Luke 9

Lao Bible (ฉบับอักษรลาว)

1ເຢຊູ ເຫ່ວ ນິ່ນ ເຍີຍ ຕສຽບ ເຫຍີ່ຍ ເຕົ້າ ກົງ-ໂຕສ້ ຕ້າຍ ຕສຸ໊ນ ຕສ່ຽວ ຈິວ ຫລີ່ງ ຈິວ ຫັດ ມ໌າ ປຸນ ນິ່ນ ບົວ ໄຮ່ ຕສຸ່ນ ຕຸ໊ ຫຍູ່ງໆ ມ້ຽນ ທສວດ ຢ່າ ໄຮ່ ຕສໍ່ ຕຸ໊ ແປ່ງ ຫລົງ.

2ນິ່ນ ພ້າຍ ນິ່ນ ບົວ ທສວດ ມີ່ງ ຕສຸ້ນ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຄູ້ ຝຽນ ຢ່າ ຕສໍ່ ແປ່ງ.

3ເຢຊູ ບົ໋ວ ນິ່ນ ເຍີຍ ໄຊ-ກໍ໋, “ທສວດ ເຈົ໊າ ໄມ້ ຕູ໋ງ ຕໍ້ ຫາຍ ຫຍູ່ງ ມີ່ງ. ປຢ໊າ-ບຢ່າ, ບົວະ ຈ໋ອງ, ປ້ຽນ ຝຸຍ, ຕສິ້ນ ຍ່ານ, ລ່ຽມ ລຸຍ-ໂຫວ ຢ່ຽນ ຢ່າ ໄມ້ ຕູ໋ງ ຕໍ້.

4ເມີ່ຍ ບົວ ຮິດ ຫາຍ ເຕົ້າ ເຍີຍ ເປຢົ໊າ, ອ໋ອຍ ຕສຸ ຮິດ ເຖົາ ທສວດ ມີ່ງ ກັ້ນ ນອມ ມູ້ງ.

5ມ່ຽນ ໄມ້ ຕສິ໊ບ ນໍ, ອ໋ອຍ ຕສຸ ທສວດ ວົ້ວ ນອມ ລ໌າງ ຢ່າ ເຝງ ກົ໊ວະ ເຕສົ໋າ ເຍີຍ ເນຍ-ບູງ ກວັ່ງ ວົ້ວ, ເຫວີ່ຍ ໂຕສ໋ວ ຕສອງ-ເຕສ໋ງ ປຸນ ນິ່ນ ບົວ ຮິ້ວ ຕຸ໊ ນິ່ນ ບົວ ໂຕສ໋ວ ຕ່ອງ.”

6ກົງ-ໂຕສ້ ບົວ ຕສ່ຽວ ມີ່ງ ລ໌າງ ເຈ໋ຍ ລ໌າງ, ຢຽມ ນອມໆ ຕ໋ອງ ຕສຸ້ນ ຄູ້ ຝຽນ ຢ່າ ຕສໍ່ ແປ່ງ.

7ກຸ໊ນ ກາລິລີ ເຕີ່ຍ-ປູງ ວົ້ວ ເຕົ້າ ເຮລົດ ຮູ່ງ ໄຮ໌ ນ້າຍ ເຕີ໋ຍ ຢຽດ ຕສູ໊ງ ສີ່ ທສວດ, ນິ່ນ ຮນ້ຳ ໄມ້ ເມ່ງ ແປະ. ມ່າຍ ເຕີ໋ຍ ກ໊ອງ ເຖງ ມ່ຽນ ເຈ໋ຍ ວວມ ເຍີຍ ເລີ໌ຍ ວົ້ວ ເຕົ້າ ໂຢຮັນ ແອ໋ງ ນັ່ງ ຕ້າຍ.

8ມ່າຍ ເຕີ໋ຍ ກ໊ອງ ເອລີຢາ ຫິ່ນ ທສວດ ຕ້າຍ. ແອ໋ງ ມ່າຍ ເຕີ໋ຍ ກ໊ອງ ມ່າຍ ຢຽດ ເຕົ້າ ໂລ໌-ຮນອຍ ເຍີຍ ໂຕ່ວ ຫວ່າ ມ່ຽນ ນັ່ງ ຕ້າຍ.

9ເຮລົດ ກ໊ອງ, “ໂຢຮັນ ເຍີຍ ມອກ໊ອງ ເຢຍ ຕສູ໊ງ ບົ໋ວ ມ່ຽນ ຮງະ ດຸ໊ດ ໝີ່ ອ໊ະ. ວົ້ວ ຫຍູ່ງ, ຕົ້ງ ເຢຍ ໄຮ໌ ກ໊ອງ ໂຕສ໋ວ ນ້າຍ ເຕີ໋ຍ ສີ່ ວົ້ວ ລ່ານ ມ່ຽນ ເຊ ຫາຍ ເຕົ້າ?” ເຮລົດ ຕສ່ຽວ ລໍ໌ ຖຈັງ ປວັດ ເຢຊູ.

10ກົງ-ໂຕສ້ ບົວ ດສ໋ວນ ຕ້າຍ ກ໊ອງ ນິ່ນ ບົວ ໂຕສ໋ວ ລິ໌ວ ເຍີຍ ຢຽດ ຕສູ໊ງ ເຈົ໊າ-ໂຫລ່ວ ປຸນ ເຢຊູ ໝວັງ. ເຢຊູ ຕໍ້ ຈ໊ຽນ ກົງ-ໂຕສ້ ບົວ ກັ້ນ ມີ່ງ ນອມ ມູ້ງ, ບົ໋ວ ເຫ່ວ ເບດໄຊດາ.

11ມ່ຽນ ທສ້ຳ ຮິ້ວ ຕຸ໊, ຕສ່ຽວ ກັນ ຈ໊ຽນ ມີ່ງ. ເຢຊູ ຕສິ໊ບ ນິ່ນ ບົວ ຢ່າ ກ໊ອງ ທິນ-ຮູ່ງ ໂຕສ໋ວ ຕສ໊ຽວ ເຍີຍ ຄູ້ ຝຽນ ບົ໋ວ ນິ່ນ ບົວ. ຫາຍ ເຕົ້າ ຖຈຽມ ຕສຸ ຕສໍ່ ແປ່ງ, ນິ່ນ ຢ່າ ຕສໍ່ ຫລົງ.

12ບະຮນອຍ ອ໊າ ລ່ຳ ເຕີ໋ຍ ມວດ ອ໊ະ. ວົ້ວ ເຕີ໋ຍ ຕສຽບ ເຫຍີ່ຍ ເຕົ້າ ໄຊ-ກໍ໋ ຕ້າຍ ບົ໋ວ ເຢຊູ, “ອ໋ອຍ ຕສຸ ປຸນ ນ້າຍ ເຕີ໋ຍ ມ່ຽນ ມີ່ງ ອ໊ະ. ບົ໋ວ ນິ່ນ ບົວ ມີ່ງ ນ້າຍ ເຕີ໋ຍ ຕ໋ອງ ເຍີຍ ລ໌າງ ເຖສົາ ເດີ່ຍ-ລິ່ວ ຈອມ ລໍ໌ ກະນ້າຍ ຫຍັ່ນ, ລໍ໌ ຕ໋ອງ ຮິດ, ເຫວີ່ຍ ຕສຸ ນ້າຍ ເຊ ເລ່ງ ເຍີຍ ຕ໋ອງ.”

13ມປ່າ ເຢຊູ ບົ໋ວ ນິ່ນ ບົວ, “ເມີ່ຍ ບົວ ກັ້ນ ລໍ໌ ປຸນ ນິ່ນ ບົວ ຫຍັ່ນ ມ່າະ!” ນິ່ນ ບົວ ເຕົາ, “ເຢຍ ບົວ ຂູງ ມ່າຍ ດຸ ປຢາ ນອມ ອຈົ໊ວ ເຖສົາ ອີ ເຕົ້າ ເບຢົ໌າ ຮນັ້ງ. ໄຊ-ເຕ໋ຍ ອ໋ອຍ ເຢຍ ບົວ ມີ່ງ ມ໌າຍ ກະນ້າຍ ປຸນ ດົ່ງ ນ້າຍ ທສ້ຳ ເຍີຍ ມ່ຽນ ຫຍັ່ນ?”

14(ຢຽມ ວົ້ວ ເຍີຍ ມຈັ່ງ ຕອນ ມ່າຍ ເລີ່ຍ ໄມ້ ໂກ ປຢາ ທສິນ ລ່ານ ເຍີຍ ຕ໋ອງ.) ເຢຊູ ບົ໋ວ ນິ່ນ ເຍີຍ ໄຊ-ກໍ໋ ບົວ, “ເຫ່ວ ຕສວັ໋ງ ມ່ຽນ ເຕສວີ໌ຍ ຈ໊ຽນ ຢຽດ ບົ໌ມ ຢຽດ ບົ໌ມ ເຍີຍ. ຢຽດ ບົ໌ມ ເລີ່ຍ ໄມ້ ໂກ ຮມ໌ ຕສຽບ ລ່ານ ເຍີຍ ຕ໋ອງ.”

15ໄຊ-ກໍ໋ ບົວ ເອີຍ ຈ໊ຽນ ນ້າຍ ເຕີ໋ຍ ຫວ່າ ໂຕສ໋ວ. ຕສວັ໋ງ ມ່ຽນ ຕສ່ຽວ ເຕສວີ໌ຍ ເອຈ່ຍ.

16ເຢຊູ ເຕສ໊າະ ວົ້ວ ເຕີ໋ຍ ປຢາ ນອມ ອຈົ໊ວ ເຖສົາ ອີ ເຕົ້າ ເບຢົ໌າ ເທສົາ ຮມຽນ ໝັ່ງ ລູ່ງ, ແລ໌ງ ຕສີ້ງ ທິນ-ຮູ່ງ ລິ໌ວ ຕສ່ຽວ ແມະ ອກອຍ ປຸນ ໄຊ-ກໍ໋ ບົວ ຕໍ້ ມີ່ງ ປຸນ ອກອຍ ຕສວັ໋ງ ມ່ຽນ ຫຍັ່ນ.

17ຕສວັ໋ງ ມ່ຽນ ຫຍັ່ນ ເປ໊ວ ເດສ່ງ. ເຕສ່ງ ເອຈ່ຍ ໝ່ວນ ວົ້ວ ເຕີ໋ຍ ກະນ້າຍ, ໄຊ-ກໍ໋ ບົວ ຊຽວ ຕ້າຍ ຕຸ໊ ຕສຽບ ເຫຍີ່ຍ ດານ ປວັ໊ງ.

18ມ່າຍ ຮນອຍ ເຢຊູ ຢຽມ ເລ່ງ ເຍີຍ ຕ໋ອງ, ນິ່ນ ກັ້ນ ເຕົ໋າ ເກົ໋າ. ໄຊ-ກໍ໋ ບົວ ຢ່າ ເຖສົາ ນິ່ນ ຢຽມ ເຍີຍ. ເຢຊູ ໜ່າຍ ກ໋າ ນິ່ນ ບົວ, “ຕສວັ໋ງ ມ່ຽນ ກ໊ອງ ເຢຍ ເຊ ຫາຍ ເຕົ້າ?”

19ໄຊ-ກໍ໋ ບົວ ເຕົາ, “ມ່າຍ ເຕີ໋ຍ ກ໊ອງ ເມີ່ຍ ຕົ້ງ ເຖງ ມ່ຽນ ເຈ໋ຍ ວວມ ເຍີຍ ເລີ໌ຍ ວົ້ວ ເຕົ້າ ໂຢຮັນ. ມ່າຍ ເຕີ໋ຍ ກ໊ອງ ເອລີຢາ. ແອ໋ງ ມ່າຍ ເຕີ໋ຍ ກ໊ອງ ເມີ່ຍ ຢຽດ ເຕົ້າ ໂລ໌-ຮນອຍ ເຍີຍ ໂຕ່ວ ຫວ່າ ມ່ຽນ ແອ໋ງ ນັ່ງ ຕ້າຍ.”

20ເຢຊູ ແອ໋ງ ກ໊ອງ, “ເມີ່ຍ ບົວ ນີ? ເມີ່ຍ ບົວ ກ໊ອງ ເຢຍ ຕົ້ງ ຫາຍ ເຕົ້າ?” ປີເຕ ເຕົາ, “ເມີ່ຍ ຕົ້ງ ທິນ-ຮູ່ງ ພ້າຍ ຕ້າຍ ເຍີຍ ກີຕູ່.”

21ເຢຊູ ຫັດ ນິ່ນ ເຍີຍ ໄຊ-ກໍ໋, ເຫ່ວ ນິ່ນ ບົວ ໄມ້ ຕູ໋ງ ກ໊ອງ ນ້າຍ ເຕີ໋ຍ ສີ່ ບົ໋ວ ຫາຍ ເຕົ້າ.

22ນິ່ນ ຢ່າ ກ໊ອງ, “ເຢຍ, ປ້າມ ມ່ຽນ ເຍີຍ ຕອນ, ອ໋ອຍ ຕສຸ ສ່ຽວ ທສ້ຳ-ຫຍູ່ງ ໂຄ້ວ. ມ່ຽນ ໂກ໋ ເຖສົາ ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ອ໋ອຍ ເອກ້ມ ເຢຍ, ຕໍ້ ເຢຍ ມີ່ງ ໄຕ໋ ກວັ່ງ, ມປ່າ ອກະຮ້າ ປົວ ຮນອຍ ເຢຍ ແອ໋ງ ນັ່ງ ຕ້າຍ.”

23ເຢຊູ ແອ໋ງ ກ໊ອງ ບົ໋ວ ນິ່ນ ບົວ ຢຽດ ຕສູ໊ງ, “ຫາຍ ເຕົ້າ ອ໋ອຍ ກັນ ເຢຍ ມີ່ງ ອ໋ອຍ ຕສຸ ເຊ້ຍ ຈ໊ຽນ ນິ່ນ ກັ້ນ. ຮນອຍໆ ອ໋ອຍ ຕສຸ ດາມ ຈ໊ຽນ ນິ່ນ ເຍີຍ ຕສຽບ ດສັ່ງ ຈ໋າ ກັນ ເຢຍ ມີ່ງ.

24ຫາຍ ເຕົ້າ ຂູງ ຮນ້ຳ ໂອຈ໋ວ ນິ່ນ ກັ້ນ ເຍີຍ ແໝ່ງ ຮນັ້ງ, ວົ້ວ ເຕົ້າ ເຍີຍ ແໝ່ງ ຕສ່ຽວ ຕສຸ ກວັ່ງ. ມປ່າ ຫາຍ ເຕົ້າ ເຫວີ່ຍ ເຢຍ ກວັ່ງ ນິ່ນ ເຍີຍ ແໝ່ງ, ວົ້ວ ເຕົ້າ ຕສ່ຽວ ໂອຈ໋ວ ຕຸ໊ ນິ່ນ ເຍີຍ ແໝ່ງ.

25ຫາຍ ເຕົ້າ ຕຸ໊ ເດສ່ງ ລູ່ງ ເດ໊ຍ ເຍີຍ ກະນ້າຍ ມປ່າ ນິ່ນ ກັ້ນ ຕສຸ ໝຽດ, ວົ້ວ ເຕົ້າ ຕຸ໊ ຫາຍ ຫຍູ່ງ ມ່າຍ ລ່ຳ ຫລົ່ງ?

26ຫາຍ ເຕົ້າ ໄຍ້ ເຢຍ ຢ່າ ໄຍ້ ເຢຍ ອຈ໋າວ ເຍີຍ ຫວ່າ, ເຢຍ, ປ້າມ ມ່ຽນ ເຍີຍ ຕອນ, ເຖສົາ ເຢຍ ກັ້ນ ເຍີຍ ອຈັງ-ຫລ່າງ ຢ່າ ເຖສົາ ຕສັ່ງ ເຕ໋ຍ ເຖສົາ ທສີງ-ເດສ່ງ ຟິນ-ມ່ຽນ ເຍີຍ ອຈັງ-ຫລ່າງ ຕ້າຍ ວົ້ວ ຕສັ່ນ, ເຢຍ ຕສ່ຽວ ໄຍ້ ວົ້ວ ເຕົ້າ.

27ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຢຽມ ນ້າຍ ເຍີຍ ມ່ຽນ ມ່າຍ ເຕີ໋ຍ ຕສູ໊ງ ໄມ້ ແກ້ງ ໄຕ່ ຕສ່ຽວ ຕຸ໊ ປວັດ ທິນ-ຮູ່ງ ຕ້າຍ ໂຕສ໋ວ ຕສ໊ຽວ ກຸ໊ນ ມ່ຽນ.”

28ເຢຊູ ກ໊ອງ ລິ໌ວ ນ້າຍ ເຕີ໋ຍ ຫວ່າ, ອກະຮ້າ ເສ່ຍ ຫຮຢຽດ ຮນອຍ ເຍີຍ ຕ໋ອງ, ນິ່ນ ຕໍ້ ຈ໊ຽນ ປີເຕ, ໂຢຮັນ, ເຖສົາ ຢາກອບ ມີ່ງ ວົ້ວ ເຈ໋ຍ ບົງ ເຕົ໋າ ເກົ໋າ.

29ເຢຊູ ເຕົ໋າ ເກົ໋າ ວົ້ວ ຕສັ່ນ, ນິ່ນ ເຍີຍ ຮມຽນ ທິ້ວ ເດສ່ງ ໝີ່ ອ໊ະ. ນິ່ນ ເຍີຍ ລຸຍ-ໂຫວ ຢ່າ ທິ້ວ ໝີ່ ອ໊ະ, ບົ໊ບ ແປະ ເຍີຍ, ແຕສ້ງໆ ວົ້ວ.

30ລ່ຽມ ເຕສີ້ຍ ມ່າຍ ອີ ລ່ານ ມ່ຽນ ຢຽມ ວົ້ວ ເຖສົາ ເຢຊູ ກ໊ອງ ຫວ່າ, ເຊ ໂມເຊ ເຖສົາ ເອລີຢາ.

31ນິ່ນ ບົວ ຢຽມ ອຈັງ-ຫລ່າງ ຫິ່ນ ທສວດ ຢ່າ ຢຽມ ວົ້ວ ເຖສົາ ເຢຊູ ກ໊ອງ ເຖົາ ນິ່ນ ໄຕ່ ເຍີຍ ເຈົ໊າ ໄມ້ ເລົ່າ ອ໋ອຍ ຢຽມ ເຢລູຊາເລມ ຕສີ້ງ ຕສຢັ້ງ ສີ່.

32ວົ້ວ ຕສັ່ນ ປີເຕ ເຖສົາ ນິ່ນ ເຍີຍ ອີ ເຕົ້າ ຕ່ອຍ ມຕສີງ ຫຍຸຍ, ອ໋ອຍ ມອຈ້ອມ ໄຫ່ ອ໊ະ. ນິ່ນ ບົວ ຢ໊ຽດ ເຍຍ ຕ້າຍ, ປວັດ ເຢຊູ ເຍີຍ ອຈັງ-ຫລ່າງ ຢ່າ ປວັດ ວົ້ວ ເຕີ໋ຍ ອີ ລ່ານ ມ່ຽນ ເຖສົາ ເຢຊູ ໂຊ້ວ ຈ໊ຽນ ວົ້ວ.

33ວົ້ວ ເຕີ໋ຍ ອີ ລ່ານ ເຖສົາ ເຢຊູ ອ໋ອຍ ເລີ່ຍ ຕ່ອຍ ວົ້ວ ຕສັ່ນ ປີເຕ ກ໊ອງ ບົ໋ວ ເຢຊູ, “ຕສ໊ຽວ ອ້າ! ເຢຍ ບົວ ຢຽມ ນ້າຍ ເກ້ງ ຫລົງ ໄຫ່. ໂທ້ ປຸນ ເຢຍ ບົວ ໂຕສ໋ວ ປົວ ນອມ ລິ່ວ, ໂຕສ໋ວ ນອມ ປຸນ ເມີ່ຍ, ໂຕສ໋ວ ນອມ ປຸນ ໂມເຊ, ແອ໋ງ ໂຕສ໋ວ ນອມ ປຸນ ເອລີຢາ.” (ປີເຕ ຕສູ໊ງ ໄມ້ ຮິ້ວ ຕຸ໊ ນິ່ນ ກ໊ອງ ຫາຍ ຫຍູ່ງ.)

34ນິ່ນ ກ໊ອງ ຫວ່າ ຕສູ໊ງ ໄມ້ ແກ້ງ ເຊດ, ມ່າຍ ຕໍ໊ ບ໋ວນ ຕ້າຍ ເດສຍ ຈ໊ຽນ ນິ່ນ ບົວ. ໄຊ-ກໍ໋ ບົວ ເປັຍ ບ໋ວນ ກະຍົ໌ວ ນິ່ນ ບົວ ກ້ຳ ເດສ໋ຍ ໄຫ່.

35ໄຮ໌ ຫວ່າ ຢຽມ ບ໋ວນ ກະຍົ໌ວ ທສວດ ຕ້າຍ ກ໊ອງ, “ນ້າຍ ເຊ ເຢຍ ເຍີຍ ຕອນ, ຕົ້ງ ເຢຍ ກິ໊ນ ຕ້າຍ ວົ້ວ ເຕົ້າ. ໝວັງ ນິ່ນ ມ່າະ!”

36ນ້າຍ ເຕີ໋ຍ ເຖຈຍ ເຊກ ໝີ່ ອ໊ະ, ຂູງ ມ່າຍ ເຢຊູ ກັ້ນ ຢຽມ ວົ້ວ ຮນັ້ງ. ໄຊ-ກໍ໋ ບົວ ຢ່າ ມວັ່ງ ຈ໊ຽນ ນ້າຍ ເຕີ໋ຍ ເຈົ໊າ-ໂຫລ່ວ, ໄມ້ ແກ້ງ ກ໊ອງ ນິ່ນ ບົວ ຕຸ໊ ປວັດ ລິ໌ວ ເຍີຍ ເຈົ໊າ ບົ໋ວ ຫາຍ ເຕົ້າ.

37ຕະເຫຍີ່ຍ ຮນອຍ, ເຢຊູ ບົວ ຢຽມ ບົງ ເອຈ່ຍ ຕ້າຍ, ມ່າຍ ກວັ້ນ ມ່ຽນ ທສ້ຳ ເຍີຍ ຕ້າຍ ລໍ໌ ເຢຊູ.

38ວົ້ວ ກວັ້ນ ມ່ຽນ ມ່າຍ ເຕົ້າ ມຈັ່ງ ຕອນ ເຫ່ວ ຈ໊ຽນ ກ໊ອງ, “ຟິນ-ແຊງ ອ້າ! ໂທ້ ເມີ່ຍ ເຖງ ໝັ່ງ ເຢຍ ເຍີຍ ຕອນ. ເຢຍ ຂູງ ມ່າຍ ນ້າຍ ເຕົ້າ ຕອນ-ໂດະ ຮນັ້ງ.

39ນິ່ນ ຕສຸ ມ້ຽນ ມົວະ. ຢ໊ຽດ ຕສຸ ຢຽດ ດສຸ່ນ, ຕສ່ຽວ ເໜົ່າໆ ເຍີຍ ເຫ່ວ ແອ໋ງ ທສຽວ ອ໊ະ. ວວມ-ດສຸ້ຍ ບຢ໌າວ ປົ້ມໆ ເຍີຍ ທສວດ. ມ້ຽນ ຕສັ່ນໆ ຫ່ອຍ ນິ່ນ ໂຄ້ວ ໄຫ່, ໄມ້ ຄັ້ງ ປູ໋ງ ກວັ່ງ.

40ເຢຍ ໂທ້ ເມີ່ຍ ເຍີຍ ໄຊ-ກໍ໋ ບົວ ຕສຸ່ນ ມ້ຽນ ທສວດ ມປ່າ ນິ່ນ ບົວ ຕສຸ່ນ ໄມ້ ໄຮ່ ທສວດ.”

41ເຢຊູ ບົ໋ວ ຕສວັ໋ງ ມ່ຽນ, “ເມີ່ຍ ບົວ ອີ້ ຈ໋າ ເຍີຍ ມ່ຽນ ອ້າ! ເມີ່ຍ ບົວ ຕສະເກ້ງ ໄມ້ ສຽນ, ມນ່ອມ ຢ່າ ໂຮ໌ ໄຫ່. ເຢຍ ອ໋ອຍ ຕສຸ ເຖສົາ ເມີ່ຍ ບົວ ຢຽມ, ອ໋ອຍ ຕສຸ ຍ໌ຽນ ເມີ່ຍ ບົວ ດົ່ງ ຫາຍ ເລົ່າ?” ເຢຊູ ແອ໋ງ ກ໊ອງ ບົ໋ວ ວົ້ວ ລ່ານ ມ່ຽນ, “ຕໍ້ ເມີ່ຍ ເຍີຍ ຕອນ ຕ້າຍ ນ້າຍ ມ່າະ!”

42ນ້າຍ ເຕົ້າ ຕອນ ຕ້າຍ ຈ໊ຽນ ວົ້ວ ຕສັ່ນ, ມ້ຽນ ແອ໋ງ ມົວະ ນິ່ນ ຄີງ ເອຈ່ຍ ເດົາ ທສຽວ ຕຸ໊ ໂຄ້ວ ໄຫ່. ເຢຊູ ຕສ່ຽວ ຫັດ ເຮ່ຍ ໄກວ໊ ມ້ຽນ ຢ່າ ຕສໍ່ ຫລົງ ວົ້ວ ເຕົ້າ ຕອນ, ຈິວ ປຸນ ນິ່ນ ເຍີຍ ເຕຍ ໝີ່ ອ໊ະ.

43ຕສວັ໋ງ ມ່ຽນ ບົວະ ຮ່ອງ ໄຫ່ ທິນ-ຮູ່ງ ເຍີຍ ຕົ້ມ ທຈະ. ຕສວັ໋ງ ມ່ຽນ ຖສໍ່ ບົວະ ຮ່ອງ ໄຫ່ ເຢຊູ ໂຕສ໋ວ ເຍີຍ ຢຽດ ຕສູ໊ງ ສີ່ ວົ້ວ ຕສັ່ນ, ເຢຊູ ບົ໋ວ ນິ່ນ ເຍີຍ ໄຊ-ກໍ໋,

44“ເມີ່ຍ ບົວ ຫລົງໆ ເຍີຍ ໝວັງ ເຢຍ ອີ້ ຕສັ່ນ ບົ໋ວ ເມີ່ຍ ບົວ ນ້າຍ ເຕີ໋ຍ ຫວ່າ. ເຢຍ, ປ້າມ ມ່ຽນ ເຍີຍ ຕອນ, ອ໋ອຍ ຕສຸ ຈິວ ປຸນ ຢຽມ ມ່ຽນ ເຍີຍ ປົ໌ວ-ເດ໊ຍ.”

45ມປ່າ ໄຊ-ກໍ໋ ບົວ ໄມ້ ເມ່ງ ແປະ ນ້າຍ ໂຈ໋ວ ຫວ່າ ເຍີຍ ເອີ໋ຍ ເລີ໌ຍ. ເຊ ຮນັ້ງ ອ໊ອມ ຈ໊ຽນ ນໍ, ນິ່ນ ບົວ ຖສີງ ຕ້າຍ ໄມ້ ໄຮ່ ເມ່ງ ແປະ. ນິ່ນ ບົວ ຢ່າ ກ້ຳ ເດສ໋ຍ ໄມ້ ໜ່າຍ ເຢຊູ.

46ໄຊ-ກໍ໋ ບົວ ຢຽມ ນິ່ນ ບົວ ກັ້ນ ບຸດົ໋ງ ແດສງ ຫາຍ ເຕົ້າ ໂຕສ໋ວ ເກົ້າ ໂຮລ ເຈ໋ຍ.

47ມປ່າ ເຢຊູ ຮິ້ວ ຕຸ໊ ນິ່ນ ບົວ ຢຽມ ໂຮຍ້ວ ຮນັ້ງ ຫາຍ ນໍ ຮນ້ຳ, ນິ່ນ ຕສ່ຽວ ເຄນ ເຕົ້າ ຝຸຈ໊ວຍ ຕ້າຍ ໂຊ້ວ ຈ໊ຽນ ນິ່ນ ເຍີຍ ກະເຮລນ,

48ຢ່າ ກ໊ອງ ບົ໋ວ ນິ່ນ ບົວ, “ຫາຍ ເຕົ້າ ເຕ໊ງ ເຢຍ ເຍີຍ ບົ໋ວ ຕສິ໊ບ ນ້າຍ ເຕົ້າ ໄຝ ເຍີຍ ຝຸຈ໊ວຍ, ວົ້ວ ເຕົ້າ ຢ່າ ຕສິ໊ບ ເຢຍ. ຫາຍ ເຕົ້າ ຕສິ໊ບ ເຢຍ ຢ່າ ຕສິ໊ບ ພ້າຍ ເຢຍ ຕ້າຍ ວົ້ວ ເຕົ້າ. ຮນັ້ງ ໜ່າຍ, ຢຽມ ເມີ່ຍ ບົວ ເຍີຍ ບຸດົ໋ງ, ຫາຍ ເຕົ້າ ໂຕສ໋ວ ເກົ້າ ໄຝ ເຈ໋ຍ, ວົ້ວ ເຕົ້າ ຕຸ໊ ໂຕສ໋ວ ເກົ້າ ໂຮລ ເຈ໋ຍ.’

49ໂຢຮັນ ກ໊ອງ, “ໄຊ-ເຕ໋ຍ ອ້າ! ເຢຍ ບົວ ປວັດ ເຕົ້າ ມ່ຽນ ຫລົ່ງ ເມີ່ຍ ເຍີຍ ບົ໋ວ ຕສຸ່ນ ມ້ຽນ ທສວດ. ເຢຍ ບົວ ໄມ້ ປຸນ ນິ່ນ ໂຕສ໋ວ, ເຫວີ່ຍ ຕສຸ ນິ່ນ ໄມ້ ເຕສີ໌ຍ ໂຕສ໋ວ ບົວ ເຍີຍ ກວັ້ນ.”

50ເຢຊູ ບົ໋ວ ນິ່ນ, “ໄມ້ ຕູ໋ງ ລ່ານ ນິ່ນ, ເຫວີ່ຍ ຕສຸ ຫາຍ ເຕົ້າ ໄມ້ ເຖສົາ ບົວ ຕ໋ອຍ-ເຕກ, ວົ້ວ ເຕົ້າ ເຊ ເຖງ ບົວ ອ໊ະ.”

51ທິນ-ຮູ່ງ ອ໋ອຍ ຕສິ໊ບ ເຢຊູ ຝາວ ທິນ-ຕ້ອງ ເຍີຍ ຮນອຍ-ເຫຍັຍ ເຖົາ ຟັດ ອ໊ະ. ເຢຊູ ຕສ່ຽວ ຫລຽບ ຕີ່ງ ໂຮຍ້ວ ມີ່ງ ເຢລູຊາເລມ ຕສີ້ງ.

52ນິ່ນ ພ້າຍ ເຕີ໋ຍ ມ່ຽນ ມີ່ງ ດ່າງ. ນິ່ນ ບົວ ເປັຍ ນອມ ສະມາເລຍ ລ໌າງ, ອ໋ອຍ ເຖງ ເຢຊູ ຫລິ່ວ ເລີ໌ຍ ຕ໋ອງ,

53ມປ່າ ລ໌າງ ຕສັ່ງ ມ່ຽນ ໄມ້ ຄັ້ງ ຕສິ໊ບ ເຫວີ່ຍ ຕສຸ ປວັດ ເຢຊູ ອ໋ອຍ ມີ່ງ ເຢລູຊາເລມ ຕສີ້ງ.

54ເຢຊູ ເຍີຍ ໄຊ-ກໍ໋, ຢາກອບ ເຖສົາ ໂຢຮັນ, ປວັດ ຮນັ້ງ ນ້າຍ, ນິ່ນ ບົວ ກ໊ອງ, “ຕສ໊ຽວ ອ້າ! ເມີ່ຍ ອ໋ອຍ ເຢຍ ບົວ ເຫ່ວ ລູ່ງ ໂຕ໌ວ ເອຈ່ຍ ຕ້າຍ ປົ໊ວ ໝຽດ ເດສ່ງ ນິ່ນ ບົວ ໄຟ?”

55ເຢຊູ ຮວິນ ດສ໋ວນ ກ໊ອງ ນິ່ນ ບົວ.

56ເຢຊູ ບົວ ແອ໋ງ ມີ່ງ ກັ້ນ ນອມ ລ໌າງ ໝີ່ ອ໊ະ.

57ນິ່ນ ບົວ ກັນ ຈ໊ຽນ ເຈົ໊າ ມີ່ງ ເກົາ, ມ່າຍ ລ່ານ ມ່ຽນ ບົ໋ວ ເຢຊູ, “ໄມ້ ກຸ໊ນ ເມີ່ຍ ມີ່ງ ຫາຍ, ເຢຍ ອ໋ອຍ ກັນ ເມີ່ຍ ມີ່ງ.”

58ເຢຊູ ກ໊ອງ ບົ໋ວ ນິ່ນ, “ເຮ່ຍ ຈູ໊ ມ່າຍ ຄວດ ຢຽມ, ເໜາະ ຢ່າ ມ່າຍ ເລົ໌າ, ມປ່າ ເຢຍ, ປ້າມ ມ່ຽນ ເຍີຍ ຕອນ, ໄມ້ ມ່າຍ ຕ໋ອງ ເປວີ໋ຍ ຮິດ ຂວນ.”

59ເຢຊູ ແອ໋ງ ບົ໋ວ ລ່ານ ມ່ຽນ, “ກັນ ເຢຍ ມີ່ງ ມ່າະ!” ວົ້ວ ລ່ານ ມ່ຽນ ເຕົາ, “ຕົ້ມ ກໍ໋ ອ້າ! ເຢຍ ໂທ້ ດສ໋ວນ ມີ່ງ ປຢົ໊ບ ເຢຍ ເຍີຍ ເຕຍ ດ່າງ.”

60ເຢຊູ ເຕົາ, “ເຊວີ່ຍ ໄຕ່ ມີ່ງ ເຍີຍ ມ່ຽນ ກັ້ນ ປຢົ໊ບ ນິ່ນ ບົວ ເຍີຍ ໄຕ່ ມີ່ງ ເຍີຍ ມ່ຽນ ອ໊ະ. ເມີ່ຍ ກຸ໊ນ ມີ່ງ ຕສຸ້ນ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຄູ້ ຝຽນ.”

61ແອ໋ງ ມ່າຍ ລ່ານ ກ໊ອງ ບົ໋ວ ເຢຊູ, “ຕົ້ມ ກໍ໋ ອ້າ! ເຢຍ ອ໋ອຍ ກັນ ເມີ່ຍ ມີ່ງ ມປ່າ ເຢຍ ໂທ້ ດສ໋ວນ ບົ໋ວ ຕັ້ງ ເຢຍ ເຍີຍ ຮມວັ້ງ ຕ່ອຍ.”

62ເຢຊູ ກ໊ອງ, “ຫາຍ ເຕົ້າ ນັ້ນ ຈ໊ຽນ ໄລ່ ເປຢີ໊ຍ ໄລ່ ລີ່ງ ມປ່າ ນິ່ນ ຮວິນ ດສ໋ວນ ໝັ່ງ ອກະຮ້າ, ວົ້ວ ເຕົ້າ ໄມ້ ຜຸຍ ຢຽມ ທິນ-ຮູ່ງ ເຍີຍ ກົ໊ວະ.”

← Chapter 8 Jump to: Chapter 10 →