Joshua 1

Mossi MPBU (WẼNNAAM SEBRE 2014)

Jump to: Chapter 2 →

1Sẽn-Ka-Saab tʋmtʋmd a Moyiis kũumã zugẽ, Sẽn-Ka-Saab goma ne a Nun biig a Zozoe sẽn yɩ a Moyiis rakõorã n yeele:

2«Mam tʋmtʋmd a Moyiis kiime. Moasã, bee ne foom tɩ f yik n tall nebã fãa n dʋʋg Zʋrdẽ kʋɩlgã n kẽng tẽng ning mam sẽn kõt Israyɛll nebã.

3Mam kõta yãmb zĩig ning fãa yãmb naoor sẽn na n tabge, wa mam sẽn dag n yeel a Moyiisã.

4Yãmb soolmã na n sɩnga ne we-raoogã, la Libã tãmsã yãmb sẽn ne wã, hal tɩ ta kʋɩl-kãsengã b sẽn boond tɩ Efratã, la Hɛt-rãmba tẽngã fãa, n tɩ ta ko-kãsengã sẽn be wĩndgã sẽn lʋɩtẽ wã.

5Fo vɩɩmã tɛka, ned ba a ye kõn tõog n teeg a yãoog ne foom ye. Bala, mam na n zĩnda ne foom wa m sẽn zĩnd ne a Moyiisã. Mam na n yãaga foom, la mam kõn tol n bas n ka sõng-f ye.

6Keng f meng n paam daoodo. Bala, yaa foom n na n kɩt tɩ m nebã soog tẽng ning mam sẽn wẽen n yeel b yaab-rãmbã tɩ m na n kõ-b lame wã.

7Fo we n keng f meng n paam daood bala, la f mao n sak tõog ning mam tʋmtʋmd a Moyiis sẽn kõ foomã neere. Fo sã n dat n paam tõogr ne bũmb nins fãa fo sẽn na n maanã, bɩ f ra bʋdg n leb goabg bɩ rɩtg ye.

8Karem tõogã koees daar fãa, n tags a yell wĩndg la yʋngo, n sak n maan wa bũmb nins sẽn gʋls a pʋgẽ wã. Yaa woto la f na n tõog n maan f tʋʋmã tɩ yɩ sõama, la yaa woto la f na n tõog ne f tʋʋmdã.

9Mam ka yeel foom tɩ f keng f meng n paam daood la? Da zoe rabeem ye, da yɛɛs ye. Bala, Sẽn-Ka-Saab sẽn yaa fo Wẽnnaamã na n zĩnda ne foom zĩig ninga fãa fo sẽn na n kẽnge.»

10A Zozoe yeela nebã kãsem-dãmbã yaa:

11«Saag-y tãb-sikã fãa n yeel nebã yaa: Bao-y rɩɩb sẽn na n zã, bala, keta rasem a tãab tɩ yãmb pɩʋʋg Zʋrdẽ kʋɩlgã n tɩ reeg tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã.»

12Dẽ, a Zozoe goma ne a Rubɛn la a Gaad buudã, ne a Manaase buudã pʋɩ-sʋkã n yeel-b yaa:

13«Tẽeg-y bũmb ning Sẽn-Ka-Saab tʋmtʋmd a Moyiis sẽn dag n yeel yãmbã. B rag n yeelame: Sẽn-Ka-Saab sẽn yaa yãmb Wẽnnaamã kõta yãmb vʋʋsgo, la b kõo yãmb tẽn-kãngã.»

14Woto, yãmb pagbã ne y kambã ne y rũmsã na n paa tẽng ning a Moyiis sẽn kõ yãmb Zʋrdẽ kʋɩlgã rʋʋndã. La sã n yaa ne yãmb sẽn yaa raopã, n yaa gãndaadã, yãmb na n boba y zab-teedo, n lʋɩ y ba-biisã taoor n dʋʋg kʋɩlgã n zab n sõng-ba.

15Maan-y woto, hal tɩ Sẽn-Ka-Saab ges y ba-biisã yell wa b sẽn ges yãmb yellã, tɩ b na tõog n soog tẽng ning Sẽn-Ka-Saab sẽn yaa yãmb Wẽnnaamã sẽn kõt bãmbã. Rẽ zugẽ, yãmb na yaool n lebg n wa reeg soolem ning Sẽn-Ka-Saab tʋmtʋmd a Moyiis sẽn dag n kõ yãmb tɩ yaa y pʋɩɩrã sẽn be yaangã Zʋrdẽ kʋɩlgã rʋʋndã.

16Bãmb leoka a Zozoe n yeele: Tõnd na n maana bũmb nins fãa yãmb sẽn na n yeel tõnd tɩ d maanã, la d na n kẽnga zĩig ning fãa yãmb sẽn na n tʋm tõndo.

17Tõnd na n saka yãmb ne bũmb fãa wa tõnd sẽn dag n sak a Moyiisã. Bɩ Sẽn-Ka-Saab sẽn yaa yãmb Wẽnnaamã zĩnd ne yãmba, wa b sẽn dag n be ne a Moyiisã.

18Ned ning fãa sẽn na n kɩɩs yãmb koɛɛgã, la a zãgs t'a ka na n sak yãmb sẽn yeel bũmb ning fãa wã, a sɩbgr na n yɩɩ kũum. Yãmb we n paam daoodo, la y keng y menga.

Jump to: Chapter 2 →