Mark 8

mewari

← Chapter 7 Jump to: Chapter 9 →

1वाँ दनाँ में एक दूजाँ मोका पे घणी भीड़ भेळी वी। वाँका नके खाबा के वाते कई ने हो। ईसू आपणाँ चेला ने भड़े बलाया अन वाँने क्यो,

2“मने अणा मनकाँ पे बाळ आरी हे, काँके अणा मनकाँ ने मारी लारे तीन दन वेग्या हे अन वाँका नके खाबा वाते कई ने हे।

3जदी मूँ वाँने भूकई घरे खन्दा देऊँ, तो वीं गेला मेंईस थाकन वाँको जीव घबरा जाई, काँके कुई तो घणा छेटीऊँ आया हे।”

4वाँका चेला जबाव दिदो, “ईं हुन्ना काँकड़ में अणा मनकाँ ने खाणो खुवाबा के वाते खाणो कटेई ने मल सके?”

5पछे ईसू वाँने पूँछ्यो, “थाँका नके कतरी रोट्याँ हे?” वाँकाणी जबाव दिदो “हात।”

6पछे वीं भीड़ ने रेटे बेटबा का वाते क्यो अन वणा हात रोट्याँ लिदी अन परमेसर ने धन्नेवाद दिदो। पछे वणा आपणाँ चेला ने रोट्याँ तोड़न बाँटबा का वाते दिदी अन पछे वणा लोगाँ ने परोस दिदी।

7वाँका नके थोड़ीक फोरी माछळ्याँ भी ही। वणा परमेसर ने धन्नेवाद केन वाँने भी बाँटबा वाते दे दिदी।

8मनक खाणो खान धापग्याँ अन पछे बंची तकी रोट्याँ ने भेळी करन हात ठोपला भरिया।

9वटे लगे-भगे च्यार हजार मनक वेई। पछे ईसू वाँने हिक दिदी।

10अन वीं जट आपणाँ चेला की लारे नाव में बेटन दलमनूता नाम का परदेस में पराग्या।

11पछे फरीसी ईसू नके आया अन वाँकाऊँ बेस करबा लागा। अन वाँकी परक करबा वाते वणाऊँ हरग को निसाण माँग्यो।

12तो ईसू लाम्बो हाँ लेन वाँने क्यो, “ईं पीड़ी का मनक कस्योई निसाण काँ देकबो छावे? मूँ थाँने हाचेई केवूँ हूँ ईं जुग का मनकाँ ने कस्योई निसाण ने दिदो जाई।”

13पछे वो वाँने छोड़न पाछो नाव में आग्यो अन समन्द का पेला पाल्ड़े परोग्यो।

14ईसू का चेला खाणो लारे लाणो भूलग्या हा। वीं नाव में एक रोटी के बगर वाँका नके ओरी कई ने हो?

15ईसू वाँने चेतावणी देन क्यो, “फरीसियाँ अन हेरोदेस का हाज्याऊँ बंचन रिज्यो।”

16वाँकाणी होच-बच्यार करन केबा लागा के, आपणाँ नके तो रोटी कोयने हे।

17ईसू जाणतो हो के, वी कई केरिया हे? ईं वाते यो पूँछ्यो, “रोटी ने हे, ओ थें काँ होच-बच्यार कररिया हो? कई, थें अबाणू भी ने हमज्यो कई, थाँकामें अकल कोयने?

18थाँके आक्याँ हे, कई थें देक ने सको? थाँके कान्दड़ा हे, कई थें हुण ने सको? कई थाँने आद कोयने?

19जदी में पाँच हजार मनकाँ ने पाँच रोट्याँ तोड़न दिदी, थाँकाणी वाँ टुका ने कतरी ठोपल्याँ में भरिया हा?” वाँकाणी क्यो, “बारा।”

20अन ईसू पूँछ्यो, “जदी च्यार हजार मनकाँ का वाते हात रोट्याँ ही, तो थाँ कतरी ठोपल्याँ में वणा टुका ने भरन तोक्या हा?” वाँकाणी क्यो “हात।”

21पछे ईसू वाँने क्यो “कई, थें अबाणू भी ने हमज्या?”

22पछे वीं बेतसेदा नाम का गाम में आग्या। वटे कुई मनक ईसू का नके एक आन्दा ने लाया अन परातना किदी के, वो वींके हात लगावे।

23वणा आन्दा मनक को हात पकड़्यो अन वींने गाम का बारणे लेग्या। वणा वींकी आक्याँ पे थूँक्यो। आपणो हात वींपे मेल्यो अन वींने पूँछ्यो “कई, थने दिकरियो हे?”

24ऊपरे देकन वणी क्यो, “मने मनक दिकरिया हे। वी च्यारूँमेर रूँकड़ा के जस्यान चालता तका दिकरिया हे।”

25जदी ईसू दूजी दाण वींकी आक्याँ पे हात मेल्यो, वणी आपणी आक्याँ पुरी तरियाऊँ खोल दिदी। वींने देकबा की तागत पाच्छी मलगी अन वो एकदम सई देकबा लागो।

26पछे ईसू वींने घरे खन्दाता तका क्यो, ईं गाम में जाज्ये मती।

27अन पछे ईसू अन वाँका चेला केसरिया देस का फिल्‍लिपी नगर का भड़े का गामाँ में पराग्या। गेला में ईसू आपणाँ चेला ने पूँछयो, “मारा वाते मनक कई केवे के, मूँ कूण हूँ?”

28वाँकाणी जबाव दिदो, “बतिस्मा देबावाळो यहुन्नो, तो कुई मनक एलिया अन दूजाँ थने परमेसर का आड़ीऊँ बोलबावाळो मेंऊँ कस्योई एक माने हे।”

29पछे ईसू वाँने पूँछ्यो, “अन थाँ मने कई केवो हो के, मूँ कूण हूँ?” पतरस वींने क्यो, “थूँ मसी हे।”

30पछे वणा वाँने या चेतावणी दिदी के, “थाँ मारा बारा में ओ किंने भी मती केज्यो।”

31अन वो वाँने हिकाबा लागो, “मनक का पूत(ईसू) ने घणो दुक जेळणो पेड़ी अन पंच, मोटो याजक अन मूसा का नेमा ने हिकाबावाळाऊँ वो भुला दिदो जाई अन हाँची में वो मारियो जाई अन पछे तीजे दन वो मरयाँ तका मूँ जीवतो वे जाई।”

32वणा वाँने या बात हाँची बता दिदी। पछे पतरस वींने एक आड़ी लेग्यो अन तापड़्यो।

33पण, ईसू पाच्छे फरन आपणाँ चेला ने देक्या अन पतरस ने तापड़ता तका बोल्या, “सेतान, माराऊँ छेटी वेजा। थाँरो होचणो परमेसर का आड़ीऊँ कोयने, पण मनकाँ का जस्यान हे।”

34पछे, ईसू भी आपणाँ चेला की लारे मनकाँ की भीड़ ने बलई अन वाँने क्यो, “जदी कुई मारी लारे आणो छावे, तो वो आपणाँ खुद ने भुल जाई अन आपणी हूळी लेन मारा पाच्छे अई जावे।

35काँके ज्यो भी आपणाँ जीव ने बंचाणो छावे, तो वो वींने गमाई। अन ज्यो कुई मारा वाते अन हव हमच्यारा का वाँते जीव देई, वींको जीव बंचायो जाई।

36जदी कुई मनक आपणी जीव ने खोन आकी दनियाँ ने पा लेवे, तो वींको कई फायदो?

37मनक आपणो जीव पावा का वाते कई ने दे सके हे।

38जद्याँ कुई मारा अन मारी हिकऊँ, कुकरमी अन पापी जमानाऊँ हरमाई तो मूँ ज्यो मनक को पूत(ईसू) हूँ, जद्याँ पुवितर हरग-दुताँ की लारे परमेसर की मेमा में आऊँ, तो वींका वाते हरमाऊँ।”

← Chapter 7 Jump to: Chapter 9 →