Revelation 13

mewari

← Chapter 12 Jump to: Chapter 14 →

1तद्याँ में समन्द का मयनेऊँ एक डरावणो जनावर ने बारणे निकळतो देक्यो। वींके दस तो हिंगड़ा अन हात माता हा। अन वणी आपणाँ हिंगड़ा पे दस राजमुकट पेर मल्या हा। वींका हरेक माता पे परमेसर को अपमान करबावाळा नाम लिक्या तका हा।

2में जणी जनावर ने देक्यो हो, वो दिकबा में तो चीता का जस्यान को हो, पण वींका पग रिसड़ा का जस्यान का अन मुण्डो नार की जस्यान को हो। अन वणी अजगर वींने आपणी गादी अन आपणाँ हाराई अदिकार, तागत हूँप दिदी।

3वीं डरावणा जनावर का एक माता में अस्यान को घाव हो, जणीऊँ अस्यान लगारियो हो के, वो अबे मर जाई। पण वींको ओ घाव भरग्यो, जणीऊँ हारी धरती का मनक अचम्बा करन वींके हाते वेग्या।

4वीं मनक वीं अजगर के धोक लागबा लागग्या, काँके वणी आपणाँ हाराई अदिकार वीं डरावणा जनावर ने दे दिदा हा। पछे मनक वीं जनावर के भी धोक लागन केबा लागा, “ईं जनावर का जस्यान को कूण हे? ज्यो अणीऊँ लड़ सके?”

5वीं डरावणा जनावर ने बयालिस मिना तईं परमेसर की बेजती करबा को हक दिदा ग्यो हो, जणीऊँ वो मेपणो का हाते परमेसर की बेजती करे।

6ईं वाते वणी परमेसर की बेजती करणो चालूँ कर दिदो। अन वो परमेसर का नाम, वाँकी रेबावाळी जगाँ की अन हरग में रेबावाळा मनकाँ की बेजती करबा लाग्यो।

7वींने ओ हक दिदा ग्यो हो के, वो हाराई कुल का मनकाँ का, हारी बोली बोलबावाळा का, हारी जात्या का मनकाँ का हाते, लड़न वाँने हरा नाके।

8जणा मनकाँ को नाम वीं उन्याँ की जीवन की किताब में ने लिक्यो तको हो, वीं हाराई वी डरावणा जनावर के धोक लागी। अन यो उन्यो ज्यो ईं दनियाँ की सरुआतऊँ बली वेबा का वाते ते किदो ग्यो हो।

9ज्यो भी हुणे हे वो हुणले,

10जिंने जेळ में जाणो हे वो जाई, ज्यो भी तरवारऊँ मारी, पाको हे वो भी तरवारऊँस मारियो जाई। खरा अन धिज्यो राकबावाळा मनकाँ को ओईस विस्वास हे।

11ईंका केड़े में धरतीऊँ एक ओरी डरावणा जनावर ने बारणे निकळते तको देक्यो। वींके गारा का जस्यान का दो हिंगड़ा हा, पण वींकी बोली अजगर की जस्यान की ही।

12वो भी पेला डरावणा जनावर का हाराई अदिकार काम में लेतो हो, अन धरती पे रेबावाळा हाराई मनकाँऊँ वीं जनावर ने ज्याँका घाव हव वेग्यो धोक देवाड़तो हो।

13ओ मोटा-मोटा हेन्याण चमत्कार बतातो हो, अटा तईं के, वो मनकाँ का हामे आकासऊँ धरती पे वादी वरा देतो हो।

14वो पेला डरवाणा जनावर का हकऊँ चमत्कार बतातो हो। वो धरती पे रेबावाळा मनकाँ ने भरमातो अन बोलतो हो के, जीं पेला जनावर के तरवारऊँ घाव व्यो हो, वो ठीक वेग्यो हे, थाँ वींकी मूरत बणावो, ताँके वींने मान मले।

15वींने दूजाँ वीं पेला डरावणा जनावर की मूरती में जीव नाकबा को हक दिदो ग्यो हो, जणीऊँ वाँ मूरती बोलबा लागे। वीं मूरत के जतरा भी मनक धोग ने लागी, वाँने वो मरवा देई।

16वणी फोरा अन मोटा, पलई रिप्यावाळा, पलई गरीब, पलई मालिक पलई नोकर हाराई का माता अन जीमणा हात पे एक छाप लगाबा का वाते मजबूर कर दिदा।

17अन जिंका भी माता पे वाँ छाप की संख्या ने वे, वीं डरावणा जनावर को नाम ने वे, तो वो मनक कई भी लेण-देण ने कर सके।

18जिंमें अकल हे, वो वीं जनावर की संख्या ने जोड़ी ले, काँके ईं कणी मनक का नम्बर हे, ईं नम्बर 666 हे।

← Chapter 12 Jump to: Chapter 14 →