Matthew 19

Lao Bible (ฉบับอักษรลาว)

← Chapter 18 Jump to: Chapter 20 →

1ເຢຊູ ກ໊ອງ ລິ໌ວ ນ້າຍ ເຕີ໋ຍ ຫວ່າ ຕສ່ຽວ ທສວດ ກາລິລີ ແຊ້ງ ມີ່ງ ຢູເດຍ ແຊ້ງ ເຈ໋ຍ ວົ້ວ ຫງ່ານ ຕສິ ຈໍແດນ ດ້າຍ.

2ມ່ຽນ ທສ້ຳ ໄຫ່ ກັນ ຈ໊ຽນ ເຢຊູ ມີ່ງ, ນິ່ນ ຕສ່ຽວ ຢຽມ ວົ້ວ ຕສໍ່ ຫລົງ ນິ່ນ ບົວ ເຍີຍ ແປ່ງ.

3ມ່າຍ ເຕີ໋ຍ ຟາລິສີ ມ່ຽນ ຕ້າຍ ເສີຍ ເຢຊູ ຕສ່ຽວ ໜ່າຍ, “ໄມ້ ກຸ໊ນ ໂອກ໋ ເຫວີ່ຍ ຫາຍ ຫຍູ່ງ ກອນ-ແປ໋ງ ເລີ່ຍ ນິ່ນ ເຍີຍ ເອົ໊າ, ເຊ ຫອບ ບົວ ເຍີຍ ເລີ໌ຍ ໄຟ?”

4ເຢຊູ ເຕົາ, “ເມີ່ຍ ບົວ ໄມ້ ໂຕະ ເຈ໋ຍ ນ້າຍ ໂຕ່ວ ກີງ-ໂຊວ ໄຟ? ‘ຕສິ້ນ ດ່າງ ທິນ-ຮູ່ງ ເຕສີ໋ຍ ລູ່ງ ເຕສີ໋ຍ ເດົາ ວົ້ວ ຕສັ່ນ, ນິ່ນ ເຕສີ໋ຍ ທສວດ ມ່ຽນ ຕ້າຍ ເປ໋ນ ມຈັ່ງ ມເຊັຍ.’

5ທິນ-ຮູ່ງ ຢ່າ ກ໊ອງ, ‘ເຫວີ່ຍ ນ້າຍ ມຈັ່ງ ຕອນ ຕອງ ຈາ, ເລີ່ຍ ນິ່ນ ເຍີຍ ເຕ໋ຍ ໝ່າ, ເຖສົາ ນິ່ນ ເຍີຍ ເອົ໊າ ກັ໊ບ ຈ໊ຽນ. ອີ ເຕົ້າ ຕສ່ຽວ ເປ໋ນ ຢຽດ ນອມ ຊິນ ໝີ່ ອ໊ະ.

6ຮນັ້ງ ໜ່າຍ ນິ່ນ ບົວ ໄມ້ ເຕສີ໌ຍ ອີ ເຕົ້າ ອ໊ະ. ເປ໋ນ ຢຽດ ເຕົ້າ ຮນັ້ງ. ເຫວີ່ຍ ນ້າຍ, ທິນ-ຮູ່ງ ກັ໊ບ ຕ້າຍ ເຍີຍ ໄທສ-ຕ໋ອຍ, ມ່ຽນ ໄມ້ ຕູ໋ງ ແທສະ ອກອຍ.”

7ຟາລິສີ ມ່ຽນ ແອ໋ງ ໜ່າຍ ເຢຊູ, “ວົ້ວ ຫຍູ່ງ, ໂມເຊ ເຫວີ່ຍ ຫາຍ ຕິ່ວ ບົ໋ວ ໂອກ໋ ປຸນ ເຕສີ໊ຍ ເລີ່ຍ ໄທສ ໂຊວ ນິ່ນ ເຍີຍ ເອົ໊າ ຕສ່ຽວ ເຫ່ວ ເອົ໊າ ມີ່ງ ອ໊ະ?”

8ເຢຊູ ເຕົາ, “ເຊ ຫລາຍ ເມີ່ຍ ບົວ ໂຮຍ້ວ ແຫງ່ງ ໄຫ່ ໂມເຊ ຖສີງ ຕ້າຍ ປຸນ ເມີ່ຍ ບົວ ໄຮ່ ເລີ່ຍ ຕຸ໊ ເມີ່ຍ ບົວ ເຍີຍ ເອົ໊າ. ມປ່າ ຕສິ້ນ ດ່າງ, ເຕສີ໋ຍ ລູ່ງ ເຕສີ໋ຍ ເດົາ ວົ້ວ ຕສັ່ນ, ໄມ້ ເຕສີ໌ຍ ຮນັ້ງ ໜ່າຍ.

9ເຢຍ ບົ໋ວ ເມີ່ຍ ບົວ, ຫາຍ ເຕົ້າ ເລີ່ຍ ນິ່ນ ເຍີຍ ເອົ໊າ, ຢ່າ ໄມ້ ເຕສີ໌ຍ ຫລາຍ ນິ່ນ ເຍີຍ ເອົ໊າ ຫຮຢຽນ ໂອກ໋ ນໍ, ແອ໋ງ ມີ່ງ ຫລົ່ງ ຊຢັງ-ເອົ໊າ, ນິ່ນ ເຊ ຫຮຢຽນ ເອົ໊າ ຮນັ້ງ.”

10ໄຊ-ກໍ໋ ບົວ ກ໊ອງ ບົ໋ວ ເຢຊູ, “ເຊ ກ໊ອງ ຫລົ່ງ ເອົ໊າ ຫລົ່ງ ໂອກ໋ ເຍີຍ ເຈົ໊າ ຮນັ້ງ ໜ່າຍ ນໍ, ຢຽດ ລິ໌ວ ໄມ້ ຕູ໋ງ ຫລົ່ງ ເກົ້າ ຫລົງ.”

11ເຢຊູ ເຕົາ, “ນ້າຍ ເຕີ໋ຍ ອຈ໋າວ ເຍີຍ ຫວ່າ, ໄມ້ ເຕສີ໌ຍ ເຕົ້າໆ ໄຮ່ ເອີຍ ຈ໊ຽນ ໂຕສ໋ວ. ຂູງ ຕົ້ງ ຕຸ໊ ທິນ-ຮູ່ງ ເຍີຍ ເອນ ເຍີຍ ມ່ຽນ ໄຮ່ ເອີຍ ຈ໊ຽນ ໂຕສ໋ວ ຮນັ້ງ.

12ເຫວີ່ຍ ຕສຸ ມ່າຍ ທສ້ຳ-ຕິ່ວ ເຈົ໊າ ປຸນ ມ່ຽນ ໄມ້ ໄຮ່ ຕອງ ຈາ. ມ່າຍ ເຕີ໋ຍ ທສວດ ເສີຍ ຕສຢັ້ງ ຕສ່ຽວ ໄມ້ ໄຮ່ ຕອງ ຈາ. ມ່າຍ ເຕີ໋ຍ ຕສຸ ມ່ຽນ ອິມ ໂຕ໊ ມີ່ງ. ມ່າຍ ເຕີ໋ຍ ເຫວີ່ຍ ໂຕສ໋ວ ທິນ-ຮູ່ງ ເຍີຍ ກົ໊ວະ ເຍີຍ ກົງ ໄມ້ ຕອງ ຈາ. ຫາຍ ເຕົ້າ ໄຮ່ ເອີຍ ຈ໊ຽນ ນ້າຍ ເຕີ໋ຍ ຫວ່າ, ອ໋ອຍ ຕສຸ ເອີຍ ຈ໊ຽນ ໂຕສ໋ວ ອ໊ະ.”

13ມ່າຍ ເຕີ໋ຍ ມ່ຽນ ຕໍ້ ຝຸຈ໊ວຍ ຕ້າຍ ລໍ໌ ເຢຊູ, ອ໋ອຍ ເຢຊູ ມານ ຈ໊ຽນ ນິ່ນ ບົວ, ເຖງ ນິ່ນ ບົວ ເຕົ໋າ ເກົ໋າ. ມປ່າ ໄຊ-ກໍ໋ ບົວ ກ໊ອງ-ເຫມ ນ້າຍ ເຕີ໋ຍ ມ່ຽນ.

14ເຢຊູ ກ໊ອງ, “ກຸ໊ນ ປຸນ ຝຸຈ໊ວຍ ຕ້າຍ ລໍ໌ ເຢຍ, ໄມ້ ຕູ໋ງ ລ່ານ ນິ່ນ ບົວ ຊາ. ເຫວີ່ຍ ຕສຸ ຫາຍ ເຕົ້າ ຫລົ່ງ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ນິ່ນ, ວົ້ວ ເຕົ້າ ເຊ ຮນັ້ງ ນ້າຍ ເຕີ໋ຍ ຝຸຈ໊ວຍ ນໍ.”

15ເຢຊູ ມານ ລິ໌ວ ນ້າຍ ເຕີ໋ຍ ຝຸຈ໊ວຍ ນິ່ນ ຕສ່ຽວ ມີ່ງ ໝີ່ ອ໊ະ.

16ມ່າຍ ດສຸ່ນ ມ່າຍ ເຕົ້າ ມ່ຽນ ຕ້າຍ ໜ່າຍ ເຢຊູ, “ຟິນ-ແຊງ ອ່າ, ເຢຍ ຫອບ ຕສຸ ໂຕສ໋ວ ຫາຍ ຫຍູ່ງ ຫລົງ ເຍີຍ ສີ່ ຖສີງ ຕຸ໊ ຢຽດ ລິ໌ວ ເຍີຍ ແໝ່ງ?”

17ເຢຊູ ເຕົາ, “ເມີ່ຍ ເຫວີ່ຍ ຫາຍ ຕິ່ວ ໜ່າຍ ເຢຍ ເຖົາ ຫລົງ ເຍີຍ ສີ່? ຂູງ ມ່າຍ ດຸ ເຕົ້າ ຫລົງ ຮນັ້ງ. ເຊ ກ໊ອງ ເມີ່ຍ ອ໋ອຍ ຕຸ໊ ຢຽດ ລິ໌ວ ເຍີຍ ແໝ່ງ, ອ໋ອຍ ຕສຸ ເອີຍ ຈ໊ຽນ ເລີ໌ຍ-ຫລັດ ໂຕສ໋ວ.”

18ວົ້ວ ເຕົ້າ ໜ່າຍ, “ຫາຍ ເຕີ໋ຍ ເລີ໌ຍ-ຫລັດ?” ເຢຊູ ເຕົາ, “ໄມ້ ຕູ໋ງ ໄຕ໋ ມ່ຽນ, ໄມ້ ຕູ໋ງ ຫຮຢຽນ ເອົ໊າ, ໄມ້ ຕູ໋ງ ໂຕສ໋ວ ຕສະ ຢ່າ ໄມ້ ຕູ໋ງ ໂຕສ໋ວ ຈ໊າ ຕສອງ-ເຕສ໋ງ.

19ອ໋ອຍ ຕສຸ ຖົງ ໜິ່ມ ເມີ່ຍ ເຍີຍ ເຕ໋ຍ ໝ່າ, ຢ່າ ຮນ້ຳ ມ່ຽນ ຮນັ້ງ ຮນ້ຳ ກັ້ນ ນໍ.”

20ວົ້ວ ເຕົ້າ ມ່ຽນ ຫລຸນ ມ່ຽນ ກ໊ອງ, “ນ້າຍ ເຕີ໋ຍ ຢຽດ ຕສູ໊ງ ເຍີຍ ເລີ໌ຍ ເຢຍ ໝວັງ ເດສ່ງ ອ໊ະ. ແອ໋ງ ທສາ ຫາຍ ຫຍູ່ງ ອ໋ອຍ ຕສຸ ໂຕສ໋ວ ໄຟ?”

21ເຢຊູ ບົ໋ວ ນິ່ນ, “ເຊ ກ໊ອງ ເມີ່ຍ ອ໋ອຍ ໂຕສ໋ວ ຕຸ້ນ ຢຸ້ນ ເຍີຍ ມ່ຽນ, ອ໋ອຍ ຕສຸ ມີ່ງ ໝ່າຍ ເດສ່ງ ເມີ່ຍ ມ່າຍ ເຍີຍ ກະນ້າຍ, ເຕສ໊າະ ວົ້ວ ເຕີ໋ຍ ຍ່ານ ປຸນ ມ່ຽນ ຈົ່ມ ມ່ຽນ. ຮນັ້ງ ນ້າຍ ເມີ່ຍ ຕສ່ຽວ ມ່າຍ ຈ໋າຍ ເຍີຍ ກະນ້າຍ ຊຽວ ຈ໊ຽນ ວົ້ວ ທິນ-ຕ້ອງ. ໂຕສ໋ວ ລິ໌ວ, ຕ້າຍ ກັນ ເຢຍ ໂອ່.”

22ວົ້ວ ເຕົ້າ ມ່ຽນ ຫລຸນ ມ່ຽນ ໄຮ໌ ນ້າຍ ເຕີ໋ຍ ຫວ່າ, ນິ່ນ ຕສຢັງ ໜ່າຍ ເດສົ້າໆ ເຍີຍ ມີ່ງ ໝີ່ ອ໊ະ, ເຫວີ່ຍ ຕສຸ ນິ່ນ ມ່າຍ ຈາ-ຕີ້ງ ໂຮ໌ ໄຫ່.

23ເຢຊູ ແອ໋ງ ກ໊ອງ ບົ໋ວ ນິ່ນ ເຍີຍ ໄຊ-ກໍ໋, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ປຸ໊ດ-ຕສ້ອຍ ມ່ຽນ ອະ ຕຸ໊ ເປັຍ ທິນ-ຮູ່ງ ເຍີຍ ກົ໊ວະ.

24ເຢຍ ແອ໋ງ ກ໊ອງ ດສຸ່ນ ບົ໋ວ ເມີ່ຍ ບົວ, ລໍ່ ທໍ່ ຖສຸນ ເຈ໋ຍ ຊິມ-ບຢຸ່ຍ ຖສໍ່ ເກົ້າ ຮູ່ງ ເຫ່ ປຸ໊ດ-ຕສ້ອຍ ມ່ຽນ ເປັຍ ທິນ-ຮູ່ງ ເຍີຍ ກົ໊ວະ.”

25ໄຊ-ກໍ໋ ບົວ ໄຮ໌ ລິ໌ວ ນ້າຍ ເຕີ໋ຍ ຫວ່າ ນິ່ນ ບົວ ບົວະ ຮ່ອງ ໄຫ່ ອ໊ະ. ນິ່ນ ບົວ ໜ່າຍ ກ໋າ, “ວົ້ວ ຫຍູ່ງ, ຫາຍ ເຕົ້າ ໄຮ່ ຕຸ໊ ໂອຈ໋ວ?”

26ເຢຊູ ໝັ່ງ ຈ໊ຽນ ນິ່ນ ບົວ ຢ່າ ກ໊ອງ, “ມ່ຽນ ໄມ້ ໄຮ່ ໂອຈ໋ວ ກັ້ນ ມປ່າ ໝ່ານ ສີ່ ທິນ-ຮູ່ງ ໄຮ່ ໂຕສ໋ວ ຕຸ໊ ເຍີຍ.”

27ປີເຕ ຕສ່ຽວ ກ໊ອງ, “ໄຊ-ເຕ໋ຍ ອ້າ! ເຢຍ ບົວ ກວັ່ງ ເດສ່ງ ຫຍູ່ງໆ ຕ້າຍ ກັນ ເມີ່ຍ. ວົ້ວ ຫຍູ່ງ, ເຢຍ ບົວ ໄຮ່ ຕຸ໊ ຫາຍ ຫຍູ່ງ?”

28ເຢຊູ ບົ໋ວ ນິ່ນ ບົວ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ມ່າຍ ຊຢັງ-ລູ່ງ ຊຢັງ-ເດົາ ວົ້ວ ຕສັ່ນ, ເຢຍ, ປ້າມ ມ່ຽນ ເຍີຍ ຕອນ, ເຕສວີ໌ຍ ຈ໊ຽນ ເຢຍ ອຈັງ-ຫລ່າງ ເຍີຍ ເຫວີ່ຍ ເຍີຍ ຕສຢັ້ງ ໂຫ່, ເມີ່ຍ ບົວ ກັນ ເຢຍ ເຍີຍ ມ່ຽນ ຕສ່ຽວ ຕຸ໊ ເຕສວີ໌ຍ ຈ໊ຽນ ຕສຽບ ເຫຍີ່ຍ ນອມ ເຫວີ່ຍ ຊ້ຽມ ວົ້ວ ເຕີ໋ຍ ຕສຽບ ເຫຍີ່ຍ ຝີງ ອິສະລາເອນ ມ່ຽນ.

29ຫາຍ ເຕົ້າ ເຫວີ່ຍ ເຢຍ ກວັ່ງ ນິ່ນ ເຍີຍ ເປຢົ໊າ, ມົ໌ວ-ຕ່ອຍ, ເຕ໋ຍ ໝ່າ, ຝຸຈ໊ວຍ ໄຟ ລີ່ງ ເຕີ່ຍ, ວົ້ວ ເຕົ້າ ກວັ່ງ ຢຽດ ໂກ໊ວ ຕສ່ຽວ ຕຸ໊ ຢຽດ ແປ໊ະ ໂກ໊ວ ຢ່າ ຕຸ໊ ຢຽດ ລິ໌ວ ເຍີຍ ແໝ່ງ.

30ມປ່າ ມ່າຍ ໂຕສ໋ວ ໂຮລ ເຍີຍ ມ່ຽນ ທສ້ຳ ອ໋ອຍ ຕສຸ ໂຕສ໋ວ ໄຝ. ໂຕສ໋ວ ໄຝ ເຍີຍ ມ່າຍ ທສ້ຳ ຢ່າ ຕຸ໊ ໂຕສ໋ວ ໂຮລ.

← Chapter 18 Jump to: Chapter 20 →