1 Chronicles 5

Nuer Bible © Bible Society in South Sudan 1998,2012

← Chapter 4 Jump to: Chapter 6 →

1Kä cu ti̱ti̱ a gaat Rɛ-u-ben kɛ̱̈ɛ̱̈ Je-kɔb (ɛ jɛn kɛ̱̈ɛ̱̈, kuɛ la ɣöö mëë cɛ ciek gua̱n ka̱n, cua cuɔ̱ŋ kä ɣöö ɛ kɛ̱̈ɛ̱̈ ka̱m gaat Jo-thɛp gat Je-kɔb. Cuɛ cuɔ̱ŋ kä ɣöö ɛ kɛ̱̈ɛ̱̈ cu bath.

2Kä cu buɔ̱m ni Juda kä gaatman, kä cu ruëëc ben kä jɛ, kä cu cuŋ ke̱e̱kä a nyin Jo-thɛp,)

3kä cu Rɛ-u-ben kɛ̱̈ɛ̱̈ Je-kɔb tekɛ gaat ŋuaan. Ä-nok kɛnɛ Palu kɛ Ɣɛdh-ron kɛnɛ Kar-mi.

4Kä cu gaat Yo-el a Cɛ-mɛ̈-yaa kɛnɛ Gog kɛ Cimi,

5kɛ Mikaa kɛnɛ Rɛ-a-yaa kɛ Baal,

6kɛ Beera mëë cua pɛc ɛ kuäär A-thi-ri-ya ni Tig-lath-pi-lɛ-thɛr. Kä ɛ jɛn ɛ nëë la bo̱o̱th ji̱ Rɛ-u-ben ɔ.

7Kä cua ji̱ maarädiɛn gɔ̱r nikɛ bööth thuk duëlikiɛn. Cua bööth ni Yi-el kɛnɛ Dhɛ-kar-yaa,

8kɛ Bɛlä gat A-dhadh gat Cɛmä gat Yo-el mëë cieŋ kä Ä-ro-er a räth nikä Nɛbo kɛnɛ Baal-me-on.

9Kä cieŋɛ bä kui̱c käny ca̱ŋ a räth ni dup in wä därdɔaar kui̱c ɔ jac ni kir Yu-pɛ-ree-tidh, kɛ ɣöö ci ɣɔ̱ɔ̱kiɛn ŋuan kä Gil-yad.

10Kɛ ni̱n ruec Thɔɔl, cukɛ nyiëëny kɛ ji̱ Ɣɛ̈g-ri, kä cukɛ kɛ joc. Kä cukɛ wi̱i̱kiɛn ciɛŋ kui̱c käny ca̱ŋ kä Gil-yad.

11Cu gaat Gad cieŋ kui̱c caam gan Rɛ-u-ben kä Ba-can a räth nikä Thal-ka.

12Cu Yo-el a bo̱o̱th kä cu rɛwdɛ a Ca-pam, kɛ Yɛ̈-nay kɛnɛ Ca-pat rɛɛk kä Ba-can.

13Kä cu ji̱ maarädiɛn kɛ dho̱r gua̱ni a. Mi-ka-el kɛnɛ Mɛ-cu-lam kɛ Cɛba kɛnɛ Yo-ray kɛ Yɛ̈-kan kɛnɛ Dhiya kɛ E-bɛr.

14Kä cu ti̱ti̱ a gaat Ä-bi-ɣa-yil gat Ɣuri gat Ya-ro-ɛ̈k gat Gil-yad gat Mi-ka-el gat Yɛ-ci-cay gat Yɛ̈k-do gat Buudh,

15kɛ Ä-ɣi gat Ɛ̈b-di-el gat Guni, ɛ bo̱o̱th thuɔk duëël gua̱n.

16Kä cua ciɛŋ ni Gil-yad kɛnɛ rɛy ciëŋ Ba-can kɛ wi̱i̱kɛ, kɛ toc Ca-ron kɛɛliw.

17Kɛn ti̱ti̱ diaal gɔ̱a̱rkɛ kɛ, ni̱n ruec Yo-tham kuäär Juda kɛnɛ Ya-rɔ-baam kuäär I-thɛ-rɛl.

18Thok duëël Rɛ-u-ben kɛnɛ thok duëël Gad kɛ tha̱a̱ŋ thuɔk duëël Ma-na-thɛ tekɛ rɛm ti bathdɔɔri ti jiɛɛn ŋuaan wi̱cdɛ ŋuaan wi̱cdɛ kur bärɔw wi̱cdɛ jiɛɛn bäkɛl, ti ca ŋi̱eec agɔaa kɛ köötni kɛnɛ mutni kɛ kuen kue̱e̱ni.

19Cukɛ nyiëëny kɛ ji̱ Ɣɛ̈g-ri kɛnɛ ji̱ Yɛ-tur kɛ ji̱ Na-pic kɛnɛ ji̱ No-dab.

20Kä cukɛ luäk jek kä Kuoth, kɛ ɣöö cikɛ jɛ pal rɛy köör, kä cu Kuoth Ɣɛ̈g-ri kɛnɛ nɛy diaal tin te kɛɛl kɛ jɛ la̱th tetnikiɛn, kɛ ɣöö ca ŋäth ni Kuoth.

21Cukɛ thɔ̱a̱rɔa̱a̱li ti bathdɔɔri ti jiɛɛn dhieec, kɛ det ti bathdɔɔri ti kur rɛw wi̱cdɛ jiɛɛn dhieec, kɛ muɔ̱li ti bathdɔɔri rɛw, kɛ nɛy ti bathdɔɔri ti kuɔ̱r kɛl pɛc kä Ɣɛ̈g-ri.

22Kä cukɛ kur ti ŋuan näk, kɛ ɣöö ɛ ko̱r Kuɔth. Kä cukɛ cieŋ wi̱i̱diɛn amäni mëë ca naath pɛc.

23Kä cu tha̱a̱ŋ gan Ma-na-thɛ ti ŋuan cieŋ kä rɛɛk Ba-can a räth nikä Baal-ɣɛr-mon kɛ Thi-nir kɛnɛ Pääm Ɛr-mon.

24Kä cu ti̱ti̱ a bööth dho̱ri gua̱ni. E-pɛr kɛ Yici kɛnɛ Ɛ-li-el kɛ Ɛ̈dh-ri-el kɛnɛ Yir-mɛ-yaa kɛ Ɣo-dɛ̈w-yaa kɛnɛ Ya-di-el, kä kɛn bäkɛ ji̱ ko̱o̱r ti buɔ̱m buɔ̱ɔ̱m.

25Duundɛ ɣöö /kenkɛ Kuoth gua̱ni ŋäth, cukɛ wä pal ni kuth nɛɛni tëë ci Kuoth kɛ joc nhiamdiɛn.

26Inɔ cu Kuoth kuäär A-thi-ri-ya ni Pul min la Tig-lath-pi-lɛ-thɛr jak kä kääpɛ wec. Kä cuɛ thok duëël Rɛ-u-ben kɛnɛ thok duëël Gad kɛ tha̱a̱ŋ thuɔk duëël Ma-na-thɛ pɛ̈c rɛɛk kä Ɣɛlɛ̈ kɛnɛ Ɣa-bor kɛ Ɣara kɛnɛ yier Go-dhan amäni walɛ.

← Chapter 4 Jump to: Chapter 6 →