Mark 12

mewari

1ईसू केणी में वाँने केबा लागो, “एक मनक अंगूरा को एक बाग लगायो अन वींके च्यारूँमेर हड़ो किदो। पछे अंगूरा को रस निकाळबा के वाते गाणी अन रुकाळी का वाते डागळो बणायो, अन हिंजारिया ने हिजारे देन जातरा पे परोग्यो।

2पछे अंगूर पाकबा अन तोड़बा की टेम में आपणी पाँती लेबा का वाते वीं हिंजारिया का नके एक हाळी खन्दायो।

3पण, वाँकाणी वीं हाळी ने पकड़न कुट्यो अन रिता हात पाछो नवाड़ दिदो।

4पछे वणी बाग को मालिक दूजाँ हाळी ने वाँका नके खन्दायो। वाँ हिंजारिया वींको घणो माजणो बगाड़यो अन वींको मातो फोड़ नाक्यो।

5वाँ पछे तीजा हाळी ने वाँका नके खन्दायो, जिंने भी वाँकाणी मार नाक्यो। अस्यान दूजाँ हारई हाळयाँ ने खन्दाया, जीमूँ वाँकाणी किंने तो कुट्या अन किंने तो नेमी मार नाक्या।

6अबे तो वाँका नके वाँको एकाएक पूत बच्यो, ज्यो वींको लाड़लो पूत हो। पछे हाराई केड़े वींने अस्यान होचन वीं हिंजारिया नके खन्दायो के, वे मारा पूत को तो मान राकी।

7वे हिंजारिया एक-दूँजा ने क्यो, ‘ओ तो वींको छोरो हे, ज्यो हकदार बेणी। आवो, आपाँ ईंने भी मार नाका, तो पछे ईंका मरयाँ केड़े ईंकी जमीं-जादाद हारोई आपणो वे जाई।’

8अस्यान वाँकाणी वींने भी मार नाक्यो अन अंगूरा का बाग का बारणे फेंक दिदो।”

9ईसू पूँछ्यो, “अंगूरा का बाग को मालिक वाँ हिंजारिया का हाते कई केरी? वो आन, ईं हिंजारिया ने मार नाकी अन बाग दूजाँ ने हूँप देई।

10कई, थें सास्तर को ओ बचन ने भण्यो, “‘वो भाटो, जिंने कारीगर कई काम को ने हमज्यो, वोईस नीम को खास भाटो बण्यो।

11ओ परबू परमेसर किदो, ज्यो आपणी नजर में अनोको हे।’”

12यहूदी नेता ओ जाणरिया हे या केणी वणी आपणाँ खिलाप मेंईस क्यो हे, तो वे वींने पकड़वा वाते, कतरी कळा होचबा लागा। पण, दूजाँ मनकाऊँ वे दरपता हा, ईं वाते वाँने छोड़न पराग्या।

13जदी यहूदी नेता फरीसी मनकाँ अन राजा हेरोदिया के दल का मनकाँ ने ईसू ने बाताँ में उळजाबा का वाते खन्दाया।

14वे वींका नके आया अन बोल्या, “गरुजी, माँ जाणा हाँ के, थाँकाणी हाँची केवो अन दूजाँ मनक कई होची ईंको थाँने कई होस कोयने? काँके थाँ मनकाँ को मुण्डो देकन बाताँ ने करो हो, पण हाँचऊँ परमेसर का गेला की हिक देवो हो। तो बतावो रोम का राजा ने लगान देणी सई हे कन कोयने? आपाँने वींने लगान देणी छावे के, ने देणी छावे?”

15ईसू वाँकी चाल हमजग्या। वे वाँने क्यो, “थें मारी परक काँ कररिया हो? एक चान्दी का रिप्यो लावो, तो मूँ वींने देकूँ।”

16तो वे चान्दी को रिप्यो लेन आया। पछे ईसू वाँने पूँछ्यो, “ईंका पे किंको नाम अन छाप लगई तकी हे?” वाँकाणी क्यो, “रोम का राजा की।”

17जदी ईसू वाँने बतायो, “ज्यो रोम देस का राजा को हे, वो रोम का राजा ने देदो अन ज्यो परमेसर को हे, वो परमेसर ने देदो।” तो वे घणा अचम्बा में पड़ग्या।

18पछे कुई सदुकी मनक मरबा का पछे जीवतो उठबा में विस्वास ने करता हा। वीं वाँका नके आया अन वाँकाणी वाँने पूँछ्यो,

19“ओ गरुजी, मूसे ओ नेम लिक्यो हे, ‘जदी किंको भई मर जावे अन वींकी लुगई के छोरा-छोरी ने वे, तो वींका भई वींऊँ ब्याव करले अन पछे आपणाँ भई का बंस ने आगे बड़ावे।’

20एकदाण की बात हे एक जगाँ हात भई हा। हारऊँ मोटे भई ब्याव किदो अन बना छोरा-छोरी वींयाईं मरग्यो।

21पछे दूजे भई भी वींकी लुगईऊँ ब्याव किदो, पण वो भी बना छोरा-छोरी मरग्यो। तीजे भई भी अस्यानीस किदो।

22अन हातीई भायाँ अस्यानीस किदो, पण किंकेई भी छोरा-छोरी ने जनम्याँ अन पछे वा लुगई भी मरगी।

23मरिया केड़े जी दन वीं भई पाच्छा जीवता वेई, तो बतावो, वा लुगई किंकी वेई? काँके वे हाती भई वीं लुगईऊँ ब्याव किदो हो।”

24ईसू वाँने क्यो, “थें नेमीई डापा में पड़ग्या, ने तो सास्तर जाणो हो अन ने परमेसर की तागत ने।

25काँके वीं मनक जदी मरिया तका पाच्छा जीवता वे जाई, तो वीं ब्याव ने केरी अन नेई छोरियाँ ने ब्याव का वाते देई, पण वीं हरग-दुत का जस्यान हरग में वेई।

26मरिया तका जीवता वेन उठबा का बारा में थाँकाणी मूसा की किताब में जटे हळगता तका झाड़क्याँ का बारा में लिक्यो हे, कई थाँ वो ने भण्यो? वटे परमेसर मूसा ने क्यो हो, ‘मूँ अबराम को परमेसर हूँ, इसाक को परमेसर हूँ अन याकूब को परमेसर हूँ।’

27वो मरिया तका को कोयने, पण जीवता मनकाँ को परमेसर हे। थें घणा डापा में पड़ग्या हो।”

28पछे एक मूसा का नेमा ने हिकाबावाळो आयो अन वणी ईसू ने बात-बच्यार करता तका हुण्यो। यो देकन के ईसू सदुकियाँ ने हव तरियाऊँ जवाब दिदो हे, तो वणी ईसुऊँ पूँछ्यो, “हारऊँ मोटी आग्या कई हे?”

29ईसू जबाव दिदो, “हारऊँ मोटी आग्या आ हे। ‘हे इजराएल हुण, बेस परबू परमेसरइस आपणो एक परबू हे।

30हारई मनऊँ, जीवऊँ, अकलऊँ अन आपणी हारी तागतऊँ थने आपणाँ परबू परमेसरऊँ परेम करणो छावे।’

31दूजी आग्या आ हे के, ‘आपणाँ पड़ोसीऊँ भी अतरो परेम कर, जतरो परेम थूँ आपणाँऊँ करे।’ अणा दुई आग्याऊँ मोटी दूजी कसी आग्या कोयने हे।”

32ईं बात पे मूसा का नेमा ने हिकाबावाळे वाँने क्यो, “ओ गरुजी, थाँकी आ बात हव हे, थाँ तो हाँची बात क्यो। बेस एकीस परमेसर हे अन वींने छोड़न दूज्यो कुई कोयने।

33हारई मनऊँ, हारई अकलऊँ, अन आपणी हारई तागतऊँ थने परमेसरऊँ परेम करणो छावे। अन आपणाँ पड़ोसीऊँ भी अतरो परेम कर, जतरो परेम थूँ खुदऊँ करे। अणा दुई आग्या ने मानणी, हाराई होमऊँ अन बलीदानाऊँ भी बड़िया हे।”

34जदी ईसू ओ देक्यो के, वो मनक पुरी हमजदारीऊँ जबाव दिदो, तो वणा क्यो, “थूँ परमेसर का राजऊँ घणो छेटी कोयने।” ईंका पछे कुई भी ईसुऊँ कस्योई सवाल पूँछबा की हिम्मत ने किदी।

35पछे ईसू मन्दर में उपदेस देता तका ओ सवाल किदो, “मूसा का नेमा ने हिकाबावाळा कस्यान केवे के, मसी दाऊद का वंस को हे?

36दाऊद खुद पुवितर आत्मा की बात हुणन क्यो, “‘परबू परमेसर मारा परबूऊँ क्यो, मारा जीमणा पाल्ड़े बेट, जतरे मूँ थाँरा दसमणा ने पगाँ का बाजोट ने कर दूँ।’”

37“दाऊद खुद वाँने ‘परबू’ केतो हो, तो पछे मसी दाऊद को बंस कस्यान वे सके?” एक मोटी भीड़ वाँकी बात राजी मनऊँ हुणरी ही।

38आपणाँ उपदेस में वे क्यो, “मूसा का नेमा ने हिकाबावाळाऊँ हूँस्यार रेणो। वाँने आपणाँ जब्बा पेरन अटने-वटने गूमणो हव लागे हे। अन वीं छावे के, बजार में दूजाँ लोग माने नमस्कार केवे।

39अन परातना घर में वे मोटी गादी पे बेटबो छावे हे। वे जीमण में भी हव जगाँ की आस करता रेवे।

40वाँ लुगई जिंको धणी सान्त वेग्यो, वाँको धन कोसबो छावे हे। वीं दिकाबा का वाते मोटी परातना करे। वाँ मनकाँ ने घणी मोटी सजा मेली।”

41ईसू मन्दर की दान-पेटी के हामे बेटन देकरियो हा के, लोग-बाग दान-पेटी में रिप्या कस्यान नाकरिया हे। घणा धनी मनक घणा रिप्या नाक्या।

42पछे वटे एक गरीब लुगई जिंको धणी सान्त वेग्यो हो, वा अई अन वणी वींमें दो फोरा ताँबा का सिक्का नाक्या, ज्याँको मोल घणो कम हो।

43पछे वे आपणाँ चेला ने बलाया अन वाँने क्यो, “मूँ थाँने हाँची बात केऊँ, सबाका का दानऊँ वाँ लुगई जिंको धणी सान्त वेग्यो, वींको दान हेलो हे।

44काँके हारई आपणाँ रिप्या की बड़ोतरीऊँ नाक्या, पण ईं लुगई आपणी गरीबी हालत में भी ज्यो थोड़ाक रिप्या नके हा, वे हारई दे दिदा। वींका नके अतराक रिप्या हा, ज्यो वींका जीव को आसरो हो।”

← Chapter 11 Jump to: Chapter 13 →