Revelation 21

mewari

← Chapter 20 Jump to: Chapter 22 →

1पछे में एक नुवो हरग अन नुवी धरती देकी। काँके पेलो हरग अन पेली धरती खतम वेग्या हा अन समन्द भी अबे ने रियो हो।

2पछे में पुवितर नगर नुवो यरूसलेम ने हरगऊँ परमेसर का नकेऊँ उतरते देक्यो अन वो वीं लाड़ी का जस्यान हे, ज्याँ आपणाँ धणी का वाते सजे धजे।

3तद्याँ में गादी में एक जोरकी अवाज हूणी। वाँ केरी ही के, “देको, अबे परमेसर को मन्दर मनकाँ का वसमें हे अन वीं वाँका वसमें घर बणान रिया करी। वीं वाँकी परजा वेई अन खुद परमेसर वाँका परमेसर वेई।

4अन वो वाँकी आक्याँ का आसूँ पुछ नाकी अन ईंका केड़े मोत ने रेई, अन ने होक, ने रोणो-धोणो, ने पिड़ा रेई, काँके पेल्याँ की बाताँ जाती री ही।”

5ज्यो गादी पे बेट्या तको हे वणी क्यो, “देको, मूँ हारोई नुवो कररियो हूँ।” पछे पाछो वणी क्यो, “लिकी ले, काँके यो बचन विस्वास करबा के जोगो अन हाँचो हे।”

6पछे वणी माराऊँ क्यो, “ईं बाताँ पुरी वेगी हे। मूँ अलफा अन ओमेगा, सरुआत अन अन्त हूँ। मूँ तरियाँ ने जीवन का पाणी का सोताऊँ फोकट में पाणी पाऊँ।

7जो जे पाई वोईस अणा हारी चिजाँ को मालिक वेई। मूँ वींको परमेसर वेऊँ अन वो मारो बेटो वेई।

8पण दरपण्या अन बना विस्वासवाळा, भरस्ट, हत्यारा अन कुकरमी, जादु-टोना करबावाळा, मूरती पुजबावाळा, अन हाराई जूट बोलबावाळा को भाग वीं कुण्ड में मली ज्यो हमेस्यान बळतो रेवे हे। या दूजी मोत हे।”

9पछे वणा हाताँ दुताँ का नके आकरी हात विपत्याऊँ भरिया तका हात प्याला हा, वणा मेंऊँ एक मारा नके आयो अन माराऊँ बात करन क्यो, “अटे आ, मूँ थने वणी लाड़ी ने बताऊँ, ज्याँ उन्याँ की लुगई हे।”

10वो दूत मने परमेसर की आत्मा में एक मोटा अन ऊसा मंगरा पे लेग्यो, अन वणी मने पुवितर नगर नुवा यरूसलेम का दरसण कराया। वो नगर परमेसर का आड़ीऊँ रेटे उतर रियो हो।

11परमेसर की मेमा वींमें ही अन वींकी ज्योती अनमोल काँस बिल्‍लोर के जस्यान चमक री ही।

12नगर का च्यारूँमेर एक परकोटो हो, वींके बारा फाटक हा अन बाराई फाटकाँ पे बारा हरग-दुत हा, अन बाराई फाटकाँ पे इजराएल्याँ की बाराई गोताँ का नाम लिक मेल्या हा।

13अणामूँ तीन फाटकाँ उगमणी आड़ी ही, तीन धरव का आड़ी, तीन लंकव का आड़ी अन तीन आतमणी आड़ी ही।

14नगर को परकोटो बारा नीमा का भाटाऊँ बणायो ग्यो हो अन वींपे मेमना का बाराई थरप्या तका चेला का नाम लिक मेल्या हा।

15ज्यो हरग-दुत माराऊँ बाताँ कररियो हो, वींका नके होनाऊँ एक नापवा की एक जरी बणी तकी हे, जणीऊँ वो वीं नगर ने अन वींकी फाटकाँ अन वींका परकोटा ने नाप सकतो हो।

16वीं नगर ने हमचोरस बसायो तको हो अन वींकी लम्बाई अन चोड़ाई बराबर ही अन वणी वीं जरीऊँ नगर ने माप्यो, तो हाड़ा हात स्ये कोस को निकळ्यो, वींकी लम्बाई अन चोड़ाई अन ऊँचाई बराबर ही।

17हरग-दुत पाछो वीं परकोटा ने माप्यो। वो एक होन चमालिस हात हो। हरग-दुत वींने मनकाँ का हात का नापऊँ माप्यो हो।

18नगर को परकोटो यसब नाम को मण्याऊँ बण्यो तको हो अन नगर ने काँस का जस्यान चमकता तका सुद होनाऊँ बणायो ग्यो हो।

19नगर का परकोटा की नीमा हरेक तरियाँ का अनमोल मण्याऊँ सजई गी ही। नीम को पेलो भाटो यसब को बण्यो हो, दूजो नीलमणी अन तीजो लालड़ी अन चोतो मरकत को हो।

20पाचवो गोमेद अन छटो माणक, हातवो पीतमणी को, आटवो परोज को, नवो पुखराज को, दसवो लहसनिया को, ग्यारवो धुम्रकान्त को, बारवो चन्द्रकाँत को हो।

21अन बाराई फाटकाँ बारा मोत्याऊँ बणी ही, अन हरेक फाटक एक-एक मोतीऊँ बण्यो हो, नगर का गेला हव काँस का जस्यान सुद होना बण्या तका हा।

22नगर में मने कुई मन्दर ने दिकई दिदो, काँके सर्वसक्‍तिमान परबू परमेसर अन उन्योइस वाँको मन्दर हे।

23अन वीं नगर ने कस्याई सुरज अन चाँद की जरुरत ने ही के, वीं वींने उजितो देवे, काँके वो तो परमेसर का तेजऊँ चमकरियो हे। उन्योइस वीं नगर को दिवो हे।

24हारी जात्या का मनक वीं दिवा का उजिता के आसरे आगे बड़ी, अन धरती का राजा आपणाँ-आपणाँ वेभव का सामान वींमें लाई।

25दन की टेम में वींकी फाटक कदी बन्द ने वेई अन वटे रात तो कदी वेईस ने।

26अन मनक जात्या जात्या को वेभव अन धन-दोलत वटे लाई।

27वींमें ने कुई हुगली चीज अन ने हूँगला काम करबावाळो, ने जूट बोलबावाळो कणी भी तरियाऊँ वटे ने आई। खाली वीं मनक आई ज्याको नाम उन्याँ की जीवन की किताब में लिक्या तका हे।

← Chapter 20 Jump to: Chapter 22 →