Matthew 4

Mazanderani GMB (گیله ماز)

← Chapter 3 Jump to: Chapter 5 →

1ایما روح القُدُس، عیسی رِه صَحرایِ دِلِه بَبِرده تا اِبلیس اونه وَسوَسِه هَکونه.

2عیسی چهل شُو وچِهل روز، روزِه بِیته و سَرآخَر وَشنا هَبا.

3اونوَخت وَسوَسِه گَر اونِه نَزدیک هَبا و باَگوته: «اَگِه تو خُدای ریکائی، این سَنگِشان رِه باگو نان هَبون.»

4عیسی اونه جَواب باگوته: «توراتِ دِلِه بَنویشتِه هَبا: «”اِنسان فَقَط نان هَمرَه زندهِ نیِه، بلکه هر کلامی که خُدایِ دَهنِ جی دِرگا هَنه.“»

5ایما اِبلیس اونه مُقَدَّسِ شَهرِ دِلِه بَبِرده و یَهودیانِ گَتِه مَعبَدِ تُکالِه سَر بَنَه

6و اونه باَگوته: «اَگه تو خُدایِ ریکا هیسی، تِرِه ایجه یه جی جیر تُوواد، چون مَزمورِ کِتابِ دِلِه بَنویشتِه هَبا: «”خُدا خودشه فِرشتِگانِ دَستور دَنه و اوشان، تِره خودِشانِه دَسِّ سَر گیرنَن، نَکُنِه تی لِنگِ، سَنگی رِه بَزِنی.“»

7عیسی جَواب هَدَه: «این هَم توراتِ دِلِه بَنوِیشتِه هَبا که: «”خداوند تیِ خُدا رِه آزمون نَکُن.“»

8یِدَفِه دیگه، اِبلیس اونه گَتِه کوهِ سَر بَبِرده وتمام دنیایِ مَملکَت رِه تمام اوشانه شکوه وجلال هَمرَه اونه نشان هَدَه

9و عیسی رِه باَگوته: «اگه می جلو زانو بَزِنی و مَرِه پَرَسِّش هَکُنی، تمام ایشان رِه تِرِه دَنَم.»

10عیسی اونه باَگوته: «رَت هَباش اِی شیطان! چونکه توراتِ دِلِه بَنویشتِه هَبا: «”خداوند، تیِ خُدا رِه پَرَسِش هَکُن و فَقَط اونه عبادَت هَکُن.“»

11ایما اِبلیس عیسی رِه وِل هَکُردِه و فِرشتِگان بومَن و اونه خِدمَت هَکُردَن.

12وَختی عیسی بِشنَوِسِّه یحیی دَسگیر هَبا، به جَلیلِ منطقه وَگَرِسِّه.

13ایما ناصِره یه شَهرِ تَرک هَکوردِه، به كَفَرناحوم بَشَه و اوجِه بُمانِسِّه. کَفَرناحوم جَلیلِ دَریایِ ور و زِبولون و نَفتالی یه مَناطِقِ دِلِه دَبا.

14این كارِ هَمرَه اِشعَیایِ پِیغَمبر گَب به اَنجام بَرِسییَه که بَگوته با:

15«زِبولون مِلک ونَفتالی یه مِلک، که دَریایِ راهِ سَر و اُردُنِ اُجار دَرین، جَلیلِ مِلَتها،

16قومی که ظُلَماتِ دِلِه دَبان، ایتا گَتِه نوربَدییَن، و اوشانی که مِلک و مَرگ سایه دِلِه دَبان، اوشانه رَه روشِنایی بِتابِسِّه.»

17عیسی اَزون روز شُروع هَکُردِه به تعلیم هَدَن و گونه با: «توبِه هَکُنید، چون آسِمان پادشاهی که خُدا اونه حاکِمِ نَزّیکِه!»

18وَختی عیسی جَلیلِ دَریا کنار قَدَم زنه با، بَدیَه دُتا اَداش یعنی شَمعونِ مُلَقَّب به پِطرُس و اونه اَداش آندریاس، دَریایِ دِلِه سالی تُووادِنَن، چون اوشان ماهیگیربان.

19عیسی اوشانه باَگوته: «می دُمّالسَر بیئِین تا شِمِره مَردُمانِ صیّاد هَکُنم.»

20اون دُتا اَداش درجا خودِشانِ سالی شان رِه وِل هَکوردَن و اونه دُمّالسَر بَشَن.

21وقتی خودِشِه راه رِه ادامِه هَدَه، دُتا اَداش یَعنی یعقوب، زِبِدی یه ریکا و اونه اَداش یوحنا رِه بَدییَه که خودِشانِه پیَر، زِبِدی یه هَمرَه لوتکایِ دِلِه نیشته بان ودَبان خودِشانِ سالی شان ره حاضر کانه بان. عیسی اوشان رِه هَم باَگوته می دُمّالسَر بیئَین،

22اوشان دَرجا لوتکا و خودِشانِه پیَرِ وِل هَکُردنِ و اونه دُمّالسَر بَشَن.

23عیسی تمام جَلیلِ دِلِه گَردِنه با و یَهودیِانِ عِبادَتگاهِ دِلِه تعلیم دَنهِ با و خُدایِ پادشاهی رِه اِعلام کانِبا و مَردُمانِ مَرَض و ناخُشی رِه شَفا دَنهِ با.

24عیسی یه شُهرَت تمام سوریه دِلِه دَپیتِه و مردم تمام اوشانی که هَر نوع دَرد و مَرَضِ دُچار بان و اوشانیکه آلبَزه بان و پَرکَنِش داشتِن وچُلاقِشان رِه اونه وَر هارنِه بان و اون، اوشانه شَفا دَنه با.

25ایتا گَتِه اِزدحام جلیل شهر و دِكاپولیسِ مَنطَقِه یه جی، اورشلیمِ شَهر و یَهودیِه یه مَنطَقِه یه جی و اُردُنِ روخانه یه اُجارِ جی عیسی یه دُمّالسَر رادَکِتَن.

← Chapter 3 Jump to: Chapter 5 →