1 Chronicles 28

Nuer Bible © Bible Society in South Sudan 1998,2012

← Chapter 27 Jump to: Chapter 29 →

1Ɛ jɛn cu Dee-bid bööth ji̱ I-thɛ-rɛl diaal cɔal kä Jɛ-ru-tha-lɛm. Bööth thuk duëli kɛ bööth bua̱ni tin la̱tkɛ kuäär ikä, kɛ bööth bathdɔɔri kɛnɛ bööth kuri kɛ bööth ti̱eet kuakni kɛ ɣɔ̱k kua̱r kɛnɛ gaatkɛ, kɛ bööth la̱a̱tni duëël kuäärä, kɛ nɛy tin buɔ̱m buɔ̱ɔ̱m diaal tin la wäth ko̱o̱r.

2Kä cu kuäär ni Dee-bid rɔ jiɛc, kä cuɛ wee “Liɛŋɛ ɣä, lö gaatmaar kä nɛɛkä. Ɣän tëë lɔɔcdä ɛn ɣöö dëë duel la̱t kɛ kui̱ thandukä matdä ruac Kuɔth Nhial, kɛ kɔm ciökni Kuɔthdan. Kä ca rɔ rialikä kɛ ɣöö bä la̱t.

3Duundɛ ɣöö ci Kuoth ɣä jiök i̱, ‘/Ci ɣä bi lät kä luak, kɛ ɣöö ɛ ji̱n gua̱n ko̱o̱r mi ci naath näk.’

4“Kä ŋotdɛ ci Kuoth Nhial min la Kuoth I-thɛ-rɛl ɣä kuany dhɔr gua̱a̱r kɛɛliw ala kuäär I-thɛ-rɛl mäni cäŋ kɛl. Kä cɛ Juda mɛk ala bo̱o̱th, kä thok duëël Juda cua dhɔr gua̱a̱r, kä rɛy ganmaar, cuɛ lɔcdɛ nhɔk ɛn ɣöö bɛ ɣä kuany ala kuäär I-thɛ-rɛl kɛɛliw.

5Kä rɛy gankä diaal (kɛ ɣöö ci Kuoth Nhial ɣä moc gaat ti ŋuan) cuɛ kuany ni gatdä ni Thɔ-lo-mon kɛ ɣöö bɛ nyuur wi̱i̱ kɔam Kuäärä Kuɔth Nhial kä I-thɛ-rɛl kɛɛliw.

6Kä cu Kuoth Nhial ɣä jiök i̱, ‘Ɛ gatdu ni Thɔ-lo-mon bi ɣä ta̱th luak ɔ, kɛ ɣöö ca mɛk ala gatdä, kä bi ɣän a gua̱n.

7Kä bä kuäärɛ jak kä te thi̱n amäni cäŋ kɛl, mi wee ŋuɔ̱tkä wä tit ce̱tkɛ mi tiitdi kɛ mi walɛ.’

8Kɛ kui̱c ɛmɛ täämɛ, ɣän bä la̱r yɛ nhiam Kuɔth, kɛnɛ ji̱ I-thɛ-rɛl diaal, nɛɛ Kuɔth Nhial. Tiɛtdɛ luëëk Kuɔth Nhial min la Kuothdan diaal. Dɔ̱ŋ bia mun ɛgɔaa ɛ mi ciɛŋ, a bia ba̱ny ri̱c ɔ bi ben ɔ amäni cäŋ kɛl.”

9Kä cuɛ Thɔ-lo-mon jiök i̱, “Gatdä, ŋäcni Kuoth guur, kä lät ni jɛ ikä kɛ lɔcdu kɛɛliw. Kɛ ɣöö Kuoth Nhial ŋäcɛ lo̱c kɛnɛ ca̱a̱p, kɛ cär. Mi wi̱i̱ jɛ wä go̱r biɛ jek. Kä mi wi̱i̱ jɛ wä pa̱l raar amäni cäŋ kɛl.

10Kä ɛn täämɛ titdɛ ɛn ɣöö ci Kuoth Nhial ji̱ kuany kɛ ɣöö bi luaakdɛ mi rɛl rɔ la̱t. Bumni, kä lät ni jɛ.”

11Ɛ jɛn cu Dee-bid gatdɛ ni Thɔ-lo-mon ka̱m ca̱p ta̱th luaak, kɛnɛ duëlkɛ, kɛ gua̱th tɔ̱ɔ̱wnikɛ, kɛ duël nhial, kɛ duël rɛc i̱, kɛ duel in la luɛlkɛ dueer nath thi̱n.

12Kä cuɛ jɛ ka̱m ca̱a̱p diaal tin dëë täth ni kal luaak Kuɔth Nhial, kɛ duel tin gölkɛ ni jɛ, kɛ duël tɔ̱ɔ̱wä luaak Kuɔth, kɛ duël tɔ̱ɔ̱wä mucni tin ca lɛy.

13Kä cuɛ la̱t ca̱p in bɛ rial ni bööth pali kɛnɛ ji̱ Lii-bay ikä, kɛ kui̱ lätni rɛ̈y luaak Kuɔth Nhial, kɛnɛ kui̱ kuakni la̱t rɛy luaak.

14Kä cuɛ da̱a̱p kɛnɛ ciɛk in bo̱r tin ba täth ni kuak dääpä diaal kɛnɛ kuak cikä min bo̱r la̱th go̱lä.

15Cuɛ da̱a̱p in ba lät ni cuuŋni lɛmbärni kɛnɛ lɛmbärnikɛ, kɛ theem dääpä cuuŋä lɛmbärä kɛnɛ lɛmbärikɛ, kɛ ciɛk in bo̱r min ba lätni cuuŋ lɛmbärä kɛnɛ lɛmbärikɛ,

16kɛ da̱a̱p in ba lät ni tharbët, kɛnɛ ciɛk in ba lätni tharbët in la juray in thöpkɛ Kuoth a la̱thkɛ thi̱n.

17Kɛ da̱a̱p mi ko̱k ko̱k mi la̱tkɛ tuɔ̱ŋ la̱ŋ kɛ thääk la̱ŋ kɛ Liir la̱ŋ kɛ took la̱ŋ, kɛ took cikä min bo̱r.

18Kɛ da̱a̱p mi ca lɛy kɛ kui̱ yi̱kä min la waŋkɛ wal thi̱n. Kä cuɛ ka̱m ca̱p in bɛ täth ni thurbil kɛ kui̱ pua̱nyni tin ce̱tkɛ pua̱ny ja̱a̱kni tin bi gɔ̱kiɛn ɣa̱r wi̱i̱ thandukä matdä ruac Kuɔth Nhial.

19Kä cu Dee-bid wee i̱, “Kɛn ti̱ti̱ diaal ca kɛ gɔ̱a̱r piny, kɛ ɣöö te Kuoth Nhial kɛɛl kɛ ɣä, kä cɛ ɣä ka̱m ŋäc ca̱a̱pni tin la̱tdä ti̱ti̱ diaal.”

20Kä cuɛ gatdɛ ni Thɔ-lo-mon jiök i̱, “Bumni, kä com rɔ, lätni luak. /Cu dual, kä /cu rɔ luär, kɛ ɣöö te Kuoth Nhial min la Kuothdä kɛɛl kɛ ji̱. /Cɛ ji̱ bi jak kä pɛn kä /cɛ ji̱ bi pa̱l ruëëc, amäni mi ci ta̱th luaak Kuɔth Nhial thuɔ̱k.

21Kä nɛnɛ buɔ̱n bööth pali kɛnɛ ji̱ Lii-bay cikɛ rɔ rialikä kɛ kui̱ lätni diaal rɛy luaak Kuɔth. Kä bi nɛy diaal tin ŋa̱ckɛ lät kä ti diaal ji̱ luäk kɛ la̱t kä bi bööth diaal kɛ nɛy diaal ruacdu luɔ̱th.”

← Chapter 27 Jump to: Chapter 29 →