Hebrews 13

Lao Bible 2012 (ພຣະຄຳພີສັກສິ)

← Chapter 12 Jump to:

1ຈົ່ງໃຫ້ຄວາມຮັກຢ່າງພີ່ນ້ອງ ມີຢູ່ຕໍ່ກັນສະເໝີໄປ.

2ຢ່າລືມການຕ້ອນຮັບແຂກ ເພາະດ້ວຍການເຮັດເຊັ່ນນີ້ ມີບາງຄົນກໍໄດ້ຕ້ອນຮັບເທວະດາຢ່າງບໍ່ຮູ້ຕົວ.

3ຈົ່ງລະນຶກເຖິງບັນດາຜູ້ທີ່ຖືກລ່າມໂສ້ ເໝືອນກັບວ່າພວກເຈົ້າກໍຖືກລ່າມໂສ້ເໝືອນກັບພວກເຂົາດ້ວຍ. ຈົ່ງລະນຶກເຖິງບັນດາຜູ້ທີ່ຖືກຂົ່ມເຫັງ ເພາະວ່າພວກເຈົ້າກໍມີຮ່າງກາຍເໝືອນກັນ.

4ຈົ່ງໃຫ້ການແຕ່ງງານຂອງພວກເຈົ້າ ເປັນທີ່ຍົກຍ້ອງນັບຖືແກ່ທຸກຄົນ ແລະຈົ່ງໃຫ້ຄູ່ຜົວເມຍສັດຊື່ຕໍ່ກັນແລະກັນ. ພຣະເຈົ້າຈະຕັດສິນລົງໂທດຄົນເຮັດຜິດສິນທຳແລະຄົນຫລິ້ນຊູ້.

5ຈົ່ງໃຫ້ການດຳເນີນຊີວິດຂອງພວກເຈົ້າ ເວັ້ນຈາກການຮັກເງິນຮັກຄຳ. ຈົ່ງພໍໃຈໃນສິ່ງທີ່ຕົນມີຢູ່ ເພາະພຣະເຈົ້າເອງຊົງກ່າວວ່າ, “ເຮົາຈະບໍ່ປະເຈົ້າ ຫລືຖິ້ມເຈົ້າເສຍຈັກເທື່ອ.”

6ດ້ວຍເຫດນັ້ນ ຈົ່ງໃຫ້ພວກເຮົາມີໃຈກ້າ ແລະກ່າວວ່າ, “ອົງພຣະຜູ້ເປັນເຈົ້າ ເປັນພຣະຜູ້ຊ່ວຍຂອງຂ້າພະເຈົ້າ ແລະ ຂ້າພະເຈົ້າຈະບໍ່ຢ້ານກົວ. ມີຜູ້ໃດແດ່ຈະເຮັດຫຍັງ ໃຫ້ຂ້າພະເຈົ້າໄດ້.”

7ຈົ່ງລະນຶກເຖິງພວກຜູ້ນຳຂອງພວກເຈົ້າ ຄືຜູ້ທີ່ໄດ້ປະກາດພຣະທຳແກ່ພວກເຈົ້າ. ຈົ່ງພິຈາລະນາເບິ່ງຜົນສຸດທ້າຍແຫ່ງຊີວິດຂອງພວກເພິ່ນ ແລະຈົ່ງປະຕິບັດຕາມແບບຢ່າງຄວາມເຊື່ອຂອງພວກເພິ່ນ.

8ພຣະເຢຊູຄຣິດເຈົ້າຊົງເປັນຢູ່ສະເໝີກັນ ທັງໃນເວລາວານນີ້ ວັນນີ້ ແລະສືບໆໄປເປັນນິດ.

9ຢ່າຍອມໃຫ້ຄຳສອນປອມໃດໆ ນຳພາພວກເຈົ້າໃຫ້ຫລົງຜິດໄປ. ເປັນການດີແທ້ທີ່ຈິດໃຈຂອງພວກເຮົາໄດ້ຮັບການເຊີດຊູໃຫ້ເຂັ້ມແຂງດ້ວຍພຣະຄຸນຂອງພຣະເຈົ້າ. ບໍ່ແມ່ນດ້ວຍອາຫານການກິນ ຊຶ່ງບໍ່ເປັນປະໂຫຍດແກ່ຄົນທີ່ປະຕິບັດຕາມ.

10ພວກເຮົາມີແທ່ນບູຊາແທ່ນໜຶ່ງ ຊຶ່ງຄົນຜູ້ປະຕິບັດໃນຫໍເຕັນສັກສິດນັ້ນ ບໍ່ມີສິດທີ່ຈະຮັບປະທານຂອງຈາກແທ່ນນັ້ນໄດ້.

11ມະຫາປະໂຣຫິດໄດ້ນຳເລືອດສັດເຂົ້າໄປໃນສະຖານທີ່ສັກສິດທີ່ສຸດ ເພື່ອເປັນການຖວາຍບູຊາລຶບລ້າງບາບ, ແຕ່ໂຕສັດນັ້ນ ເພິ່ນໄດ້ນຳອອກໄປເຜົານອກຄ້າຍ.

12ເພາະສະນັ້ນ ພຣະເຢຊູເຈົ້າຈຶ່ງຕາຍທີ່ນອກປະຕູເມືອງເຊັ່ນກັນ ເພື່ອຊຳລະໄພ່ພົນຂອງພຣະເຈົ້າໃຫ້ບໍຣິສຸດ ດ້ວຍເລືອດຂອງພຣະອົງເອງ.

13ດ້ວຍເຫດນັ້ນ ຈົ່ງໃຫ້ພວກເຮົາອອກໄປຫາພຣະອົງທີ່ນອກຄ້າຍ ແລະຍອມທົນເອົາຄຳໝິ່ນປະໝາດທີ່ພຣະອົງໄດ້ຮັບ.

14ດ້ວຍວ່າ, ເທິງແຜ່ນດິນໂລກນີ້ ບໍ່ມີບ້ານເມືອງອັນຖາວອນສຳລັບພວກເຮົາ, ພວກເຮົາສະແຫວງຫານະຄອນທີ່ຈະມີມາໃນພາຍໜ້າ.

15ດ້ວຍເຫດນັ້ນ ຈົ່ງໃຫ້ພວກເຮົາຖວາຍຄຳຍ້ອງຍໍສັນລະເສີນຕະຫລອດໄປແກ່ພຣະເຈົ້າ ເປັນເຄື່ອງບູຊາໂດຍທາງພຣະອົງນັ້ນ ແລະຍົກຍໍພຣະນາມຂອງພຣະອົງ ດ້ວຍສົບປາກຂອງພວກເຮົາ.

16ຢ່າລືມທີ່ຈະເຮັດຄຸນງາມຄວາມດີ ແລະຊ່ວຍເຫລືອຊຶ່ງກັນແລະກັນ ເພາະເຄື່ອງບູຊາຢ່າງນີ້ແຫຼະ ເປັນທີ່ພໍພຣະໄທພຣະເຈົ້າ.

17ເຈົ້າທັງຫລາຍຈົ່ງຍອມຟັງແລະຍອມຢູ່ໃນໂອວາດຜູ້ນຳຂອງພວກເຈົ້າ ເພາະພວກເພິ່ນດູແລຮັກສາຈິດວິນຍານຂອງພວກເຈົ້າຢູ່ ເໝືອນຜູ້ໜຶ່ງທີ່ຈະຕ້ອງສະເໜີລາຍງານ ເພື່ອພວກເພິ່ນຈະໄດ້ເຮັດງານນີ້ດ້ວຍຄວາມຊື່ນໃຈ, ບໍ່ແມ່ນດ້ວຍຄວາມເສົ້າໃຈ ຊຶ່ງຈະບໍ່ເປັນປະໂຫຍດແກ່ເຈົ້າທັງຫລາຍ.

18ຈົ່ງພາວັນນາອະທິຖານເພື່ອພວກເຮົາ ເພາະເຮົາເຊື່ອແນ່ວ່າ ພວກເຮົາມີໃຈສຳນຶກຜິດແລະຊອບອັນດີຢູ່ແລ້ວ ແລະປາຖະໜາທີ່ຈະດຳເນີນຊີວິດຕາມຢ່າງດີໃນທຸກສິ່ງ.

19ເຮົາຂໍເລັ່ງລັດພວກເຈົ້າ ໃຫ້ພາວັນນາອະທິຖານຫລາຍຂຶ້ນຕາມຢ່າງນັ້ນ ເພື່ອພຣະເຈົ້າຈະສົ່ງເຮົາກັບຄືນໄປຢູ່ກັບພວກເຈົ້າໄວໆ.

20ຂໍພຣະເຈົ້າຜູ້ຊົງໂຜດສັນຕິສຸກ ຜູ້ໄດ້ຊົງນຳອົງພຣະເຢຊູເຈົ້າຂອງເຮົາທັງຫລາຍ ໃຫ້ຄືນມາຈາກຄວາມຕາຍ ຄືຜູ້ຊົງເປັນຜູ້ລ້ຽງແກະອົງຍິ່ງໃຫຍ່ ດ້ວຍພຣະໂລຫິດທີ່ກ່ຽວກັບພັນທະສັນຍາອັນຕັ້ງຢູ່ເປັນນິດນັ້ນ,

21ຈົ່ງຊົງກະທຳໃຫ້ເຈົ້າທັງຫລາຍເປັນຄົນຄົບຖ້ວນໃນການດີທຸກຢ່າງ ເພື່ອຈະໄດ້ປະຕິບັດຕາມພຣະໄທພຣະອົງ ແລະຊົງທຳງານພາຍໃນເຈົ້າທັງຫລາຍ ຕາມທີ່ຊອບໃນສາຍພຣະເນດຂອງພຣະອົງ ໂດຍທາງພຣະເຢຊູຄຣິດເຈົ້າ. ສະຫງ່າຣາສີຈົ່ງມີແດ່ພຣະຄຣິດສືບໆໄປເປັນນິດ ອາແມນ.

22ພີ່ນ້ອງທັງຫລາຍເອີຍ, ເຮົາຂໍຮ້ອງພວກເຈົ້າໃຫ້ອົດທົນຟັງຖ້ອຍຄຳທີ່ໜູນນໍ້າໃຈນີ້. ດ້ວຍວ່າ, ຈົດໝາຍທີ່ເຮົາໄດ້ຂຽນມາຫາພວກເຈົ້ານັ້ນກໍບໍ່ຍາວ.

23ເຮົາປາຖະໜາໃຫ້ພວກເຈົ້າຮູ້ວ່າ ຕີໂມທຽວ ນ້ອງຊາຍຂອງພວກເຮົາ ໄດ້ອອກຈາກຄຸກແລ້ວ, ຖ້າລາວມາຮອດທີ່ນີ້ໄວ ເມື່ອເຮົາໄປຢ້ຽມຢາມພວກເຈົ້າ ເຮົາກໍຈະເອົາລາວໄປນຳດ້ວຍ.

24ເຮົາຂໍຝາກຄວາມຄິດເຖິງ ມາຍັງບັນດາຜູ້ນຳຂອງພວກເຈົ້າ ແລະໄພ່ພົນຂອງພຣະເຈົ້າທຸກຄົນ. ບັນດາພີ່ນ້ອງທີ່ມາຈາກອີຕາລີ ກໍຝາກຄວາມຄິດເຖິງມາຫາພວກເຈົ້າດ້ວຍ.

25ຂໍໃຫ້ພຣະຄຸນ ຈົ່ງສະຖິດຢູ່ກັບພວກເຈົ້າທຸກຄົນເທີ້ນ ອາແມນ.

← Chapter 12 Jump to: