Hosea 5

Nuer Bible © Bible Society in South Sudan 1998,2012

← Chapter 4 Jump to: Chapter 6 →

1Liɛŋɛ nɛmɛ, yɛn bööth palä Kuɔth, ka̱mɛ jɛ tiit agɔaa yɛn ji̱ dhɔaar I-thɛ-rɛl, kä pa̱lɛ ji̱thkun piny yɛn kua̱r, kɛ ɣöö ba yɛ luk, ce̱t yɛn nikɛ dhuur kä Midh-pa, kɛnɛ cambak mi ca yuɔr wi̱i̱ pa̱a̱m Ta-bor.

2Kä cia nhɔk ni luuri Ci-tim, duundɛ ni ɣöö bäkɛ duäc kɛn diaal.

3Ɣän ŋa̱cä Ɛ-pa-rim, kä /ci I-thɛ-rɛl rɔ dee tɛ̱̈ɛ̱̈ kɛ ɣä, kä yɛn ji̱ Ɛ-pa-rim cia leer la̱t, cɛ wi̱c I-thɛ-rɛl nyon bä.

4Kä /ci ciɛŋkiɛn kɛ dee nhök ɣöö dee kɛ rɔ riet Kuothdiɛn, te ni leer rɛydiɛn. A /ca Kuoth kui̱c ɛ kɛn.

5A /ca ji̱ I-thɛ-rɛl cu gɔany ɛ liakdiɛn. Ci ji̱ Ɛ-pa-rim cu riɛk kɛ dueerkiɛn, a cu ji̱ Juda cu duer kɛɛl kɛ kɛ.

6Cäŋ wäkɛ wä jiɛɛn kɛ detkiɛn nikɛ ɣɔ̱ɔ̱kiɛn i̱ waa Kuoth Nhial go̱r, /ci kɛn ɛ bi jëk, kɛ ɣöö cɛ jiɛɛn rɛydiɛn.

7Kɛ nɛy ti thil ŋa̱th kɛ Kuoth Nhial, kɛ ɣöö cikɛ dap ni gaat läkä. Niɛ täämɛ bi tëth path ti̱mädiɛn kɛ däk kɛɛl kɛ ka̱a̱kiɛn.

8Kuɔth ɛ kaaŋ köör kä Giba, kɛnɛ Rama. Kökɛ ko̱r kä Beth-a-wɛn, kä wër köör ji̱n Ben-ya-min!

9Ɛ-pa-rim ba däk cäŋ duäcä rɛy gan I-thɛ-rɛl latdä thuɔ̱k.

10Ci bööth Juda ce̱tnikɛ nɛy ti wuɔckɛ ti̱i̱tni piɛny, akɛ kɛn nɛy tin bä ŋɛ̈ɛ̈nydä ku wuɔc wi̱i̱diɛn ce̱tkɛ pi̱.

11Ca Ɛ-pa-rim joc kɛ luk, kɛ ɣöö nhɔkɛ ni guur guäyni.

12Kɛ kui̱ ɛmɔ bä ce̱tnikɛ ŋiɛc kɛ Ɛ-pa-rim, kä bä ce̱tnikɛ tor dhɔɔr Juda.

13Kä cäŋ ëë ci Ɛ-pa-rim jueydɛ ŋa̱c kä ci Juda buɔ̱tdɛ nɛn, ci Ɛ-pa-rim wi̱cdɛ luɔc kä A-thi-ri-ya jäkɛ kuäär in diit kä raan go̱rɛ luäk. Ɛ ni ɣöö /cɛ buɔ̱tdu kiɛ jueydu dee jak kä gɔaa.

14Kä bä cu ce̱tkɛ lony kɛ Ɛ-pa-rim, kä bä ce̱tkɛ ruath luɔny kɛ dhɔr Juda. Bäkɛ rɛt kä bäkɛ naŋ dɔɔr, a thilɛ mi bikɛ kän.

15Bä cu loc ni gua̱a̱thdä, amäni mi ci kɛn dueerkiɛn ŋa̱c, kä go̱o̱r kɛn ɣä, kɛ bɛ̈cdiɛn.

← Chapter 4 Jump to: Chapter 6 →