Mark 14

mewari

1फसे को अन बना हाज्या की रोट्याँ का तेवार के दो दन पेल्याँ की बात हे, मुक्य याजकाँ अन मूसा का नेमा ने हिकाबावाळा एक असी जाळ वसारिया हा। जींऊँ वे ईसू ने ईं जाळ में नाकन बंदी बणान मार सके।

2पण वीं केता हा के, “ओ तेवार का दनाँ में ने करणो छावे। दूजाँ मनक लड़ई-जगड़ो कर देई।”

3जदी बेतनियाँ में ईसू समोन ज्यो पेल्याँ कोड़ी हो, वींके घर में जीमणो जिमरिया हाँ, वीं टेम एक लुगई धोळा भाटा का ठामड़ा में हव वाना को खरो अन मेंगा मोल को अंतर लेन अई। वणी ठामड़ा ने फोड़्यो अन अंतर ईसू का माता पे ऊँदा दिदो।

4ईं बात पे उटे बेटा तका थोड़ाक मनक एक-दूँजा ने केबा लागा, “अंतर को अस्यान काँ नकसाण किदो?

5ओ अंतर तीन सो चान्दी का रिप्याऊँ भी हेला रिप्या में बेंच देती अन पछे वीं धन ने गरीबा में बाँट देती।” वाँ हारई वींकी घणी खोट्याँ खादी।

6जदी ईसू क्यो, “वींने काँ तंग करिया हो? छोड़ दो। वे तो मारा वाते एक हव काम किदो हे।

7गरीब मनक तो रोज थाँकी लारे रेवे। ईं वाते हर-कदी थें वाँकी मदत कर सको हो। पण, मूँ थाँकी लारे रोज ने रेऊँ।

8अणी लुगई वो काम किदो हे, ज्यो वा कर सके। अणी टेमऊँ पेल्याँई मारा सरीर ने गाड़बा वाते हव वाना को अंतर नाकन ईंने त्यार कर दिदो हे।

9मूँ थाँने हाँची बात केऊँ, ईं हारी दनियाँ में जटे भी हव हमच्यार को परच्यार किदो जाई, वटे अणी लुगई ज्यो काम किदो हे, वीं बारा में बात-बच्यार करता तका आद कररिया करी।”

10जदी यहूदो इसकरियोती, ज्यो ईसू का बारई चेला में एक हो। ज्यो मुक्य याजकाँ नके ईसू ने धोकाऊँ पकड़ाबा का वाते ग्यो।

11वींकी बात हुणन वीं घणा राजी व्या अन वाँकाणी वाँने घणा रिप्या देबा को बचन दिदो। ईं वाते पछे यहूदो ईसू ने धोकाऊँ पकड़ाबा को मोको होदबा लागो।

12बना हाज्या की रोट्याँ का तेवारऊँ पेलो दन जदी गारा का उनन्या ने फसे खाबा की बली चड़ावे, वीं दन चेला ईसू ने पूँछ्यो, “थूँ कई छावे हे, आपाणी कटे जान खाबा के वाते फसे को जीमणो बणावा।”

13तद्याँ ईसू आपणाँ दो चेला ने ओ केन खन्दाया हाँ, “नगर में जावो, वटे थाँने एक मनक पाणी की कळी लेन मेली, थाँ वींका पाच्छे जाज्यो।

14पछे जटे भी वो घर मयने जावे, वीं घर का मालिक ने केज्यो, ‘गरुजी क्यो हे जीमणा वाते माँको ओवरो कटे हे, जटे मूँ आपणाँ चेला की लारे फसे का तेवार को जीमणो कर सकूँ।’

15पछे वो थाँने मेड़ी ऊपरे एक मोटो सज्यो अन त्यार किदो तको ओवरो बताई, वटे आपणाँ वाते जीमणो त्यार करो।”

16जदी वींका चेला नगर दिने चाल्या, वटे हारी बात वस्यानीस मली, जस्यान ईसू वाँने की ही। तद्याँ वाँकाणी फसे का तेवार को जीमणो त्यार किदो।

17जद्याँ हाँज वीं, तो ईसू आपणाँ बाराई चेला के लारे वटे आग्या।

18जदी वे हारई जणा बेटन जीमणो जिमरिया हा, तद्याँ ईसू क्यो, “मूँ हाँची केऊँ के, थाँकामूँ एक जणो, ज्यो मारा हाते जीमरियो हे। वो मने धोकाऊँ पकड़ा देई।”

19ईं बात पे वीं दकी व्या अन एक का पछे एक ईसुऊँ पूँछबा लागा, “कई वो मूँ तो ने हूँ?”

20ईसू वाँने क्यो, “वो थाँ बारा चेला मूँ एक हे, ज्यो मारी लारे प्याला में रोटी डबोकरियो हे।

21मनक का पूत ने तो मरणोइस हे, जस्यान वाँका वाते लिक्यो हे, पण ज्यो मनक का पूत ने पकड़ाई, वींका वाँते घणी दुक बात वेई। वीं मनक के वाते आ बात घणी हव वेती, जदी वो जनमई ने लेतो।”

22जदी वे जीमणो जिमरिया हा, ईसू रोटी हात में लिदी अन धन्नेवाद की परातना किदी। रोटी ने तोड़ी अन वाँ चेला ने देता तका क्यो, “लो, ओ मारो डील हे।”

23पछे वणा प्यालो लिदो, परमेसर ने धन्नेवाद दिदो अन वो चेला ने दिदो अन वणा हारई पिदो।

24जदी ईसू क्यो, “ओ मारो लुई हे, यो परमेसर का नवा करार की हेन्याणी हे, ज्यो घणा जणा के वाते वेवाड़्यो ग्यो हे।

25थाँने हाँची केऊँ के, अबे मूँ वीं दन तईं अंगूरा को रस ने छाकूँ, जदी परमेसर का राज में नवा अंगूरा को रस ने पीऊँ।”

26तद्याँ एक भजन गान वीं हाराई जेतुन का मंगरा पे पराग्या।

27ईसू वाँने क्यो, “थें हारई मने छोड़न भाग जावो। काँके परमेसर का बचना में लिक्यो हे, ‘मूँ गारा की रुकाळी करबावाळा ने मार नाकूँ अन गारा बकर जाई।’

28पण, जीवतो वेबा के केड़े मूँ थाँकाऊँ पेल्याँई गलील परो जाऊँ।”

29जदी पतरस बोल्यो, “ईं हारई थने छोड़ देई। पण, मूँ थने कदी ने छोड़ूँ।”

30ईं बात पे ईसू वींने क्यो, “मूँ थने हाँची केऊँ, आज राते कूकड़ा के दो दाण बोलबाऊँ पेल्याँ थूँ मने तीन दाण ओळकबाऊँ नट जाई।”

31ईं बात पे पतरस ओरी कल्ड़ो बोल्यो, “यद्याँ मने थाँरा हाते मरणो भी पड़े, तो भी मूँ थने ने नटूँ।” अन दूजाँ हाराई चेला भी अस्यानीस क्यो।

32पछे वे एक असी जगाँ पे आया, जिंने गतसमने को बाग केता हा। वटे ईसू आपणाँ चेलाऊँ क्यो, “जतरे मूँ परातना करूँ, थें अटेईस बेटो।”

33पतरस, याकूब अन यहुन्ना ने भी वो आपणी लारे लेग्यो। वो घणो दकी अन परेसान वेरियो हो।

34वे वाँने क्यो, “मारा मन में घणो दुक हे, जींऊँ मारो जीव निकळबा में हे। थें अटे रुको अन जागता रेवो।”

35पछे थोड़ाक आगे जान वे धरती पे उन्दो पड़न परातना किदी के, यद्याँ वे सके तो यो दुक को टेम ने मारापूँ टळ जावे।

36पछे वो बोल्यो, “बापू, ओ मारा बापू! थाँरा वाते हारोई काम होरो हे। ईं दुक का प्याला ने माराऊँ छेटी कर दे। पण ज्यो मूँ छाऊँ वो ने, पण ज्यो थूँ छावे वोईस कर।”

37पछे वो पाछो आयो, तो आपणाँ चेला ने हुता देकन पतरसऊँ क्यो, “समोन, थूँ हूँरियो हे? कई थूँ एक घड़ी भी ने जाग सक्यो?

38जागता रेवो अन परातना करो, जींऊँ थाँ कस्यी भी जाँच-परक में ने पड़ो। आत्मा तो त्यार हे, पण सरीर घणो दुबळो हे।”

39अन ईसू पाछो परोग्यो अन वईस बात लेन परातना करबा लागो।

40जदी वो दूजी दाण पाछो आयो, तो वे वाँने पाच्छा हूँता तका देक्या। वाँकी आक्याँ में नींद भरी ही। वाँने कई ने हुजरियो हो, वे कई जबाव देवे?

41वो तीजी दाण पाछो आन वाँने क्यो, “कई, थें अबाणू भी हुता अन रियाम्बो लेरिया हो? बेस, वा घड़ी आ पूगी हे, जदी मनक को पूत(ईसू) धोकाऊँ पकड़ान पाप्याँ का हाताँ में हूँप्यो जाई।

42ऊबा वे जावो, आवो चाला। देको, मने धोकाऊँ पकड़बावाळा आरिया हे।”

43ईसू अस्यान बोलरियो हो के, वींका बारई चेला मूँ एक यहूदो वटे आयो। वींका लारे लाट्याँ-तलवाराँ लिदी तकी एक टोळी ही। जिंने मुक्य याजकाँ, मूसा का नेमा ने हिकाबावाळा अन दाना यहूदी नेता खन्दई ही।

44धोकाऊँ पकड़बावाळे वाँने ओ इसारो किदो, “मूँ जिंके गळे मलूँ, वोईस ईसू हे। वींने बन्दी बणा लिज्यो अन पकड़न पूरा हेंचेतऊँ ले जाज्यो।”

45जस्यानी यहूदो वटे आयो, वो ईसू का नके जान क्यो, “गरुजी” अन वाँके गळे मल्यो।

46पछे वाँकाणी ईसू ने पकड़न बन्दी बणा दिदा।

47तो ईसू को एक चेलो, ज्यो वाँका नके ऊबो हो, आपणी तरवार निकाळन मायाजक का एक नोकर पे चला दिदी, जींऊँ वींको कान्दड़ो कटग्यो।

48पछे ईसू वाँने क्यो, “कई, मूँ अपरादी हूँ? ज्यो थाँ मने लाट्याँ-तलवाराँ लेन पकड़बा आया हो।

49रोज मन्दर में उपदेस देतो तको मूँ थाँकी लारे हो, पण थाँ मने ने पकड़्यो। अबे अस्यान, ईं वाते व्यो के, परमेसर का सास्तर को बचन पूरो वे सके।”

50पछे वींका हारई चेला वींने छोड़न भागग्या।

51बना गाबा पेरियाँ अन चादरो ओड़या तको एक मोट्यार वाँका पाछे-पाछे आयो, तो मनक वींने पकड़बा लागा।

52पण, वो आपणो चादरो छोड़न उगाड़ो-पुगाड़ो भागग्यो।

53वे ईसू ने मायाजक का नके लेग्या। पछे हारई मुक्य याजकाँ, दाना यहूदी नेता अन मूसा का नेमा ने हिकाबावाळा अगेटा व्या।

54पतरस वाँऊँ छेटी रेतो तको वाँका पाच्छे मायाजक की गवाड़ी का मयने पराग्यो अन वटे पेरादारा का हाते बेटन तापबा लागो।

55हारई मुक्य याजकाँ अन यहूदियाँ की पुरी महासबा ईसू ने मोत की सजा देबा के वाते वाँका विरोद में सबूत होदरी ही, पण वे होद ने सक्या।

56कतरई जणा वींका विरोद में गवई दिदी, पण वाँकी गवई जूटी ही अन एक हरीकी ने ही।

57पछे कुई मनक ऊबा व्या अन वींका विरोद में जूटी गवई देता तका केबा लागा,

58“माँकाणी ईंने ओ केतो हुण्यो के, ‘मनक का हाताऊँ बण्या मन्दर ने मूँ हल्डा देऊँ अन पछे तीन दन में दूज्यो मन्दर बणा देऊँ, ज्यो मनकाऊँ बण्यो तको ने वेई।’”

59पण, ईंमें वाँकी गवायाँ एक जस्यी कोयने ही।

60जदी वाँका हामे मायाजक ऊबो वेन ईसू ने पूँछ्यो, “ईं मनक, थाँरा विरोद में ईं गवायाँ देरिया हे, थूँ खुद ने बंचाबा का वाते काँ ने बोलरियो हे?”

61ईं बात पे ईसू छाना-माना रिया। कई जबाव ने दिदो। मायाजक वाँने पाछो पूँछ्यो, “कई, थूँ मेमामय परमेसर को पूत मसी हे?”

62ईसू बोल्यो, “मूँ हूँ, थें मनक का पूत ने, वीं सगतीवान का जीमणा पाल्ड़े बेटो अन हरगऊँ आता तका बादळा में देको।”

63मायाजक आपणी रीसऊँ जब्बो फाड़न क्यो, “माने ओरी गवई की जरूत ने हे।

64थाँ ईंने परमेसर की नन्दयाँ करतो तको हुण्यो हे। अबे थाँको कई बच्यार हे?” वे हारई वाँने अपरादी केता तका क्यो, “ईंने मोत की सजा मलणी छावे।”

65जदी मनक वींपे थूँक्यो अन वींको मुण्डो ढाँकन मुक्की ठोकी अन केबा लागा, “आगेवाणी करन बोल थारे कूण ठोकी?” अन पछे पेरादारा वींने पकड़न रेपटाँ मारी।

66पतरस अबाणू रेटे गवाड़ी में बेटो हो मायाजक की एक दासी अई।

67जदी वे पतरस ने वटे तापतो तको देक्यो, तो ध्यानऊँ वींने ओळकन बोली, “थूँ तो नासरत का ईसू का लारे रेतो हो?”

68पण, पतरस नटग्यो अन केबा लागो, “मूँ ने जाणूँ हूँ अन थूँ कई केरी हे मारी हमज में ने अईरो हे।” ओ केता तका वो डेळी तक परोग्यो अन पछे कूकड़ो बोल्यो।

69वाँ दासी जदी वींने दूजी दाण देक्यो, तो वा उटे ऊबा तका मनकाँऊँ पाच्छी केबा लागी, “ओ मनक वाँ मनकाँ मूँ एक हे।”

70पतरस पाछो नटग्यो। पछे थोड़ीक देर केड़े उटे ऊबा मनक पतरस ने क्यो, “हाँची में थूँईस हे, वाँ मनकाँ मूँ एक, काँके थूँ गलील को हे।”

71जदी पतरस बोल्यो, “मूँ होगन खान हाँची केरियो। यद्याँ मूँ हाँची ने केरियो हूँ, तो परमेसर मने दण्ड दे। जिंके बारा में थाँकाणी बात कररिया हो, वीं मनक ने मूँ ने जाणूँ।”

72जट दूजी दाण कूकड़ो बोल्यो अन पतरस ने वीं टेम पे ईसू का सबद आद आग्या, ज्यो वाँकाणी क्या हा, “कूकड़ा के दो दाण बोलबाऊँ पेल्याँ थूँ मने तीन दाण ओळकबाऊँ नट जाई।” तो पतरस मन में ओ होचन कल्ड़ो-कल्ड़ो रोबा लागो।

← Chapter 13 Jump to: Chapter 15 →