Mark 1 — Marwari Bible

1परमेसर रा बेटा यीसु मसीह रै सुभ संदेस री सरूआत इण तरैह होई,

2ज्यूं यसायाह भविसयदाता री किताब मे लिख्योड़ौ है के, “देख, म्हैं म्हारै दूत नै थारै आगै मेलूं, जिकौ थारै वास्तै मारग तैयार करैला।

3रिंदरोही में एक हेलौ करणवाळै री आवाज सुणाई दैय री है, ‘परभु रै वास्तै मारग तैयार करौ, जिण ऊं परभु रौ मारग खुलीयोड़ो रैवै।’ ”

4यूहन्‍ना आयौ, जिकौ कांकड़ मे बतिस्मो देतो अर पाप री माफी खातर मन फिराओ रौ बतिस्मो लेवणा रौ परचार करतौ।

5यहूदिया परदेस रा अर यरुसलेम सैहर रा रैवण वाळा घणा ही लोग बारै निकळनै उणरै खनै गिया अर आपरा पापों नै मांन नै यरदन नदी में यूहन्‍ना ऊं बतिस्मो लियौ।

6यूहन्‍ना ऊंट रै बालों रा बण्योड़ा गाभा पेरतो अर आपरी कमर माथै चमड़े रौ पटो बान्धियोड़ो राखतौ अर वो टिडियां अर सेहद खावतो हो।

7यूहन्‍ना ओ परचार करतौ के, “म्हारै पछै जिकौ आवण वाळौ है, वो म्हारै ऊं घणौ ताकतवर है। म्हैं तो इण लायक ई कोनीं की उणरै पगरखो री डोरी खोल सकूं।

8म्हैं तो थांनै पांणी ऊं बतिस्मो देवूं हूं, पण वो थांनै पवितर आतमा ऊं बतिस्मो देवेला।”

9उण दिनां में यीसु गलील देस रा नासरत हेर ऊं आने, यरदन नदी में यूहन्‍ना ऊं बतिस्मो लियौ।

10वो पांणी ऊं बारै निकळन आयौ, जद हाथो हाथ आभै नै खुलतो अर परमेसर री आतमा नै कबूड़ै रै ज्यूं खुद रै माथै उतरती देखी,

11अर आ आकासवाणी होई के, “थूं म्हारौ लाडलौ बेटौ है, म्हैं थारै ऊं घणौ राजी हूं।”

12पवितर आतमा यीसु नै हाथो हाथ सुनी जगा मे भेजिया।

13सुनी जगा में चाळीस दिन तांई सैतान यीसु नै पाप करनै वास्तै लालच दियौ अर यीसु सुनी जगा रै जीवो रै बीच में रिया, पण सरगदूत यीसु री सेवा करता रिया।

14यूहन्‍ना रै जेळ में जावण रै पछै, यीसु गलील में आया अर परमेसर रै सुभ संदेस रौ परचार सरू करयौ।

15यीसु कयौ, “वगत पूरौ हो गियो है अर परमेसर रौ राज नैड़ौ आयग्यौ है, मन फिराओ अर परमेसर रै सुभ संदेस माथै विसवास राखौ।”

16यीसु गलील री झील रै कांठै फिरता वगत समौन अर उणरा भाई अन्‍द्रियास नै झील में जाळ नोखते देख्यां क्यूंकै वे मछली पकड़न वाळा हा।

17यीसु उणौनै कयौ, “म्हारै लारै आओ, म्हैं थांनै परमेसर रै खनै लोगां नै लावण वाळा बणाऊंला।”

18वे हाथोहाथ जाळ नै छोड़नै उणरै लारै चाल दिया।

19थोड़ाक आगै जायनै, वे जबदी रा बेटा याकूब अर उणरा भाई यूहन्‍ना नै नाव माथै जाळ नै सावळ करता देखिया।

20यीसु उणौनै हाथो हाथ बुलाया अर वे आपरै पिता जबदी नै मजूरो रै साथै नाव माथै छोड़नै यीसु रै लारै चाल दिया।

21पछै यीसु अर उणरा चेला कफरनहूंम मे आया अर यहूदियो रै आराम रा दिन यीसु पराथना घर में जायनै परमेसर रा वचन सिखावण लागा।

22लोग यीसु ऊं परमेसर रा वचन सुणनै अचूम्बो करयौ, क्यूंकै यीसु सास्तरियों रै ज्यूं कोनीं, पण अधिकारी रै ज्यूं परमेसर रा वचन सिखावता हा।

23उणीज वगत, पराथना घर में एक आदमी हो, उण में एक दुस्ट आतमा ही, वो चिलायनै कयौ,

24“ हे नासरत रा यीसु, थूं म्हारै ऊं कांई चावै? कांई थूं म्हारौ नास करणौ चावै? म्हैं थनै जांणूं हूं, थूं कुण है? थूं परमेसर रौ पवितर मिनख है।”

25यीसु हाका करनै उणनै कयौ, “चुप रैह अर उण मे ऊं निकळ जा।”

26जद दुस्ट आतमा उणनै मरोड़नै हाका करया अर उणमे ऊं निकळग्यौ।

27इण माथै सगळा लोग अचूम्बो करयौ अर आपस मे बातां करनै लागा, “आ कांई बात है? आ तो कोई नवी सीख है। यीसु अधिकार रै साथै दुस्ट आतमा नै भी आग्या दैवै है अर वे यीसु री आग्या नै मांनै है।”

28यीसु री आ बात हाथो हाथ गलील देस रै खनै री सगळी जगा मे पूग गी।

29इण पछै यीसु पराथना घर मे ऊं निकळनै याकूब अर यूहन्‍ना रै साथै, समौन अर अन्‍द्रियास रै घर आया।

30समौन री सासु नै ताव छड़योड़ौ हो अर वां माचा में सुती ही। आ बात लोग यीसु नै बताई।

31तो यीसु उणरै खनै जायनै, उणरौ हाथ पकड़नै ऊभी करी अर उणरौ ताव उतरगो। वा उणरी सेवा करनै लागी।

32उण इज दिन सांझ रै वगत जणै सूरज डूबगो, तो लोग बिमारों नै अर जिणमे दुस्ट आतमा ही, उणनै भी उणरै खनै लाया।

33नगर रा घणा जणा घर रा द्धार माथै भेळा होया।

34यीसु घणा लोगां नै जिकौ तरैह तरैह री बिमारियों ऊं दुखी हा, उणौनै सावळ करिया, घणा जणा नै दुस्ट आतमाओ ऊं छुड़ाया अर दुस्ट आतमाओ नै बोलण तांई नीं दिया। क्यूंकै वे यीसु नै जांणता हा के, यीसु परमेसर रौ पवितर मिनख है।

35सवार होणै ऊं घणौ पैला, यीसु उठनै एक एकांत जगा माथै गिया अर पराथना करनै लाग्या।

36जद समौन अर उणरा साथी यीसु नै ढ़ूढ़नै गिया।

37यीसु मिलया, तो उणौनै कयौ, “हैंग जणा थांनै ढ़ूढ़ रिया है।”

38यीसु समौन अर उणरा साथियो नै कयौ, “आओ अपां ओर खनै री बस्तियो मे चालौ, म्हैं उठै भी परचार करूं, क्यूंकै म्हैं इण वास्तै आयौ हूं।”

39यीसु गलील मे पराथना घरो में जायनै परचार करता अर दुस्ट आतमा लागोड़ा लोगां नै सावळ करता रिया।

40एक कोढ़ी यीसु खनै आयौ अर उणरै सांमै गोडा टेकनै विणती करनै कैवण लागौ, “हे परभु जे थूं चावै तो म्हनै कोढ़ ऊं सावळ कर सकै है।”

41यीसु उण माथै तरस खाने उणरै हाथ लगान कयौ, “म्हैं चावूं हूं, की थूं कोढ़ ऊं सावळ हो जा।”

42उणीज वगत उणरौ कोढ़ झड़ग्यौ अर वो सुद्ध होईग्यौ।

43जद यीसु उणनै चेतायनै हाथोहाथ विदा करयौ,

44अर उणनै कयौ, “देख किणनै ही मत कहीजै। पण जायनै याजक नै दिखाइजे अर थारै सुद्ध होणा री ऐवज मे मूसा जिकौ ही तैय करयौ है वा भेट चढ़ा। जिण ऊं आ गवाई रैवै के परमेसर थारौ कोढ़ झाड़ियौ।”

45पण वो बारै जायनै इण बात रौ घणौ परचार करयौ अर इती फैलान लागौ के यीसु पाछौ खुलम खुलो सैहर मे कोनीं जा सकया, पण सैहर रै बारै कांकड़ जैड़ी जगा मे रिया अर उठै ई च्यांरूमेर ऊं मिनख यीसु खनै आवता रिया।