Luke 22

Lao Bible (ฉบับอักษรลาว)

1ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ, ແອ໋ງ ມ່າຍ ນອມ ບົ໋ວ ເຫ່ວ ເສຍ ແໝ່ງ ຕສິ໊ບ, ອ໊າ ລ່ຳ ເຖົາ ອ໊ະ.

2ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ອ໋ອຍ ປີ໋ງ ຈ໊ຽນ ລໍ໌ ຖຈັງ ໄຕ໋ ເຢຊູ, ເຫວີ່ຍ ຕສຸ ນິ່ນ ບົວ ກ້ຳ ເດສ໋ຍ ຕສວັ໋ງ ມ່ຽນ.

3ວົ້ວ ຕສັ່ນ ຊາຕານ ເປັຍ ຢູດາດ ເຍີຍ ໂຮຍ້ວ. ວົ້ວ ເຕົ້າ ຢູດາດ, ມ່ຽນ ຢ່າ ເຫ່ວ ອິສະຄາລິໂອດ. ນິ່ນ ໂຕສ໋ວ ເຢຊູ ເຍີຍ ຕສຽບ ເຫຍີ່ຍ ເຕົ້າ ໄຊ-ກໍ໋ ເຍີຍ ຢຽດ ເຕົ້າ.

4ຢູດາດ ຕສ່ຽວ ມີ່ງ ໄຊ ມ່ຽນ ເປຢີ໊ຍ ເຖສົາ ໂກ໋ວ ຕສັ່ງ ທິນ-ຮູ່ງ ເຍີຍ ເປຢົ໊າ ເຍີຍ ແປງ-ເປຢີ໊ຍ ວົ້ວ ທສ່າງ ລ່າງ ຮນັ້ງ ຫາຍ ນໍ ໄຮ່ ເຕສ໊າະ ເຢຊູ ຈິວ ປຸນ ນິ່ນ ບົວ.

5ວົ້ວ ເຕີ໋ຍ ມ່ຽນ ອະເຮນີ້ຍ ໄຫ່ ຢ່າ ແລ໌ງ ປຸນ ຍ່ານ ນິ່ນ.

6ຢູດາດ ຕສ່ຽວ ແລ໌ງ ອ໊ະ. ຕສ່ຽວ ລໍ໌ ຖຈັງ, ຕົ້ງ ຕສວັ໋ງ ມ່ຽນ ໄມ້ ຢຽມ ເຍີຍ ຕສຢັ້ງ ໂຫ່, ເຕສ໊າະ ເຢຊູ ຈິວ ປຸນ ນິ່ນ ບົວ.

7ເຈ໋ຍ ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ, ຕົ້ງ ອ໋ອຍ ຕສຸ ໄຕ໋ ຢູ້ງ ຕອນ ຫຍັ່ນ ເສຍ ແໝ່ງ ຕສິ໊ບ ວົ້ວ ຕົ໋ນ ຫຍັ່ນ ຮົບ ເຍີຍ ຮນອຍ ເຖົາ ອ໊ະ.

8ເຢຊູ ພ້າຍ ປີເຕ ເຖສົາ ໂຢຮັນ, ບົ໋ວ ນິ່ນ ບົວ, “ເມີ່ຍ ບົວ ອ໋ອຍ ຕສຸ ມີ່ງ ເບ່ນ ເສຍ ແໝ່ງ ຕສິ໊ບ ວົ້ວ ຕົ໋ນ ຫຍັ່ນ ຮົບ ຕ້າຍ ປຸນ ບົວ ລົ່ມ ດສ້ອຍ ຫຍັ່ນ.”

9ນິ່ນ ບົວ ໜ່າຍ ກ໋າ ເຢຊູ, “ໄຊ-ເຕ໋ຍ ອ໋ອຍ ເຢຍ ບົວ ມີ່ງ ຫາຍ ເບ່ນ?”

10ນິ່ນ ເຕົາ, “ເມີ່ຍ ບົວ ເປັຍ ຕສີ້ງ ວົ້ວ ຕສັ່ນ ຕສ່ຽວ ມ່າຍ ເຕົ້າ ມ່ຽນ ດາມ ນອມ ຕັ໊ບ ຈ໊ຽນ ວວມ ເຍີຍ ເນຍ-ຫະໂລ່ວ ຕ້າຍ ປວັ້ງ ເມີ່ຍ ບົວ. ນິ່ນ ເປັຍ ຫາຍ ນອມ ເປຢົ໊າ, ເມີ່ຍ ບົວ ກັນ ຈ໊ຽນ ນິ່ນ ເປັຍ.

11ຢ່າ ໜ່າຍ ກ໋າ ເປຢົ໊າ-ຕສ໊ຽວ, ‘ໄຊ-ເຕ໋ຍ ໜ່າຍ, ນິ່ນ ເຖສົາ ນິ່ນ ເຍີຍ ໄຊ-ກໍ໋ ອ໋ອຍ ຕສຸ ຢຽມ ຫາຍ ຖຈົງ ເປຢົ໊າ ຫຍັ່ນ ເສຍ ແໝ່ງ ຕສິ໊ບ ວົ້ວ ຕົ໋ນ ຫຍັ່ນ ຮົບ?’

12ເປຢົ໊າ-ຕສ໊ຽວ ຕສ່ຽວ ຕໍ້ ເມີ່ຍ ບົວ ຝາວ ມີ່ງ ໝັ່ງ ກູ້ ຫງວ່າຍ ວົ້ວ ດສັ້ງ ເປຢົ໊າ, ມ່າຍ ຖຈົງ ຈັ໊ງ ເຍີຍ. ຫຍູ່ງໆ ມ່າຍ ດສ້ອຍ ເດສ່ງ. ເມີ່ຍ ບົວ ຢຽມ ໜ່າຍ ເບ່ນ ອ໊ະ.”

13ນິ່ນ ບົວ ຕສ່ຽວ ມີ່ງ ປວັດ ຫຍູ່ງໆ ຕ໋ອຍ ເຢຊູ ກ໊ອງ ເຍີຍ ຫວ່າ. ນິ່ນ ບົວ ຕສ່ຽວ ຢຽມ ວົ້ວ ເບ່ນ ເສຍ ແໝ່ງ ຕສິ໊ບ ເຍີຍ ຫຮນາງ.

14ເຖົາ ຫຍັ່ນ ເຍີຍ ຕສຢັ້ງ ໂຫ່, ເຢຊູ ເຖສົາ ນິ່ນ ເຍີຍ ກົງ-ໂຕສ້ ບົວ ຝາວ ເຕ້ຍ ຫຍັ່ນ ຫຮນາງ.

15ເຢຊູ ກ໊ອງ ບົ໋ວ ນິ່ນ ບົວ, “ເຢຍ ໄມ້ ແກ້ງ ຕສຸ ສ່ຽວ ໂຄ້ວ, ເຢຍ ຕສະເກ້ງ ອ໋ອຍ ເຖສົາ ເມີ່ຍ ບົວ ຫຍັ່ນ ນ້າຍ ຕົ໋ນ ເສຍ ແໝ່ງ ຕສິ໊ບ ເຍີຍ ຫຮນາງ ດ່າງ.

16ເຢຍ ບົ໋ວ ເມີ່ຍ ບົວ, ຢັ້ງ ນ້າຍ ເຈ໋ຍ ເຢຍ ໄມ້ ຫຍັ່ນ ເສຍ ແໝ່ງ ຕສິ໊ບ ເຍີຍ ຫຮນາງ. ຕສົ໊ວ ເຖົາ ນ້າຍ ຕົ໋ນ ຫຮນາງ ເຍີຍ ຕສຽນ ເອີ໋ຍ ເລີ໌ຍ ຕຸ້ນ ຢຸ້ນ ເດສ່ງ, ເຊ ຕົ້ງ ທິນ-ຮູ່ງ ຕ້າຍ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຕສຢັ້ງ ໂຫ່, ເຢຍ ຖສີງ ຕ້າຍ ແອ໋ງ ຕຸ໊ ຫຍັ່ນ.”

17ກ໊ອງ ລິ໌ວ, ເຢຊູ ເຕສ໊າະ ຕສ໊ານ ອະຫງຸ່ນ ຕິ໊ວ ຕ້າຍ ແລ໌ງ ຕສີ້ງ ທິນ-ຮູ່ງ ຢ່າ ກ໊ອງ, “ຕສິ໊ບ ນ້າຍ ນອມ ຕສ໊ານ ມີ່ງ ປຸນ ອກອຍ ຢຽດ ລ່ານ ຮົບ ເຕີ໋ຍ.

18ເຢຍ ບົ໋ວ ເມີ່ຍ ບົວ, ຢັ້ງ ນ້າຍ ເຈ໋ຍ ເຢຍ ໄມ້ ຮົບ ອະຫງຸ່ນ ຕິ໊ວ. ຕສົ໊ວ ເຖົາ ທິນ-ຮູ່ງ ຕ້າຍ ໂຕສ໋ວ ຕສ໊ຽວ ກຸ໊ນ ມ່ຽນ ຖສີງ ຕ້າຍ ແອ໋ງ ຮົບ.”

19ເຢຊູ ເຕສ໊າະ ອຈົ໊ວ ຕ້າຍ ແລ໌ງ ຕສີ້ງ ລິ໌ວ ທິນ-ຮູ່ງ, ຕສ່ຽວ ແມະ ອກອຍ ປຸນ ໄຊ-ກໍ໋ ບົວ, ຢ່າ ກ໊ອງ, “ນ້າຍ ເຢຍ ເຍີຍ ຊິນ, ເຊ ເຫວີ່ຍ ເມີ່ຍ ບົວ ເຊ້ຍ ເຍີຍ. ເມີ່ຍ ບົວ ອ໋ອຍ ຕສຸ ຮນັ້ງ ນ້າຍ ໂຕສ໋ວ ເຫວີ່ຍ ຈັ໋ງ ເຢຍ.”

20ຫຍັ່ນ ລິ໌ວ ຫຮນາງ, ເຢຊູ ແອ໋ງ ເຕສ໊າະ ຕສ໊ານ ອະຫງຸ່ນ ຕິ໊ວ ຕ້າຍ ກ໊ອງ, “ນ້າຍ ນອມ ຕສ໊ານ ເຊ ຫລົ່ງ ເຢຍ ເຍີຍ ດສຢ໊າມ ຫລຽບ ເຈ໌ຍ ເຍີຍ ຊຢັງ-ແຫງ່ງ ຫວ່າ, ເຊ ເຫວີ່ຍ ເມີ່ຍ ບົວ ຫລ່ຽວ ທສວດ ຕ້າຍ.”

21“ໝັ່ງ ມ່າະ! ອ໋ອຍ ໝ່າຍ ເຢຍ ວົ້ວ ເຕົ້າ ເຍີຍ ປົ໌ວ ເຖສົາ ເຢຍ ເຍີຍ ປົ໌ວ ຈວັ່ງ ເຕ້ຍ ຫລອງ ຈ໊ຽນ.

22ເຢຍ, ປ້າມ ມ່ຽນ ເຍີຍ ຕອນ, ອ໋ອຍ ຕສຸ ເອີຍ ທິນ-ຮູ່ງ ຈາ-ດ່າງ ຕີ່ງ ຕ້າຍ ເຍີຍ ເກວີຍ ເສີຍ, ມປ່າ ໝ່າຍ ເຢຍ ວົ້ວ ເຕົ້າ ຕສູ໊ງ ຕສຸ ໂຄ້ວ ອ໊ະ.”

23ໄຊ-ກໍ໋ ບົວ ຕສ່ຽວ ລ່ານ ໜ່າຍ ລ່ານ ນິ່ນ ບົວ ຫາຍ ເຕົ້າ ອ໋ອຍ ໂຕສ໋ວ ທສວດ ນ້າຍ ເຕີ໋ຍ ສີ່.

24ໄຊ-ກໍ໋ ແດສງ ເຈ໌ຍ ຕ້າຍ ກ໊ອງ, ຢຽມ ນິ່ນ ບົວ ບຸດົ໋ງ, ອ໋ອຍ ຕສຸ ຝຸນ ນິ່ນ ບົວ ຫາຍ ເຕົ້າ ໂຕສ໋ວ ໂຮລ ເຈ໋ຍ.

25ເຢຊູ ບົ໋ວ ນິ່ນ ບົວ, “ຈັ໋ນ ເຍີຍ ຮູ່ງ ກຸ໊ນ ຈ໊ຽນ ແປະ ຝີງ. ໂຕສ໋ວ ຈຽນ-ໂຟ້ວ ວົ້ວ ເຕີ໋ຍ, ແປະ ຝີງ ເຫ່ວ, ‘ເດສຍ ມ່ຽນ ເຍີຍ ກໍ໋-ໂຢ໌ວ.’

26ມປ່າ ເມີ່ຍ ບົວ ໄມ້ ຫອບ ຕສຸ ຮນັ້ງ ໜ່າຍ. ເມີ່ຍ ບົວ ຫາຍ ເຕົ້າ ໂຕສ໋ວ ເກົ້າ ໂຮລ ເຈ໋ຍ, ວົ້ວ ເຕົ້າ ອ໋ອຍ ຕສຸ ໂຕສ໋ວ ຮນັ້ງ ເກົ້າ ຫລຸນ ເຈ໋ຍ ວົ້ວ ເຕົ້າ. ຫາຍ ເຕົ້າ ໂຕສ໋ວ ເປຢີ໊ຍ, ວົ້ວ ເຕົ້າ ອ໋ອຍ ຕສຸ ໂຕສ໋ວ ຮນັ້ງ ໂປວ ນໍ.

27ຫາຍ ເຕົ້າ ໂຕສ໋ວ ເກົ້າ ໂຮລ? ເຕສວີ໌ຍ ຈ໊ຽນ ຫຍັ່ນ ວົ້ວ ເຕົ້າ ໄຟ ຫລິ່ວ ເລີ໌ຍ ວົ້ວ ເຕົ້າ? ເຕສວີ໌ຍ ຈ໊ຽນ ວົ້ວ ເຕົ້າ ໂຕສ໋ວ ເກົ້າ ໂຮລ ໄມ້ ເຕສີ໌ຍ? ມປ່າ ເຢຍ ຢຽມ ເມີ່ຍ ບົວ ບຸດົ໋ງ ຮນັ້ງ ຟູ-ສູ ເຍີຍ ມ່ຽນ ນໍ.

28ເຢຍ ປວັ້ງ ຕສຸ ໂຄ້ວ ເມີ່ຍ ບົວ ເຖສົາ ເຢຍ ຢຽມ, ໄມ້ ກວັ່ງ ເຢຍ.

29ເຢຍ ເຍີຍ ເຕຍ ຮນັ້ງ ຫາຍ ນໍ ເຕສ໊າະ ນອມ ກົ໊ວະ ປຸນ ເຢຍ, ເຢຍ ຕສ່ຽວ ຮນັ້ງ ວົ້ວ ນໍ ເຕສ໊າະ ນອມ ຈິວ ປຸນ ເມີ່ຍ ບົວ.

30ເຊ ເຫວີ່ຍ ປຸນ ເມີ່ຍ ບົວ ຢຽມ ເຢຍ ເຍີຍ ກົ໊ວະ ເຖສົາ ເຢຍ ຈວັ່ງ ເຕ້ຍ ຫຍັ່ນ ຈວັ່ງ ເຕ້ຍ ຮົບ. ເມີ່ຍ ບົວ ຢ່າ ຕຸ໊ ເຕສວີ໌ຍ ເຫວີ່ຍ, ຊ້ຽມ ວົ້ວ ເຕີ໋ຍ ຕສຽບ ເຫຍີ່ຍ ຝີງ ອິສະລາເອນ ມ່ຽນ.

31“ຊີມົນ ອ້າ! ຊີມົນ! ໝວັງ ໂອ່. ຊາຕານ ຕຸ໊ ທິນ-ຮູ່ງ ອກອຍ ດສຸ້ຍ ເສີຍ ເມີ່ຍ ບົວ ຢຽດ ຕສູ໊ງ ຮນັ້ງ ມ່ຽນ ຫຍົມ ທສຸ ນໍ.

32ມປ່າ ເຢຍ ຕສູ໊ງ ເຫວີ່ຍ ເມີ່ຍ ເຕົ໋າ ເກົ໋າ ໂທ້ ທິນ-ຮູ່ງ ປຸນ ເມີ່ຍ ສຽນ ວ້ວນ, ໄມ້ ຖຸຍ. ເມີ່ຍ ແອ໋ງ ດສ໋ວນ ຕ້າຍ ລໍ໌ ເຢຍ, ເມີ່ຍ ອ໋ອຍ ຕສຸ ເຖງ ເມີ່ຍ ເຍີຍ ກໍ໋-ໂຢ໌ວ ເຮ້ນ ເຈ໌ຍ ຕ້າຍ.”

33ປີເຕ ເຕົາ, “ຕສ໊ຽວ ອ້າ! ໄມ້ ກຸ໊ນ ເປັຍ ໂລ່, ໄມ້ ກຸ໊ນ ໄຕ່, ເຢຍ ຕສຢັ້ງ ຢ່າ ເຖສົາ ເມີ່ຍ ຢຽດ ດຸຍ. ໄຕ່ ຢ່າ ເຖສົາ ເມີ່ຍ ຢຽດ ຄວດ.”

34ເຢຊູ ກ໊ອງ, “ປີເຕ ອ້າ! ເຢຍ ບົ໋ວ ເມີ່ຍ, ອີ້ ຮນອຍ ໄຈ ໄມ້ ແກ້ງ ອກ໋າຍ, ເມີ່ຍ ອ໋ອຍ ກ໊ອງ ປົວ ດສຸ່ນ ເມີ່ຍ ໄມ້ ຮິ້ວ ຕຸ໊ ເຢຍ.”

35ເຢຊູ ແອ໋ງ ໜ່າຍ ກ໋າ ນິ່ນ ເຍີຍ ໄຊ-ກໍ໋ ບົວ, “ເຢຍ ພ້າຍ ເມີ່ຍ ບົວ ມີ່ງ ວົ້ວ ຕສັ່ນ, ເຢຍ ບົ໋ວ ເມີ່ຍ ບົວ ໄມ້ ຕູ໋ງ ຕໍ້ ຍ່ານ ບົວະ, ຢ່າ ໄມ້ ຕູ໋ງ ຕໍ້ ບົວະ ຕັ໊ບ ກະນ້າຍ ໄຟ ຕໍ້ ເຮ່, ເມີ່ຍ ບົວ ທສາ ຫາຍ ຫຍູ່ງ ໄຟ?” ນິ່ນ ບົວ ເຕົາ, “ໄມ້ ທສາ ຫາຍ ຫຍູ່ງ.”

36ເຢຊູ ກ໊ອງ, “ມປ່າ ອີ້ ຕສັ່ນ ຫາຍ ເຕົ້າ ມ່າຍ ຍ່ານ ບົວະ ໄຟ ຕັ໊ບ ກະນ້າຍ ເຍີຍ ບົວະ ອ໋ອຍ ຕສຸ ຕໍ້ ຈ໊ຽນ ມີ່ງ. ຫາຍ ເຕົ້າ ໄມ້ ມ່າຍ ດສຸ ດ໊າວ ອ໋ອຍ ຕສຸ ໝ່າຍ ນິ່ນ ເຍີຍ ຕົ້ມ ລຸຍ ມ໌າຍ ຕສູງ.

37ກີງ-ໂຊວ ເຟ້ຍ ຈ໊ຽນ ກ໊ອງ, ‘ນິ່ນ ຕສຸ ຝຸນ ເຖສົາ ຕສຸ໌ຍ-ມ່ຽນ ຟີ່ ຮນັ້ງ.’ ເຢຍ ບົ໋ວ ເມີ່ຍ ບົວ, ນ້າຍ ໂຈ໋ວ ຫວ່າ ອ໋ອຍ ຢຽມ ເຢຍ ທສວດ ຕ້າຍ, ຕສູ໊ງ ທສວດ ຈ໊ຽນ ອ໊ະ.”

38ໄຊ-ກໍ໋ ບົວ ກ໊ອງ, “ຕສ໊ຽວ ອ້າ! ໝັ່ງ ກ໋າ ນ້າຍ! ມ່າຍ ອີ ຕສູງ ດສຸ ດ໊າວ.” ເຢຊູ ເຕົາ, “ນ້າຍ ເກົ໋າ ອ໊ະ.”

39ເຢຊູ ທສວດ ຕສີ້ງ ມີ່ງ ຢ່າ ຮນັ້ງ ຢຽດ ເກົາ ນໍ, ມີ່ງ ກະລັ້ນ ບົງ. ໄຊ-ກໍ໋ ບົວ ກັນ ຈ໊ຽນ ມີ່ງ.

40ເຖົາ ວົ້ວ ນອມ ຕ໋ອງ, ເຢຊູ ບົ໋ວ ນິ່ນ ບົວ, “ເມີ່ຍ ບົວ ອ໋ອຍ ຕສຸ ໂທ້ ທິນ-ຮູ່ງ ເຖງ ເມີ່ຍ ບົວ ໄມ້ ຕສຸ ປວັ້ງ ເສີຍ ໂຮຍ້ວ ເຍີຍ ສີ່.”

41ກ໊ອງ ລິ໌ວ, ນິ່ນ ກັ້ນ ແອ໋ງ ມີ່ງ ນອມ ຕ໋ອງ ໂກ ເຕີ໋ຍ ເຍີຍ, ດົ່ງ ຕສອຍ ຢຽດ ເລົາ ຫລະເປຢີ໊ຍ ໂກ ເຍີຍ ຕ໋ອງ, ຢຽມ ວົ້ວ ເກວີ່ຍ ເອຈ່ຍ ເຖສົາ ທິນ-ຮູ່ງ ກ໊ອງ ຫວ່າ.

42ນິ່ນ ກ໊ອງ, “ອາ ເຕຍ ອ້າ! ເຊ ກ໊ອງ ເອີຍ ເຕຍ ເຍີຍ ເອີ໋ຍ ນໍ, ໂທ້ ເຕສ໊າະ ອກອຍ ເຢຍ ອ໋ອຍ ຕສຸ ຮົບ ນ້າຍ ນອມ ຕສ໊ານ. ມປ່າ ໄມ້ ຕູ໋ງ ເອີຍ ເຢຍ ເຍີຍ ເອີ໋ຍ. ອ໋ອຍ ຕສຸ ເອີຍ ເຕຍ ກັ້ນ ເຍີຍ ເອີ໋ຍ ຮນັ້ງ.”

43ມ່າຍ ເຕົ້າ ຟິນ-ມ່ຽນ ຢຽມ ທິນ-ຕ້ອງ ຕ້າຍ ຫິ່ນ ທສວດ ເຖງ ທຈະ ເຢຊູ.

44ເຢຊູ ປະຫລະ ເດສົ້າ ຕຸ໊ ໂຄ້ວ ໄຫ່ ຕສ່ຽວ ຈາ ຫລົ່ງ ທຈະ ເຕົ໋າ ເກົ໋າ. ນິ່ນ ທສວດ ຫັ່ນ ຢຽດ ນອມ ຢຽດ ນອມ ໂຮລ ເຍີຍ, ຮນັ້ງ ດສຢ໊າມ ນໍ ດ໊ຽບ ເອຈ່ຍ ເດົາ.

45ເຢຊູ ເຕົ໋າ ເກົ໋າ ປ່າ, ເຈ໌ຍ ຊິນ ຕ້າຍ ເຖົາ ໄຊ-ກໍ໋ ບົວ ວົ້ວ, ປວັດ ນິ່ນ ບົວ ຫລາຍ ເດສົ້າ ຕຸ໊ ໂຄ້ວ ໄຫ່, ມອຈ້ອມ ໝີ່ ອ໊ະ.

46ນິ່ນ ກ໊ອງ ບົ໋ວ ໄຊ-ກໍ໋ ບົວ, “ເມີ່ຍ ບົວ ຝູ່ງ ຮນັ້ງ ນ້າຍ ນໍ ມອຈ້ອມ? ເຈ໌ຍ ຊິນ ໂທ້ ທິນ-ຮູ່ງ ເຖງ ເມີ່ຍ ບົວ ໄມ້ ຕສຸ ປວັ້ງ ເສີຍ ໂຮຍ້ວ ເຍີຍ ສີ່ ມ່າະ!”

47ເຢຊູ ກ໊ອງ ຫວ່າ ຕສູ໊ງ ໄມ້ ແກ້ງ ເຊດ, ມ່າຍ ກວັ້ນ ມ່ຽນ ຕ້າຍ. ຕສຽບ ເຫຍີ່ຍ ເຕົ້າ ໄຊ-ກໍ໋ ເຍີຍ ຢຽດ ເຕົ້າ, ບົ໋ວ ເຫ່ວ ຢູດາດ, ຢ່າ ຕໍ້ ຈ໊ຽນ ນິ່ນ ບົວ ຕ້າຍ. ຢູດາດ ມີ່ງ ຟັດ ເຍີຍ ອ໋ອຍ ຕສົມ ເຢຊູ.

48ມປ່າ ເຢຊູ ໜ່າຍ, “ຢູດາດ ອ່າ, ເມີ່ຍ ຕສົມ ເຢຍ, ປ້າມ ມ່ຽນ ເຍີຍ ຕອນ, ເຫວີ່ຍ ເຕສ໊າະ ເຢຍ ໝ່າຍ ໄຟ?”

49ເຖສົາ ເຢຊູ ຢຽມ ວົ້ວ ເຕີ໋ຍ ໄຊ-ກໍ໋ ປວັດ ອ໋ອຍ ມ່າຍ ຫາຍ ຫຍູ່ງ ສີ່ ທສວດ, ນິ່ນ ບົວ ຕສ່ຽວ ໜ່າຍ ກ໋າ, “ຕສ໊ຽວ ອ້າ! ແປງ ດສຸ ດ໊າວ ຮງະ ນິ່ນ ບົວ ຕຸ໊ ເຍີຍ ຊ່າະ?”

50ມ່າຍ ເຕົ້າ ຕສູ໊ງ ຮງະ ຕົ້ມ ໄຊ ມ່ຽນ ເຍີຍ ໂນ່ວ ຕສ່ຽວ ໄພ ຕສຸ ໂນ່ວ ເຍີຍ ບຢ່າວ ປູງ ມນ່ອມ ດຸ໊ດ ໝີ່ ອ໊ະ.

51ມປ່າ ເຢຊູ ກ໊ອງ, “ໄມ້ ຕູ໋ງ ໂຕສ໋ວ ມ່າະ!” ນິ່ນ ຕສ່ຽວ ຮລົວ ວົ້ວ ເຕົ້າ ໂນ່ວ ເຍີຍ ມນ່ອມ ຕສໍ່ ຫລົງ ໝີ່ ອ໊ະ.

52ເຢຊູ ກ໊ອງ ບົ໋ວ ຕ້າຍ ເຕສ໊າະ ນິ່ນ ວົ້ວ ເຕີ໋ຍ ໄຊ ມ່ຽນ ເປຢີ໊ຍ ເຖສົາ ໂກ໋ວ ຮູ່ງ ຕິ່ນ ເຍີຍ ແປງ-ເປຢີ໊ຍ ເຖສົາ ມ່ຽນ ໂກ໋, “ເມີ່ຍ ບົວ ປວັດ ເຢຍ ຮນັ້ງ ຕສະ ແປງ ຖສີງ ຕ້າຍ ຕໍ້ ຈ໊ຽນ ດສຸ ດ໊າວ ເຖສົາ ດຢັ໋ງ-ດົ໋ນ ຕ້າຍ ເຕສ໊າະ ເຢຍ?

53ເຢຍ ຮນອຍໆ ເຖສົາ ເມີ່ຍ ບົວ ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ, ເມີ່ຍ ບົວ ຢ່າ ໄມ້ ເຕສ໊າະ. ມປ່າ ອີ້ ຕສັ່ນ ເຊ ເມີ່ຍ ບົວ ເຍີຍ ຕສຢັ້ງ ໂຫ່ ອ໊ະ. ຫຮມວັງ ເຍີຍ ທຈະ ຢ່າ ກຸ໊ນ ຈ໊ຽນ.”

54ນິ່ນ ບົວ ເຕສ໊າະ ເຢຊູ ຕໍ້ ມີ່ງ ຕົ້ມ ໄຊ ມ່ຽນ ເຍີຍ ເປຢົ໊າ. ປີເຕ ຢ່າ ກັນ ຈ໊ຽນ ມີ່ງ ມປ່າ ເລີ່ຍ ໂກ ເຕີ໋ຍ ເຍີຍ.

55ຢຽມ ຫລາດ ກະຍົ໌ວ, ບຸດົ໋ງ ວົ້ວ ນອມ ຕ໋ອງ, ນິ່ນ ບົວ ປົ໊ວ ຈ໊ຽນ ໂຕ໌ວ ເຕສວີ໌ຍ ຈ໊ຽນ. ປີເຕ ຢ່າ ເຖສົາ ນິ່ນ ບົວ ເຕສວີ໌ຍ ວົ້ວ.

56ມ່າຍ ເຕົ້າ ມເຊັຍ ໂປວ ປວັດ ປີເຕ ເຕສວີ໌ຍ ໂຕ໌ວ-ເດສົ່າ ເຮລນ, ໂຕ໌ວ ແອ໊ງ ຕສຸ ປີເຕ. ວົ້ວ ເຕົ້າ ໂປວ ນຸໆ ເຍີຍ ໝັ່ງ ຢ່າ ກ໊ອງ, “ນ້າຍ ເຕົ້າ ຢ່າ ເຖສົາ ວົ້ວ ລ່ານ ມ່ຽນ ຢຽມ.”

57ມປ່າ ປີເຕ ໄມ້ ຫຍ່ຽມ. ນິ່ນ ກ໊ອງ, “ເມີ່ຍ ນ້າຍ ເຕົ້າ ມເຊັຍ ຕອນ ອ້າ! ເຢຍ ໄມ້ ຮິ້ວ ຕຸ໊ ນິ່ນ ນີອາ.”

58ອ໊າ ຕັ້ງ ແອ໋ງ ມ່າຍ ເຕົ້າ ມ່ຽນ ປວັດ ປີເຕ ຕສ່ຽວ ກ໊ອງ, “ເມີ່ຍ ຢ່າ ຕົ້ງ ຢຽດ ເຕົ້າ ວົ້ວ ກວັ້ນ ມ່ຽນ ນີອາ.” ມປ່າ ປີເຕ ເຕົາ, “ເມີ່ຍ ໜ່າຍ ເຕົ້າ ມ່ຽນ ອ້າ! ເຢຍ ໄມ້ ເຕສີ໌ຍ ເຫລາະ.”

59ອກະຮ້າ ຢຽດ ນອມ ຕສຢັ້ງ ໂຫ່ ເຍີຍ ຕ໋ອງ, ແອ໋ງ ມ່າຍ ເຕົ້າ ມ່ຽນ ຕ້າຍ ຕີ່ ຈ໊ຽນ ກ໊ອງ, “ນ້າຍ ເຕົ້າ ດົ່ງ ຫາຍ ຕສູ໊ງ ໂຕສ໋ວ ຢຽດ ເຕົ້າ ນິ່ນ ເຍີຍ ມ່ຽນ, ເຫວີ່ຍ ຕສຸ ນິ່ນ ເຊ ກາລິລີ ມ່ຽນ.”

60ມປ່າ ປີເຕ ເຕົາ, “ເມີ່ຍ ໜ່າຍ ເຕົ້າ ມ່ຽນ ອ້າ! ເຢຍ ຕສູ໊ງ ໄມ້ ຮິ້ວ ຕຸ໊ ເມີ່ຍ ກ໊ອງ ຫາຍ ຫຍູ່ງ.” ປີເຕ ກ໊ອງ ນ້າຍ ເຕີ໋ຍ ຫວ່າ ໄມ້ ແກ້ງ ເຊດ, ໄຈ ຕສ່ຽວ ອກ໋າຍ ອ໊ະ.

61ຕສ໊ຽວ ຮວິນ ດສ໋ວນ ໝັ່ງ ຈ໊ຽນ ປີເຕ, ປີເຕ ຕສ່ຽວ ຈັ໋ງ ຕສຸ ຕສິ້ນ ດ່າງ ຕສ໊ຽວ ກ໊ອງ ເຍີຍ ຫວ່າ, “ອີ້ ມ໌ວນ ໄຈ ຕສູ໊ງ ໄມ້ ແກ້ງ ອກ໋າຍ, ເມີ່ຍ ໄມ້ ຫຍ່ຽມ ເຢຍ ປົວ ດສຸ່ນ.”

62ປີເຕ ຕສ່ຽວ ທສວດ ມີ່ງ ທຈະ ຍ້ຽມ ຕຸ໊ ໂຄ້ວ ໄຫ່.

63ໂກ໋ວ ເຢຊູ ວົ້ວ ເຕີ໋ຍ ມ່ຽນ ກວັດ ໂຕະ ຈັ໊ດ ເຢຊູ ຢ່າ ເບ໊າະ ນິ່ນ.

64ນິ່ນ ບົວ ປວັງ ຈ໊ຽນ ນິ່ນ ເຍີຍ ມຕສີງ ໜ່າຍ ນິ່ນ, “ໄທສ ກ໋າ! ຫາຍ ເຕົ້າ ເບ໊າະ ເມີ່ຍ?”

65ນິ່ນ ບົວ ຢ່າ ກ໊ອງ ຫວ່າ ທສ້ຳ ເຍີຍ ຮວວດ ເຢຊູ.

66ລູ່ງ ອຈັງ ວົ້ວ ຕສັ່ນ, ຢິວໄທ ມ່ຽນ ເຍີຍ ມ່ຽນ ໂກ໋ ເຖສົາ ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ກັ໊ບ ຕສຸ໊ນ ແອ໋ງ ຕໍ້ ເຢຊູ ມີ່ງ ຢຽມ ນິ່ນ ບົວ ເຍີຍ ກຸ໊ນ ສີ່ ຫວຸ່ຍ ດສະຮມຽນ.

67ນິ່ນ ບົວ ກ໊ອງ, “ເຊ ກ໊ອງ ເມີ່ຍ ຕສະເກ້ງ ກີຕູ່, ບົ໋ວ ເຢຍ ບົວ ມ່າະ!” ເຢຊູ ເຕົາ, “ເຊ ກ໊ອງ ເຢຍ ບົ໋ວ ເມີ່ຍ ບົວ ນໍ, ເມີ່ຍ ບົວ ຢ່າ ໄມ້ ສຽນ.

68ເຊ ກ໊ອງ ເຢຍ ໜ່າຍ ໂຈ໋ວ ຫວ່າ ເມີ່ຍ ບົວ, ເມີ່ຍ ບົວ ຢ່າ ໄມ້ ເຕົາ.

69ມປ່າ ຢັ້ງ ນ້າຍ ເຈ໋ຍ, ເຢຍ, ປ້າມ ມ່ຽນ ເຍີຍ ຕອນ, ຕສ່ຽວ ເຕສວີ໌ຍ ຈ໊ຽນ ມ່າຍ ທຈະ ເຍີຍ ທິນ-ຮູ່ງ ເຍີຍ ບຢ່າວ ແໝງ.”

70ນິ່ນ ບົວ ຢຽດ ຕສູ໊ງ ກ໊ອງ, “ວົ້ວ ຫຍູ່ງ, ເມີ່ຍ ໂຕສ໋ວ ທິນ-ຮູ່ງ ເຍີຍ ຕອນ?” ເຢຊູ ເຕົາ ນິ່ນ ບົວ, “ເຢຍ ຕົ້ງ ຫາຍ ເຕົ້າ ເມີ່ຍ ບົວ ກັ້ນ ກ໊ອງ ລິ໌ວ ອ໊ະ.”

71ນິ່ນ ບົວ ກ໊ອງ, “ເຢຍ ບົວ ໄມ້ ຕສຸ ແອ໋ງ ຫລົ່ງ ຫາຍ ຫຍູ່ງ ໂຕສ໋ວ ຕສອງ-ເຕສ໋ງ ອ໊ະ. ເຢຍ ບົວ ຕສູ໊ງ ໄຮ໌ ນິ່ນ ກັ້ນ ເຍີຍ ດສຸ້ຍ ກ໊ອງ ລິ໌ວ ອ໊ະ.”

← Chapter 21 Jump to: Chapter 23 →