Luke 19

Lao Bible (ฉบับอักษรลาว)

1ເຢຊູ ເປັຍ ເຢລີໂຄ ຕສີ້ງ, ອ໋ອຍ ຢັ້ງ ຕສີ້ງ ເຈ໋ຍ.

2ຢຽມ ວົ້ວ ມ່າຍ ເຕົ້າ ມ່ຽນ ໂຕສ໋ວ ຊຽວ ໂດສວ-ຕສິ້ນ ເຍີຍ ເປຢີ໊ຍ ເຕສີ໊ຍ, ບົ໋ວ ເຫ່ວ ສັກຄຽດ. ນິ່ນ ຢ່າ ປຸ໊ດ-ຕສ້ອຍ ມ່ຽນ.

3ນິ່ນ ອ໋ອຍ ໝັ່ງ ກ໋າ ເຢຊູ ຮນັ້ງ ຫາຍ ນໍ, ມປ່າ ສັກຄຽດ ໄອ໊ ໄຫ່. ມ່ຽນ ທສ້ຳ ທ້ອງ ຈ໊ຽນ ນິ່ນ, ນິ່ນ ໝັ່ງ ໄມ້ ປວັດ ເຢຊູ.

4ນິ່ນ ຕສ່ຽວ ທສ້າງ ເຈ໋ຍ ດ່າງ ຝາວ ງົ່ງ ຫຍໍ ດຢັ໋ງ, ຢຽມ ວົ້ວ ຕສົ໊ວ ຈ໊ຽນ ໝັ່ງ ເຢຊູ, ເຫວີ່ຍ ຕສຸ ເຢຊູ ອ໋ອຍ ຢັ້ງ ນ້າຍ ຕິ້ວ ເຈົ໊າ ເຈ໋ຍ.

5ເຢຊູ ເຈ໋ຍ ເຖົາ ດຢັ໋ງ-ກອນ ຕສ່ຽວ ເທສົາ ຮມຽນ ກ໊ອງ ບົ໋ວ ສັກຄຽດ, “ສັກຄຽດ ອ່າ, ກ໊ານ ເອຈ່ຍ ຕ້າຍ ມ່າະ! ອີ້ ຮນອຍ ເຢຍ ອ໋ອຍ ຕສຸ ມີ່ງ ຮິດ ເມີ່ຍ ເຍີຍ ເປຢົ໊າ.”

6ສັກຄຽດ ຮວາງໆ ຕສາງໆ ເຍີຍ ເອຈ່ຍ ຕ້າຍ, ອະເຮນີ້ຍ ເຍີຍ ຕສິ໊ບ ເຢຊູ.

7ຕສວັ໋ງ ມ່ຽນ ປວັດ ນ້າຍ ເຕີ໋ຍ ສີ່ ນິ່ນ ບົວ ຕສ່ຽວ ງົບ ກ໊ອງ, “ໜ່າຍ ລ່ານ ມ່ຽນ ມີ່ງ ໂຕສ໋ວ ຕສຸ໌ຍ-ມ່ຽນ ເຍີຍ ແຄະ ອ໊ະ ໂລ່ະ!”

8ສັກຄຽດ ໂຊ້ວ ເຈ໌ຍ ຕ້າຍ ກ໊ອງ ບົ໋ວ ຕສ໊ຽວ, “ຕສ໊ຽວ ອ້າ! ເຢຍ ມ່າຍ ເຍີຍ ຢຽດ ຕສູ໊ງ ກະນ້າຍ ເຢຍ ອ໋ອຍ ເຕສ໊າະ ຢຽດ ປ່ວນ ປຸນ ມ່ຽນ ຈົ່ມ ມ່ຽນ. ເຊ ກ໊ອງ ເຢຍ ຜຽນ ຫາຍ ເຕົ້າ ເຍີຍ ຫາຍ ຫຍູ່ງ, ຢຽດ ໂກ໊ວ ເຢຍ ອ໋ອຍ ປຸ້ຍ ເປຢີຍ ໂກ໊ວ ນິ່ນ ບົວ.”

9ເຢຊູ ກ໊ອງ ບົ໋ວ ນິ່ນ, “ອີ້ ຮນອຍ ໂອຈ໋ວ ເອນ ຕ້າຍ ເຖົາ ນ້າຍ ປ່ວນ ມ່ຽນ. ນ້າຍ ລ່ານ ມ່ຽນ ຢ່າ ໂຕສ໋ວ ອັບລາຮຳ ເຍີຍ ເຕສີ໊ຍ-ຟຸນ.

10ເຢຍ, ປ້າມ ມ່ຽນ ເຍີຍ ຕອນ, ຕ້າຍ ລໍ໌ ຢ່າ ໂອຈ໋ວ ຕີ໋ງ ລ່າຍ ເຍີຍ ມ່ຽນ.”

11ຕສວັ໋ງ ມ່ຽນ ຖສໍ່ ໝວັງ ຈ໊ຽນ ນ້າຍ ເຕີ໋ຍ ຫວ່າ, ເຢຊູ ແອ໋ງ ກ໊ອງ ຕິ້ວ ຫວ່າ-ເປີ໊ຍ. ວົ້ວ ຕສັ່ນ ນິ່ນ ອ໊າ ລ່ຳ ເຕີ໋ຍ ເຖົາ ເຢລູຊາເລມ ຕສີ້ງ, ມ່ຽນ ຫລ່າຍ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຕສຢັ້ງ ໂຫ່ ເຖົາ ອ໊ະ ມເປີຍ.

12ເຢຊູ ຕສ່ຽວ ກ໊ອງ, “ມ່າຍ ເຕົ້າ ຈຽນ ອ໋ອຍ ທສວດ ມີ່ງ ໂກ ເຍີຍ ກົ໊ວະ ຕສິ໊ບ ຫລີ່ງ ໂຕສ໋ວ ຮູ່ງ. ຕສິ໊ບ ລິ໌ວ ນິ່ນ ແອ໋ງ ດສ໋ວນ ຕ້າຍ.

13ອ໋ອຍ ມີ່ງ ວົ້ວ ຕສັ່ນ ນິ່ນ ເຫ່ວ ນິ່ນ ເຍີຍ ຕສຽບ ເຕົ້າ ໂປວ ຕ້າຍ, ຢຽດ ເຕົ້າ ປຸນ ຕິ້ວ ຍ່ານ. ນິ່ນ ກ໊ອງ, ‘ຕໍ້ ນ້າຍ ເຕີ໋ຍ ຍ່ານ ມີ່ງ ໂຕສ໋ວ ແຊງ-ເອີ໋ຍ ເຖົາ ເຢຍ ດສ໋ວນ.’

14“ວົ້ວ ເຕົ້າ ຈຽນ ເຍີຍ ແປະ ຝີງ ດສອງ ໄຫ່ ນິ່ນ ຕສ່ຽວ ພ້າຍ ມ່ຽນ ກັນ ອກາງ ມີ່ງ ກ໊ອງ, ‘ເຢຍ ບົວ ໄມ້ ອ໋ອຍ ຫລົ່ງ ນ້າຍ ລ່ານ ມ່ຽນ ໂຕສ໋ວ ເຢຍ ບົວ ເຍີຍ ຮູ່ງ.’

15“ມປ່າ ວົ້ວ ເຕົ້າ ຈຽນ ຕຸ໊ ຫລີ່ງ ໂຕສ໋ວ ຮູ່ງ ແອ໋ງ ດສ໋ວນ ຕ້າຍ ອ໊ະ. ນິ່ນ ຕສ່ຽວ ເຫ່ວ ຕົ້ງ ນິ່ນ ປຸນ ຍ່ານ ວົ້ວ ເຕີ໋ຍ ໂປວ, ຕ້າຍ ໝັ່ງ ກ໋າ ນິ່ນ ບົວ ຕສ່ອນ ຕຸ໊ ບຸເຕສ໋ຍ.

16“ຕະຢ໊ຽດ ເຕົ້າ ໂປວ ຕ້າຍ ກ໊ອງ, ‘ຕສ໊ຽວ ອ້າ! ເມີ່ຍ ປຸນ ເຢຍ ວົ້ວ ຕິ້ວ ຍ່ານ ເຢຍ ຕສ່ອນ ຕຸ໊ ຕສຽບ ຕິ້ວ.’

17“ຕສ໊ຽວ ເຕົາ, ‘ຫລົງ ອ໊ະ. ເມີ່ຍ ຕສະເກ້ງ ໂຮຍ້ວ ຕສີ໋ງ ເຍີຍ ໂປວ. ເຕີ໋ຍ ປ໊າ ໄຝ-ຟິ້ວ ສີ່ ເມີ່ຍ ຕສູ໊ງ ໂກ໋ວ ດົ່ງ ໜ່າຍ ຫລົງ, ເຢຍ ປຸນ ເມີ່ຍ ກຸ໊ນ ຕສຽບ ນອມ ຕສີ້ງ.’

18“ຕະເຫຍີ່ຍ ເຕົ້າ ໂປວ ຕ້າຍ ກ໊ອງ, ‘ຕສ໊ຽວ ອ້າ! ເມີ່ຍ ປຸນ ເຢຍ ວົ້ວ ຕິ້ວ ຍ່ານ ເຢຍ ແອ໋ງ ຕສ່ອນ ຕຸ໊ ປຢາ ຕິ້ວ.’

19“ຕສ໊ຽວ ບົ໋ວ ນິ່ນ, ‘ເຢຍ ປຸນ ເມີ່ຍ ກຸ໊ນ ປຢາ ນອມ ຕສີ້ງ.’

20“ແອ໋ງ ມ່າຍ ເຕົ້າ ໂປວ ຕ້າຍ ກ໊ອງ, ‘ຕສ໊ຽວ ອ້າ! ນ້າຍ! ເມີ່ຍ ປຸນ ເຢຍ ວົ້ວ ຕິ້ວ ຍ່ານ. ເຢຍ ຫລົ່ງ ສິ ຈ໊າວ ເປວ ຈ໊ຽນ ຊຽວ ຫລົງ ເຍີຍ.

21ເຢຍ ກ້ຳ ເດສ໋ຍ ໄຫ່ ເມີ່ຍ. ເຢຍ ຮິ້ວ ຕຸ໊ ເມີ່ຍ ໄມ້ ເຊຍ ຫາຍ ເຕົ້າ. ໄມ້ ເຕສີ໌ຍ ເມີ່ຍ ກັ້ນ ເຍີຍ ກະນ້າຍ ເມີ່ຍ ຢ່າ ເຕສ໊າະ. ເມີ່ຍ ກັ້ນ ໄມ້ ຕສຸ ດ໊ອດ ທຈະ ຕສວັ໋ງ ມປ່າ ເມີ່ຍ ຢ່າ ຊຽວ.’

22“ຕສ໊ຽວ ກ໊ອງ ບົ໋ວ ນິ່ນ, ‘ເມີ່ຍ ຫວ່າຍ ໄຫ່ ເຍີຍ ໂປວ ອ້າ! ເຢຍ ຫລົ່ງ ເມີ່ຍ ກັ້ນ ເຍີຍ ຫວ່າ ຕີ່ງ ເມີ່ຍ ເຍີຍ ຕສຸ໌ຍ. ເມີ່ຍ ຮິ້ວ ຕຸ໊ ເຢຍ ໄມ້ ເຊຍ ຫາຍ ເຕົ້າ? ເມີ່ຍ ຢ່າ ຮິ້ວ ຕຸ໊ ໄມ້ ເຕສີ໌ຍ ເຢຍ ເຍີຍ ກະນ້າຍ ເຢຍ ຢ່າ ເຕສ໊າະ? ໄມ້ ເຕສີ໌ຍ ເຢຍ ດ໊ອດ ທຈະ ຕສວັ໋ງ ເຢຍ ຢ່າ ຊຽວ?

23ຮນັ້ງ ໜ່າຍ ເມີ່ຍ ໂຕສ໋ວ ຫາຍ ຫຍູ່ງ ໄມ້ ຕໍ້ ເຢຍ ເຍີຍ ຍ່ານ ມີ່ງ ຕັ໊ບ ຍ່ານ ລ໌ຳ? ເຢຍ ດສ໋ວນ ຕ້າຍ ເຢຍ ຕຸ໊ ປ໊ວນ-ຕສິ້ນ ຢ່າ ຕຸ໊ ເຕີ໋ຍ ເຫລີ່ຍ ຕສິ້ນ ເຖສົາ ຈ໊ຽນ ນີອາ.’

24“ຕສ໊ຽວ ແອ໋ງ ບົ໋ວ ໂຊ້ວ ກະເຮລນ ວົ້ວ ເຕີ໋ຍ ມ່ຽນ, ‘ເຕສ໊າະ ນິ່ນ ວົ້ວ ຕິ້ວ ຍ່ານ ປຸນ ມ່າຍ ຕສຽບ ຕິ້ວ ວົ້ວ ເຕົ້າ ມ່າະ!’

25“ວົ້ວ ເຕີ໋ຍ ກ໊ອງ, ‘ຕສ໊ຽວ ອ້າ! ນິ່ນ ຕສູ໊ງ ມ່າຍ ຕສຽບ ຕິ້ວ ນີອາ.’

26“ວົ້ວ ເຕົ້າ ຮູ່ງ ເຕົາ, ‘ເຢຍ ບົ໋ວ ເມີ່ຍ ບົວ, ຫາຍ ເຕົ້າ ມ່າຍ ເຍີຍ, ອ໋ອຍ ຈາ ປຸນ ນິ່ນ ມ່າຍ ເກົ້າ ທສ້ຳ. ຫາຍ ເຕົ້າ ໄມ້ ມ່າຍ, ລ່ຽມ ນິ່ນ ມ່າຍ ເຕີ໋ຍ ປ໊າ, ຕສູ໊ງ ອ໋ອຍ ຕສຸ ເຕສ໊າະ ມີ່ງ.

27ມປ່າ ໄມ້ ອ໋ອຍ ເຢຍ ໂຕສ໋ວ ຮູ່ງ ວົ້ວ ເຕີ໋ຍ ວິນ-ວັ້ງ ຕໍ້ ຕ້າຍ ນ້າຍ ຢຽມ ເຢຍ ເຍີຍ ດສະຮມຽນ ໄຕ໋ ກວັ່ງ.’”

28ເຢຊູ ກ໊ອງ ລິ໌ວ ນ້າຍ ເຕີ໋ຍ ຫວ່າ ນິ່ນ ຕສ່ຽວ ມີ່ງ ດ່າງ. ໄຊ-ກໍ໋ ບົວ ກັນ ຈ໊ຽນ ມີ່ງ ເຢລູຊາເລມ ຕສີ້ງ.

29ມີ່ງ ເຖົາ ກະລັ້ນ ບົງ, ເລີ່ຍ ເບດຟາຢີ ເຖສົາ ເບທານີ ລ໌າງ ໄມ້ ໂກ, ນິ່ນ ພ້າຍ ອີ ເຕົ້າ ໄຊ-ກໍ໋ ມີ່ງ ດ່າງ.

30ນິ່ນ ກ໊ອງ ບົ໋ວ ນິ່ນ ບົວ, “ເມີ່ຍ ບົວ ມີ່ງ ເຖົາ ດສະຮມຽນ ແໝງ ວົ້ວ ນອມ ລ໌າງ. ເປັຍ ລ໌າງ ມີ່ງ ຕສ່ຽວ ປວັດ ເຕົ້າ ມາລີ ຕອນ ໂດ້ ຈ໊ຽນ ວົ້ວ, ມ່ຽນ ໄມ້ ແກ້ງ ເກ້ ເຈ໋ຍ. ໄຈ໊ ເຄນ ຈ໊ຽນ ຕ້າຍ ໂອ່.

31ເຊ ກ໊ອງ ມ່າຍ ມ່ຽນ ໜ່າຍ, ‘ເມີ່ຍ ບົວ ໄຈ໊ ມາລີ ຕອນ ໂຕສ໋ວ ຫາຍ ຫຍູ່ງ?’ ອ໋ອຍ ຕສຸ ບົ໋ວ ນິ່ນ ບົວ, ‘ຕສ໊ຽວ ຖຈຽມ ຕສຸ ຫລົ່ງ.’”

32ນິ່ນ ບົວ ຕສ່ຽວ ມີ່ງ ດ່າງ, ປວັດ ຫຍູ່ງໆ ຕ໋ອຍ ເຢຊູ ກ໊ອງ ເຍີຍ ຫວ່າ.

33ນິ່ນ ບົວ ໄຈ໊ ມາລີ ຕອນ ວົ້ວ ຕສັ່ນ, ມາລີ ເຍີຍ ຕສ໊ຽວ ໜ່າຍ ກ໋າ, “ເມີ່ຍ ບົວ ໄຈ໊ ມາລີ ຕອນ ໂຕສ໋ວ ຫາຍ ຫຍູ່ງ?”

34ນິ່ນ ບົວ ເຕົາ, “ຕສ໊ຽວ ຖຈຽມ ຕສຸ ຫລົ່ງ.”

35ນິ່ນ ບົວ ຕສ່ຽວ ເຄນ ມາລີ ຕອນ ມີ່ງ ເຢຊູ ວົ້ວ, ແອ໋ງ ເຕສ໊າະ ກັ້ນ ເຍີຍ ຕົ້ມ ລຸຍ ຕິ່ມ ຈ໊ຽນ, ຢ່າ ປ໊າ ເຢຊູ ຝາວ ມີ່ງ ເກ້ ຈ໊ຽນ ມາລີ ເຍີຍ ຕິ ຕ໌ານ.

36ເກ້ ຈ໊ຽນ ມີ່ງ ວົ້ວ ຕສັ່ນ, ຕສວັ໋ງ ມ່ຽນ ເຕສ໊າະ ນິ່ນ ບົວ ເຍີຍ ຕົ້ມ ລຸຍ ຕິ່ມ ຈ໊ຽນ ວົ້ວ ເຈົ໊າ.

37ເຢຊູ ເຖົາ ຟັດ ເຢລູຊາເລມ ຕສີ້ງ, ເອຈ່ຍ ກະລັ້ນ ບົງ ວົ້ວ ຕສັ່ນ, ຕສວັ໋ງ ໄຊ-ກໍ໋ ຕສ່ຽວ ລົ່ມ ດສ້ອຍ ອຈຽນ-ໂຢ້ວ ເຍີຍ ຫລົ່ງ ເຖຈຍ ໂຮລ ເຍີຍ ເທສງ ທິນ-ຮູ່ງ ເຫວີ່ຍ ນິ່ນ ບົວ ປວັດ ເຈ໋ຍ ຢຽດ ຕສູ໊ງ ບົວະ ຮ່ອງ ໄຫ່ ເຍີຍ ສີ່. ນິ່ນ ບົວ ຕສ່ຽວ ເຫ່ວ,

38“ໂທ້ ທິນ-ຮູ່ງ ເຖສີຍ ຟຸ ເຕ໊ງ ຕສ໊ຽວ ເຍີຍ ບົ໋ວ ຕ້າຍ ນ້າຍ ເຕົ້າ ຮູ່ງ. ທິນ-ຕ້ອງ ມ່າຍ ແປ້ງ ອອນ. ຢຽມ ຮລັງ ເຈ໋ຍ ເຍີຍ ຕ໋ອງ ມ່າຍ ອຈັງ-ຫລ່າງ.”

39ຢຽມ ວົ້ວ ມ່າຍ ເຕີ໋ຍ ຟາລິສີ ມ່ຽນ ກ໊ອງ ບົ໋ວ ເຢຊູ, “ຟິນ-ແຊງ ອ້າ! ຫັດ ເມີ່ຍ ເຍີຍ ໄຊ-ກໍ໋ ບົວ ເຊກ ມ່າະ!”

40ເຢຊູ ເຕົາ, “ເຢຍ ບົ໋ວ ເມີ່ຍ ບົວ, ເຊ ກ໊ອງ ນິ່ນ ບົວ ໄມ້ ໂຄ ໂລ, ຫລະເປຢີ໊ຍ ຕສູ໊ງ ອ໋ອຍ ຕສຸ ເຫ່ວ ເຈ໌ຍ ຕ້າຍ.”

41ເຢຊູ ມີ່ງ ອ໊າ ລ່ຳ ເຖົາ ເຢລູຊາເລມ ຕສີ້ງ. ໝັ່ງ ປວັດ ຕສີ້ງ ນິ່ນ ຕສ່ຽວ ເຫວີ່ຍ ວົ້ວ ນອມ ຕສີ້ງ ຍ້ຽມ.

42ນິ່ນ ຢ່າ ກ໊ອງ, “ເຝີຍ ຕຸ໊ ອີ້ ຮນອຍ ເມີ່ຍ ຮິ້ວ ຕຸ໊ ຫາຍ ຫຍູ່ງ ໄຮ່ ປຸນ ເມີ່ຍ ມ່າຍ ແປ້ງ ອອນ. ມປ່າ ອີ້ ຕສັ່ນ ນ້າຍ ເຕີ໋ຍ ສີ່ ເກມ ຈ໊ຽນ, ເມີ່ຍ ເຍີຍ ມຕສີງ ໝັ່ງ ໄມ້ ປວັດ.

43ຕສຢັ້ງ ໂຫ່ ອ໋ອຍ ເຖົາ, ເມີ່ຍ ເຍີຍ ວິນ-ວັ້ງ ອ໋ອຍ ເວດ ເນຍ-ດຸຍ ຮວີງ ກ໋ອມ ເມີ່ຍ. ນິ່ນ ບົວ ອ໋ອຍ ເຫວີ່ຍ ຈ໊ຽນ ເປຢີຍ ປູງ ຂວນ ຈ໊ຽນ ເມີ່ຍ.

44ລ່ຽມ ເມີ່ຍ ກັ້ນ ເຖສົາ ຢຽມ ເມີ່ຍ ເຍີຍ ຕສີ້ງ ຫລາດ ກະຍົ໌ວ ເຍີຍ ມ່ຽນ ຢຽດ ຕສູ໊ງ ນິ່ນ ບົວ ອ໋ອຍ ໝຽດ ເດສ່ງ, ໄມ້ ລ່ຽວ ຢຽດ ຄວ້າຍ ຫລະເປຢີ໊ຍ ລັບ ຈ໊ຽນ, ເຫວີ່ຍ ຕສຸ ເມີ່ຍ ເຕສັ໊ຍ ໄມ້ ຕຸ໊ ທິນ-ຮູ່ງ ຕ້າຍ ໂອຈ໋ວ ເມີ່ຍ ເຍີຍ ຕສຢັ້ງ ໂຫ່.”

45ເຢຊູ ເປັຍ ຕສັ່ງ ທິນ-ຮູ່ງ ເຍີຍ ເປຢົ໊າ ມີ່ງ ຕສ່ຽວ ຕສຸ່ນ ມ໌າຍ ໝ່າຍ ເຍີຍ ມ່ຽນ ທສວດ ມີ່ງ,

46ຢ່າ ບົ໋ວ ນິ່ນ ບົວ, “ກີງ-ໂຊວ ເຟ້ຍ ຈ໊ຽນ ກ໊ອງ, ‘ເຢຍ ເຍີຍ ເປຢົ໊າ ອ໋ອຍ ຕສຸ ໂຕສ໋ວ ເຕົ໋າ ເກົ໋າ ເຍີຍ ເປຢົ໊າ,’ ມປ່າ ເມີ່ຍ ບົວ ຫລົ່ງ ໂຕສ໋ວ ‘ຈັ໋ນ-ຕສະ ປີ໋ງ ເຍີຍ ຄວດ.’”

47ເຢຊູ ຮນອຍໆ ຢຽມ ວົ້ວ ຕສັ່ງ ທິນ-ຮູ່ງ ເຍີຍ ເປຢົ໊າ ອຈ໋າວ ມ່ຽນ. ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ກຸ໊ນ ແປະ ຝີງ ເຍີຍ ເປຢີ໊ຍ ອ໋ອຍ ໄຕ໋ ເຢຊູ,

48ມປ່າ ນິ່ນ ບົວ ລໍ໌ ໄມ້ ຕຸ໊ ຖຈັງ ເຫວີ່ຍ ຕສຸ ຕສວັ໋ງ ມ່ຽນ ອະເຮນີ້ຍ ໝວັງ ເຢຊູ ອຈ໋າວ, ຢ່າ ໄມ້ ອ໋ອຍ ປູ໋ງ ດ໊ອດ ຢຽດ ໂຈ໋ວ ນິ່ນ ເຍີຍ ຫວ່າ.

← Chapter 18 Jump to: Chapter 20 →