Mark 6

mewari

1पछे ईसू वीं जगाँ ने छोड़न आपणाँ नगर में पराग्या। वींका चेला भी वींके हाते हा।

2जद्याँ आराम को दन आयो, तो वणा यहूदियाँ का परातना घर में उपदेस देणो सरू कर दिदो। वटे घणा मनक हा, ज्यो वाँकी बाताँ हुणन अचम्बा में पड़ग्या। तद्याँ वीं बोल्या, “ईंने ईं बाताँ कटूँ मली हे? आ कस्यी अकल हे, ज्यो ईंने मली हे? यो अस्या अचम्बावाळा काम कस्यान करे हे?

3कई, यो वो हुतार तो ने हे, ज्यो मरियम को छोरो हे अन कई याकूब, योसेस, यहूदा अन समोन को भई तो ने हे? कई, ईंकी बेना आपणाँ अटे तो ने हे?” ईं वाते वाँ लोगाँ वींने नकार दिदो।

4तद्याँ ईसू वाँने क्यो, “कस्या भी परमेसर का आड़ीऊँ बोलबावाळा ने वींको देस हगा-होई अन परवार ने छोड़न, दूजाँ कुई वींको मान ने गटावे हे।”

5वटे ईसू कस्याई अचम्बावाळा काम ने कर सक्या, बेस माँदा मनकाँ पे हात राकन हव किदा।

6लोगाँ ने विस्वास ने करता देकन ईसू ने घणो अचम्बो व्यो। पछे ईसू गामाँ में ग्यो अन च्यारूँमेर उपदेस देतो रियो।

7वणा आपणाँ बाराई चेला ने बलाया अन दो-दो जणा ने बारवास में खन्दाया। वणी वाँने हुगली आत्माने निकालबा को हक दिदो।

8अन यो आदेस भी दिदो, “थाँ आपणी लाटी के अलावा ओरी कई मत लिज्यो, ने रोटी, ने जोळी, ने बटवा में रिप्या-कोड़ी।

9थें पगरख्याँ तो पेरज्यो, पण दो-दो कुरता हाते मती लेज्यो।”

10अन अस्यान भी क्यो, “जीं घर में थाँने मान मले वटे अतरीक देर तईं रको, जतरी देर तईं वाँ जगाँ ने छोड़ो।

11जद्याँ कसी जगाँ का मनक थाँने ने माने अन थाँकी बात ने हुणे, तो थाँ वा जगाँ छोड़ दिज्यो अन आपणाँ पगाँ को धूळो वटेई जाटक दिज्यो, तद्याँ या बात वाँका वाते चेतावणी रेई के, वाँका नास को कारण वीं खुदईस हे।”

12पछे चेला वटूँ पराग्या अन वणा परच्यार किदो के, “पापऊँ मन फेरो।”

13वाँकाणी नरी हुगली आत्माने बारणे निकाळी, नरई माँदा मनकाँ के जेतुन को तेल लगान हव किदा।

14राजा हेरोदेस ने आ बात को पतो लागग्यो काँके, ईसू को नाम हंगळी जगाँ फेलग्यो हे। कुई मनक तो केरिया हा, “बतिस्मा देबावाळो यहुन्नो मरिया तका मूँ पाछो जीवतो वेग्यो हे। ईं वाते वींमें ईं सगत्याँ चमत्कार कररी हे।”

15दूजाँ मनक केरिया हा, “वो एलियो हे।” पण, कुई ओरी दूजाँ जणा केरिया हा, “यो पेलाँ का जमाना का परमेसर का आड़ीऊँ बोलबावाळा मूँ कुई एक हे।”

16जद्याँ हेरोदेस ईं बाताँ हूणी, तद्याँ वो बोल्यो, “यहुन्नो, जिंको मातो में कटवायो, वो पाछो जीवतो वेग्यो हे।”

17काँके हेरोदेस खुदईस यहुन्ना ने बन्दी बणाबा अन जेळ में नाकबा को आदेस दिदो हो। वणी आपणाँ भई फिलिपुस की लुगई हेरोदियासऊँ ब्याव कर लिदो हो, ईं वाते वणी अस्यो किदो।

18काँके यहुन्नो हेरोदेस ने केतो हो के, थाँरो आपणाँ भई की लुगईऊँ ब्याव करणो हव बात कोयने हे।

19ईं बात पे हेरोदियास वींऊँ दसमणी राकबा लागी अन वाँ यो छाती ही के, वींने मरवा नाकूँ। पण, वाँ हेरोदेस का मस अस्यो ने कर सकी।

20हेरोदेस यहुन्नाऊँ दरपतो हो, काँके हेरोदेस जाणतो हो के, यहुन्नो एक खरो अन भलो मनक हो, ईं वाते वो ईंको बचाव करतो हो। हेरोदेस ने यहुन्ना की बाताँ हुणन घबरावणी वेती ही, पण वीं बाताँ वींने घणी भाती भी ही।

21आकरी में हेरोदियास ने अस्यो एक मोको मलग्यो, जद्याँ हेरोदेस आपणाँ जनम दन पे मोटा अदिकारी, सेनापत्याँ अन गलील का मोटा-मोटा मनकाँ के वाते एक जीमणो राक्यो।

22तद्याँ हेरोदियास की छोरी मयने जान असी नाची के वटे जीमण में आया तका हंगळा मेमाना अन हेरोदेस ने घणा राजी किदा। ईं बात पे राजा हेरोदेस वीं छोरी ने क्यो, “थूँ माँग, ज्यो भी चीज थारे छावे, मूँ थने देऊँ।”

23पछे राजा वींऊँ होगन खान क्यो, “मूँ थने कई भी देबाने त्यार हूँ, अटा तईं के, मारो आदो राज-पाट।”

24ईं बात पे वा बारणे निकळी अन आपणी माँ नके गी अन वींने पूँछ्यो, “मने कई चीज माँगणी छावे?” पछे वींकी माँ बतायो, “बतिस्मा देबावाळा यहुन्ना को मातो।”

25तद्याँ वा तरत दोड़ी अन मयने राजा का भड़े अई अन क्यो, “मूँ छावूँ हूँ के, थाँ मने अबाणूइस बतिस्मा देबावाळा यहुन्ना को मातो कटवान थाळी में मेलन दिदो।”

26ईं बात पे राजा ने घणो दुक व्यो। पण, वो आपणाँ होगन अन जीमणा में आया मेमाना का मस वीं छोरी ने नटणो ने छावतो हो।

27ईं वाते राजा तरत एक जल्‍लाद ने वींको मातो काट लाबा को आदेस दिदो। पछे वो जल्‍लाद, जेळ में जान यहुन्ना को मातो काट्यो।

28अन थाळी में मेलन वीं छोरी ने दिदो अन वा छोरी वींने लेजान आपणी बई ने दिदो।

29जद्याँ यहुन्ना का चेला आ बात हुणन, वींका मरिया तका डील ने लेग्या अन वींने एक कबर में गाड़ दिदो।

30पछे थरप्या तका ईसू के नके पाच्छा आन हंगळी बात वींने बतायी ही, ज्यो वाँ किदी अन हिकई।

31वटे घणा मनक आरिया जारिया हा, ईं वाते वाँने खाणो खाबा को टेम भी ने मल पारियो हो। ईं वाते ईसू वाँने क्यो, “चालो, आपाँ हून्नी जगाँ पे चाला अन थोड़ोक रईम्बो ला।”

32ईं वाते वे नाव में बेटन एक हून्नी जगाँ पे पराग्या।

33घणा जणा वाँने जाता तका देक्या अन वाँने ओळक लिदा के, वे कूण हे? ईं वाँते वे हंगळा नगरा का लोग दोड़-दोड़न ईसू अन चेलाऊँ भी पेल्याँ वटे जा पूग्या।

34जद्याँ ईसू नावऊँ बारणे निकळ्या, तो वाँ घणी भीड़ देकी, तद्याँ वाँका पे घणी दया अई। काँके वे हंगळा गारा का जस्यान हा, ज्याँको कुई गवाळ्यो ने हो। तो ईसू वाँने नरी बाताँ हिकाबा लागा।

35जद्याँ हाँज पड़गी, तद्याँ वाँका चेला वाँका नके आया अन बोल्या, “आ एक काकड़ की जगाँ हे अन अन्दारो भी घणो वेग्यो हे।

36मनकाँ ने अड़े-भड़े का गामाँ अन वस्तायाँ में जाबा दो, ताँके वे आपणाँ वाते खाबा ने कई चीज मोल ले सके।”

37पण, ईसू चेलाऊँ क्यो, “वाँने खाबा का वाते थाँ कई दो।” तद्याँ वाँ वींने क्यो, “कई थें छावो के, माँ जावाँ? अन दोस्ये चान्दी का रिप्या की रोट्याँ मोल लेन आवा अन वाँने खाबा ने देवाँ।”

38ईसू वाँने क्यो, “जावो अन देको, थाँका नके कतरी रोट्याँ हे?” वणा पतो करन वाँकाऊँ क्यो, “आपणाँ नके पाँच रोट्याँ अन दो माछळ्याँ हे।”

39पछे वणा चेला ने आग्या दिदी, “लिली-लिली चुंटी पे अणा हंगळा ने पंगताँ में बेठाण दो।”

40तद्याँ वे हंगळा हो-हो अन पचा-पचा की पंगताँ में बेटग्या।

41अन ईसू पाँच रोट्याँ अन दो माछळ्याँ उठान हरग के दयने देकन परमेसर ने धन्नेवाद दिदो अन रोट्याँ तोड़-तोड़न आपणाँ चेला ने परोसबा ने दिदी अन वणा वीं दो माछळ्याँ भी वाँ मनकाँ में बाँट दिदी।

42हंगळा जणा खान धापग्या।

43अन पछे वाँ चेला, बंची तकी रोट्याँ अन माछळ्याँ ने बारा ठोपल्याँ भरन तोकी।

44ज्याँ लोगाँ रोट्याँ खादी ही, वाँका में मनक मनकईस लगे-भगे पाँच हजार हाँ।

45पछे, जट ईसू आपणाँ चेला ने नाव पे चड़ाया, ताँके जतरे ईसू वीं भीड़ ने विदा करे, वतरे वीं वाऊँ पेल्याँ पेला पाल्ड़े बेतसेदा परा जावे।

46वीं वाँने विदा करन परातना करबा वाते मंगरा पे चड़ग्या।

47अन जद्याँ हाँज वीं, तद्याँ नाव समन्द का गाबे ही अन ईसू एकला जमीं पे हा।

48वे देक्यो के, चेलाऊँ नाव ने आगे डगाणो घणो भारी पड़रियो हे, काँके वइरो वाँके हामे चालरियो हो। तो भाग-फाट्याँ के लगे-भगे वो समन्द पे चालतो तको वाँका नके आयो अन वाँकाऊँ आगे निकलणो छातो हो,

49तो वाँ चेला ईसू ने पाणी पे चालता देकन होच्यो के, यो कुई भूत हे। तो वाँ हंगळाईं हाको कर दिदो।

50काँके वाँ हंगळा जणा वींने देकन दरपग्या हा, तो जट ईसू वाँने बतळान क्यो, “हिम्मत राको, दरपो मती, यो तो मूँ हूँ।”

51पछे वो नाव में चड़न वाँकी लारे वेग्यो अन वइरो ढबग्यो। ईं बात पे वाँने घणो अचम्बो व्यो।

52काँके वे पाँच हजार लोगाँ ने खाणो खुवाबा को मतलब ने हमज्या हाँ, काँके वाँकी अकल काम ने कररी ही।

53समन्द पार करबा केड़े, वीं गन्नेसरत नगर में पूग्या अन वटे नाव ने बांद दिदी।

54जद्याँ वे नावऊँ उतरन बारणे आया, तद्याँ लोग-बाग ईसू ने तरत ओळक लिदा हाँ।

55पछे वे लोग च्यारूँमेर दोड़न ग्या अन हंगळा जणा ने यो बतायो के, ईसू वटे हे, तो मनक माँदा मनकाँ ने माचा पे हूँवाणन वटे लेग्या।

56वो गाम, सेर अन वस्ती में कटे भी जातो हो, तो लोग-बाग आपणाँ माँदा मनकाँ ने बजार का चोगान में राक देता अन वींऊँ परातना करता तका केता के, वो आपणाँ गाबा को एक कोर भी वाँके अड़ाबा दे। तो ज्यो भी वीं कोर के अड़ता, वे हंगळा हव वे जाता।

← Chapter 5 Jump to: Chapter 7 →