Mark 9 — Mazanderani EMB (کتاب مقدس به زبان مازندرانی - گویش شرقی)

1عیسی اَی هم جَمیَّت و شه شاگِردونِ بااوته: «حَییقَتاً، شِما ره گامبه، بعضیا اینجه اِیست هاکاردِنه که تا نَوینِن خِدائه پادشاهی، قِوَّتِ هِمراه بییَمو، نَمیرنِنه.»

2شیش روز دییه، عیسی، پِطرُس و یَعقوب و یوحنا ره بَییته و وِشونِ شه هِمراه یِتا بِلَندِ کوهِ سَر بَوِرده تا تینا دَووِن. اونجه، وِشونِ چِشِ پَلی، وه دیمِ بَردَگِردِسه.

3وه جِمه برق زوئه و خَله اِسبه بَییه، جوری که دِنیائه دِله هیچ کی نَتونده یِتا جِمه ره این طی اِسبه هاکانه.

4اونجه، اِیلیا و موسیِ پِیغمبِر وِشونِ چِشِ پَلی ظاهر بَینه و عیسیِ هِمراه دَینه گَب زونه.

5پِطرُس عیسی ره بااوته: «اِسّا، چَنده خوارِ اِما اینجه دَرِمبی. بییِل سه تا سایبون بَسازیم، یِتا تِ وِسه، یِتا موسی و یِتا هم اِیلیائه وِسه.»

6پِطرُس نَدونِسه چی باره، چوون وِشون خَله بَتِرسی بینه.

7بعد یِتا اَبر وِشونِ سَرِ وَر سایه دِم هِدا و یِتا صِدا اَبرِ جِم بییَمو که، «این مِ عزیزِ ریکائه، وه گَبِ گوش هادین.»

8یهویی وَختی شه دورِ وَرِ هارِشینه، به جِز عیسی کَس دییه ره شه پَلی نَدینه.

9وَختی کوهِ جِم جِر اییَمونه، عیسی وِشونِ دَستور هِدا اونچیِ که بَدینه ره هیچ کَسِ وِسه نارِن تا وَختی که اِنسانِ ریکا، مِرده هائه جِم زنده بَووه.

10وِشون این جَریانِ شه پَلی داشتِنه، ولی هَمدییهِ جِم پِرسینه: «مِرده هائه جِم زنده بَیِّن» یعنی چی.

11وِشون عیسی جِم بَپِرسینه: «چه توراتِ مَلِّمون گانِنه اَوِّل وِنه اِیلیائه پِیغَمبِر بِیّه؟»

12عیسی بااوته: «البته که اَوِّل اِیلیا اِنه تا همه چی ره اَوِّلِ واری دِرِس هاکانه. ولی چه مِقدَّسِ بَنوِشته هائه دِله بَنوِشته بَییه انسان ریکا وِنه خَله زَجر بَکِشه و وه هِمراه بَد رِفتاری هاکانِن؟

13ولی مِن شِما ره گامبه که اِیلیا، بییَموئه و وِشون هر چی خواسِنه وه هِمراه هاکاردِنه، دِرِس هَمون طی که وه خَوِری بَنوِشته بَییه.»

14وَختی وِشون بَقیه شاگِردونِ پَلی بَرِسینه، بَدینه یَته خَله جَمیِّتِ وِشونِ دور اِیست هاکاردِنه و توراتِ مَلِّمون هم وِشونِ هِمراه بَحث کاندنه.

15جَمیِّت تا عیسی ره بَدینه، همه تَعَجِّب هاکاردِنه و دووِ هِمراه عیسی پَلی بییَمونه و وه ره سِلام هاکاردِنه.

16عیسی وِشونِ جِم بَپِرسیه: «هَمدییهِ هِمراه چی بَحث کاندینی؟»

17یِتا مَردی جَمیِّتِ دِله جِواب هِدا: «اِسّا، مِن شه ریکا ره تِ پَلی بیاردِمه. چوون وه یِتا پلیدِ روحِ گرفتارِ که اون روح وه ره لال کانده.

18روح وَختی وه ره گِرنه، وه ره بِنه زَنده، جوری که وه دِهون کَف کانده، وه دَندونا قفل و وه تَن خِشک بونه. تِ شاگردونِ جِم بَخواسِمه اون روحِ مِ ریکائه جِم بیرون هاکانِن، ولی نَتونِسِنه.»

19عیسی وِشونِ جِواب بااوته: «ای بی ایمونِ نَسل، تا کی وِنه شِمه هِمراه دَووم؟ تا کی وِنه شِما ره تِحَمُّل هاکانِم؟ وه ره مِ پَلی بیارین.»

20وِشون ریکا ره عیسی پَلی بیاردِنه. اون روح وَختی عیسی ره بَدیئه، دَرجا ریکا ره غشگری دِم هِدا، ریکا بنه سَر دَکِته و هَمون طی که وه دِهون کَف کارده، خاکِ سَر غلت خارده.

21عیسی ریکائه پییِرِ جِم بَپِرسیه: «چَن وَختِ این طیِ؟» جِواب هِدا: «از وَچِگی.

22این روح چَن کَش وه ره تَش و اوهِ دِله دِم هِدا تا وه ره نابود هاکانه. اگه توندی اِما ره رَحم هاکان و کُمِک هاکان.»

23عیسی بااوته: «اگه توندی؟ اونی وِسه که ایمون دارنه همه چی ممکنه.»

24اون ریکائه پییِر دَرجا بِلِندِ صِدائه هِمراه بااوته: «ایمون دارمه؛ مِ ره کُمِک هاکان تا شه بی ایمونیِ حریف بَووِم!»

25وَختی عیسی بَدیئه یِتا جَمیَّت دووِ هِمراه اونجه اِنِنه، اون پَلیدِ روحِ تَشِر بَزُو، بااوته: «ای لال و غولِ روح، تِ ره دَستور دِمبه وه جِم بیرون بِئی و دییه هیچ وَخت وه دِله نَشویی!»

26روح نَعره بَکِشیه و ریکا ره بَدجور تکون هِدا و وه جِم بیرون بییَمو. ریکا مِیّتِ واری بَییه، جوری که خَله از جَمیَّت بااوتِنه: «بَمِرده.»

27ولی عیسی ریکائه دَسِ بَییته، وه ره بِلِند هاکارده و ریکا شه لینگِ سَر اِیست هاکارده.

28وَختی عیسی سِره بُورده، وه شاگِردون خَلوتِ دِله وه جِم بَپِرسینه: «چه اِما نَتونِسیمی اون پلیدِ روحِ بیرون هاکانیم؟»

29عیسی وِشونِ بااوته: «این طی روح، به جِز دِعا هیچیِ هِمراه بیرون نَشونه.»

30وِشون اونجه جِم بوردِنه و جَلیلِ مَنطقه جِم بُگذِشتِنه. عیسی نِخواسه هیچ کَس بَدونه وه کِجه دَره،

31چوون شه شاگِردونِ تَعلیم دائه و وِشونِ گاته: «اِنسانِ ریکا مَردِمِ دَس تَسلیم بونه و وِشون وه ره کُشِنِنه. ولی سه روز بَعد از بَمِردِن، زنده بونه.»

32شاگِردون وه منظورِ نِفَهمِسِنه و تَرسینه وه جِم سِئال هاکانِن.

33بعد وِشون کَفَرناحومِ شَهر بَرِسینه. وَختی سِره دِله دَینه، عیسی، شاگردونِ جِم بَپِرسیه: «راه دِله چی بحث کاردینی؟»

34ولی وِشون هیچی نااوتِنه، چوون راهِ دِله هَمدییهِ هِمراه اینِ بَحثِ کاردِنه که کی همهِ جِم گَت تِرِ.

35عیسی هِنیشته و اون دِوازَه شاگردِ شه پَلی صدا هاکارده و بااوته: «هر‌ کی خوانه اَوِّلین بوئه، وِنه آخِرین بوئه و همهِ نوکِر بوئه.»

36بعد عیسی یِتا وَچه ره بَییته، وِشونِ میون بییِشته و وَچه ره کَشه بَییته و وِشونِ بااوته:

37«هر‌ کی این طی وچه ای ره مِ اسمِ خاطِری قبول هاکانه، مِ ره قبول هاکارده؛ و هر کی مِ ره قبول هاکانه، نا مِ ره، بلکه اونی که مِ ره بَفرِسیه ره قبول هاکارده.»

38یوحنا عیسی ره بااوته: «اِسّا، یه نَفِرِ بَدیمی که تِ اسمِ هِمراه دِو بیرون کارده، ولی چوون اَمه جِم نَییه، وه دَمِ بَییتیمی.»

39ولی عیسی بااوته: «وه دَمِ نَیرین، چوون هیچ کی نَتونده مِ اسمِ هِمراه معجِزه هاکانه و اَت کم دییه، مِ بَدی ره باره.

40چوون هر کی اَمه ضِد نَبوئه، اَمه جِم هَسه.

41حَییقَتاً، شِما ره گامبه، هر کی اینِ وِسه که شِما مَسیحِ وِسه هَسینی حتَّی یِتا پیاله اوه شِما ره هاده، به هیچ وجه شه اَجر از دَس نَدِنه.

42«هر کی باعثِ بَووه یِتا از این کِچیکون که مِ ره ایمون دارنِنه، گِناه دَکِفه، وه وِسه بِهتَر بییه یِتا گَتِ آسیوِ سَنگ وه گَردِن وَسِّنه و وه ره دریائه دِله دِم دانه!

43اگه تِ دَس تِ ره گِناه کَشِنه، اونِ بَورین. تِ وِسه بِهتَرِ که یِتا دَسِ هِمراه، اَبِدی زندگیِ دِله بُوری تا این که دِتا دَسِ هِمراه جَهَنِمِ دِله بوری، اون تَشی که هیچ وَخت دَکوشته نَوونه.

44جایی که وِشونِ اَجیک نَمیرنه و تَش هیچ وَخت دَکوشته نَوونه.

45اگه تِ لینگ تِ ره به گِناه کَشِنه، اونِ بَورین. تِ وِسه بِهتَرِ که یِتا لینگِ هِمراه اَبِدی زندگی دِله بُوری، تا این که دِتا لینگِ هِمراه جَهَنِمِ دِله دِم هِدا بَووی.

46[جایی که وِشونِ اَجیک نَمیرنه و تَش هیچ وَخت دَکوشته نَوونه.

47اگه تِ چش تِ ره گِناه کَشِنه، اونِ دَر بیار، تِ وِسه بِهتَرِ که یِتا چشِ هِمراه خِدائه پادشاهیِ دِله بُوری، تا این که هر دِتا چشِ هِمراه جَهَنِمِ دِله دِم هِدا بَووی،

48”جایی که وِشونِ اَجیک نَمیرنه و تَش هیچ وَخت دَکوشته نَوونه.“

49چوون همه، تَشِ هِمراه نِمِک هاشی بونِنه.

50نِمِک خوارِ، ولی اگه نِمِک شه شوری ره از دَس هاده، چه طی بونه اَی اونِ شور هاکارد؟ شِما هم شه دِله نِمِک دارین و هَمدییه هِمراه صِلح و صِفائه دِله زندگی هاکانین.