Hosea 9

Nuer Bible © Bible Society in South Sudan 1998,2012

← Chapter 8 Jump to: Chapter 10 →

1A lɔcdu /ci tɛth lö I-thɛ-rɛl! A /ci gɔaa ɛlɔ̱ŋ ce̱tkɛ nɛy tin kɔ̱kiɛn, cia̱ ler mi ci Kuothdɛ pa̱l rueec. Ci nhɔk ni ɣöö bi rɔ kɔak ce̱tnikɛ ler mi dua̱ckɛ kä piny gua̱th kɔ̱a̱mni bɛɛl diaal.

2Ɛn gua̱th kɔ̱a̱mni kɛnɛ dha̱a̱ri kɔaŋ /ca kɛ bi mi̱eth. Kä bi kɔaŋ in pay la̱t thil.

3Kä /cikɛ bi lɛ te rɛy muɔ̱ɔ̱n Kuɔth Nhial, bi Ɛ-pa-rim cu loc kä I-jëp, kä bɛ cu cam ni mi̱th mi /ci rɔ lot kä A-thi-ri-ya.

4Kä /ca kɔaŋ bi̱lɛ muɔc piny ala muc Kuɔth Nhial, amäni luurikiɛn /ca lɔc Kuɔth bi jak kä tɛth. Kä kɛn luuri ɛ tɔ̱ bikɛ ce̱tkɛ, mi̱eth jiɛthkä lɔaac kä kɛ, kä nɛy diaal tin wä kɛ wä cam, bikɛ nyuɔn. Kä ɛn mi̱th ɛmɔ ba duŋ buath pua̱nynikiɛn kärɔa, /cikɛ bi cop rɛy luaak Kuɔth Nhial ala muc.

5Kä ɛŋu ɛnɔ bia la̱t ɔ kɛ cäŋ ŋarä min ca mɛk, cäŋ ŋarä Kuɔth Nhial?

6Nɛ̈nɛ jɛ wäkɛ, lënykɛ rɔ kä A-thi-ri-ya, bi ji̱ I-jëp kɛ rol. Bikɛ kɛ kony ɛn wi̱ni rɛɛkdiɛn kä Mɛm-pith! Kä ba ria̱ŋdiɛn min la yiëëth in bo̱r can ɛ kuäk, kä ba ti̱eckiɛn ka̱n ɛ kuiy.

7Ci gua̱a̱th kɛ kui̱ duäcä cop, gua̱a̱th in bi ram ɔ min ro̱ŋ kɛ jɛ jek. Mi wee tuɔɔk ɛn nɔmɔ, bi I-thɛ-rɛl ɛ ŋa̱c! Kä bikɛ wee i̱, “Gök ɛmɛ ɛ dɔ̱a̱r, kä ɛn ramɛ tekɛ yiëë ɛ yɔŋ.” Kɛ ɣöö ŋuan dueerkun kɛnɛ nyi̱er di̱tdun.

8Gök ɛ gääŋ ji̱ Ɛ-pa-rim tin la nɛɛ Kuɔthdä, duundɛ ni ɣöö te dhuur duɔ̱pnikɛ diaal, kä te nyir luaak Kuɔth bä.

9Cikɛ rɔ nyon kɛ dueerkiɛn ce̱tnikɛ mëë tekɛ kä Giba. Bi Kuoth dueerkiɛn tim kä bɛ kɛ duäc kɛ kui̱diɛn.

10Kä mëë jëkä I-thɛ-rɛl ce̱tdɛ nikɛ thoŋɛdit därdɔaar, kä mëë nɛ̈ɛ̈nä guuri, ce̱tkɛ nikɛ dɛy jiaath ŋɔa̱a̱p tin nhiam. Min cikɛ ben kä Baal-pɛ-or, cikɛ rɔ cu ley kuoth ni Baal. Kä cikɛ cu jiääk ce̱tnikɛ min nhɔk kɛn ɛ.

11Bi wuɔ̱t Ɛ-pa-rim rɔ bar ce̱tnikɛ dit, bɛ thil dap, kä bɛ thil ruët, kä /ci ruët bi tuɔɔk.

12A cäŋɛ mi wä kɛ gaat dap bä, bäkɛ naŋ ni kɛn diaal a thil kɛl mi bä ba̱ny piny a tëk. Kä mi wa̱a̱ kɛn diaal wä ba̱ny piny, riɛk akɛ kɛ.

13Kä gaat Ɛ-pa-rim, kɛ nën in nɛ̈ɛ̈näkɛ, luɔtdiɛn ɣöö kɛ ti bi duɔ̱p. Bɛ gaatkɛ nöŋ ŋuut nath ɛn Ɛ-pa-rim.

14Kä ɛŋu mi dëë thiec kä Kuoth Nhial i̱ derɛ lät kɛ nɛy ɛti? Jak ni mänkiɛn kä rol! Kä ɛ thinkiɛn thil cak!

15Kɛ ɣöö lät jiäknikiɛn diaal tuɔɔkɛ kä Gil-gal, kä niɛ wa̱a̱ni cä kɛ tok kɛ lo̱k thi̱n. Kɛ kui̱ lätnikiɛn ti jiäk, bäkɛ tuɔɔk raar cieeŋdä. Kä /cä bi lɛ ŋot kɛ mi nhɔakä kɛ, ci bööthkiɛn diaal ɣä lo̱k.

16Ɛ-pa-rim ce̱tdɛ kɛ juac mi ci tharɛ kööt, mi /ci dɛy dee kuir, kä /cikɛ bi tekɛ gaat. A cäŋ wä kɛ tekɛ gaat, kä nhɔk kɛn kɛ, bäkɛ näk.

17Bi Kuothdä kɛ cu lo̱k, kɛ ɣöö /ka̱n ruac Kuɔth liŋ ɛ kɛn, bikɛ cu ga̱y rɛy nath.

← Chapter 8 Jump to: Chapter 10 →