Romans 9

Marwari Bible

← Chapter 8 Jump to: Chapter 10 →

1म्हैं मसीह में साची कैवूं हूं, झूठ कोनीं बोलूं अर म्हारौ अंतो भी पवितर आतमा में गवाई दैवै है,

2की म्हनै घणौ सौग है, अर म्हारौ मन हमेसां दुखी रैवै है।

3म्हैं अपणै कुटम्बी भाइयो अर देस रै लोगां रै भलै रै लियै मसीह ऊं अलग हो जावण रै लियै तैयार हूं।

4वे इजरायली है, परमेसर उणौनै गोद लिया हा। उणौनै परमेसर री महिमा अर वाचाओ अर व्यवस्था अर उपासना अर वायदो मिळियौ है।

5इबरानी पूरवज भी उणौरा हा, अर मसीह उणौमे जनमिया हा। मसीह महान है, अर युगानयुग स्तुति रै लायक परमेसर है। आमीन।

6पण ओ कोनीं की परमेसर रौ वचन टळग्यो, इण वास्तै की जिकौ इजरायल रै वंस है, वे सगळा इजरायली कोनीं,

7अर नीं अबराहम रै वंस होणै रै कारण सगळी उणरी औळाद ठैरै, पण पवितर सास्तर में लिख्योड़ौ है, “इसहाक ऊं इज थारौ वंस केहलावेला।”

8मतलब सरीर री औळाद परमेसर री औळाद कोनीं, पण वायदे री औळाद वंस गिण्या जावै है।

9क्यूंकै वायदे रौ वचन ओ है, “म्हैं इण वगत रै अनुसार आऊंला, अर सारा रै एक बेटौ होवैला।”

10अर कैवल ओहीज कोनीं, पण जद रिबका भी म्हौरै पूरवज इसहाक ऊं जापायती ही।

11अर अजी तांई न तो टाबर जनमिया हा, अर नीं उणौ कीं भूंडौ भलौ कियो हो, इण वास्तै, की परमेसर री मनसा जिकौ उणरै चुण लेणे रै अनुसार है, करमो रै कारण कोनीं, पण बुलाणवाळै पे बणी रैवै।

12परमेसर रिबका ऊं कयौ, “मोटो बेटौ छोटे बेटे रौ दास होवैला।”

13ज्यौ पवितर सास्तर मे लिख्योड़ौ है, “म्हैं याकूब ऊं परैम कियो, पण एसाव नै नकार दियौ।”

14इण वास्तै म्हौ कांई कैवौ? कांई परमेसर रै एठै अन्याव है? कदैई कोनीं।

15क्यूंकै वो मूसा ऊं कैवै है, “म्हैं जिण किणी माथै दया करणी चावूं उण माथै दया करूंला, अर जिण किणी माथै करपा करणी चावूं उणीज माथै करपा करूंला।”

16इण वास्तै आ नीं तो चाहणवाळै री, नीं दौड़णवाळै री पण दया करणैवाळै परमेसर री बात है।

17क्यूंकै पवितर सास्तर मे परमेसर फिरौन ऊं कयौ, “म्हैं थनै इण वास्तै ऊभौ कियो है की थारै मे अपणी सामरथ दिखाऊं, अर म्हारै नाम रौ परचार सगळी धरती माथै होवै।”

18इण वास्तै वो जिण माथै चावै उण माथै दया करै है, अर जिणनै चावै है उणनै कठोर बणा दैवै है।

19तो पछै थूं सायद म्हारै ऊं कैवै, “जे म्हौरै करमो रौ काबू करणैवाळौ परमेसर है तो पछै भी वो उणमे म्हौरौ दोस क्यूं समझै है? आखरी उणरी इछा रौ विरोध कुण कर सकै है?”

20हे मिनख, भला थूं कुण है जिकौ परमेसर रौ सामनौ करै है? कांई कोई चीज बणायोड़ी अपणै बणाणै वाळै ऊं पूछ सकै है, “थां म्हनै ऐड़ी क्यूं बणाई?”

21कांई कुम्हार नै माटी माथै अधिकार कोनीं, की एक ही लौंदे में ऊं, एक बरतन आदर रै लियै, अर दूजौ बरतन बिना आदर रै लियै बणाए? तो इणमे अचूम्बे री बात कांई है?

22की परमेसर नै आपरौ क्रोध दिखाणै अर अपणी सामरथ परगट करणै री इछा ऊं क्रोध रै बरतनो री, जिकौ विनास रै लियै तैयार किया हा, घणी धीरज ऊं सही,

23जिण ऊं जिकौ दया रै बरतनो ऊपर जिणौनै उणै महिमा रै लियै पैला ऊं तैयार किया, अपणै महिमा रै धन नै परगट कर सकै।

24मतलब म्हौ माथै जिणै उणै नीं कैवल यहूदियो में ऊं बल्कि दूजी जातियो में ऊं भी बुलाया।

25ज्यौ भविसयदाता होसे री किताब में भी कैवै है, “जिकौ लोग म्हारा कोनीं हा, उणौनै म्हैं अपणा कहूंंला। अर जिकौ धरती प्रिय कोनीं ही, म्हैं उणनै प्रिय कहूंंला।”

26अर, “ऐड़ौ होवैला की जिण जगा मे उण ऊं ओ कयौ हो, की ‘थै लोग म्हारी परजा कोनीं हो,’ उणीज जगा वे जीवते परमेसर री संतान कहीजैला।”

27अर भविसयदाता यसायाह इजरायल रै बारै में हेलौ करनै कैवै है, “भलै ही इजरायल री औळाद री गिणती समंदर री धूड़ रै कणों रै बराबर हो, तौभी उणमे ऊं थोड़ा इज बचेला।

28क्यूंकै परभु धरती माथै आपरै न्याव नै पूरी तरैह ऊं अर वेगौ ही पूरौ करैला।”

29ज्यौ यसायाह पैला भी कयौ हो, “जे सेनाओ रौ परभु म्हारै लियै कीं वंस नीं छोड़तो, तो म्हौ सदोम रै ज्यूं अर अमोरा रै ज्यूं नास ही हो जाता।”

30तो पछै म्हौ कांई कैवौ? म्हौ इण नतीजे माथै पूगा हो की दूजी जातियो रा लोग जिकौ धारमिकता री खोज में नीं हा, उणौ धारमिकता हासल की है। वे जिकौ विसवास रै कारण इज धारमिक ठैराया गिया।

31पण इजरायली, जिकौ धरम री व्यवस्था री खोज करता हा उण व्यवस्था तांई कोनीं पूगा।

32कीण वास्तै? इण वास्तै की वे इणरौ पालण विसवास ऊं कोनीं, बल्कि अपणै करमो ऊं कर रिया हा, वे उण चटान ऊं ठोकर खा ग्या, जिकौ ठोकर दिलावै है।

33ज्यौ पवितर सास्तर में लिख्योड़ौ है, “देखौ, म्हैं सियोन में एक भाटो राख रियौ हूं, जिकौ ठोकर दिलावै है, अर एक चटान जिकौ पाप करावै है। बल्कि वो जिकौ उणमे विसवास करै है, उणनै कदैई निरास नीं होणौ पड़ैला।”

← Chapter 8 Jump to: Chapter 10 →