Matthew 25

Lao Bible (ฉบับอักษรลาว)

1“ທິນ-ຮູ່ງ ຕ້າຍ ໂຕສ໋ວ ຕສ໊ຽວ ກຸ໊ນ ມ່ຽນ ວົ້ວ ຕສັ່ນ, ເປີ໊ຍ ຕສຽບ ເຕົ້າ ເຊັຍ-ຕອນ ໂປ້ວ ຈ໊ຽນ ໂຢ້ວ ຕັງ ທສວດ ມີ່ງ ຕສິ໊ບ ຊຢັງ-ລ່າງ ນໍ.

2ວົ້ວ ເຕີ໋ຍ ເຊັຍ-ຕອນ, ມ່າຍ ປຢາ ເຕົ້າ ຫຮງົງ, ມ່າຍ ປຢາ ເຕົ້າ ໄກວ.

3ຫຮງົງ ວົ້ວ ເຕີ໋ຍ, ໂປ້ວ ຈ໊ຽນ ຕັງ ມີ່ງ ມປ່າ ໄມ້ ຕໍ້ ໂຢ້ວ ມີ່ງ ບູ້ງ.

4ໄກວ ວົ້ວ ເຕີ໋ຍ, ໂປ້ວ ຈ໊ຽນ ຕັງ ແອ໋ງ ເຕສ໊າະ ໂຢ້ວ ຕັ໊ບ ແປ້ງ ຕໍ້ ຈ໊ຽນ ມີ່ງ.

5ວົ້ວ ເຕີ໋ຍ ເຊັຍ-ຕອນ ຕສົ໊ວ ເລົ່າ ເຍີຍ, ໄມ້ ປວັດ ຊຢັງ-ລ່າງ ຕ້າຍ ຕສ່ຽວ ມອຈ້ອມ ຕະຮງັດ, ຕສຢັງ ໜ່າຍ ມອຈ້ອມ ເດສ່ງ.

6“ເຖົາ ດ໊າມ ມ໌ວນ, ມ່າຍ ເຖຈຍ ເຫ່ວ ຈ໊ຽນ ກ໊ອງ, ‘ຊຢັງ-ລ່າງ ເຖົາ ອ໊າ ໂລ່ະ! ຕ້າຍ ຕສິ໊ບ ນິ່ນ ອ໊ະ.’

7“ວົ້ວ ເຕີ໋ຍ ຕສຽບ ເຕົ້າ ເຊັຍ-ຕອນ ເຍຍ ຕ້າຍ ຫລິ່ວ ເລີ໌ຍ ນິ່ນ ບົວ ເຍີຍ ຕັງ.

8ຫຮງົງ ວົ້ວ ເຕີ໋ຍ ບົ໋ວ ໄກວ ວົ້ວ ເຕີ໋ຍ, ‘ໂທ້ ປຸນ ເຕີ໋ຍ ໂຢ້ວ ເຢຍ ບົວ. ເຢຍ ບົວ ເຍີຍ ຕັງ ອ໊າ ລ່ຳ ໄຕ່ ອ໊ະ.’

9“ໄກວ ວົ້ວ ເຕີ໋ຍ ເຕົາ, ‘ກ້ຳ ເດສ໋ຍ ໂຢ້ວ ໄມ້ ເກົ໋າ ປຸນ ເມີ່ຍ ບົວ ເຖສົາ ເຢຍ ບົວ ລົ່ມ ດສ້ອຍ ຫລົ່ງ. ເມີ່ຍ ບົວ ອ໋ອຍ ຕສຸ ມີ່ງ ວົ້ວ ໝ່າຍ ໂຢ້ວ ເຍີຍ ຕ໋ອງ ມ໌າຍ.’

10“ຫຮງົງ ວົ້ວ ເຕີ໋ຍ ເຊັຍ-ຕອນ ຕສ່ຽວ ມີ່ງ ມ໌າຍ ໂຢ້ວ ໄມ້ ແກ້ງ ດສ໋ວນ, ຊຢັງ-ລ່າງ ເຖົາ ຕ້າຍ ອ໊ະ. ຫລິ່ວ ເລີ໌ຍ ຕສຢັ໋ງ ວົ້ວ ເຕີ໋ຍ ປຢາ ເຕົ້າ ຕສ່ຽວ ກັນ ຈ໊ຽນ ຊຢັງ-ລ່າງ ເປັຍ ມີ່ງ ຫຍັ່ນ ທສີງ-ຈາ-ຫຮນາງ. ແກ້ງ ຕສ່ຽວ ກວນ ຈ໊ຽນ ອ໊ະ.

11“ອກະຮ້າ ຫຮງົງ ວົ້ວ ເຕີ໋ຍ ເຊັຍ-ຕອນ ເຖົາ ຕ້າຍ ຕສ່ຽວ ເຫ່ວ, ‘ຕົ້ມ ກໍ໋ ອ່າ, ຕົ້ມ ກໍ໋! ຄອຍ ແກ້ງ ປຸນ ເຢຍ ບົວ ເປັຍ ໂອ່.’

12“ຊຢັງ-ລ່າງ ເຕົາ, ‘ເຢຍ ກ໊ອງ ຕສຽນ ເຍີຍ, ເຢຍ ໄມ້ ຮິ້ວ ຕຸ໊ ເມີ່ຍ ບົວ.’”

13ເຢຊູ ແອ໋ງ ກ໊ອງ ເຊດ ເມວີ໌ຍ ຫວ່າ, “ຮນັ້ງ ໜ່າຍ, ເມີ່ຍ ບົວ ອ໋ອຍ ຕສຸ ກີງ ໂຮຍ້ວ ບູ້ງ ຈ໊ຽນ, ເຫວີ່ຍ ຕສຸ ເມີ່ຍ ບົວ ໄມ້ ຮິ້ວ ຕຸ໊ ວົ້ວ ນອມ ຮນອຍ, ວົ້ວ ນອມ ຕສຢັ້ງ ໂຫ່.

14“ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ຢ່າ ຮນັ້ງ ເຕົ້າ ມ່ຽນ ອ໋ອຍ ທສວດ ເຈົ໊າ ມີ່ງ ໂກ ເຍີຍ. ນິ່ນ ຕສ່ຽວ ເຫ່ວ ນິ່ນ ເຍີຍ ໂປວ ຕ້າຍ ຢ່າ ເຕສ໊າະ ນິ່ນ ເຍີຍ ຈາ-ຕີ້ງ ຈິວ ປຸນ ນິ່ນ ບົວ ໂກ໋ວ.

15ນິ່ນ ເອີຍ ເກ໊າະ-ມ່ຽນ ເຍີຍ ປັ້ນ ເຕສີ່ຍ ປຸນ. ມ່າຍ ເຕົ້າ ນິ່ນ ປຸນ ປຢາ ຫວ່ານ ຕສິ້ນ. ມ່າຍ ເຕົ້າ ປຸນ ອີ ຫວ່ານ ຕສິ້ນ. ມ່າຍ ເຕົ້າ ປຸນ ຢຽດ ຫວ່ານ ຕສິ້ນ. ປຸນ ລິ໌ວ, ນິ່ນ ຕສ່ຽວ ທສວດ ເຈົ໊າ ມີ່ງ ໝີ່ ອ໊ະ.

16ຕຸ໊ ຕສິ໊ບ ປຢາ ຫວ່ານ ຕສິ້ນ ວົ້ວ ເຕົ້າ ລ່ຽມ ເຕສີ້ຍ ທສວດ ມີ່ງ ໂຕສ໋ວ ແຊງ-ເອີ໋ຍ ແອ໋ງ ຕສ່ອນ ຕຸ໊ ປຢາ ຫວ່ານ.

17ຕຸ໊ ຕສິ໊ບ ອີ ຫວ່ານ ວົ້ວ ເຕົ້າ ຢ່າ ຟີ່ ຮນັ້ງ ເຍີຍ ໂຕສ໋ວ, ແອ໋ງ ຕສ່ອນ ຕຸ໊ ອີ ຫວ່ານ.

18ມປ່າ ຕຸ໊ ຢຽດ ຫວ່ານ ວົ້ວ ເຕົ້າ ທສວດ ມີ່ງ ເວດ ຄວດ ປຢົ໊ບ ຈ໊ຽນ ປີ໋ງ ນິ່ນ ເຍີຍ ຕສ໊ຽວ ເຍີຍ ຍ່ານ.

19“ອກະຮ້າ ເລົ່າ ເຍີຍ, ວົ້ວ ເຕີ໋ຍ ໂປວ ເຍີຍ ຕສ໊ຽວ ດສ໋ວນ ຕ້າຍ ຕິ໊ມ ໝັ່ງ ນິ່ນ ບົວ ເຍີຍ ແຕສ໊ະ-ຕານ.

20ຕຸ໊ ປຢາ ຫວ່ານ ຕສິ້ນ ວົ້ວ ເຕົ້າ ແອ໋ງ ຕໍ້ ຈ໊ຽນ ປຢາ ຫວ່ານ ດ໊າວ-ຕ້າວ ປຸນ ນິ່ນ ເຍີຍ ຕສ໊ຽວ. ນິ່ນ ກ໊ອງ, ‘ຕສ໊ຽວ ອ່າ, ເມີ່ຍ ປຸນ ປຢາ ຫວ່ານ ຕສິ້ນ. ໝັ່ງ ກ໋າ ນ້າຍ! ເຢຍ ແອ໋ງ ຕສ່ອນ ຕຸ໊ ປຢາ ຫວ່ານ.’

21“ນິ່ນ ເຍີຍ ຕສ໊ຽວ ກ໊ອງ, ‘ຫລົງ ອ໊ະ. ເມີ່ຍ ເຊ ຫລົງ ໄຫ່, ໂຮຍ້ວ ຕສີ໋ງ ເຍີຍ ໂປວ. ເຕີ໋ຍ ປ໊າ ຍ່ານ ຮນັ້ງ ເມີ່ຍ ໂກ໋ວ ຕຸ໊ ດົ່ງ ໜ່າຍ ຫລົງ, ເຢຍ ອ໋ອຍ ປຸນ ເມີ່ຍ ໂກ໋ວ ທສ້ຳ ເຍີຍ. ກຸ໊ນ ເປັຍ ຕ້າຍ ເຖສົາ ເຢຍ ອຈຽນ-ໂຢ້ວ ມ່າະ!’

22“ຕຸ໊ ອີ ຫວ່ານ ຕສິ້ນ ວົ້ວ ເຕົ້າ ໂປວ ແອ໋ງ ເປັຍ ຕ້າຍ ກ໊ອງ, ‘ຕສ໊ຽວ ອ່າ, ເມີ່ຍ ປຸນ ອີ ຫວ່ານ ຕສິ້ນ ເຢຍ. ໝັ່ງ ກ໋າ ນ້າຍ! ເຢຍ ແອ໋ງ ຕສ່ອນ ຕຸ໊ ອີ ຫວ່ານ.’

23ນິ່ນ ເຍີຍ ຕສ໊ຽວ ກ໊ອງ, ‘ຫລົງ ໄຫ່ ອ໊ະ. ເມີ່ຍ ເຊ ຫລົງ ໄຫ່, ໂຮຍ້ວ ຕສີ໋ງ ເຍີຍ ໂປວ. ເຕີ໋ຍ ປ໊າ ຍ່ານ ຮນັ້ງ ເມີ່ຍ ໂກ໋ວ ຕຸ໊ ດົ່ງ ນ້າຍ ຫລົງ, ເຢຍ ອ໋ອຍ ປຸນ ເມີ່ຍ ໂກ໋ວ ທສ້ຳ. ກຸ໊ນ ເປັຍ ຕ້າຍ ເຖສົາ ເຢຍ ອຈຽນ-ໂຢ້ວ ອ໊ະ.’

24“ຕຸ໊ ຢຽດ ຫວ່ານ ຕສິ້ນ ວົ້ວ ເຕົ້າ ໂປວ ເປັຍ ຕ້າຍ ກ໊ອງ, ‘ຕສ໊ຽວ ອ່າ, ເຢຍ ຮິ້ວ ຕຸ໊ ເມີ່ຍ ໄມ້ ເຊຍ ຫາຍ ເຕົ້າ. ເມີ່ຍ ໄມ້ ດ໊ອດ ທຈະ ຕສວັ໋ງ ເຍີຍ ຕ໋ອງ ເມີ່ຍ ຢ່າ ຕຸ໊ ກ໊າດ. ຕົ້ງ ເມີ່ຍ ໄມ້ ຮ໌າ ຍິມ ເຍີຍ ຕ໋ອງ ເມີ່ຍ ຢ່າ ຕຸ໊ ຊຽວ.

25ເຢຍ ກ້ຳ ເດສ໋ຍ ໄຫ່ ຕສ່ຽວ ມີ່ງ ເວດ ຄວດ ປຢົ໊ບ ຈ໊ຽນ ເມີ່ຍ ເຍີຍ ຍ່ານ. ນ້າຍ! ເມີ່ຍ ເຍີຍ ຍ່ານ ອ໊ະ.’

26“ນິ່ນ ເຍີຍ ຕສ໊ຽວ ກ໊ອງ, ‘ເມີ່ຍ ໜ່າຍ ເຕົ້າ ຫວ່າຍ ໄຫ່, ເຫລວີ່ຍ ໄຫ່ ເຍີຍ ໂປວ ອ້າ! ເມີ່ຍ ຮິ້ວ ເຢຍ ໄມ້ ດ໊ອດ ທຈະ ຕສວັ໋ງ ເຍີຍ ຕ໋ອງ ເຢຍ ຕຸ໊ ກ໊າດ? ເຢຍ ໄມ້ ຮ໌າ ຍິມ ເຍີຍ ຕ໋ອງ ຢ່າ ຕຸ໊ ຊຽວ?

27ວົ້ວ ຫຍູ່ງ, ເມີ່ຍ ຫອບ ຕສຸ ຕໍ້ ເຢຍ ເຍີຍ ຍ່ານ ມີ່ງ ຕັ໊ບ ວົ້ວ ຍ່ານ ລ໌ຳ. ຮນັ້ງ ໜ່າຍ, ເຢຍ ດສ໋ວນ ຕ້າຍ ເຢຍ ຕຸ໊ ປ໊ວນ-ຕສິ້ນ ຢ່າ ຕຸ໊ ເຫລີ່ຍ ຕສິ້ນ ເຖສົາ ຈ໊ຽນ ນີອາ.’

28“‘ເຕສ໊າະ ນິ່ນ ເຍີຍ ວົ້ວ ເຕີ໋ຍ ຍ່ານ ອ໊ະ. ແອ໋ງ ປຸນ ມ່າຍ ຕສຽບ ນອມ ວົ້ວ ເຕົ້າ,

29ເຫວີ່ຍ ຕສຸ ຫາຍ ເຕົ້າ ມ່າຍ ເຕີ໋ຍ ເຍີຍ, ອ໋ອຍ ທິບ ປຸນ ນິ່ນ ມ່າຍ ເກົ້າ ທສ້ຳ, ນິ່ນ ຕສ່ຽວ ມ່າຍ ເຕສ່ງ. ຫາຍ ເຕົ້າ ໄມ້ ມ່າຍ, ລ່ຽມ ນິ່ນ ມ່າຍ ເຕີ໋ຍ ປ໊າ ເຍີຍ, ຕສູ໊ງ ຕສຸ ເຕສ໊າະ ໝີ່ ອ໊ະ.

30ເຕສ໊າະ ນ້າຍ ເຕົ້າ ໄມ້ ລ່ຳ ຫລົ່ງ ເຍີຍ ໂປວ ຕສອຍ ກວັ່ງ ກະເຫຍ່ຍ ຫຮມວັງ ເຍີຍ ຕ໋ອງ ມີ່ງ. ນິ່ນ ອ໋ອຍ ຕສຸ ປູ໋ງ-ຊີງ ປູ໋ງ-ເຖຈຍ ເຍີຍ ຍ້ຽມ, ຫງາດ ຈ໊ຽນ ຍ່າ ເຕ໊ຍ.’

31“ເຢຍ, ປ້າມ ມ່ຽນ ເຍີຍ ຕອນ ຕ້າຍ ໂຕສ໋ວ ຮູ່ງ ວົ້ວ ຕສັ່ນ, ມ່າຍ ຕສວັ໋ງ ຟິນ-ມ່ຽນ ຢ່າ ອ໋ອຍ ເຖສົາ ຈ໊ຽນ ຕ້າຍ. ເຢຍ ຢ່າ ອ໋ອຍ ເຕສວີ໌ຍ ຈ໊ຽນ ເຢຍ ອຈັງ-ຫລ່າງ ເຍີຍ ເຫວີ່ຍ.

32ໝ່ານ ຝີງ ມ່ຽນ ແອ໋ງ ຕ້າຍ ກັ໊ບ ຕສຸ໊ນ ຢຽມ ເຢຍ ເຍີຍ ດສະຮມຽນ. ເຢຍ ຕສ່ຽວ ປຸນ ອກອຍ ໂຕສ໋ວ ອີ ກວັ້ນ, ຮນັ້ງ ຢູ້ງ ຕສ໊ຽວ ປຸນ ອກອຍ ນິ່ນ ເຍີຍ ປະກີ ຢູ້ງ ເຖສົາ ຢູ້ງ ນໍ.

33ປະກີ ຢູ້ງ ຢຽມ ເຢຍ ເຍີຍ ບຢ່າວ ແໝງ, ຢູ້ງ ຢຽມ ຕສ໋າຍ ແໝງ.

34“ຮູ່ງ ເຕ໋ຍ ຕສ່ຽວ ບົ໋ວ ຢຽມ ບຢ່າວ ແໝງ ວົ້ວ ເຕີ໋ຍ ມ່ຽນ, ‘ເມີ່ຍ ບົວ ນ້າຍ ເຕີ໋ຍ ເຢຍ ເຍີຍ ເຕຍ ເຖສີຍ ຟຸ ເຍີຍ ມ່ຽນ ອ້າ! ກຸ໊ນ ຕ້າຍ ອ໊ະ. ຕ້າຍ ຕສິ໊ບ ຕົ້ງ ຕສິ້ນ ດ່າງ ເຕສີ໋ຍ ລູ່ງ ເຕສີ໋ຍ ເດົາ ວົ້ວ ຕສັ່ນ ທິນ-ຮູ່ງ ຫລິ່ວ ເລີ໌ຍ ຕສຢັ໋ງ ປຸນ ເມີ່ຍ ບົວ ວົ້ວ ນອມ ກົ໊ວະ,

35ເຫວີ່ຍ ຕສຸ ເຢຍ ຫງໍ່, ເມີ່ຍ ບົວ ປຸນ ເຢຍ ຫຍັ່ນ. ຈາງ ອກ໊າດ, ເມີ່ຍ ບົວ ຢ່າ ປຸນ ວວມ ເຢຍ ຮົບ. ເຢຍ ໂຕສ໋ວ ກັ້ນ ຝີງ ມ່ຽນ, ເມີ່ຍ ບົວ ຢ່າ ຕສິ໊ບ ເຢຍ ຢຽມ ເມີ່ຍ ບົວ ເຍີຍ ເປຢົ໊າ.

36ໄມ້ ມ່າຍ ລຸຍ-ໂຫວ ຕສຸ໊, ເມີ່ຍ ບົວ ຢ່າ ປຸນ ເຢຍ ມ່າຍ ຕສຸ໊. ປຸ໊ດ ແປ່ງ, ເມີ່ຍ ບົວ ຢ່າ ໂກ໋ວ ເຢຍ. ເຢຍ ຕສຸ ຫວວນ ຈ໊ຽນ ໂລ່, ເມີ່ຍ ບົວ ຢ່າ ຕ້າຍ ໝັ່ງ ເຢຍ.’

37“ວົ້ວ ເຕີ໋ຍ ຄູ້ ມ່ຽນ ຕສ່ຽວ ເຕົາ ຮູ່ງ ເຕ໋ຍ, ‘ຕສ໊ຽວ ອ່າ, ເຢຍ ບົວ ຕສຢັ້ງ ຫາຍ ປວັດ ເມີ່ຍ ຫງໍ່ ຢ່າ ປຸນ ເມີ່ຍ ຫຍັ່ນ? ປວັດ ເມີ່ຍ ຈາງ ອກ໊າດ ຢ່າ ປຸນ ເມີ່ຍ ຮົບ?

38ຕສຢັ້ງ ຫາຍ ປວັດ ເມີ່ຍ ໂຕສ໋ວ ກັ້ນ ຝີງ ມ່ຽນ ຕສ່ຽວ ຕສິ໊ບ ເມີ່ຍ ຢຽມ ເຢຍ ບົວ ເຍີຍ ເປຢົ໊າ? ໄຟ ປວັດ ເມີ່ຍ ໄມ້ ມ່າຍ ລຸຍ-ໂຫວ ຕສຸ໊ ຕສ່ຽວ ປຸນ ເມີ່ຍ ມ່າຍ ຕສຸ໊?

39ເຢຍ ບົວ ຕສຢັ້ງ ຫາຍ ປວັດ ເມີ່ຍ ປຸ໊ດ ແປ່ງ ໄຟ ຕສຸ ຫວວນ ວົ້ວ ໂລ່ ຢ່າ ມີ່ງ ໝັ່ງ ເມີ່ຍ?’

40“ຮູ່ງ ເຕ໋ຍ ຕສ່ຽວ ເຕົາ ນິ່ນ ບົວ, ‘ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ເມີ່ຍ ບົວ ໂຕສ໋ວ ປຸນ ຢຽດ ເຕົ້າ ເຢຍ ເຍີຍ ກໍ໋-ໂຢ໌ວ, ໄມ້ ກຸ໊ນ ນິ່ນ ໂຕສ໋ວ ເກົ້າ ໄຝ ເຈ໋ຍ ວົ້ວ ເຕົ້າ, ເມີ່ຍ ບົວ ຕສ່ຽວ ໂຕສ໋ວ ປຸນ ເຢຍ ອ໊ະ.’

41“ຮູ່ງ ເຕ໋ຍ ກ໊ອງ ບົ໋ວ ຢຽມ ຕສ໋າຍ ແໝງ ວົ້ວ ເຕີ໋ຍ ມ່ຽນ, ‘ຕສຸ ທິນ-ຮູ່ງ ຕສ໋ຽວ ເຍີຍ ມ່ຽນ ອ້າ! ຊິ້ມ ອກອຍ ເຢຍ! ມີ່ງ ເປັຍ ຫລິ່ວ ເລີ໌ຍ ຕສຢັ໋ງ ປຸນ ມ້ຽນ ເຍີຍ ຮູ່ງ ເຖສົາ ນິ່ນ ເຍີຍ ໂປວ ຢຽມ ວົ້ວ ກວ໋າ ຢຽດ ລິ໌ວ ໄມ້ ໄຕ່ ເຍີຍ ໂຕ໌ວ.

42ເຫວີ່ຍ ຕສຸ ເຢຍ ຫງໍ່, ເມີ່ຍ ບົວ ໄມ້ ປຸນ ເຢຍ ຫຍັ່ນ. ຈາງ ອກ໊າດ, ເມີ່ຍ ບົວ ໄມ້ ປຸນ ວວມ ເຢຍ ຮົບ.

43ເຢຍ ໂຕສ໋ວ ກັ້ນ ຝີງ ມ່ຽນ, ເມີ່ຍ ບົວ ຢ່າ ໄມ້ ຕສິ໊ບ ເຢຍ ເປັຍ ເປຢົ໊າ. ເຢຍ ໄມ້ ມ່າຍ ລຸຍ-ໂຫວ ຕສຸ໊, ເມີ່ຍ ບົວ ໄມ້ ປຸນ ລຸຍ-ໂຫວ ເຢຍ ຕສຸ໊. ເຢຍ ປຸ໊ດ ແປ່ງ ໄຟ ຕສຸ ຫວວນ ໂລ່, ເມີ່ຍ ບົວ ຢ່າ ໄມ້ ໝັ່ງ ເຢຍ.’

44“ນິ່ນ ບົວ ຕສ່ຽວ ເຕົາ ນິ່ນ, ‘ຕສ໊ຽວ ອ່າ, ເຢຍ ບົວ ຕສຢັ້ງ ຫາຍ ປວັດ ເມີ່ຍ ຫງໍ່ ໄຟ ຈາງ ອກ໊າດ, ໄຟ ໂຕສ໋ວ ກັ້ນ ຝີງ ມ່ຽນ ໄຟ ໄມ້ ມ່າຍ ລຸຍ-ໂຫວ ຕສຸ໊, ໄຟ ປຸ໊ດ ແປ່ງ ໄຟ ຕສຸ ຫວວນ ຈ໊ຽນ ໂລ່ ຢ່າ ໄມ້ ເຖງ ເມີ່ຍ?’

45“ຮູ່ງ ເຕ໋ຍ ຕສ່ຽວ ເຕົາ, ‘ເຢຍ ບົ໋ວ ຕສຽນ ເມີ່ຍ ບົວ, ເມີ່ຍ ບົວ ໄມ້ ເຖງ ຢຽດ ເຕົ້າ ນ້າຍ ເຕີ໋ຍ ໂຕສ໋ວ ໄຝ ເຈ໋ຍ ເຍີຍ ມ່ຽນ, ເມີ່ຍ ບົວ ຢ່າ ໄມ້ ເຖງ ເຢຍ.’”

46ເຢຊູ ແອ໋ງ ກ໊ອງ ເຊດ ເມວີ໌ຍ ຫວ່າ, “ຮນັ້ງ ໜ່າຍ, ນ້າຍ ເຕີ໋ຍ ອ໋ອຍ ຕສຸ ທສວດ ມີ່ງ ຢຽດ ລິ໌ວ ສ່ຽວ ຕສຸ໌ຍ. ມປ່າ ຄູ້ ມ່ຽນ ວົ້ວ ເຕີ໋ຍ ຕສ່ຽວ ຕຸ໊ ຢຽດ ລິ໌ວ ເຍີຍ ແໝ່ງ.”

← Chapter 24 Jump to: Chapter 26 →