Revelation 11

mewari

← Chapter 10 Jump to: Chapter 12 →

1ईंका केड़े मने नाप लेबा का वाते एक पितो दिदो ग्यो। अन माराऊँ क्यो ग्यो, “ऊबो वेन परमेसर का मन्दर अन वेदी ने नापले। अन जीं मनक मन्दर में जे-जेकार कररिया हे, वाँने गणले।

2पण मन्दर की चार दिवारी की जगाँ ने मती नापज्ये, काँके ओ जो यहूदी ने हे वणा मनकाँ ने दिदो ग्यो। वीं बयालिस मिना तईं आपणाँ पगाँऊँ वीं पुवितर नगर ने गूंदी।

3मूँ दो गवा ने अदिकार देऊँ वीं एक हजार दोस्ये हाठ दनाँ तईं परमेसर की बाताँ बताई। वीं बोरियाँ का गाबा पेरिया तका वेई, जीं दक ने बतावे हे।”

4ईं दुई गवा वणा दो जेतुन का रूँकड़ा ने अन दो दिवा ने बतावे हे जी धरती पे राज करबावाळा परबू परमेसर का हामे हरग में ऊबा रेवे हे।

5अन जद्याँ कुई वाँको नास करणो छावे तो वाँका मुण्डाऊँ वादी बारणे आन वाँका दसमणा ने बाल देई। ईं वाते जद्याँ कुई वाँको नकसाण करबा का वाते होची, तो पको हे, वाँने अस्यान की मोत जेलणी पड़ी।

6वाँके नके आकास पे अदिकार वेई, वीं वइरा ने रोक देई जणीऊँ वीं जद्याँ तईं परच्यार करे बरका ने वरी, अन वाँने पाणी पे अदिकार वेई जणीऊँ पाणी ने लुई बणा सके, वीं जद्याँ छावे, ईं धरती पे विपती ला सके हे।

7जद्याँ वीं परच्यार हुणा देई, तो वो डरावणो जनावर, ज्यो पाताळ मेंऊँ निकळी, वो वाँकाऊँ लड़न वाँने मार देई।

8वाँका लास वीं मोटा नगर का चोक में पड़ी रेई, जटे वाँका परबू ने हूळी पे लटकाया हा। ईं नगर ने ईंकी बुरई का वजेऊँ सदोम अन मिसर का नामऊँ भी बोल्यो जावे हे।

9धरती का हाराई देसा का थोड़ाक मनक, हारी बोली बोलबावाळा मेंऊँ थोड़ाक मनक, हारी गोताँ का थोड़ाक मनक वाँका लास ने हाड़ा तीन दनाँ तईं देकी, वीं वाँकी लास ने कबर में ने मेलबा देई।

10धरती पे रेबावाळा मनक वाँका मोत पे राजी वेन तेवार मनाई अन एक-दूँजा ने भेंट खन्दाई। काँके अणा दुयाँ परमेसर की आड़ीऊँ बोलबावाळा धरती का मनकाँ ने घणो दक दिदो हो।

11पण हाड़ा तीन दनाँ का केड़े परमेसर की जीवन की आत्मा वाँके मयने परीगी, जणीऊँ वीं आपणाँ पगा पे उठा वेग्या, जणा भी वाँने देक्या, वीं घणा दरपग्या।

12वणा दुया ने हरगऊँ अवाज हुणई दिदी के, “ऊपरे अई जावो।” अस्यान हुणन वीं दुई आपणाँ दसमणा ने देकता देकता हरग में पराग्या।

13वीं टेम में एक जोरऊँ भूकम आयो, जणीऊँ नगर को दसमो भाग धड़ी ग्यो, अन वीं भूकमऊँ हात हजार मनक मरग्या, बाकी मनक दरपग्या अन वणा हरग का परमेसर की मेमा किदी।

14अस्यान दूजी विपती बीतगी, पण तीजी विपती वेगी आबावाळी हे।

15हातवे दूत जद्याँ रणभेरी बजई, तो हरगऊँ जोरकी अवाज अई के, “अबे ईं धरती पे परबू अन वींका मसी को राज हे। अन वीं जुग-जुग तईं राज करी।”

16पछे वीं चोबीस पुरवज ज्यो आपणाँ गादी पे बेट्या तका हा, ऊबा वेन परमेसर के गोडा टेकन धोक लाग्या।

17अन बोलबा लागा, “हाराऊँ जोरावर परबू परमेसर हे, जीं अबाणू हे अन जीं हमेस्या हा, माँ थाँको धन्नेवाद करा हा। थाँ सरूऊँ थाँकी तागतऊँ राज करणो सरू किदो हो।

18जो यहूदी ने हे वीं मनक गुस्सा में हा पण अबे थाँके गुस्सा को टेम अन न्याव करबा को टेम आग्यो जणीऊँ मरिया तका को न्याव किदो जाई। अन थाँरा भगताँ को, थाँकी आड़ीऊँ बोलबावाळा को अन वाँको जी थाँका नाम की दरपणी राक्या करे हे, बदलो लिदो जाई। अन धरती ने खराब करबावाळा को नास किदो जाई।”

19ईंका केड़े परमेसर का मन्दर ने जो हरग में हे वींने खोल्यो ग्यो, अन वीं मन्दर में मने वादा वाळी पेटी दिकई दिदी। वींके केड़े विजळी चकमवा लागी अन कड़कवा की अवाज हुणई देबा लागी अन वादळा गाजबा लाग्यो, अन भूकम आबा लागो अन गड़ा पड़बा लागा।

← Chapter 10 Jump to: Chapter 12 →