Revelation 20

mewari

← Chapter 19 Jump to: Chapter 21 →

1पछे में एक हरग-दुत ने रेटे उतरतो देक्यो। वींके हात में पाताळ की चाब्याँ अन एक मोटी हाँकळ ही।

2वो वीं अजगर ने ज्या पुराणो हाँप ज्यो इबलिस अन सेतान केवातो हो, वींने पकड़न एक हजार वर का वाते हाँकळऊँ बांद दिदो।

3वो वींने मोटा पाताळ में नाक दिदो अन वींके ऊपरे मोर लगा दिदी के, ओ एक हजार वरा तईं मनकाँ ने ने भरमाई, पण ईंका केड़े थोड़ाक टेम का वाते ईंने छोड़ दिदो जाई।

4तद्याँ में थोड़ाक गाद्‍याँ देकी, वींपे मनक बेट्या तका हा, वाँने न्याव करबा को हक दिदो ग्यो हो। अन में वणा मनकाँ की आत्मा भी देकी ज्याँका माता ईसू मसी की गवई देबा के अन परमेसर को बचन हुणाबा की वजेऊँ काट्या ग्या हा, अन वणा मनकाँ ने ज्यो भी जनावर की अन वींकी मूरत ने पूँजी अन ने वींकी मोर ने आपणाँ माता अन हात में लगई ही। वीं मनक जीवता वेन एक हजार वर का वाते मसी का हाते एक हजार वरा तईं राज करतो रियो।

5जद्याँ तईं एक हजार वर पूरा ने वे जावे, बाकी की मरिया तका मनक जीवता ने व्या। ओ पेलो पुनरुत्थान हे।

6वीं धन्न अन पुवितर हे ज्यो ईं पेला पुनरुत्थान का भागी बणी, अणापे दूजो मोत को कई अदिकार ने, पण ईं परमेसर अन मसी का याजक वेई, अन वींके हाते एक हजार वर तईं राज करी।

7जद्याँ एक हजार वर पूरा वे जाई, तद्याँ सेतान ने खोल्यो जाई,

8जणीऊँ वो वणा जात्या का नके ज्या धरती का च्यारूँमेर जाई, ज्याँने गोग अन मागोग क्यो जावे हे, जणाकी गणती समन्द की रेत की कण का बराबर वेई, वो वाँने भरमान लड़ई करबा का वाते भेळा करबा का वाते जाई।

9वीं सेतान की सेना हारी धरती पे फेल जाई, वीं परमेसर की भगताँ की डेरा ने अन वींका लाड़ला नगर ने गेर लेई, पण हरगऊँ वादी वरी अन वाँने बाल देई।

10अन वीं सेतान ने ज्यो वाँने भरमातो हो, वीं वादी का कुण्ड में जिंका में वीं डरावणा जनावराने अन वींका जूटी आगेवाणी करवावाळा नाक्या ग्या हा, वींने भी नाक दिदो जाई, जिंमें वीं हमेस्यान दन रात तड़पता रेई।

11तद्याँ में मोटी धोळी गादी अन वींपे बेट्या तका ने देक्यो, वींके हामेऊँ धरती अन आकास भागग्या अन वाँको नामो निसाण मटग्यो।

12वींके केड़े में फोराऊँ लेन मोटा तईं का हाराई मरिया तका मनकाँ ने वीं गादी का हामे ऊबा तका देक्यो, अन थोड़ीक पोत्याँ खोली गी वणाके केड़े एक ओरी पोती खोली गी, याईस “जीवन की पोती हे।” वाँके करमा का जस्यान ज्या ईं पोती में लिक्या ग्या हा, मरिया तका को न्याव किदो ग्यो हो।

13ज्यो मनक समन्द में मरग्या हा वाँने समन्द दे दिदा अन मोत अन पाताळ में ज्यो मनक हा, वाँने भी वणी दे दिदा। हाराई को न्याव वाँका कामाँ का जस्यान किदो ग्यो।

14ईंका केड़े मोत ने अन पाताळ ने वादी का कुण्ड में नाक दिदा ग्या। यो वादी को कुण्डईस दूँजी मोत हे।

15जिंको भी नाम “जीवन की पोती” में लिक्यो तको ने मल्यो, वींने भी वादी का कुण्ड में नाक दिदो ग्यो।

← Chapter 19 Jump to: Chapter 21 →