Matthew 7

Lao Bible (ฉบับอักษรลาว)

← Chapter 6 Jump to: Chapter 8 →

1“ໄມ້ ຕູ໋ງ ຕີ່ງ ມ່ຽນ ເຍີຍ ຕສຸ໌ຍ, ທິນ-ຮູ່ງ ຕສ່ຽວ ໄມ້ ຕີ່ງ ເມີ່ຍ ບົວ ເຍີຍ ຕສຸ໌ຍ,

2ເຫວີ່ຍ ຕສຸ ເມີ່ຍ ບົວ ຮນັ້ງ ຫາຍ ນໍ ຕີ່ງ ມ່ຽນ ເຍີຍ ຕສຸ໌ຍ, ທິນ-ຮູ່ງ ຢ່າ ຮນັ້ງ ວົ້ວ ນໍ ຕີ່ງ ເມີ່ຍ ບົວ ເຍີຍ ຕສຸ໌ຍ ອ໊ະ. ເມີ່ຍ ບົວ ຫລົ່ງ ຫາຍ ຫຍູ່ງ ຮລາວ ປຸນ ມ່ຽນ, ທິນ-ຮູ່ງ ຢ່າ ຫລົ່ງ ວົ້ວ ຫຍູ່ງ ຮລາວ ປຸນ ເມີ່ຍ ບົວ.

3“ເມີ່ຍ ເຫວີ່ຍ ຫາຍ ຕິ່ວ ປວັດ ເມີ່ຍ ເຍີຍ ກໍ໋-ໂຢ໌ວ ເຍີຍ ມຕສີງ ມ່າຍ ຫລະຟັບ ຢ່າ ໄມ້ ຮນ້ຳ ເຖົາ ເມີ່ຍ ກັ້ນ ເຍີຍ ມຕສີງ ມ່າຍ ອກັ໋ນ ດຢັ໋ງ?

4ກັ້ນ ເຍີຍ ມຕສີງ ມ່າຍ ອກັ໋ນ ດຢັ໋ງ, ເມີ່ຍ ຝູ່ງ ໄຮ່ ບົ໋ວ ເມີ່ຍ ເຍີຍ ກໍ໋-ໂຢ໌ວ, ‘ກໍ໋ ອ່າ, ເຢຍ ເຖງ ກໍ໋ ປັນ ທສວດ ມຕສີງ ເຍີຍ ຫລະຟັບ ໂອ່.’

5ເປີ້ຍ ຕສະ ໂຮຍ້ວ ອຈ໊ວດ ເຍີຍ ມ່ຽນ ອ້າ! ອ໋ອຍ ຕສຸ ເຕສ໊າະ ທສວດ ກັ້ນ ເຍີຍ ມຕສີງ ວົ້ວ ອກັ໋ນ ດຢັ໋ງ ດ່າງ ຖສີງ ຕ້າຍ ໄຮ່ ໝັ່ງ ຕຸ໊ ຕສຽນ ເຖງ ກໍ໋-ໂຢ໌ວ ປັນ ທສວດ ມຕສີງ ເຍີຍ ຫລະຟັບ.

6“ໄມ້ ຕູ໋ງ ເຕສ໊າະ ທສີງ-ເດສ່ງ ເຍີຍ ກະນ້າຍ ປຸນ ຈູ໊. ກ້ຳ ເດສ໋ຍ ຈູ໊ ໄຮ່ ຕ໋າວ ຊິນ ຕ້າຍ ຫງາດ ເມີ່ຍ ບົວ. ຢ່າ ໄມ້ ຕູ໋ງ ເຕສ໊າະ ຈ໋າຍ ເຍີຍ ຫລະເປຢີ໊ຍ-ໂຕສວ ຕສອຍ ປຸນ ຕູ໌ງ. ຕູ໌ງ ຂູງ ອ໋ອຍ ທສ້າຍ ຫວ່າຍ ຮນັ້ງ.

7“ອ໋ອຍ ຕສຸ ໂທ້ ຕສ່ຽວ ຕຸ໊, ອ໋ອຍ ຕສຸ ລໍ໌ ຕສ່ຽວ ປວັດ, ອ໋ອຍ ຕສຸ ແງ້ງ ແກ້ງ, ແກ້ງ ຕສ່ຽວ ອກອຍ.

8ເຫວີ່ຍ ຕສຸ ຫາຍ ເຕົ້າ ໂທ້ ຕສ່ຽວ ຕຸ໊, ຫາຍ ເຕົ້າ ລໍ໌ ຕສ່ຽວ ປວັດ. ຫາຍ ເຕົ້າ ແງ້ງ ແກ້ງ, ແກ້ງ ຕສ່ຽວ ອກອຍ.

9“ເມີ່ຍ ບົວ ຫາຍ ເຕົ້າ ມ່ຽນ, ນິ່ນ ເຍີຍ ຕອນ ໂທ້ ອຈົ໊ວ, ເມີ່ຍ ອ໋ອຍ ປຸນ ຫລະເປຢີ໊ຍ ນິ່ນ ໄຟ?

10ຕອນ ໂທ້ ເບຢົ໌າ, ເມີ່ຍ ອ໋ອຍ ປຸນ ນາງ ນິ່ນ ໄຟ?

11ເມີ່ຍ ບົວ ດົ່ງ ໜ່າຍ ຫວ່າຍ ເຍີຍ ມ່ຽນ ຕສູ໊ງ ຮິ້ວ ຕຸ໊ ປຸນ ຫລົງ ເຍີຍ ກະນ້າຍ ເມີ່ຍ ບົວ ເຍີຍ ຝຸຈ໊ວຍ, ເມີ່ຍ ບົວ ເຍີຍ ທິນ-ຕ້ອງ ເຕ໋ຍ ຢຽດ ເຕສີຍ ອ໋ອຍ ປຸນ ຫລົງ ເຍີຍ ກະນ້າຍ ໂທ້ ນິ່ນ ວົ້ວ ເຕີ໋ຍ ມ່ຽນ.

12“ເມີ່ຍ ບົວ ອ໋ອຍ ມ່ຽນ ຮນັ້ງ ຫາຍ ນໍ ໂຕສ໋ວ ປຸນ ເມີ່ຍ ບົວ, ເມີ່ຍ ບົວ ຢ່າ ອ໋ອຍ ຕສຸ ຮນັ້ງ ວົ້ວ ນໍ ໂຕສ໋ວ ປຸນ ມ່ຽນ. ໂມເຊ ເຍີຍ ເລີ໌ຍ ເຖສົາ ໂຕ່ວ ຫວ່າ ມ່ຽນ ອຈ໋າວ ເຍີຍ ຫວ່າ, ດສຸ໊ດ ຕສຸ໊ນ ກ໊ອງ ເຊ ຕົ້ງ ນ້າຍ ອ໊ະ.

13“ອ໋ອຍ ຕສຸ ເປັຍ ເຫບ ວົ້ວ ເຕົ້າ ແກ້ງ, ເຫວີ່ຍ ຕສຸ ຕໍ້ ມ່ຽນ ມີ່ງ ຕສຸ ໝຽດ ວົ້ວ ເຕົ້າ ແກ້ງ ຈັ໊ງ ເຍີຍ. ເຈົ໊າ ຢ່າ ຄູ່ ຢັ້ງ ເຍີຍ. ຢັ້ງ ວົ້ວ ຕິ້ວ ເຈົ໊າ ເຍີຍ ມ່ຽນ ທສ້ຳ ໄຫ່.

14ມປ່າ ເປັຍ ມີ່ງ ຕຸ໊ ຢຽດ ລິ໌ວ ເຍີຍ ແໝ່ງ ວົ້ວ ເຕົ້າ ແກ້ງ ເຊ ເຫບ ເຍີຍ. ເຈົ໊າ ຢ່າ ອະ ຕຸ໊ ຢັ້ງ. ລໍ໌ ປວັດ ວົ້ວ ຕິ້ວ ເຈົ໊າ ເຍີຍ ມ່ຽນ ໂຕສະ.

15“ອ໋ອຍ ຕສຸ ບູ້ງ ຈ໊ຽນ ຈ໊າ ໂຕ່ວ ຫວ່າ ມ່ຽນ. ນິ່ນ ບົວ ຕ້າຍ ລໍ໌ ເມີ່ຍ ບົວ ວົ້ວ ຕສັ່ນ, ເປີ້ຍ ຕສັ່ງ ຮນັ້ງ ປະກີ ຢູ້ງ, ມປ່າ ນິ່ນ ບົວ ເຍີຍ ໂຮຍ້ວ ທສ້ຽວ ຮນັ້ງ ເຮ່ຍ ຈູ໊ ນໍ.

16ເມີ່ຍ ບົວ ສຳ ໝັ່ງ ນິ່ນ ບົວ ໂຕສ໋ວ ເຍີຍ ສີ່ ເມີ່ຍ ບົວ ຕສ່ຽວ ຮິ້ວ ຕຸ໊ ນິ່ນ ບົວ ອ໊ະ. ດຢັ໋ງ-ອຈິ໊ມ ໄມ້ ໄຮ່ ຕສຢັ້ງ ອະຫງຸ່ນ ປ໊ຽວ. ມູ້ງ ລົງ ອຈິ໊ມ ຢ່າ ໄມ້ ໄຮ່ ຕສຢັ້ງ ງົ່ງ ຫຍໍ ປ໊ຽວ.

17ດຢັ໋ງ ຫລົງ ຕສຢັ້ງ ຫລົງ ເຍີຍ ປ໊ຽວ. ດຢັ໋ງ ໄມ້ ເປ໋ນ ຕສຢັ້ງ ໄມ້ ເປ໋ນ ເຍີຍ ປ໊ຽວ.

18ດຢັ໋ງ ຫລົງ ໄມ້ ໄຮ່ ຕສຢັ້ງ ໄມ້ ເປ໋ນ ເຍີຍ ປ໊ຽວ. ໄມ້ ເປ໋ນ ເຍີຍ ດຢັ໋ງ ໄມ້ ໄຮ່ ຕສຢັ້ງ ຫລົງ ເຍີຍ ປ໊ຽວ.

19ຫາຍ ຕິ້ວ ດຢັ໋ງ ຕສຢັ້ງ ປ໊ຽວ ໄມ້ ເປ໋ນ, ຕສູ໊ງ ຕສຸ ກ໋ອຍ ກວັ່ງ ປົ໊ວ ໂຕ໌ວ.

20ຮນັ້ງ ໜ່າຍ, ເມີ່ຍ ບົວ ປວັດ ນິ່ນ ບົວ ໂຕສ໋ວ ເຍີຍ ສີ່ ເມີ່ຍ ບົວ ຕສ່ຽວ ເຕສັ໊ຍ ຕຸ໊ ຈ໊າ ໂຕ່ວ ຫວ່າ ມ່ຽນ ອ໊ະ.

21“ເຫ່ວ ຈ໊ຽນ ເຢຍ, ‘ຕສ໊ຽວ ອ້າ! ຕສ໊ຽວ!’ ວົ້ວ ເຕີ໋ຍ ມ່ຽນ, ໄມ້ ເຕສີ໌ຍ ເຕົ້າໆ ໄຮ່ ຕຸ໊ ເປັຍ ທິນ-ຮູ່ງ ເຍີຍ ກົ໊ວະ. ຂູງ ຕົ້ງ ເອີຍ ເຢຍ ເຍີຍ ທິນ-ຕ້ອງ ເຕ໋ຍ ເຍີຍ ເອີ໋ຍ ໂຕສ໋ວ ວົ້ວ ເຕີ໋ຍ ຕຸ໊ ເປັຍ ຮນັ້ງ.

22ເຖົາ ຊ້ຽມ ຕສຸ໌ຍ ວົ້ວ ຮນອຍ ມ່ຽນ ທສ້ຳ ເຍີຍ ອ໋ອຍ ບົ໋ວ ເຢຍ, ‘ຕສ໊ຽວ ອ້າ! ຕສ໊ຽວ! ເຢຍ ບົວ ເຕ໊ງ ເມີ່ຍ ເຍີຍ ບົ໋ວ ໂຕ່ວ ທິນ-ຮູ່ງ ເຍີຍ ຫວ່າ, ຢ່າ ຕສຸ່ນ ມ້ຽນ ທສວດ, ຢ່າ ໂຕສ໋ວ ເຈ໋ຍ ບົວະ ຮ່ອງ ເຍີຍ ສີ່ ທສ້ຳ.’

23ວົ້ວ ຕສັ່ນ ເຢຍ ອ໋ອຍ ກ໊ອງ ບົ໋ວ ນິ່ນ ບົວ, ‘ເຢຍ ລ່ຽມ ໄມ້ ຮິ້ວ ຕຸ໊ ເມີ່ຍ ບົວ ນີອາ. ເມີ່ຍ ບົວ ໂຕສ໋ວ ຫວ່າຍ ເຍີຍ ມ່ຽນ ກ໊ານ ເປຢົ໋າ ອກອຍ ມ່າະ!’

24“ຮນັ້ງ ນ້າຍ, ຫາຍ ເຕົ້າ ໄຮ໌ ລິ໌ວ ເຢຍ ນ້າຍ ເຕີ໋ຍ ຫວ່າ, ຢ່າ ເອີຍ ຈ໊ຽນ ໂຕສ໋ວ, ເຊ ຮນັ້ງ ຢຽດ ເຕົ້າ ທສົງ-ເມ່ງ ເຍີຍ ມ່ຽນ ກົ໊ມ ເປຢົ໊າ ຫລະເປຢີ໊ຍ-ແປ້ງ ກູ້ ຫງວ່າຍ.

25ຕຸ້ຍ ຕົ້ມ ບຢູ່ງ, ວວມ ໂຮລ ກວ໊າດ, ປ໌ອງ ຕົ້ມ ດສຢ໋າວ ປ່ວນ ເປຢົ໊າ, ເປຢົ໊າ ຢ່າ ໄມ້ ບາງ, ເຫວີ່ຍ ຕສຸ ກົ໊ມ ຫລະເປຢີ໊ຍ-ແປ້ງ ກູ້ ຫງວ່າຍ.

26“ມປ່າ ຫາຍ ເຕົ້າ ໄຮ໌ ລິ໌ວ ເຢຍ ນ້າຍ ເຕີ໋ຍ ຫວ່າ ຢ່າ ໄມ້ ເອີຍ ຈ໊ຽນ ໂຕສ໋ວ, ຕສ່ຽວ ຮນັ້ງ ເຕົ້າ ມ່ຽນ ຫຮງົງ ມ່ຽນ ນໍ. ນ້າຍ ເຕົ້າ ກົ໊ມ ເປຢົ໊າ ຢຽມ ຊາ-ຕສຽວ ກູ້ ຫງວ່າຍ.

27ຕຸ້ຍ ຕົ້ມ ບຢູ່ງ, ວວມ ໂຮລ ກວ໊າດ, ປ໌ອງ ຕົ້ມ ດສຢ໋າວ ປ່ວນ ເປຢົ໊າ, ເປຢົ໊າ ຕສ່ຽວ ບາງ. ລົ໌ມ! ລົ໌ມ ເຍີຍ ບາງ ໝີ່ ອ໊ະ.”

28ເຢຊູ ກ໊ອງ ລິ໌ວ ນ້າຍ ເຕີ໋ຍ ຫວ່າ, ຕສວັ໋ງ ມ່ຽນ ບົວະ ຮ່ອງ ໄຫ່ ນິ່ນ ອຈ໋າວ ເຍີຍ ຫວ່າ,

29ເຫວີ່ຍ ຕສຸ ນິ່ນ ອຈ໋າວ ໄມ້ ຮນັ້ງ ນິ່ນ ບົວ ເຍີຍ ອຈ໋າວ ເລີ໌ຍ ຟິນ-ແຊງ. ນິ່ນ ເຍີຍ ຫວ່າ ມ່າຍ ຫັດ ມ໌າ ໄຫ່.

← Chapter 6 Jump to: Chapter 8 →