Hosea 14

Nuer Bible © Bible Society in South Sudan 1998,2012

← Chapter 13 Jump to:

1Kua rɔ riet Kuoth Nhial in la Kuothdun yɛn ji̱ I-thɛ-rɛl, kɛ ɣöö dueerkun ca yɛ jak kä pɛn.

2Kä ka̱nɛ riet kɛ yɛ kɛɛl, kä rietdɛ rɔ Kuoth Nhial jiökɛ jɛ i̱, “Woc jiäkɔ diaal, kä nhɔk ni gɔy kɔ, kä bakɔ ji̱ liak.

3Kɛ ɣöö /ci A-thi-ri-ya kɔ dee me̱t kän, ca̱kɔ bi ŋäth ni buɔ̱m jiöŋkööri. Kä /ca̱kɔ kolaaŋkɔ tëë ca̱kɔ la̱t kɛ tetkɔ bi me̱t nyɔk kɛ ciöt i̱ kuthkɔ, kä lapi gua̱n kɔ̱a̱c lɔaac kɛ rɛɛt.”

4“Bä thil ŋäthädiɛn jak kä gɔaa, kä bäkɛ nhɔk kɛ lɔcdä kɛ li̱w, kɛ ɣöö cä bi lɛ ŋot kɛ mi gakä kɛ kɛ.

5Kä bä cu ce̱tnikɛ thäc kɛ ji̱ I-thɛ-rɛl, kä bi gɔɔydiɛn ce̱tnikɛ tual wi̱i̱ pi̱i̱ni, kä bɛ ciökɛ yiath piny ce̱tkɛ jiɛn.

6Kä bikɛ piith rɛy teekä mi pay tuɔɔk, kä bi gɔɔydɛ ce̱tnikɛ dɛy jiaath, kä bi ŋuänydɛ pa̱a̱r nikɛ ŋuäny jiaath Lɛ-ba-nɔn.

7Kɛn bikɛ ben cieŋ rɛy ti̱pkädä, kä bikɛ ciɛk ce̱tnikɛ kak wal kɛ kui̱ kɔaŋ. Kä bi gɔɔydiɛn ce̱tkɛ jiath mi kuir day, kä bi kɛ̈kdiɛn ce̱tnikɛ kɔaŋ Lɛ-ba-nɔn.

8“Kä ji̱n Ɛ-pa-rim, ɛŋu bä lɛ la̱t kɛ kuth jiɛn ti̱ti̱ ɔ? Ɛ ɣän ɛn nëë loc palun, kä ɛ ɣän tiit ji̱ mɔ. Kɛ ɣöö ce̱t ta̱a̱dä kɛ jiath mi /ci rɔl, kä puɔ̱thdun bëë kä ɣä.”

9A dee nɛy tin ŋa̱ckɛ ŋɔak ti̱ti̱ mal liŋ, ti ca gɔ̱r wa̱nɛ mɔ ti, a dee kɛn kɛ cu käp kɛ lo̱ckiɛn. Kɛ ɣöö dup Kuɔth Nhial cuŋkɛ, kä nɛy tin ŋa̱th kɛ jɛ jälkɛ thi̱n. Kä nɛy tin ji̱ dueeri kɔ̱th kɛ kɔ̱a̱a̱th ikä, a teth kɛ.

← Chapter 13 Jump to: