1 Chronicles 22

Nuer Bible © Bible Society in South Sudan 1998,2012

← Chapter 21 Jump to: Chapter 23 →

1Kä cu Dee-bid wee “Ɛn wa̱nɛ mi ba luak Kuɔth Nhial, kä nɛmɛ ɛ yi̱k wäŋä mucni ji̱ I-thɛ-rɛl.”

2Kä cu Dee-bid jur tin cieŋ muun I-thɛ-rɛl jak kä matkɛ rɔ̱ guäth kɛl, kä cuɛ kuëëc päämni kuany rɛydiɛn, kɛ ɣöö ba pääm ti ba täth ni luak Kuɔth wä kuac.

3Kä cuɛ ladiit mi di̱i̱t jak kä te wa̱nɔ mi ba täth thöt kɛ kui̱ thiekni, kɛ ciɛk in yian mi ca luäŋ kɛ thëm.

4Kɛ jiɛn ti thil pek, kɛ ɣöö ci ji̱ Dhi-don kɛnɛ ji̱ Dhor jiɛn ti gɔw ti ŋuan nöŋ Dee-bid.

5Kä cu Dee-bid wee “Gatdä ni Thɔ-lo-mon ŋotdɛ kɛ kuɛ̈ɛ̈ kä thilɛ mi cɛ ni ŋa̱c, kä luak in ba lät kä Kuoth Nhial bi jɔɔc ni kɛ̈kdɛ, kä ba liak ni gɔɔydɛ wi̱i̱ muɔ̱ɔ̱n kɛɛliw. Kɛ kui̱c ɛmɔ, ɣän bä ta̱thdɛ rialikä.” Inɔ cu Dee-bid nyinkɛ jak kä te thi̱n a ŋuan a /kenɛ ni li̱w.

6Kä cu Dee-bid gatdɛ ni Thɔ-lo-mon cɔl, kä cuɛ jɛ ka̱m ɣöö bɛ Kuoth I-thɛ-rɛl ta̱th luak.

7Kä cuɛ Thɔ-lo-mon jiök i̱, “Ɣän gatdä tëë lɔɔcdä ɛn ɣöö dëë Kuoth Nhial min la Kuothdä lät kä luak.

8Duundɛ ɣöö cu ruac Kuɔth Nhial ben kä ɣä i̱, ‘/Ci ɣä bi lät kä luak, kɛ ɣöö ci ko̱o̱ri ti di̱t tɛ̈r, kä ci rim ti ŋuan wuɔ̱th piny nhiamdä ɛn muun ɛmɛ.

9Kä nɛnɛ, bi tekɛ gat, kä ba gua̱n malä. Kä ɣän bä jɛ moc mal kɛ ji̱ tɛ̈rɛ diaal. Kä ba jɛ cɔli Thɔ-lo-mon, kä bä I-thɛ-rɛl ka̱m mal ni̱ni kuäärädɛ.

10Kä bɛ ɣä ta̱th luak. Kä ba gatdä, kä bi ɣän a gua̱n, kä ɣän bä kuäärɛ jak kä te kä I-thɛ-rɛl amäni cäŋ kɛl.’

11“Kä täämɛ gatdä, bi Kuoth Nhial te kɛɛl kɛ ji̱, kä dɔ̱ŋ bi luak Kuɔth Nhial min la Kuothdu luäŋ kɛ ta̱th ce̱tnikɛ mëë cɛ lat kɛ kui̱du.

12Kä ɛ Kuoth Nhial moc ji̱ kɛ ca̱r mi gɔaa kɛnɛ ŋäc, kɛ ɣöö mi wëë ji̱ jak kä kuäär kä I-thɛ-rɛl, bi ŋuɔ̱t Kuɔth Nhial min la Kuothdu tit.

13Kä bi nyinku gɔw, mi wi̱i̱ ŋuɔ̱t tëë cɛ la̱t Muthɛ kɛ kui̱ I-thɛ-rɛl tit agɔaa. Bumni, kä com rɔ cu dual kä cu rɔ luär.

14Kɛ kui̱ luak Kuɔth Nhial ca da̱a̱p mi tekɛ ki̱luni ti bathdɔɔri ti kuɔ̱r kɛl, kɛnɛ ciɛk in bo̱r mi tekɛ ki̱luni ti bathdɔɔri ti bathdɔɔr kɛl, kɛ ciɛk in yian kɛ ladiitni ti ca luäŋ kɛ thëm jak kä te thi̱n rɛy cucädä. Kä ca jiɛn kɛ pääm jak kä te thi̱n. Kɛn ti̱ti̱ bikɛ rep.

15Kä ji̱n ti̱i̱ kɛ la̱a̱t ti ŋuan, ti ŋa̱ckɛ la̱t ɛlɔ̱ŋ. Tëë kɛ kuëëc päämni, kɛ ta̱a̱th duëli, kɛ ŋa̱a̱t jiɛn.

16Kɛ ta̱a̱th dääpä kɛnɛ ciɛk in bo̱r, kɛ ciɛk in yian, kɛ ladiit. Tok la̱t ɛn täämɛ! Kä bi Kuoth Nhial te kɛɛl kɛ ji̱!”

17Kä cu Dee-bid ruac kɛ bööth I-thɛ-rɛl diaal kɛ ɣöö ba gatdɛ ni Thɔ-lo-mon luäk, wee i̱,

18“A /ci Kuoth Nhial min la Kuothdun te kɛɛl kɛ yɛ? Kä /kenɛ yɛ ka̱m mal kui̱ni diaal? Kä cɛ ɣä ka̱m kɛn ji̱ wi̱i̱ni ti̱ti̱. Kä ba mun cu ruac ɛ Kuoth Nhial kɛnɛ nɛɛkɛ.

19Kä täämɛ käm ni lɔcdu kɛnɛ ca̱ru Kuoth Nhial min la Kuothdu. Kä tok ta̱th luak Kuɔth Nhial, kɛ ɣöö ba thanduk matdä ruac Kuɔth Nhial, kɛnɛ kuak Kuɔth tin rɛ̈l kɛ rɔ nööŋ rɛy luaak ɛ ba ta̱th Kuoth Nhial ɔ.”

← Chapter 21 Jump to: Chapter 23 →