Revelation 7

mewari

← Chapter 6 Jump to: Chapter 8 →

1ईंका केड़े में च्यार हरग दुताँ ने धरती का च्यारई खुणा में ऊबा तका देक्या, वीं च्यारई खुणाऊँ आबावाळा बईरो ने ठाम मेल्यो हो, जणीऊँ ईं धरती का रूँकड़ा के अन समन्द में बईरो ने चाल सके।

2अन में एक ओरी हरग-दुत ने उगमणी दसाऊँ आवतो तको देक्यो। वणी जीवता परमेसर की मोर ले राकी हे। वणी वणा च्यारई दुताँ ने ज्याँने धरती अन समन्द को नास करबा को हक दिदो ग्या हो, वाँकाऊँ जोरऊँ क्यो,

3“थाँ जद्याँ तईं धरती, समन्द अन रूँकड़ा को नास मती करज्यो, तद्याँ तईं मूँ आपणाँ परमेसर की मोर वींका दासा का माता पे ने लगई दूँ।”

4पछे जिंके मोर लगई गी ही, वाँकी गणती एक लाक चमालिस हजार ही। वीं मनक इजराएल का हाराई गोताँ मेंऊँ हा।

5वणा गोताँ में यहूदा, रुबेन, गाद, आसेर, नप्ताली, मनस्से, समोन, लेवी, इस्साकार, जबलुन, युसुप अन बिन्यामीन हा। वणा मेंऊँ एक-एक गोत मेंऊँ बारा बारा हजार मनक हा।

9ईंका केड़े में कई देक्यो के, मनकाँ का मोटी भीड़ हे जिंने कुई भी गण ने सके, वीं भीड़ में हारी जात्या का, हाराई कुल का, हारी बोली बोलबावाळा अन हाराई देसा का मनक हा, वीं वणी गादी अन उन्याँ का हामे ऊबा हा, वणा धोळा गाबा पेर मल्या हा अन हाताँ में खजुर की डाळ्याँ ले राकी ही।

10अन वीं हेलो पाड़रिया हा, “आपणाँ उदार का वाते गादी पे बेट्या तका आपणाँ परमेसर की अन उन्याँ की जे-जेकार वेवे।”

11वीं हाराई हरग-दुत वीं गादी के, पुरवजाँ के अन च्यारई जीवता जीव का च्यारूँमेर ऊबा हा। वणा गादी पे बेट्या तका परमेसर के धोक दिदो।

12पछे वणा क्यो, “आमीन! आपणाँ परमेसर की जे-जेकार, मेमा, अकल, धन्नेवाद, मान, तागत अन सगती हमेस्यान बणी तकी रेवे। आमीन।”

13तो वणा पुरवजाँ मेंऊँ एक जणे माराऊँ पूँछ्यो, “जणी धोळा गाबा पेर मल्या हा, वीं मनक कूण हे? वीं कटाऊँ आया हे?”

14में वणीऊँ क्यो, “हे मालिक, थाँ तो जाणोई हो।” तो वणा माराऊँ क्यो, “ईं वीं मनक हे जी कळेस जेलन आया हे अन अणा आपणाँ गाबा ने उन्याँ का लुई ऊँ धोन धोळा किदा हे।

15ईं वजेऊँ ईं परमेसर का गादी का हामे ऊबा हे अन वाँके मन्दर में रात-दन वाँकी भगती करता रेवे हे, ईं वाते ज्यो गादी पे बेट्या तका हे वो वाँका में वास करतो तको वाँने बंचाई।

16वाँने ने तो भूक लागी अन नेई वाँने कदी तर लागी। सुरज की तपत अन तावड़ाऊँ भी वाँके कई ने वेई।

17काँके ज्यो उन्यो गादी का बचमें में हे वो वाँकी रुकाळी करी। अन वो वाँने जीवन देबावाळा पाणी की सोता का नके लेन जाई अन परमेसर वाँकी आक्याँ का हाराई आसूँ पुछ देई।”

← Chapter 6 Jump to: Chapter 8 →