Matthew 26

Lao Bible (ฉบับอักษรลาว)

1ເຢຊູ ກ໊ອງ ລິ໌ວ ນ້າຍ ເຕີ໋ຍ ຢຽດ ຕສູ໊ງ ຫວ່າ, ນິ່ນ ບົ໋ວ ນິ່ນ ເຍີຍ ໄຊ-ກໍ໋,

2“ເມີ່ຍ ບົວ ຮິ້ວ ຕຸ໊ ມ່າຍ ອີ ຮນອຍ ຮນັ້ງ ເຖົາ ເສຍ ແໝ່ງ ຕສິ໊ບ ອ໊ະ. ເຢຍ, ປ້າມ ມ່ຽນ ເຍີຍ ຕອນ, ຕສ່ຽວ ຕສຸ ເຕສ໊າະ ຈິວ ປຸນ ມ່ຽນ ຕີງ ຕສຽບ ດສັ່ງ ຈ໋າ.”

3ວົ້ວ ຕສັ່ນ ໄຊ ມ່ຽນ ເປຢີ໊ຍ ເຖສົາ ແປະ ຝີງ ເຍີຍ ມ່ຽນ ໂກ໋ ກັ໊ບ ຕສຸ໊ນ ຢຽມ ຄາຢາຟາດ ຕົ້ມ ໄຊ ມ່ຽນ ເຍີຍ ຕິ່ນ,

4ທສ່າງ ລ່າງ ຕ໊າ ຕສະເອີ໋ຍ ປີ໋ງ ຈ໊ຽນ ເຕສ໊າະ ເຢຊູ ໄຕ໋ ກວັ່ງ.

5ມປ່າ ນິ່ນ ບົວ ກ໊ອງ, “ນ້າຍ ເຕີ໋ຍ ເຈ໋ຍ ຕສິ໊ບ ເຍີຍ ຮນອຍ ກະຍົ໌ວ ບົວ ໄມ້ ຕູ໋ງ ແກ້ງ ເຕສ໊າະ. ກ້ຳ ເດສ໋ຍ ຕສວັ໋ງ ມ່ຽນ ໄຮ່ ຫລຸ່ນ ເດສ່ງ ມເປີຍ.”

6ເຢຊູ ຢຽມ ເບທານີ ລ໌າງ, ປຸ໊ດ ເຈ໋ຍ ກົ້ມ ຮູ້ ແປ່ງ ວົ້ວ ເຕົ້າ ຊີມົນ ເຍີຍ ເປຢົ໊າ.

7ຫຍັ່ນ ຈ໊ຽນ ຫຮນາງ ເຍີຍ ຕສຢັ້ງ ໂຫ່, ມ່າຍ ເຕົ້າ ມເຊັຍ ຕອນ ຕໍ້ ນອມ ຫລະເປຢີ໊ຍ-ແປ້ງ ຕັ໊ບ ປວັ໊ງ ຈ໋າຍ ໄຫ່ ເຍີຍ ໂຢ້ວ ດາງ ຕ້າຍ ໂຕ໋ ເຢຊູ ເຍີຍ ມອກ໊ອງ.

8ໄຊ-ກໍ໋ ບົວ ປວັດ ຮນັ້ງ ໜ່າຍ ໂຕສ໋ວ, ນິ່ນ ບົວ ເຖຈຍ ເຈ໌ຍ ໄຫ່ ຕສ່ຽວ ກ໊ອງ, “ແປະໆ ຕສ໋າວ ກວັ່ງ ໂຕສ໋ວ ຫາຍ ຫຍູ່ງ?

9ນ້າຍ ເຕີ໋ຍ ໂຢ້ວ ດາງ ໄຮ່ ໝ່າຍ ຕຸ໊ ຍ່ານ ທສ້ຳ ໄຫ່ ປຸນ ມ່ຽນ ຈົ່ມ ມ່ຽນ ນີອາ.”

10ເຢຊູ ຮິ້ວ ຕຸ໊ ນິ່ນ ບົວ ຮນັ້ງ ຫາຍ ນໍ ກ໊ອງ ນິ່ນ ຕສ່ຽວ ບົ໋ວ ນິ່ນ ບົວ, “ເມີ່ຍ ບົວ ໂຕສ໋ວ ຫາຍ ຫຍູ່ງ ຫລະເຍົ້າ ນ້າຍ ເຕົ້າ ມເຊັຍ ຕອນ? ນິ່ນ ຮນັ້ງ ນ້າຍ ນໍ ໂຕສ໋ວ ປຸນ ເຢຍ ເຊ ຫລົງ ໄຫ່ ອ໊ະ.

11ເມີ່ຍ ບົວ ຕສັ່ນໆ ມ່າຍ ມ່ຽນ ຈົ່ມ ມ່ຽນ ເຖສົາ ເມີ່ຍ ບົວ ຢຽມ. ມປ່າ ເມີ່ຍ ບົວ ໄມ້ ຕຸ໊ ເຢຍ ເຖສົາ ເມີ່ຍ ບົວ ຢຽດ ລິ໌ວ ຢຽມ.

12ນິ່ນ ເຕສ໊າະ ໂຢ້ວ ດາງ ໂຕ໋ ເຢຍ ເຍີຍ ຊິນ, ນິ່ນ ໂຕສ໋ວ ເຫວີ່ຍ ຫລິ່ວ ເລີ໌ຍ ຕສັ໋ງ ເຢຍ ເຍີຍ ເຊີຍ.

13ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ໄມ້ ກຸ໊ນ ມີ່ງ ເຖົາ ລູ່ງ ເດ໊ຍ ຫາຍ ນອມ ຕ໋ອງ ຕສຸ້ນ ນ້າຍ ຄູ້ ຝຽນ, ມ່ຽນ ຕສ່ຽວ ກ໊ອງ ນ້າຍ ເຕົ້າ ມເຊັຍ ຕອນ ໂຕສ໋ວ ເຍີຍ ເຈົ໊າ-ໂຫລ່ວ ເຫວີ່ຍ ຈັ໋ງ ເຖົາ ນິ່ນ.”

14ວົ້ວ ເຕີ໋ຍ ຕສຽບ ເຫຍີ່ຍ ເຕົ້າ ໄຊ-ກໍ໋ ມ່າຍ ເຕົ້າ, ຕົ້ງ ບົ໋ວ ເຫ່ວ ຢູດາດ ອິສະຄາລິໂອດ ວົ້ວ ເຕົ້າ, ມີ່ງ ລໍ໌ ໄຊ ມ່ຽນ ເປຢີ໊ຍ

15ໜ່າຍ ນິ່ນ ບົວ, “ເຊ ກ໊ອງ ເຢຍ ເຕສ໊າະ ເຢຊູ ຈິວ ປຸນ ເມີ່ຍ ບົວ, ເມີ່ຍ ບົວ ປຸນ ຫາຍ ຫຍູ່ງ ເຢຍ?” ໄຊ ມ່ຽນ ເປຢີ໊ຍ ຕສ່ຽວ ຊ້າວ ຟ່າ ຕສຽບ ນອມ ໂລ໌-ຮນອຍ ເຍີຍ ຕສິ້ນ ປຸນ ຢູດາດ.

16ຢຽມ ໜ່າຍ ຕ້າຍ, ຢູດາດ ລໍ໌ ຖຈັງ ເຕສ໊າະ ເຢຊູ ຈິວ ປຸນ ນິ່ນ ບົວ.

17ເຈ໋ຍ ຕົ້ງ ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ ຕ້າວ ຮນອຍ, ໄຊ-ກໍ໋ ບົວ ຕ້າຍ ໜ່າຍ ເຢຊູ, “ໄຊ-ເຕ໋ຍ ອ໋ອຍ ເຢຍ ບົວ ຢຽມ ຫາຍ ເບ່ນ ເສຍ ແໝ່ງ ຕສິ໊ບ ເຍີຍ ຫຮນາງ ປຸນ ໄຊ-ເຕ໋ຍ ຫຍັ່ນ?”

18ເຢຊູ ບົ໋ວ ນິ່ນ ບົວ, “ເມີ່ຍ ບົວ ເປັຍ ຕສີ້ງ ມີ່ງ ລໍ໌ ຢຽດ ລ່ານ ມ່ຽນ, ຢ່າ ບົ໋ວ ນິ່ນ, ‘ໄຊ-ເຕ໋ຍ ກ໊ອງ, ເຢຍ ເຍີຍ ຕສຢັ້ງ ໂຫ່ ເຖົາ ອ໊ະ. ເຢຍ ເຖສົາ ເຢຍ ເຍີຍ ໄຊ-ກໍ໋ ອ໋ອຍ ຢຽມ ເມີ່ຍ ເຍີຍ ເປຢົ໊າ ເຈ໋ຍ ເສຍ ແໝ່ງ ຕສິ໊ບ.’”

19ໄຊ-ກໍ໋ ບົວ ຕສ່ຽວ ເອີຍ ເຢຊູ ເຍີຍ ຫວ່າ ໂຕສ໋ວ, ມີ່ງ ເບ່ນ ເສຍ ແໝ່ງ ຕສິ໊ບ ເຍີຍ ຫຮນາງ.

20ລູ່ງ ມ໌ານ-ຫຮມວັງ, ເຢຊູ ເຖສົາ ນິ່ນ ເຍີຍ ຕສຽບ ເຫຍີ່ຍ ເຕົ້າ ໄຊ-ກໍ໋ ຝາວ ເຕ້ຍ ຫຍັ່ນ ຫຮນາງ.

21ຫຍັ່ນ ຈ໊ຽນ ຫຮນາງ ວົ້ວ ຕສັ່ນ, ເຢຊູ ກ໊ອງ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຢຽມ ເມີ່ຍ ບົວ ບຸດົ໋ງ ມ່າຍ ເຕົ້າ ອ໋ອຍ ໝ່າຍ ເຢຍ.”

22ໄຊ-ກໍ໋ ບົວ ຕສະເກ້ງ! ເດສົ້າ ໄຫ່ ຕສ່ຽວ ຢຽດ ເຕົ້າ ຢຽດ ເຕົ້າ ເຍີຍ ໜ່າຍ ເຢຊູ, “ຕສ໊ຽວ ອ່າ, ໄມ້ ເຕສີ໌ຍ ເຢຍ ຊ່າະ?”

23ເຢຊູ ເຕົາ, “ຕົ້ງ ເຖສົາ ເຢຍ ຈວັ່ງ ດສ່ອມ ກົ໊ວະ ອຈົ໊ວ ວົ້ວ ເຕົ້າ ອ໋ອຍ ໝ່າຍ ເຢຍ.

24ເຢຍ, ປ້າມ ມ່ຽນ ເຍີຍ ຕອນ, ອ໋ອຍ ຕສຸ ເກວີຍ ເສີຍ ຮນັ້ງ ກີງ-ໂຊວ ກ໊ອງ ນໍ. ມປ່າ ໝ່າຍ ເຢຍ ວົ້ວ ເຕົ້າ ຕສູ໊ງ ຕສຸ ໂຄ້ວ ອ໊ະ. ນິ່ນ ໄມ້ ຕູ໋ງ ທສວດ ເສີຍ ເກົ້າ ຫລົງ.”

25ໝ່າຍ ເຢຊູ ວົ້ວ ເຕົ້າ ຢູດາດ ກ໊ອງ, “ໄຊ-ເຕ໋ຍ ອ້າ! ໄມ້ ເຕສີ໌ຍ ເຢຍ ຊ່າະ?” ເຢຊູ ເຕົາ, “ໜ່າຍ ເຊ ເມີ່ຍ ກັ້ນ ກ໊ອງ ອ໊ະ.”

26ຫຍັ່ນ ຈ໊ຽນ ວົ້ວ ຕສັ່ນ, ເຢຊູ ເຕສ໊າະ ອຈົ໊ວ ຕ້າຍ, ແລ໌ງ ຕສີ້ງ ລິ໌ວ ທິນ-ຮູ່ງ, ຕສ່ຽວ ແມະ ອກອຍ ປຸນ ນິ່ນ ເຍີຍ ໄຊ-ກໍ໋ ບົວ, ຢ່າ ກ໊ອງ, “ຕສິ໊ບ ຕ້າຍ ຫຍັ່ນ ອ໊ະ. ນ້າຍ ເຊ ເຢຍ ເຍີຍ ຊິນ.”

27ເຢຊູ ແອ໋ງ ເຕສ໊າະ ຕສ໊ານ ອະຫງຸ່ນ ຕິ໊ວ ຕ້າຍ, ແລ໌ງ ຕສີ້ງ ລິ໌ວ ທິນ-ຮູ່ງ, ຕສ່ຽວ ປຸນ ນິ່ນ ບົວ, ຢ່າ ກ໊ອງ, “ເມີ່ຍ ບົວ ຢຽດ ຕສູ໊ງ ກຸ໊ນ ຮົບ ມ່າະ!

28ນ້າຍ ເຊ ເຢຍ ເຍີຍ ດສຢ໊າມ ເຫວີ່ຍ ຫລຽບ ເຈ໌ຍ ທິນ-ຮູ່ງ ເຍີຍ ແຫງ່ງ ຫວ່າ. ເຊ ຫລ່ຽວ ທສວດ ເຫວີ່ຍ ປຸນ ທິນ-ຮູ່ງ ກວັ່ງ ມ່ຽນ ທສ້ຳ ເຍີຍ ຕສຸ໌ຍ.

29ເຢຍ ບົ໋ວ ເມີ່ຍ ບົວ, ຢຽມ ນ້າຍ ມີ່ງ, ເຢຍ ໄມ້ ເຖສົາ ເມີ່ຍ ບົວ ຮົບ ນ້າຍ ອະຫງຸ່ນ ຕິ໊ວ. ຕສົ໊ວ ເຖົາ ຢຽມ ເຢຍ ເຍີຍ ເຕຍ ເຍີຍ ກົ໊ວະ ຖສີງ ຕ້າຍ ຕຸ໊ ເຖສົາ ເມີ່ຍ ບົວ ຊຢັງ-ຮົບ ເຈ໋ຍ.”

30ນິ່ນ ບົວ ປ໋າວ ລິ໌ວ ດສູງ, ຕສ່ຽວ ທສວດ ຕ້າຍ, ມີ່ງ ວົ້ວ ກະລັ້ນ ບົງ ໝີ່ ອ໊ະ.

31ວົ້ວ ຕສັ່ນ ເຢຊູ ກ໊ອງ ບົ໋ວ ນິ່ນ ເຍີຍ ໄຊ-ກໍ໋, “ອີ້ ມ໌ວນ ເມີ່ຍ ບົວ ຢຽດ ຕສູ໊ງ ອ໋ອຍ ກວັ່ງ ຈ໊ຽນ ເຢຍ ເປຢົ໋າ, ເຫວີ່ຍ ຕສຸ ກີງ-ໂຊວ ເຟ້ຍ ຈ໊ຽນ ກ໊ອງ, ‘ທິນ-ຮູ່ງ ອ໋ອຍ ໄຕ໋ ປະກີ ຢູ້ງ ເຍີຍ ຕສ໊ຽວ. ປະກີ ຢູ້ງ ກວັ້ນ ຕສ່ຽວ ດສ໋ານ ເດສ່ງ ໝີ່ ອ໊ະ.’

32ມປ່າ ເຢຍ ໄຕ່ ມີ່ງ, ທິນ-ຮູ່ງ ແອ໋ງ ປຸນ ເຢຍ ນັ່ງ ຕ້າຍ, ເຢຍ ຕສ່ຽວ ມີ່ງ ກາລິລີ ແຊ້ງ ດ່າງ ເມີ່ຍ ບົວ.”

33ປີເຕ ກ໊ອງ ບົ໋ວ ເຢຊູ, “ໄມ້ ກຸ໊ນ ນິ່ນ ບົວ ຢຽດ ຕສູ໊ງ ກວັ່ງ ໄຊ-ເຕ໋ຍ, ເຢຍ ຢຽດ ລິ໌ວ ໄມ້ ກວັ່ງ.”

34ເຢຊູ ກ໊ອງ ບົ໋ວ ປີເຕ, “ເຢຍ ກ໊ອງ ຕສຽນ ບົ໋ວ ເມີ່ຍ. ອີ້ ມ໌ວນ, ໄຈ ຕສູ໊ງ ໄມ້ ແກ້ງ ອກ໋າຍ, ເມີ່ຍ ຕສູ໊ງ ໄມ້ ຫຍ່ຽມ ເຢຍ ປົວ ດສຸ່ນ.”

35ປີເຕ ກ໊ອງ, “ໄມ້ ກຸ໊ນ ເຢຍ ຕສຸ ເຖສົາ ໄຊ-ເຕ໋ຍ ໄຕ່, ເຢຍ ຢຽດ ລິ໌ວ ຫຍ່ຽມ, ໄມ້ ກວັ່ງ ເມີ່ຍ.” ວົ້ວ ເຕີ໋ຍ ໄຊ-ກໍ໋ ຢຽດ ຕສູ໊ງ ຢ່າ ຟີ່ ຮນັ້ງ ເຍີຍ ກ໊ອງ.

36ເຢຊູ ເຖສົາ ນິ່ນ ເຍີຍ ໄຊ-ກໍ໋ ມີ່ງ ນອມ ຕ໋ອງ, ບົ໋ວ ເຫ່ວ ເກດເສມານີ. ເຢຊູ ບົ໋ວ ນິ່ນ ເຍີຍ ໄຊ-ກໍ໋, “ເມີ່ຍ ບົວ ເຕສວີ໌ຍ ຈ໊ຽນ ນ້າຍ ຕສົ໊ວ ເຢຍ ມີ່ງ ວົ້ວ ແໝງ ເຕົ໋າ ເກົ໋າ.”

37ນິ່ນ ຕສ່ຽວ ຕໍ້ ປີເຕ ເຖສົາ ເສເບດີ ເຍີຍ ອີ ເຕົ້າ ຕອນ ເຖສົາ ຈ໊ຽນ ມີ່ງ. ວົ້ວ ຕສັ່ນ ເຢຊູ ໄຮ໌ ໂຮຍ້ວ ຮວາງ, ເດສົ້າ ຕຸ໊ ໂຄ້ວ ໄຫ່,

38ເຢຊູ ບົ໋ວ ນິ່ນ ບົວ, “ເຢຍ ໄຮ໌ ຕສະເກ້ງ! ເດສົ້າ ໄຫ່, ຮນັ້ງ ໄຮ່ ໄຕ່ ເຍີຍ ນໍ. ເມີ່ຍ ບົວ ເຖສົາ ເຢຍ ຢຽມ ນ້າຍ ກີງ ໂຮຍ້ວ ຕສົ໊ວ ຈ໊ຽນ ໂອ່.”

39ເຢຊູ ແອ໋ງ ເຈ໋ຍ ມີ່ງ ເຕີ໋ຍ ຕສ່ຽວ ບ໊າບ ເອຈ່ຍ, ຮມຽນ ເຖົາ ເດົາ ເຕົ໋າ ເກົ໋າ ກ໊ອງ, “ເຢຍ ເຍີຍ ເຕຍ ອ້າ! ເຊ ກ໊ອງ ຫອບ ເຍີຍ ນໍ, ໂທ້ ເຕຍ ເຕສ໊າະ ອກອຍ ເຢຍ ອ໋ອຍ ຕສຸ ຮົບ ນ້າຍ ນອມ ຕສ໊ານ. ມປ່າ ໄມ້ ຕູ໋ງ ເອີຍ ເຢຍ ເຍີຍ ເອີ໋ຍ. ອ໋ອຍ ຕສຸ ເອີຍ ເຕຍ ເຍີຍ ເອີ໋ຍ ຮນັ້ງ.”

40ເຢຊູ ແອ໋ງ ດສ໋ວນ ເຖົາ ວົ້ວ ເຕີ໋ຍ ປົວ ເຕົ້າ ໄຊ-ກໍ໋ ວົ້ວ, ປວັດ ນິ່ນ ບົວ ມອຈ້ອມ ເດສ່ງ. ນິ່ນ ຕສ່ຽວ ບົ໋ວ ປີເຕ, “ເມີ່ຍ ບົວ ໂຕສ໋ວ ຫາຍ ຫຍູ່ງ ເຖສົາ ເຢຍ ຕສົ໊ວ ໄມ້ ຕຸ໊ ຢຽດ ນອມ ຕສຢັ້ງ ໂຫ່?

41ອ໋ອຍ ຕສຸ ກີງ ຈ໊ຽນ ໂຮຍ້ວ ເຕົ໋າ ເກົ໋າ, ໂທ້ ທິນ-ຮູ່ງ ໄມ້ ຕູ໋ງ ປຸນ ເມີ່ຍ ບົວ ປວັ້ງ ຕສຸ ເສີຍ ໂຮຍ້ວ ເຍີຍ ສີ່. ເມີ່ຍ ບົວ ເຍີຍ ໂຮຍ້ວ ອ໋ອຍ ໂຕສ໋ວ ຫອບ, ມປ່າ ຊິນ ຕສັ່ງ ເມົາ ໄຫ່.”

42ເຢຊູ ແອ໋ງ ມີ່ງ ເຕົ໋າ ເກົ໋າ ຕະເຫຍີ່ຍ ດສຸ່ນ. ນິ່ນ ກ໊ອງ, “ເຢຍ ເຍີຍ ເຕຍ ອ້າ! ເຊ ກ໊ອງ ນ້າຍ ນອມ ຕສ໊ານ ເຢຍ ຊິ້ມ ໄມ້ ດຸ໊ດ, ຕສະເກ້ງ ອ໋ອຍ ຕສຸ ຮົບ ນໍ, ໂທ້ ເອີຍ ເຕຍ ເຍີຍ ເອີ໋ຍ ໂຕສ໋ວ ຕສຢັ໋ງ.”

43ເຢຊູ ແອ໋ງ ດສ໋ວນ ເຖົາ ໄຊ-ກໍ໋ ບົວ ວົ້ວ, ປວັດ ນິ່ນ ບົວ ມອຈ້ອມ ໝີ່ ອ໊ະ, ເຫວີ່ຍ ຕສຸ ມຕສີງ ຫຍຸຍ ໄຫ່, ໜູງ ໄມ້ ອກອຍ.

44ເຢຊູ ແອ໋ງ ເລີ່ຍ ນິ່ນ ບົວ, ມີ່ງ ເຕົ໋າ ເກົ໋າ ຕະຟາມ ດສຸ່ນ, ຢ່າ ຮນັ້ງ ຕສິ້ນ ດ່າງ ວົ້ວ ດສຸ່ນ ນໍ ເຕົ໋າ ເກົ໋າ.

45ອກະຮ້າ ນິ່ນ ແອ໋ງ ດສ໋ວນ ໄຊ-ກໍ໋ ບົວ ວົ້ວ. ນິ່ນ ກ໊ອງ, “ເມີ່ຍ ບົວ ຖສໍ່ ຢຽມ ໜ່າຍ ເປວີ໋ຍ ມອຈ້ອມ ຮິດ ຂວນ? ໝັ່ງ ມ່າະ! ຕສຢັ້ງ ໂຫ່ ເຖົາ ອ໊ະ. ເຢຍ, ປ້າມ ມ່ຽນ ເຍີຍ ຕອນ, ຕສຸ ຈິວ ປຸນ ຢຽມ ຕສຸ໌ຍ-ມ່ຽນ ເຍີຍ ປົ໌ວ-ເດ໊ຍ.

46ເຈ໌ຍ ຊິນ ຕ້າຍ, ບົວ ມີ່ງ ອ໊ະ. ໝັ່ງ ກ໋າ ວົ້ວ! ໝ່າຍ ເຢຍ ວົ້ວ ເຕົ້າ ມ່ຽນ ຕ້າຍ ເຖົາ ອ໊ະ.”

47ເຢຊູ ກ໊ອງ ຫວ່າ ຕສູ໊ງ ໄມ້ ແກ້ງ ເຊດ, ຕສຽບ ເຫຍີ່ຍ ເຕົ້າ ໄຊ-ກໍ໋ ເຍີຍ ຢຽດ ເຕົ້າ, ບົ໋ວ ເຫ່ວ ຢູດາດ, ຕ້າຍ ເຖົາ. ແອ໋ງ ມ່າຍ ໄຊ ມ່ຽນ ເປຢີ໊ຍ ເຖສົາ ແປະ ຝີງ ເຍີຍ ມ່ຽນ ໂກ໋ ພ້າຍ ຕ້າຍ ເຍີຍ ມ່ຽນ ທສ້ຳ ຕໍ້ ຈ໊ຽນ ດສຸ ດ໊າວ, ນັ້ນ ຈ໊ຽນ ດຢັ໋ງ-ດົ໋ນ, ກັນ ຈ໊ຽນ ຕ້າຍ.

48ໝ່າຍ ເຢຊູ ວົ້ວ ເຕົ້າ ຈາ-ດ່າງ ບົ໋ວ ຕສຢັ໋ງ ວົ້ວ ເຕີ໋ຍ, ນິ່ນ ອ໋ອຍ ໂຕສ໋ວ ນອມ ຈັ໋ງ-ໂຫ່ ປຸນ ນິ່ນ ບົວ ຮິ້ວ ຕຸ໊ ເຢຊູ. ນິ່ນ ກ໊ອງ, “ເຢຍ ຕສົມ ຫາຍ ເຕົ້າ, ເຊ ຕົ້ງ ເມີ່ຍ ບົວ ອ໋ອຍ ເຕສ໊າະ ວົ້ວ ເຕົ້າ ອ໊ະ. ກຸ໊ນ ເຕສ໊າະ ອ໊ະ.”

49ຢູດາດ ແປງ ຕສະ ເຍີຍ ມີ່ງ ເຖົາ ເຢຊູ ວົ້ວ ຢ່າ ກ໊ອງ, “ໄຊ-ເຕ໋ຍ ອ້າ! ແປ້ງ ອອນ ເຍີຍ ຊ່າະ?” ຕສ່ຽວ ຕສົມ ນິ່ນ ເຍີຍ ຮມຽນ.

50ເຢຊູ ກ໊ອງ, “ໂຢ໌ວ ອ່າ, ເມີ່ຍ ອ໋ອຍ ໂຕສ໋ວ ຫາຍ ຫຍູ່ງ ກ໊ານ ໂຕສ໋ວ ຊຽບ ອ໊ະ.” ວົ້ວ ເຕີ໋ຍ ມ່ຽນ ຕສ່ຽວ ຕ້າຍ ເອຈ່ຍ ປົ໌ວ ເຕສ໊າະ ຈ໊ຽນ ເຢຊູ.

51ມ່າຍ ເຕົ້າ ເຖສົາ ເຢຊູ ຢຽມ ວົ້ວ ເຍີຍ ມ່ຽນ ແປງ ນິ່ນ ເຍີຍ ດສຸ ດ໊າວ ທສວດ, ຮງະ ຕົ້ມ ໄຊ ມ່ຽນ ເຍີຍ ໂນ່ວ, ໄພ ຕສຸ ໂນ່ວ ເຍີຍ ຢຽດ ປູງ ມນ່ອມ ດຸ໊ດ ມີ່ງ.

52ເຢຊູ ບົ໋ວ ນິ່ນ ບົວ, “ເຕສ໊າະ ເມີ່ຍ ເຍີຍ ດສຸ ດ໊າວ ທັບ ຈ໊ຽນ ໄພ້ ມ່າະ! ຫາຍ ເຕົ້າ ຫລົ່ງ ດສຸ ດ໊າວ, ຕສູ໊ງ ອ໋ອຍ ຕສຸ ຫລາຍ ດສຸ ດ໊າວ ໄຕ່.

53ເມີ່ຍ ໄມ້ ຮິ້ວ ໄຟ? ເຢຍ ໄຮ່ ໂທ້ ເຢຍ ເຍີຍ ເຕຍ, ດຸ ຕັ້ງ ຮນັ້ງ ນິ່ນ ຕສ່ຽວ ພ້າຍ ຟິນ-ມ່ຽນ ແປງ ເກົ້າ ທສ້ຳ ຕສຽບ ເຫຍີ່ຍ ກວັ້ນ ຕ້າຍ ເຖງ ເຢຍ.

54ມປ່າ, ເຊ ກ໊ອງ ເຢຍ ຮນັ້ງ ໜ່າຍ ໂຕສ໋ວ, ສີ່ ຮນັ້ງ ຫາຍ ນໍ ໄຮ່ ທສວດ ຕ້າຍ ຕ໋ອຍ ກີງ-ໂຊວ ເຟ້ຍ ຫອບ ຕສຸ ທສວດ ເຍີຍ ຫວ່າ?”

55ເຢຊູ ຕສ່ຽວ ກ໊ອງ ບົ໋ວ ກັ໊ບ ຕສຸ໊ນ ເຍີຍ ຕສວັ໋ງ ມ່ຽນ, “ເມີ່ຍ ບົວ ປວັດ ເຢຍ ຮນັ້ງ ຕສະ ແປງ ຖສີງ ຕ້າຍ ຕໍ້ ຈ໊ຽນ ດສຸ ດ໊າວ ເຖສົາ ດຢັ໋ງ-ດົ໋ນ ຕ້າຍ ເຕສ໊າະ ເຢຍ? ເຢຍ ຮນອຍໆ ເຕສວີ໌ຍ ຈ໊ຽນ ຕສັ່ງ ທິນ-ຮູ່ງ ເຍີຍ ເປຢົ໊າ ອຈ໋າວ ມ່ຽນ, ເມີ່ຍ ບົວ ຢ່າ ໄມ້ ເຕສ໊າະ.

56ມປ່າ ນ້າຍ ເຕີ໋ຍ ຢຽດ ຕສູ໊ງ ສີ່ ທສວດ ຕ້າຍ ເຫວີ່ຍ ປຸນ ຕ໋ອຍ ເດສ່ງ ຕສິ້ນ ດ່າງ ໂຕ່ວ ຫວ່າ ມ່ຽນ ເຟ້ຍ ຈ໊ຽນ ກີງ-ໂຊວ ວົ້ວ ເຕີ໋ຍ ຫວ່າ.” ວົ້ວ ຕສັ່ນ ໄຊ-ກໍ໋ ບົວ ຕສ່ຽວ ກວັ່ງ ຈ໊ຽນ ເຢຊູ, ເປຢົ໋າ ເດສ່ງ ໝີ່ ອ໊ະ.

57ເຕສ໊າະ ເຢຊູ ວົ້ວ ເຕີ໋ຍ ມ່ຽນ ຕໍ້ ນິ່ນ ມີ່ງ ເຖົາ ຄາຢາຟາດ ຕົ້ມ ໄຊ ມ່ຽນ ວົ້ວ. ມ່າຍ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ມ່ຽນ ໂກ໋ ກັ໊ບ ຕສຸ໊ນ ຢຽມ ວົ້ວ.

58ປີເຕ ກັນ ຈ໊ຽນ ມີ່ງ ມປ່າ ເລີ່ຍ ໂກ ເຕີ໋ຍ ເຍີຍ, ເຖົາ ຕົ້ມ ໄຊ ມ່ຽນ ເຍີຍ ເປຢົ໊າ-ເຮລນ ເປັຍ ຫລາດ ກະຍົ໌ວ. ນິ່ນ ເຖສົາ ຕສົ໊ວ ເປຢົ໊າ ເຍີຍ ແປງ ເຕສວີ໌ຍ ຈ໊ຽນ ວົ້ວ, ອ໋ອຍ ໝວັງ ກ໋າ, ນ້າຍ ເຕີ໋ຍ ສີ່ ຮນັ້ງ ຫາຍ ນໍ.

59ໄຊ ມ່ຽນ ເປຢີ໊ຍ ເຖສົາ ກຸ໊ນ ສີ່ ຫວຸ່ຍ ເຍີຍ ຕສວັ໋ງ ມ່ຽນ ລໍ໌ ຈ໊າ ຕສອງ-ເຕສ໋ງ ໂກ໋ ເຢຊູ ເຫວີ່ຍ ປຸນ ນິ່ນ ຕສຸ ໄຕ໋.

60ມປ່າ ໄມ້ ກຸ໊ນ ມ່າຍ ມ່ຽນ ທສ້ຳ ຕ້າຍ ໂຕສ໋ວ ຈ໊າ ຕສອງ-ເຕສ໋ງ, ຢ່າ ລໍ໌ ໄມ້ ຕຸ໊ ຫາຍ ຫຍູ່ງ ກອນ-ແປ໋ງ ໂກ໋ ນິ່ນ. ໂຕສ໋ວ ເກົາ, ມ່າຍ ອີ ເຕົ້າ ທສວດ ຕ້າຍ

61ກ໊ອງ, “ນ້າຍ ລ່ານ ມ່ຽນ ກ໊ອງ, ‘ເຢຍ ໄຮ່ ແທສະ ເດສ່ງ ຕສັ່ງ ທິນ-ຮູ່ງ ເຍີຍ ເປຢົ໊າ. ປົວ ຮນອຍ ກະຍົ໌ວ ແອ໋ງ ກັ້ນ ເຖສີຍ ເຈ໌ຍ ຕ້າຍ.’”

62ຕົ້ມ ໄຊ ມ່ຽນ ຕສ່ຽວ ໂຊ້ວ ເຈ໌ຍ ຕ້າຍ ໜ່າຍ ເຢຊູ, “ນ້າຍ ເຕີ໋ຍ ມ່ຽນ ຮນັ້ງ ນ້າຍ ນໍ ໂກ໋ ເມີ່ຍ, ເມີ່ຍ ໄມ້ ເຕົາ ໄຟ?”

63ມປ່າ ເຢຊູ ໄມ້ ໂຄ ໂລ. ຕົ້ມ ໄຊ ມ່ຽນ ແອ໋ງ ບົ໋ວ ເຢຊູ, “ເຢຍ ຕສຢັ໊ງ ຈ໊ຽນ ຢຽດ ລິ໌ວ ຕສຢັ້ງ ເຍີຍ ທິນ-ຮູ່ງ ຫັດ ເມີ່ຍ ກ໊ອງ ຕສະ ບົ໋ວ ເຢຍ ບົວ, ເມີ່ຍ ຕສະເກ້ງ ທິນ-ຮູ່ງ ເຍີຍ ຕອນ, ກີຕູ່, ເຕສີ໌ຍ ໄຟ ໄມ້ ເຕສີ໌ຍ?”

64ເຢຊູ ເຕົາ, “ເຊ ຮນັ້ງ ເມີ່ຍ ກ໊ອງ ນໍ.” ມປ່າ ເຢຍ ບົ໋ວ ເມີ່ຍ ບົວ, ອກະຮ້າ ຮີ້ງ ເມີ່ຍ ບົວ ອ໋ອຍ ປວັດ ເຢຍ, ປ້າມ ມ່ຽນ ເຍີຍ ຕອນ, ເຕສວີ໌ຍ ຈ໊ຽນ ເນິ່ນ ເຈ໋ຍ ເຍີຍ ທິນ-ຮູ່ງ ເຍີຍ ບຢ່າວ ແໝງ, ຢ່າ ຢຽມ ວົ້ວ ບ໋ວນ ເອຈ່ຍ ຕ້າຍ.”

65ຕົ້ມ ໄຊ ມ່ຽນ ໄຮ໌ ນ້າຍ ເຕີ໋ຍ ຫວ່າ, ຕສ່ຽວ ເປ໊ດ ນິ່ນ ກັ້ນ ເຍີຍ ລຸຍ ຢ່າ ກ໊ອງ, “ນິ່ນ ຄີ ທິນ-ຮູ່ງ! ບົວ ໄມ້ ຕສຸ ລໍ໌ ຫາຍ ເຕົ້າ ໂຕສ໋ວ ຕສອງ-ເຕສ໋ງ ອ໊ະ. ເມີ່ຍ ບົວ ອີ້ ຕສັ່ນ ຕສູ໊ງ ໄຮ໌ ນິ່ນ ຄີ ທິນ-ຮູ່ງ.

66ເມີ່ຍ ບົວ ຮນັ້ງ ຫາຍ ນໍ ຮນ້ຳ?” ນິ່ນ ບົວ ເຕົາ, “ນິ່ນ ຕ່ອງ ອ໊ະ. ຕສີ່ ຕຸ໊ ໄຕ່ ອ໊ະ.”

67ນິ່ນ ບົວ ຕສ່ຽວ ທຸ້ຍ ວວມ-ດສຸ້ຍ ແນດ ເຢຊູ ເຍີຍ ຮມຽນ ຢ່າ ຫລົ່ງ ປົ໌ວ-ຈ້ວນ ເບ໊າະ. ມ່າຍ ເຕີ໋ຍ ຫລົ່ງ ປົ໌ວ-ຕສ໊າງ ໄບ໋,

68ຢ່າ ກ໊ອງ, “ເມີ່ຍ ໜ່າຍ ເຕົ້າ ກີຕູ່ ອ້າ! ໄທສ ກ໋າ! ບົ໋ວ ເຢຍ ບົວ ມ່າະ! ຫາຍ ເຕົ້າ ເບ໊າະ ເມີ່ຍ?”

69ປີເຕ ເຕສວີ໌ຍ ຈ໊ຽນ ເປຢົ໊າ-ເຮລນ ຫລາດ ກະຍົ໌ວ ວົ້ວ ຕສັ່ນ, ມ່າຍ ເຕົ້າ ມເຊັຍ ໂປວ ຕ້າຍ ກ໊ອງ, “ເມີ່ຍ ຢ່າ ກັນ ວົ້ວ ເຕົ້າ ກາລິລີ ມ່ຽນ, ເຢຊູ, ໄມ້ ເຕສີ໌ຍ?”

70ມປ່າ ປີເຕ ຕອງ ຈ໊ຽນ ຕສວັ໋ງ ມ່ຽນ ໄມ້ ຫຍ່ຽມ. ນິ່ນ ກ໊ອງ, “ເຢຍ ໄມ້ ຮິ້ວ ຕຸ໊ ເມີ່ຍ ກ໊ອງ ຫາຍ ຫຍູ່ງ.”

71ກ໊ອງ ລິ໌ວ, ປີເຕ ຕສ່ຽວ ມີ່ງ ເຖົາ ວົ້ວ ຫລາດ ແກ້ງ. ແອ໋ງ ມ່າຍ ເຕົ້າ ມເຊັຍ ໂປວ ປວັດ ນິ່ນ ຕສ່ຽວ ບົ໋ວ ຢຽມ ວົ້ວ ກະເຮລນ ເຍີຍ ມ່ຽນ, “ນ້າຍ ເຕົ້າ ມ່ຽນ ຢ່າ ກັນ ນາຊາເລດ ມູ້ງ ເຍີຍ ເຢຊູ ແອ໋.”

72ປີເຕ ແອ໋ງ ໄມ້ ຫຍ່ຽມ. ນິ່ນ ກ໊ອງ, “ໂດ໊ວ ຫາຍ ຫຍູ່ງ ຢ່າ ໂດ໊ວ ຕຸ໊, ເຢຍ ໄມ້ ຮິ້ວ ວົ້ວ ລ່ານ ມ່ຽນ.”

73ຢຽດ ຕສັ່ນ ເຈ໋ຍ, ໂຊ້ວ ຈ໊ຽນ ວົ້ວ ກະເຮລນ ເຍີຍ ມ່ຽນ ຕ້າຍ ກ໊ອງ ປີເຕ, “ເຕສີ໌ຍ ເຍີຍ. ເມີ່ຍ ເກ້ງ ຢຽດ ເຕົ້າ ວົ້ວ ເຕີ໋ຍ ມ່ຽນ ອ໊ະ. ເມີ່ຍ ກ໊ອງ ຫວ່າ ເຍີຍ ເຖຈຍ ປຸນ ເມີ່ຍ ກັ້ນ ປີ໋ງ ໄມ້ ເບວີ໌ຍ ອ໊ະ.”

74ປີເຕ ຕສ່ຽວ ແອ໋ງ ໂດ໊ວ ເຈ໌ຍ ຕສ໋ຽວ ກ໊ອງ, “ເຢຍ ຕສະເກ້ງ! ໄມ້ ຮິ້ວ ຕຸ໊ ວົ້ວ ລ່ານ ມ່ຽນ.” ລ່ຽມ ເຕສີ້ຍ ໄຈ ອກ໋າຍ ອ໊ະ.

75ປີເຕ ຈັ໋ງ ຕສຸ ເຢຊູ ກ໊ອງ ເຍີຍ ຫວ່າ, “ໄຈ ຕສູ໊ງ ໄມ້ ແກ້ງ ອກ໋າຍ, ເມີ່ຍ ໄມ້ ຫຍ່ຽມ ເຢຍ ປົວ ດສຸ່ນ.” ປີເຕ ຕສ່ຽວ ທສວດ ມີ່ງ ຍ້ຽມ ຕຸ໊ ໂຄ້ວ ໄຫ່.

← Chapter 25 Jump to: Chapter 27 →