Hosea 1

Nuer Bible © Bible Society in South Sudan 1998,2012

Jump to: Chapter 2 →

1Nɛmɛ ɛ jɛn ruac Kuɔth Nhial ëë ci ben kä Ɣocä, gat Beeri, gua̱a̱th ëë ruec ni U-dhi-yaa kɛnɛ Yo-tham, kɛ A-ɣadh, kɛ Ɣidh-ki-yaa kua̱r Juda, kä ruec Ya-rɔ-baam gat Yo-ac kuäär I-thɛ-rɛl.

2Mëë tok Kuoth ruac kɛ I-thɛ-rɛl kɛ thok Ɣocä, cuɛ Ɣocä jiök i̱, “Wër kueni rɔ ciek mi ler, mi thil ŋa̱th. Kä bi dap kɛ gaat leerä, kɛ ɣöö ci wi̱c muɔ̱ɔ̱n la̱t ni nyin leerä, a ca Kuoth Nhial cu ba̱ny piny.”

3Ɛn wa̱nɔ cu Ɣocä wä wee kuɛɛn, kä cuɛ ciekdɛ ni Gɔ-mɛr nyaa wutdä mi cɔal i̱ Dib-la-yim cu kuɛn. Kä cuɛ ruët, kä cuɛ Ɣocä da̱p gat mi dho̱o̱l.

4Kä cu Kuoth Nhial ɛ jiök i̱, “Cɔl ciötdɛ i̱ Yidh-rɛɛl, kɛ ɣöö ɣän kɛ gua̱a̱th mi tɔt mia̱a̱ bëëni, bä cieŋ Yeɣu däk kɛ kui̱ riɛm Yidh-rɛɛl, kä bä kuäär I-thɛ-rɛl cu moc pëk.

5Kä niɛ cäŋ ɛmɔ, bä buɔ̱m I-thɛ-rɛl cu da̱k rɛy lo̱o̱lä Yidh-rɛɛl.”

6Kä kɛ kɔr kä mi tɔt cu Gɔ-mɛr rɔ nyɔk kɛ mi ruëtdɛ, cuɛ dap kɛ nyaadɛ. Kä cu Kuoth Ɣocä jiök i̱ wër, “Cɔl ciötdɛ i̱ Nyalo̱k, kɛ ɣöö /ci gɔɔydä ŋot kä ji̱ I-thɛ-rɛl, kä /cä kɛ bi me̱t pälikä, amäni cäŋ.

7Duundɛ ɣöö bä tëë nhök kɛ dhɔr Juda, kä bäkɛ kän. Kä /ciɛ buɔ̱mdiɛn, kööriɛn, bäkɛ kän ɣän Kuothdiɛn in la Kuoth Nhial.”

8Kɛ kɔr kä min ci Gɔ-mɛr nyaadɛ woc thiin. Cuɛ ruët, kä cuɛ dap kɛ gat mi dho̱o̱l.

9Cu Kuoth Nhial ɛ jiök i̱, “Cɔl ciötdɛ i̱ /Ci Yɛn a Nɛɛkä, kɛ ɣöö /ci yɛn a nɛɛkä kä /ci ɣän a Kuothdun.”

10Ku duundɛ la ɣöö gaat I-thɛ-rɛl, bikɛ ŋuan ce̱tnikɛ nyin litdä thuɔk yieer, tin /ca dee luäŋ kɛ thëm kɛnɛ kuën. Täämɛ cu Kuoth kɛ jiök i̱, “/Ci yɛn a nɛɛkä,” duundɛ ɣöö bi gua̱a̱th ku lɛ cop in ba kɛ cɔl i̱, “Gaat Kuɔth in tëk.”

11Kä bi ji̱ I-thɛ-rɛl mat kɛnɛ ji̱ Juda ala kɛl, kä bikɛ rɔ̱ cu kueny bööth kɛl. Kä bikɛ buɔ̱m wi̱i̱ muɔ̱ɔ̱n, kɛ ɣöö gɔaa cäŋ Yidh-rɛɛl.

Jump to: Chapter 2 →