົ້າຂອງພຣະອົງ ໄດ້ຊົງຫົດສົງພຣະອົງໄວ້ ດ້ວຍນໍ້າມັນແຫ່ງຄວາມຊົມຊື່ນຍິນດີ ຫລາຍກວ່າເພື່ອນທັງຫຼາຍ ຂອງພຣະອົງ.”

10ພຣະອົງຊົງກ່າວອີກວ່າ, “ຂ້າແດ່ອົງພຣະຜູ້ເປັນເຈົ້າ ເມື່ອຕົ້ນເດີມນັ້ນ ພຣະອົງຊົງວາງຮາກແຜ່ນດິນໂລກໄວ້ ແລະສ້າງຟ້າສະຫວັນ ດ້ວຍສີພຣະຫັດຂອງພຣະອົງ.

11ສິ່ງເຫຼົ່ານັ້ນຈະດັບສູນໄປ ແຕ່ພຣະອົງຊົງດຳລົງຄົງຢູ່ ສິ່ງເຫຼົ່ານັ້ນຈະເກົ່າແກ່ໄປໝົດສິ້ນ ເໝືອນດັ່ງເຄື່ອງນຸ່ງຫົ່ມ.

12ພຣະອົງຈະມ້ວນສິ່ງເຫຼົ່ານັ້ນໄວ້ ເໝືອນດັ່ງມ້ວນເສື້ອໃຫຍ່ ມັນຈະຖືກປ່ຽນແປງດັ່ງເຄື່ອງນຸ່ງຫົ່ມ. ແຕ່ຝ່າຍພຣະອົງຊົງເປັນຢູ່ດັ່ງເດີມສະເໝີໄປ ແລະ ປີທັງຫລາຍຂອງພຣະອົງກໍບໍ່ສິ້ນສຸດຈັກເທື່ອ.”

13ນອກຈາກນັ້ນ ພຣະເຈົ້າບໍ່ເຄີຍກ່າວແກ່ເທວະດາຂອງພຣະອົງຕົນໃດວ່າ, “ຈົ່ງນັ່ງທີ່ເບື້ອງຂວາມືຂອງເຮົາ ຈົນກວ່າເຮົາປາບເຫຼົ່າສັດຕູຂອງທ່ານ ໃຫ້ຂາບລົງຢູ່ໃຕ້ພື້ນຕີນຂອງທ່ານ.”

14ຝູງເທວະດາທັງປວງນັ້ນ ແມ່ນວິນຍານຮັບໃຊ້ ທີ່ພຣະເຈົ້າຊົງໃຊ້ມາບົວລະບັດບັນດາຜູ້ທີ່ຈະໄດ້ຮັບຄວາມລອດພົ້ນເປັນມໍຣະດົກບໍ່ແມ່ນບໍ?

Jump to: Chapter 2 →