Jeremiah 42

Lao Bible (ฉบับอักษรลาว)

← Chapter 41 Jump to: Chapter 43 →

1ຈຸນ-ແປງ ເຍີຍ ຕສວັ໋ງ ແປງ-ເປຢີ໊ຍ ເຖສົາ ຄາເລອາ ເຍີຍ ຕອນ, ໂຢຮານັນ, ເຖສົາ ໂຮຊາຢາ ເຍີຍ ຕອນ, ອາຊາລິຢາ, ເຖສົາ ຈ໊ຽນ ຢຽດ ຕສູ໊ງ ແປະ ຝີງ ຢຽມ ໂຕສ໋ວ ໄຝ ເຈ໋ຍ ເຖົາ ໂຕສ໋ວ ໂຮລ ເຈ໋ຍ ເຍີຍ ມ່ຽນ, ເປັຍ ຕ້າຍ ຟັດ,

2ຢ່າ ກ໊ອງ ບົ໋ວ ໂຕ່ວ ຫວ່າ ມ່ຽນ, ເຢເລມີ, “ໂທ້ ໝວັງ ເຢຍ ບົວ ໂຈ້ວ ເຍີຍ ຫວ່າ, ຢ່າ ໂທ້ ເຖງ ເຢຍ ບົວ ເຕົ໋າ ເກົ໋າ ໂຈ້ວ ຕສ໊ຽວ, ເມີ່ຍ ເຍີຍ ທິນ-ຮູ່ງ, ເຊ ເຫວີ່ຍ ເຢຍ ບົວ ຢຽດ ຕສູ໊ງ ເຕສ່ງ ເອຈ່ຍ ເຍີຍ ມ່ຽນ. ຕສິ້ນ ດ່າງ ເຢຍ ບົວ ທສ້ຳ ມປ່າ ອີ້ ຕສັ່ນ ໂຕສະ ຮນັ້ງ ເມີ່ຍ ເຍີຍ ມຕສີງ ປວັດ ຈ໊ຽນ ເຍີຍ ນໍ.

3ໂທ້ ຕສ໊ຽວ, ເມີ່ຍ ເຍີຍ ທິນ-ຮູ່ງ, ປຸນ ເຢຍ ບົວ ຮິ້ວ ຕຸ໊ ເຢຍ ບົວ ຫອບ ຕສຸ ຢັ້ງ ເຍີຍ ເຈົ໊າ, ເຢຍ ບົວ ຢ່າ ອ໋ອຍ ຕສຸ ໂຕສ໋ວ ຫາຍ ຫຍູ່ງ.”

4ໂຕ່ວ ຫວ່າ ມ່ຽນ, ເຢເລມີ, ກ໊ອງ ບົ໋ວ ນິ່ນ ບົວ, “ເຢຍ ໝວັງ ໄຮ໌ ເມີ່ຍ ບົວ ໝີ່ ອ໊ະ. ຕສິ໋ວ ເມີ່ຍ ບົວ ໂຈ້ວ ເຍີຍ ຫວ່າ ເຢຍ ອ໋ອຍ ເຕົ໋າ ເກົ໋າ ໂທ້ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ. ຕສ໊ຽວ ຮນັ້ງ ຫາຍ ນໍ ເຕົາ, ເຢຍ ຕສູ໊ງ ບົ໋ວ ເມີ່ຍ ບົວ. ເຢຍ ໄມ້ ປີ໋ງ ຢຽດ ຫຍູ່ງ ເມີ່ຍ ບົວ.”

5ນິ່ນ ບົວ ກ໊ອງ ບົ໋ວ ເຢເລມີ, “ເຊ ກ໊ອງ ເຢຍ ບົວ ໄມ້ ເອີຍ ຕສ໊ຽວ, ເມີ່ຍ ເຍີຍ ທິນ-ຮູ່ງ, ພ້າຍ ເມີ່ຍ ເຍີຍ ຢຽດ ຕສູ໊ງ ຫວ່າ ໂຕສ໋ວ, ໂທ້ ຕສ໊ຽວ ໂຕສ໋ວ ຕສຽນ ເຍີຍ, ຕສຽບ ຕສົ໊ວະ ເຍີຍ ຕສອງ-ເຕສ໋ງ ຕສ່ຽວ ເຖສົາ ເຢຍ ບົວ ຕ໋ອຍ-ເຕກ.

6ໄມ້ ກຸ໊ນ ຫລົງ ໄຟ ທສ້ຽວ, ເຢຍ ບົວ ອ໋ອຍ ໝວັງ ຕສ໊ຽວ, ເຢຍ ບົວ ເຍີຍ ທິນ-ຮູ່ງ ເຍີຍ ຫວ່າ, ຕົ້ງ ເຢຍ ບົວ ເຫ່ວ ເມີ່ຍ ລໍ໌ ວົ້ວ ເຕົ້າ. ເຢຍ ບົວ ໝວັງ ຕສ໊ຽວ, ເຢຍ ບົວ ເຍີຍ ທິນ-ຮູ່ງ ເຍີຍ ຫວ່າ ເຢຍ ບົວ ຕສ່ຽວ ໄຮ່ ຕຸ໊ ຫລົງ.”

7ເຈ໋ຍ ລິ໌ວ ຕສຽບ ຮນອຍ, ເຢເລມີ ຕຸ໊ ຕສິ໊ບ ຕສ໊ຽວ ເຍີຍ ຫວ່າ.

8ນິ່ນ ຕສ່ຽວ ເຫ່ວ ຄາເລອາ ເຍີຍ ຕອນ, ໂຢຮານັນ, ເຖສົາ ຈຸນ-ແປງ ເຍີຍ ຕສວັ໋ງ ແປງ-ເປຢີ໊ຍ ເຖສົາ ຢຽດ ຕສູ໊ງ ແປະ ຝີງ ຢຽມ ໂຕສ໋ວ ໄຝ ເຈ໋ຍ ເຖົາ ໂຕສ໋ວ ໂຮລ ເຈ໋ຍ.

9ນິ່ນ ກ໊ອງ ບົ໋ວ ນິ່ນ ບົວ, “ ຕສ໊ຽວ, ອິສະລາເອນ ເຍີຍ ທິນ-ຮູ່ງ, ຕົ້ງ ເມີ່ຍ ບົວ ພ້າຍ ເຢຍ ມີ່ງ ລໍ໌ ເຫວີ່ຍ ຕໍ້ ເມີ່ຍ ບົວ ໂຈ້ວ ເຍີຍ ຫວ່າ, ຮນັ້ງ ນ້າຍ ກ໊ອງ,

10‘ເຊ ກ໊ອງ ເມີ່ຍ ບົວ ຢຽມ ຈ໊ຽນ ນ້າຍ ນອມ ເຕີ່ຍ-ປູງ, ເຢຍ ຕສ່ຽວ ເຖສີຍ ເຈ໌ຍ ເມີ່ຍ ບົວ, ໄມ້ ເຕສີ໌ຍ ແທສະ ເມີ່ຍ ບົວ ເອຈ່ຍ. ເຢຍ ຕສວັ໋ງ ເມີ່ຍ ບົວ, ຢ່າ ໄມ້ ແປງ ເມີ່ຍ ບົວ ທສວດ, ເຫວີ່ຍ ຕສຸ ເຢຍ ກ໊ອຍ ໂຮຍ້ວ ໄມ້ ປຸນ ເມີ່ຍ ບົວ ຕສຸ ທສ້ຽວ ເຍີຍ ເຕສະ ໜ່ານ ຮນັ້ງ ຕສຸ ເຈ໋ຍ ນໍ.

11ໄມ້ ຕູ໋ງ ກ້ຳ ເດສ໋ຍ ບາບີລົນ ຮູ່ງ, ຕົ້ງ ເມີ່ຍ ບົວ ກ້ຳ ເດສ໋ຍ ວົ້ວ ເຕົ້າ.’ ເຫວີ່ຍ ຕສຸ ຕສ໊ຽວ ກ໊ອງ, ‘ໄມ້ ຕູ໋ງ ກ້ຳ ເດສ໋ຍ ນິ່ນ ເຫວີ່ຍ ຕສຸ ເຢຍ ເຖສົາ ເມີ່ຍ ບົວ ຢຽມ, ອ໋ອຍ ໂອຈ໋ວ ເມີ່ຍ ບົວ, ປຸນ ເມີ່ຍ ບົວ ເປຢົ໋າ ດຸ໊ດ ນິ່ນ ເຍີຍ ປົ໌ວ-ເດ໊ຍ.

12ເຢຍ ອ໋ອຍ ຄໍ້-ລ່ຽນ ເມີ່ຍ ບົວ, ເຫວີ່ຍ ປຸນ ນິ່ນ ຄໍ້-ລ່ຽນ ເມີ່ຍ ບົວ ຢ່າ ປຸນ ເມີ່ຍ ບົວ ດສ໋ວນ ເມີ່ຍ ບົວ ກັ້ນ ເຍີຍ ເຕີ່ຍ-ປູງ.’

13“ມປ່າ ເຊ ກ໊ອງ ເມີ່ຍ ບົວ ກ໊ອງ, ‘ເຢຍ ບົວ ໄມ້ ຢຽມ ນ້າຍ ນອມ ເຕີ່ຍ-ປູງ ອ໊ະ,’ ຕສ່ຽວ ໄມ້ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ,

14ແອ໋ງ ກ໊ອງ, ‘ເຢຍ ບົວ ໄມ້ ຢຽມ ອ໊ະ. ເຢຍ ບົວ ອ໋ອຍ ມີ່ງ ອີຢິ໊ບ ເຕີ່ຍ-ປູງ. ຢຽມ ວົ້ວ ໄມ້ ປວັດ ເບ໊າະ ຈ໋າ ເຍີຍ ສີ່, ໄມ້ ໄຮ໌ ຈອງ ເຍີຍ ເຖຈຍ, ຢ່າ ໄມ້ ຫງໍ່ ຫຮນາງ. ເຢຍ ບົວ ຕສ່ຽວ ຢຽມ ວົ້ວ.’

15ໂອ ເມີ່ຍ ບົວ ເຕສ່ງ ເອຈ່ຍ ເຍີຍ ຢູດາ ມ່ຽນ ອ້າ! ອ໋ອຍ ຕສຸ ໝວັງ ຕສ໊ຽວ ເຍີຍ ຫວ່າ. ເນິ່ນ ເຈ໋ຍ ເຍີຍ ຕສ໊ຽວ, ອິສະລາເອນ ເຍີຍ ທິນ-ຮູ່ງ, ຮນັ້ງ ນ້າຍ ກ໊ອງ, ‘ເຊ ກ໊ອງ ເມີ່ຍ ບົວ ຕີ່ງ ໂຮຍ້ວ ເປັຍ ອີຢິ໊ບ ເຕີ່ຍ-ປູງ ຢຽມ,

16ຕົ້ງ ເມີ່ຍ ບົວ ກ້ຳ ເດສ໋ຍ ເຍີຍ ດສຸ ດ໊າວ ອ໋ອຍ ຢຽມ ອີຢິ໊ບ ຕສຸ່ນ ຕສ່າຍ ເມີ່ຍ ບົວ. ເມີ່ຍ ບົວ ກ້ຳ ເດສ໋ຍ ຫງໍ່ ຫຮນາງ ເຍີຍ ເຈົ໊າ, ມປ່າ ຫງໍ່ ຫຮນາງ ເຍີຍ ເຈົ໊າ ອ໋ອຍ ກັນ ຈ໊ຽນ ເມີ່ຍ ບົວ ມີ່ງ ອີຢິ໊ບ. ເມີ່ຍ ບົວ ຕສ່ຽວ ຢຽມ ວົ້ວ ໄຕ່.

17ຕະຟ່ານ ຕີ່ງ ໂຮຍ້ວ ມີ່ງ ຢຽມ ອີຢິ໊ບ ເຍີຍ ມ່ຽນ ຕສ່ຽວ ຕສຸ ດສຸ ດ໊າວ, ຕສຸ ຫງໍ່ ຫຮນາງ, ຕສຸ ວວນ-ແປ່ງ ໄຕ່. ນິ່ນ ບົວ ໄມ້ ເຕສ່ງ ຢຽດ ລ່ານ ໄຮ່ ເປຢົ໋າ ຕຸ໊ ດຸ໊ດ. ເຢຍ ອ໋ອຍ ປຸນ ນິ່ນ ບົວ ຕສຸ ທສ້ຽວ ເຍີຍ ເຕສະ ໜ່ານ.’

18ເຫວີ່ຍ ຕສຸ ເນິ່ນ ເຈ໋ຍ ເຍີຍ ຕສ໊ຽວ, ອິສະລາເອນ ເຍີຍ ທິນ-ຮູ່ງ, ຮນັ້ງ ນ້າຍ ກ໊ອງ, ‘ເຢຍ ຮນັ້ງ ຫາຍ ນໍ ໂນ໌ວ ໄຫ່, ກະເຖຈຍ ແປ໊ດ ທສວດ ປຸນ ຢຽມ ເຢລູຊາເລມ ເຍີຍ ແປະ ຝີງ, ເມີ່ຍ ບົວ ມີ່ງ ອີຢິ໊ບ ເຕີ່ຍ-ປູງ ເຍີຍ ຕສຢັ້ງ ໂຫ່, ເຢຍ ເຍີຍ ກະເຖຈຍ ຢ່າ ອ໋ອຍ ຮນັ້ງ ວົ້ວ ນໍ ແປ໊ດ ທສວດ ປຸນ ເມີ່ຍ ບົວ. ເມີ່ຍ ບົວ ຕສ່ຽວ ຕສຸ ມ່ຽນ ໂຢ໋ວ, ເປ໋ນ ກ້ຳ ເດສ໋ຍ ເຍີຍ ກະນ້າຍ, ເປ໋ນ ຕສ໋ຽວ ເຍີຍ ຫວ່າ, ຢ່າ ຕສຸ ມ່ຽນ ຮວວດ. ເມີ່ຍ ບົວ ໄມ້ ຕຸ໊ ແອ໋ງ ປວັດ ນ້າຍ ນອມ ຕ໋ອງ.’

19“ເຕສ່ງ ເອຈ່ຍ ເຍີຍ ຢູດາ ມ່ຽນ ອ້າ! ຕສ໊ຽວ ກ໊ອງ ບົ໋ວ ເມີ່ຍ ບົວ, ‘ໄມ້ ຕູ໋ງ ມີ່ງ ອີຢິ໊ບ ເຕີ່ຍ-ປູງ.’ ເມີ່ຍ ບົວ ອ໋ອຍ ຕສຸ ຮິ້ວ ຕີ່ງ, ອີ້ ຮນອຍ ເຢຍ ຕົ໊ນ ຈ໊ຽນ ເມີ່ຍ ບົວ ກ໊ອງ,

20ເມີ່ຍ ບົວ ມີ່ງ ຕ່ອງ ເຈົ໊າ ຕສ່ຽວ ຕສຸ ກວັ່ງ ແໝ່ງ ອ໊ະ, ເຫວີ່ຍ ຕສຸ ເມີ່ຍ ບົວ ໂທ້ ເຢຍ ມີ່ງ ລໍ໌ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ກ໊ອງ, ‘ໂທ້ ເຫວີ່ຍ ເຢຍ ບົວ ເຕົ໋າ ເກົ໋າ ໂຈ້ວ ຕສ໊ຽວ, ເຢຍ ບົວ ເຍີຍ ທິນ-ຮູ່ງ. ຕສ໊ຽວ, ເຢຍ ບົວ ເຍີຍ ທິນ-ຮູ່ງ ກ໊ອງ ຫາຍ ຫຍູ່ງ ໂທ້ ບົ໋ວ ເຢຍ ບົວ, ເຢຍ ບົວ ຕສ່ຽວ ເອີຍ ຈ໊ຽນ ໂຕສ໋ວ ອ໊ະ.’

21ອີ້ ຮນອຍ ເຢຍ ເຕສ໊າະ ນ້າຍ ເຕີ໋ຍ ຫວ່າ ບົ໋ວ ເມີ່ຍ ບົວ, ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ພ້າຍ ເຢຍ ຕ້າຍ ບົ໋ວ ເມີ່ຍ ບົວ ເຍີຍ ຫວ່າ, ມປ່າ ເມີ່ຍ ບົວ ໄມ້ ໝວັງ.

22ອີ້ ຕສັ່ນ ເມີ່ຍ ບົວ ອ໋ອຍ ຕສຸ ຮິ້ວ ຕີ່ງ, ເມີ່ຍ ບົວ ອ໋ອຍ ມີ່ງ ຢຽມ ເຍີຍ ຕ໋ອງ ເມີ່ຍ ບົວ ອ໋ອຍ ຕສຸ ດສຸ ດ໊າວ, ຕສຸ ຫງໍ່ ຫຮນາງ, ຕສຸ ວວນ-ແປ່ງ ໄຕ່.”

← Chapter 41 Jump to: Chapter 43 →