Matthew 26 — Mossi MPBU (WẼNNAAM SEBRE 2014)

7pag a yembr kolga bãmba. A rag n zãada albatr tʋk sẽn pid ne tɩdar kaam, sẽn tar yũ‑noog wʋsgo, t'a ligdã raab yaa toogo. Bãmb sẽn dɩt wakate, pagã rɩka tɩdar kaamã n kiig a Zeezi zugu.

8Karen-biisã sẽn yã rẽnda wã, b sũyã sãamame tɩ b yeele: «Yaa bõe tɩ pagã rɩk tɩdarã n lob bõn‑bõn a woto?

9Bala, b rag n tõe n koos-a‑la ligd wʋsg n dɩk n kõ naong rãmba.»

10A Zeezi bãngame n yeel-ba: «Yaa bõe tɩ yãmb namsd pagã a woto? A maana tʋʋm-sõng mam yĩnga.

11Bala, naong rãmbã bee ne yãmb daar fãa, la maam, yãmb ka na n paam tɩ mam be ne yãmb daar fãa ye.

12Pagã sẽn walg mam yĩngã tɩdar kaamã, yaa mam mumb yĩnga.

13Sɩd-sɩda, mam yeta yãmb tɩ dũni tɛk fãa, zĩig ning fãa b sẽn na n moon koe-no-kãngã, b na n goma bũmb ning pagã sẽn maanã yelle, a tẽegr yĩnga.»

14Dẽ, karen-biisã piig la a yiibã ned a yembr sẽn boond t'a Zʋdaas Iskaryo wã kẽnga maan-kʋʋdbã kãsem-dãmbã nengẽ

15n tɩ sok-b yaa: «Yãmb na n kõo maam bõe tɩ m yõk a Zeezi n kõ-yã?» Woto, b kõ-a-la wanzuri ligd pis-tã.

16Sẽn sɩng ne wakat-kãnga, yẽnda baoo a sẽn na n bẽd ne bũmb ning n paam n yõk a Zeezi n yõk n kɩse.

17Bur sẽn ka rã-bɩllã wakat pipi daare, karen-biisã waa n soka a Zeezi yaa: «Yãmb datame tɩ d segl Pakã rɩɩb yɛɛnẽ n kõ-yã.»

18A Zeezi leok-b lame n yeele: «Kẽng-y tẽngã pʋgẽ, a zagl yiri, n tɩ yeel-a tɩ yãmb karen-saambã n yet a woto: ‹Mam wakat kolgame. Yaa fo yirã la mam dat n maan Pakã tigr ne m karen-biisã.› »

19Karen-biisã maana bũmb ning a Zeezi sẽn yeelã, la b segla Pakã tigrã.

20Zĩ-sobd sẽn ta, a Zeezi zĩnda ne b karen-biisã n na n dɩ.

21La b rɩɩbã wakate, a Zeezi yeelame: «Sɩd-sɩda, mam yeta yãmb tɩ yãmb ned a yembr n na n yõk maam n kõ.»

22Karen-biisã sũy sãama wʋsgo, tɩ ned fãa sok a Zeezi yaa: «Zu-soaba, yaa maam bɩ?»

23B leoka bãmb n yeele: «Ned ning sẽn na n naaga maam n tʋm-a nug laagẽ wã, n na n yõk maam n kɩse.»

24Ninsaal Bi-riblã na n looga wa b sẽn dag n gʋls b yellã to-to wã. La ned ning sẽn na n yõk-a Ninsaal Bi-riblã n kɩsã na paam toogo. Dao‑kãng sã n dag n ka rogẽ n são.

25A Zʋdaase, soab ning sẽn na n zãmb-a bãmbã sokame: «Karen-saamba, yaa maam bɩ?» A Zeezi leok-a lame: «Foom n yeele.»

26Bãmb sẽn dɩtã wakate, a Zeezi dɩka buri. La b sẽn ning-a barka, b kao-a lame n kõ b karen-biisã n yeele: «Reeg n dɩ-y-yã. Yõwã yaa mam yĩngã.»

27Rẽ zugẽ, b rɩka bõn-yũudla, La b sẽn ning-a barka, b kõo b karen-biisã n yeele: «Bɩ yãmb fãa yũ-y‑yã,

28bala, yõwã yaa mam zɩɩm, kãab-paalgã zɩɩm sẽn daag neb wʋsg yĩnga, yel-wẽnã sugr kũun yĩnga.

29Mam yeta yãmb tɩ mam ka na n leb n yũ reezẽ rã-kãngã hal tɩ ta daar ning mam sẽn na n yũ-a paalg ne yãmb m ba soolem pʋgẽ wã ye.»

30La bãmb sẽn yɩɩl yɩɩn-sõamyã, bãmb yiime n tees oliiv tɩɩs tãngã zugu.

31Dẽ, a Zeezi yeela bãmba: «Yʋn-kãngã bala, yãmb fãa na n zoee n basa maam. Bala, b gʋlsa a woto: ‹Mam na n wẽe rũm-kɩɩmã, la piisã sull na n sãeegame.›

32La m vʋʋgrã zugẽ, m na n deng-y‑la Galɩle.»

33A Pɩyɛɛr yeelame: «Baa nebã fãa sã n na n bas yãmba, mam yẽ kõn bas yãmb ye.»

34La a Zeezi yeel-a lame: «Sɩd-sɩda, mam yeta foom tɩ yʋn-kãngã bala, sẽn deng no-raoog kɛlenga, fo na n kɩɩsa naoor a tãab tɩ fo ka mi maam ye.»

35A Pɩyɛɛr yeela bãmba: «Baa sã n na n yɩ tɩlɛ tɩ mam ki ne yãmba, mam ka na n yeel tɩ m ka mi yãmb ye.» La karen-biis a taabã me yeela a woto.

36Rẽ poore, a Zeezi kẽnga zĩig ning sẽn boond tɩ Zetsemaane wã ne b karen-biisã, la b yeel-b lame yaa: «Zĩnd-y ka tɩ m kẽng taoor bilf n tɩ pʋʋse.»

37A Zeezi peega a Pɩyɛɛr ne a Zebde kom-dibli a yiibã, la sũ-sãang ne sũur zɩɩb kãseng yõka a Zeezi.

38Dẽ, bãmb yeelame: «Sũ-sãang n tar maam hal n dat n kʋ maam. Pa-y ka n neend ne maam.»

39La bãmb kẽnga taoor bilfu, n wõgemd n fõgen b nenga, n pʋʋs a woto: «M ba, sã n tõeeme, bɩ y kɩt tɩ bõn-yũudl‑kãngã loog n bas maam. Baoosgo, bɩ a ra yɩ mam sẽn dat ye, a yɩ wa yãmb sẽn datã.»

40Bãmb lebg n waa b karen-biisã nengẽ n mik tɩ b gõeeme, la b yeela a Pɩyɛɛr yaa: «Yãmb ka tõog n neend ne maam baa lɛɛr a yembr tãa bala!

41Neend-y la y pʋʋse, n da wa n kẽ makr pʋgẽ ye. Sɩɩgã ratame, la yĩngã pãng paoodame.»

42Bãmbã leb n vẽsga naoor a yiib soab n pʋʋs a woto: «M ba, sã n yaa tɩ ka tõe tɩ bõn-yũudl‑kãngã loog kal mam yũ-a, bɩ y tʋlsem maane.»

43Bãmb waame n mik tɩ b leb n gõeeme, bala, b ninã rag n zɩsga ne gõeem.

44Bãmb basa b karen-biisã n leb n zãag naoor a tãab soaba, n leb n pʋʋs wa pĩndã.

45Dẽ poore, b leb n waa b karen-biisã nengẽ n yeel-ba: «Yãmb ket n gõee moasã n vʋʋsdẽ! Ade, wakat kolgame tɩ b na n yõk Ninsaal Bi-riblã n kõ yel-wẽn maandbã.

46Yik-y tɩ d kẽnge. Sẽn zãmb-a maamã kolgdame.»

47Bãmb sẽn nan ket n gomda, piig la a yiibã ned a yembre, a Zʋdaas waa ne neb kʋʋngo, maan-kʋʋdbã, kãsem-dãmbã ne tẽngã nin-kẽembã sẽn tʋme, la b ra zãada zabr sʋʋs ne roaya.

48Ned ning sẽn zãmbd a Zeezi wã rag n kõo nebã bãnd n yeele: «Ned ning mam sẽn na n mokã, yaa yẽnda la a Zeezi, yõk-y‑yã‑a.»

49Dẽ, tao-tao bala, yẽnda kolga a Zeezi n yeele: «Karen-saamba, ne y yʋngo!» La a moka bãmba.

50A Zeezi yeela yẽnda: «M zoa, fo sẽn wa n na n maan bũmb ningã, bɩ f maane.» Woto, nin-kãens kolgame n gãd a Zeezi, n yõk-ba.

51Neb nins sẽn dag n be ne a Zeezi wã, ned a yembr taka a sʋʋg n wõog n kɛ maan-kʋʋd kãsmã tʋmtʋmd n fiuug a tʋbre.

52La a Zeezi yeel-a lame: «Lebs f sʋʋgã n sui a wʋʋgẽ. Bala, neb nins fãa sẽn na n zab ne zabr sʋʋga, zabr sʋʋg n na n kʋ-ba.

53Fo tẽedame tɩ mam ka tõe n bool m ba tɩ b tʋm maam malegs sẽn yɩɩd tusa-tusa sul piig la a yiib la?

54Sã n yɩ a woto, gʋls-sõamyã sẽn yet t'a tog n yɩɩ a woto wã na n yɩɩ a wãn n paam pidsgu.»

55Wakat-kãnga, a Zeezi yeela neb kʋʋngã: «Yãmb waa ne zabr sʋʋse la ne roay n na n yõk maam wa m yaa fãada. Mam dag n zĩi ne yãmb wẽnd doogẽ wã daar fãa, n zãmsd nebã, la yãmb ka yõk maam ye.

56La bõn-kãens fãa maaname tɩ bũmb nins Wẽnnaam no-rɛɛsdbã sẽn gʋlsã paam pidsgu.» Dẽ, karen-biisã fãa basa a Zeezi n zoe.

57Neb nins sẽn yõk a Zeezi wã talla bãmb n kẽng maan-kʋʋd kãsem a Kayif zakẽ, zĩig ning tõog karen-saam-dãmbã ne kãsem-dãmba sẽn tigs taabã.

58A Pɩyɛɛr pʋgla a Zeezi yɩɩg-yɩɩg halɩ n ta maan-kʋʋd kãsmã zakẽ, n kẽ n naag ne gũudbã n zĩẽ, n dat n ges yellã sẽn na n baas to-to.

59Maan-kʋʋdbã kãsem-dãmbã ne kaorengã yɛl-bʋʋdbã fãa rag n baooda kaset zĩrẽ n na n paam n dõd a Zeezi n kɩt tɩ b kʋ-ba,

60la b ka paam ye, baa ne zĩrẽ kaset rãmb wʋsg sẽn wa wã. Neb a yiib n yaool n wa n yeele:

61«Rao-kãngã yeelame tɩ yẽnda tõe n sãama wẽnd doogã n lebs n me-a dasem a tãab pʋgẽ.»

62Maan-kʋʋd kãsmã yikame n sok a Zeezi yaa: «Yãmb ka leokd tɩ bũmb la? Yaa bõe leokr la yãmb tar ne nin‑bãmbã sẽn dõt yãmbã?»

63A Zeezi kell n sĩndame. La maan-kʋʋd kãsmã yeela bãmba: «Mam kota yãmb ne Wẽnnaam sẽn vɩ wã yʋʋr tɩ y togs tõnd yãmb sã n yaa Kirisi, Wẽnnaam Bi-riblã.»

64A Zeezi leok-a lame n yeele: «Yaa yãmb sẽn yeelã. Sẽn paase, mam yeta yãmb tɩ sẽn sɩng ne moasã, yãmb na n yãnda Ninsaal Bi-riblã, tɩ b zĩ Sẽn-Tõe-yã-fãa wã rɩtgo, la b zao yĩngr sawat n watẽ.»

65Dẽ, maan-kʋʋd kãsmã kẽesa a fut n yeele: «Bãmb paooga Wẽnnaam. Tõnd leb n baooda kaset dãmb n na n maan bõe? Yãmb la sẽn wʋm bãmb sẽn paoog Wẽnnaamã la! Yãmb tagsg yaa bõe?»

66B leokame n yeele: «Bãmb togda ne kũum.»

67Dẽ, b tʋbsa a Zeezi nengã kolkoodo, la b pãb bãmb ne nug-gila. Neb kẽer laala bãmb pegs n yeele:

68«Kirisi, togs-y bãngr gomd n wilg tõnd ned ning sẽn wẽ-a yãmbã.»

69Wakat-kãnga, a Pɩyɛɛr dag n zĩi yɩng zakã pʋga. Tʋmtʋmd-poak a yembr kolga yẽnda n yeele: «Fo me rag n bee ne Galɩle ned a Zeezi.»

70La a kɩɩsa nebã fãa taoor n yeele: «Mam ka mi fo sẽn dat n yeel tɩ bũmb ningã ye.»

71La yẽnda sẽn yik n kẽnd zakã noor sẽnẽ, tʋmtʋmd-poak a to n yãnd yẽnda n yeel neb nins sẽn be‑b beenẽ wã yaa: «Rao-kãngã dag n bee ne Nazarɛt dao a Zeezi.»

72La yẽnda leb n kɩɩsame, n wẽen n yeele: «Mam ka mi rao-kãngã ye.»

73Sẽn yɩ bilfu, neb nins sẽn dag n be beenẽ wã kolgame n yeel a Pɩyɛɛr yaa: «Sɩda yẽ, fo yaa bãmb ned a yembre, bala fo goamã bal wilgda fo sẽn yaa a soaba.»

74Dẽ, a Pɩyɛɛr sɩngame n kãab la a wẽen n yeele: «Mam ka mi rao-kãngã ye.» Tao-tao bala, no-raoog kelmame.

75La a Pɩyɛɛr tẽega a Zeezi sẽn dag n yeel yẽnda wã: «Sẽn deng no-raoog sẽn na n kelme, fo na n kɩɩsa naoor a tãab tɩ fo ka mi maam ye.» La a Pɩyɛɛr yii yɩng n yãb ne sũ-sãan-kãsenga.