Mark 14 — Marwari Bible

1दो दिन रै पछै फसह अर अखमीरी रोटी रौ तैंवार आवण वाळौ हो। परधान याजक अर सास्तरी इण बात री सौध मे हा, की यीसु नै छळ ऊं पकड़नै मार दो।

2पण कैवता हा, “तैंवार रा दिनां मे अपां ओ कोनीं कर सकौ, कदैई ऐड़ौ नीं हो की लोगां मे हंगामों हो जावै।”

3जद वो बैतनिय्याह मे समौन जिनै पैला कोढ़ हो उणरै घर मांय खाणौ खाणै बैठा हा, तद एक लुगाई संगमरमर रै बरतन मे मूंगौ अंतर लेन आई, अर उणरै माथा ऊपर ढ़ोळियो।

4पण कोई नै रीस आई कैवण लागा, “इण अन्तर रौ क्यूं पापों काटयो?

5क्यूंकै ओ अन्तर तीनसो चांदी रा सिक्‍का ऊं हली कीमत मांय बेचनै कंगालो मांय बाटियो जा सकतौ हो।” अर वे उण लुगाई नै हाका करनै लागा।

6यीसु कयौ, “उणनै छोड़ दो, उणनै क्यूं परेसान करौ हो? वां तो म्हारै साथै भलाई करी है।

7कंगाल थौरे साथै हमेसां रैवै, अर थै जणै चावौ तद उणी भलाई कर सकौ हो, पण म्हैं थौरे साथै हमेसां नीं रैवूंला।

8जिकौ कीं वां कर सकी, वो करयौ, वां म्हारै गाड़े जावण री तैयारी माई पैला ऊं म्हारै सरीर माथै अन्तर लगायो है।

9म्हैं थौरे ऊं साचौ कहूं की सगळै संसार में जठै कठै ई सुभ संदेस परचार कियो जावैला वठै इण लुगाई रा कांम री चरचा उणरी याद में की जावैला।”

10तद यहूदा इस्‍करियोती जिकौ बारैह मे ऊं एक हो, परधान याजकौ रै खनै गयो की यीसु नै पकड़ानै वास्तै उण ऊं बात करनै आयौ।

11वे उणरी बात सुण नै राजी होया, अर उणरै रूपिया देवण रौ वचन दियौ, अर यहूदा मौकौ ढ़ूंढ़ण लागौ की यीसु नै धोखे ऊं पकड़वा दे।

12अखमीरी रोटी रै तैंवार रै पैलै दिन, जिणमे ऊं फसह रा दिन मेमने री बलि देता हा, उणरा चेला उण ऊं पूछयौ, “थूं कांई चावै, की म्हौ कठै जायनै थारै वास्तै फसह खावण री तैयारी करौ?”

13वो आपरै चेला मे ऊं दो नै ओ कैहन भेज्या, “नगर मांय जाओ, अर एक मिनख पांणी रौ घड़ो उठायोड़ो थांनै मिळैला, उणनै लारै उण घर मे जाता रीजो।

14अर वो जिकौ घर मांय जावै उण घर रा मालिक ऊं कहीजौ, ‘गुरु कैवै, की वो कमरो कठै है जिण मे म्हैं म्हारै चेलौ रै साथै फसह तैंवार रौ भोज कर सकूं?’

15वो थांनै एक सजी सजायोड़ी तैयार करयोड़ौ माळियो दिखा दैला, उठै अपणै वास्तै तैयारी करौ।”

16चेला निकळनै गांव मे आया अर जैड़ौ यीसु उणौ नै कयौ वैड़ौ ही पायो, अर उणौ फसह रौ खाणौ तैयार कियो।

17जद सिंझ्या होई, तद यीसु बारैह चेलौ रै साथै आयौ।

18अर जद वे बैठा खाणौ खा रिया हा, तो यीसु कयौ, “म्हैं थौरे ऊं हाची कैवूं, की थांरै मे ऊं एक, जिकौ म्हारै साथै खाणौ खा रियौ है, म्हारै साथै विसवासघात करनै म्हनै पकड़ावैला।”

19इण ऊं वे दुखी होयनै एक दूजै ऊं कैवण लागा, “पको वो म्हैं कोनीं हूं?”

20यीसु उणौ नै कयौ, “वो बारैह मे ऊं एक है, जिकौ म्हारै साथै एक ही थाळी मे खावै है।

21मिनख रौ बेटौ तो, जैड़ौ उणरै बारै मे पवितर सास्तर मे लिख्योड़ौ है, म्हनै तो मरणौ ही है, पण उण मिनख साथै घणौ बूरो होवैला, जिण ऊं मिनख रौ बेटा रै साथै विसवासघात करैला। उण मिनख रौ जनम ही नीं होवतो, तो उण वास्तै भलौ होवतो।”

22अर जद वे खा ही रिया हा तो वो रोटी ली, अर परमेसर नै धन्यवाद देने तोड़ी, अर उणौ नै दी, अर कयौ, “लौ, आ म्हारी देह है।”

23पछै वो कटोरो लेने धन्यवाद करयौ अर उणौ नै दियौ, अर वे हैंग उण मे ऊं पीयो।

24अर वो उणौ नै कयौ, “म्हारौ ओ लोई परमेसर रा नए वाचा री सरूआत है, जिकौ घणा रै पाप माफी वास्तै बहायौ जावै।

25म्हैं थौरे ऊं हाची कैवूं हूं, की अंगूर रौ रस उण दिन तांई कदैई कोनीं पीऊंला, जद तांई परमेसर रै राज मे नयो नीं पीऊं।”

26पछै वे भजन गाणें बारै जैतून रै भाखर माथै गिया।

27तो यीसु चेला नै कयौ, “थै हैंग आपरा विसवास ऊं डिग जावोला, क्यूंकै लिख्योड़ौ है, ‘म्हैं रुखाळा नै मारूंला, अर लरड़ियां बिखर जावैला।’

28“पण म्हैं आप जी उठनै रै पछै थौरे ऊं पैला गलील जाऊंला।”

29पतरस उण ऊं कयौ, “सायद सगळा आपरै विसवास ऊं डिग जावैला। म्हैं नीं डिगुला।”

30यीसु उण ऊं कयौ, “म्हैं थौरे ऊं साची कैवूं, की आज ही इणी रात रा कुंकड़े रै दो बार बांग दैणै ऊं पैला, थूं तीन बार म्हनै ओळखणै ऊं मना करैला।”

31पण पतरस और भी जोर देने कयौ, “जे म्हनै थारै साथै मरणौ भी पड़ै तौभी थांनै पिछांणै ऊं मना नीं करूंला।” अर इण तरैह सगळौ चेलौ भी कयौ।

32पछै वे गतसमने नाम री एक जगा आया, अर वो आपरै चेलौ नै कयौ, “अठै बैठा रैवौ, जद तांई म्हैं पराथना करूं।”

33अर वो पतरस अर याकूब अर यूहन्‍ना नै आपरै साथै लेन गियौ। वो घणौ दुखी अर व्याकुल होवण लागौ।

34अर यीसु चेला नै कयौ, “म्हारौ मन घणौ दुखी है, अठै तांई म्हैं मरण माथै हूं, थै अठै रुको, अर जागता रैवौ।”

35अर वो थोड़ोक आगै चालयौ, अर जमीन माथै पड़नै पराथना करन लागौ, की जे हो सकै तो ओ वगत म्हारै माथै ऊं टळ जावै।

36अर कयौ, “पिता, हे पिता, थारै ऊं हैंग हो सकै, इण दुख भरयोड़े कटोरा नै म्हारै खनै ऊं आगौ ले लौ, तौभी जैड़ौ में चावूं वो नीं, पण जिकौ थै चावौ वो हीज हो।”

37पछै यीसु आया अर उणौनै सोयोड़ा देखनै पतरस ऊं कयौ, “हे समौन, थूं सूतौ है? कांई थूं एक घड़ी भी कोनीं जाग सकै?

38जागता अर पराथना करता रैवौ की, थै परीकसा मे नीं पड़ो। आतमा तो तैयार है, पण सरीर कमजोर है।”

39अर वो पाछौ गियौ, अर वा हीज बात कैहन पराथना करी।

40अर पाछौ आयनै उणनै सुतो देखियौ। क्यूंकै उणरी आंख्यां ऊंग ऊं भारी ही, अर चेला नीं जांणता हा की उणनै कांई जबाब दे।

41पछै तीजी बार आने उणौनै कयौ, “अबै तांई सुता हो? बस। अबै वगत आईगो है, देखौ म्हैं, मिनख रौ बेटौ पापियो रै हाथ ऊं विसवासघात करनै पकड़ायौ जावैला।

42उठो, चालौ देखौ, म्हारै विसवासघात करनै वाळौ नैड़ौ आई गियौ है।”

43वो ओ कैह ही रियौ हो, की यहूदा जिकौ बारैह मे ऊं एक हो, आपरै साथै एक मोटी भीड़ तरवारो अर लाठियां लेन आई जिणौनै परधान याजकौ अर सास्तरियों अर बुढ़ियों भेज्या हा।

44अर उणरा पकड़नवाळा उणनै ओ पतौ दियौ हो की जिणनै म्हैं चूमूं वो ही है, उणनै पकड़ नै सावचेती ऊं ले जाईजौ।

45अर वो आयौ, अर हाथोहाथ उणरै खनै आयनै कयौ, “हे गुरु!” अर उणनै चूमन लागौ।

46तद वे यीसु नै तुरत पकड़नै कब्जे मे ले लियौ।

47उणौ मे ऊं जिकौ खनै ऊभा हा, एक तरवार खींचनै महायाजक रै सेवक माथै चलाई, अर उणरौ कांन उडा दियौ।

48यीसु उणौनै कयौ, “कांई थै डाकू जांणनै म्हनै पकड़ नै वास्तै तरवारो अर लाठिया लेन आया हो?

49म्हैं तो हरैक दिन मिंदर मे थौरे साथै रैयनै उपदेस दिया करूं हूं, अर तद थै म्हनै कोनीं पकड़यौ, पण ओ इण वास्तै होयौ है की पवितर सास्तर री बातां पूरी हो।”

50इण माथै सगळा चेला उणनै छोड़नै नाह गिया।

51अर एक जवान आपरै उघाड़े सरीर माथै चादर ओढ़नै यीसु रै लारै गियौ, अर लोग उणनै पकड़ना री कोसीस करी।

52पण वो चादर छोड़नै उघाड़ो नाह गियौ।

53पछै वे यीसु नै महायाजक रै खनै लेन गिया, अर हैंग परधान याजक अर बुढ़िया अर सास्तरी उठै भेळा होया हा।

54पतरस आगौ ई आगौ उणौरै लारै लारै महायाजक रै आंगणै तांई गियौ, अर नौकरो रै साथै बैठनै अग्‍नि तपाणै लागौ।

55सगळा परधान याजक अर सगळी यहूदी पंचायत यीसु रै मार दैणै रै वास्तै उणरै विरोध माई गवाई री खोज माई हा, पण नीं मिळी।

56क्यूंकै कीं लोग उणरै विरोध मांय झूठी गवाई देता हा, पण उणौरी गवाई एक जैड़ी कोनीं ही।

57तद किता उठनै उण माथै आ झूठी गवाई दी,

58“म्हौ उणनै ओ कैवतै सुण्यौ है की, ‘म्हैं इण हाथ रै बनयोड़ा मिंदर नै ढ़ाह दूंला, अर तीन दिनां माई दूजौ बणाऊंला, जिकौ हाथ ऊं कोनीं बनयोड़ो हो।’ ”

59इणमे भी उणौरी गवाई एक जैड़ी कोनीं निकळी।

60तद महायाजक बीच मांय ऊभौ होन यीसु ऊं पूछयौ, “थूं कोई जबाब कोनीं दैवै? ऐ लोग थारै बारै मांय कांई गवाई दे रिया है?”

61पण वो चुप रियौ। अर की जबाब नीं दियौ। महायाजक उण ऊं फेर कियो, “कांई थूं उण परम पिता परमेसर रौ बेटौ, मसीह है?”

62यीसु कयौ, “हां म्हैं हूं, अर थै मिनख रा बेटा नै सर्वसक्तिमान रै जीमणै ओर बैठौ, अर आभै रै बादळो माथै आवतौ देखोला।”

63तद महायाजक आपरा कपड़ा फाड़नै कयौ, “अबै म्हौरै गवाई री कठै जरुत है?

64थै आ परमेसर री निंदा सुणी, थौरी कांई राय है?” वे सगळौ कयौ, “ओ तो मौत रै काबिल है।”

65तद कोई तो उण माथै थूके, कीं उणरौ मूंडौ ढ़कनै उणरै मुक्‍का ठोके अर कईक मजाक उडानै कैवण लागा, “भविसयवांणी करन बता कुण ठोकियो।” अर नौकरो उणनै पकड़नै लेन गिया अर भळै ठोकयो।

66जद पतरस नीचे आंगणै मांय हो, तो महायाजक री दासियो मे ऊं एक उणरै खनै आई।

67अर पतरस नै तापतो देखनै उणनै ध्यांन ऊं देखियौ अर कैवण लागी, “थूं भी तो नासरत रा यीसु रै साथै हो।”

68पतरस नटगो, “म्हैं तो कोनीं जांणूं अर कोनीं समझूं की थूं कांई कैवै है।” पछै वो बारै दरवाजे खनै गियौ, अर कुंकड़े बांग दी।

69वा दासी पतरस नै देखनै जिकौ खनै ऊभा हा, पाछौ कैवण लागी, “उण मे ऊं ओ एक है।”

70पण वो भळै नटगो। थोड़ी देर पछै वे जिकौ खनै ऊभा हा फेर पतरस ऊं कयौ, “पको थूं तो उणौ मे ऊं एक है क्यूंकै थूं गलीली भी है।”

71तो वो सौगन खाने के म्हैं झूठ बोलूं तो म्हनै परमेसर देखेला अर कैवण लागौ, “म्हैं उण मिनख नै, जिणरी थै बात करौ, कोनीं जांणूं।”

72अर हाथोहाथ दूजी बार कुंकड़े बांग दी, पतरस नै आ बात जिकौ यीसु उण ऊं कही ही याद आई, “कुंकड़े रै दो बार बांग दैणै ऊं पैला थूं तीन बार म्हारौ इन्कार करैला।” वो इण बात नै सोचनै जोर जोर ऊं रोवण लागौ।