Deuteronomy 6

Nyankole 1964

← Chapter 5 Jump to: Chapter 7 →

1Mbwenu eki nikyo kyaragiirwe n'ebiragiro ebyatairweho n'ebyaragiirwe, ebi MUKAMA Ruhanga waanyu yandagiire kubeegyesa, ngu mubone kubyoroberera omu nsi ei murikwambukamu kukubuura;

2otiine MUKAMA Ruhanga waawe, oyorobere ebiragiro bye byona ebyatairweho, ebi ndikukuragiira, iwe na mutabani waawe na mwijukuru waawe, ebiro byona ebi orimara omu nsi, haza obone kuhangaara.

3N'ahabw'ekyo, hurira, iwe Israeli, oteho omutima, obyorobere, obone kuba gye, n'okukanyira munonga omuri egyo nsi y'amate n'obwoki, nka MUKAMA Ruhanga wa baashwenkuru oku yaakuraganiise.

4Hurira, iwe Israeli! MUKAMA Ruhanga waitu n'omwe;

5kandi ogume okunde MUKAMA Ruhanga waawe n'omutima gwawe gwona, n'amagara gaawe goona, n'amaani gaawe goona.

6Kandi ebigambo ebi, ebi ndikukuragiira eri izooba, bishemereire kukuguma aha mutima;

7ogume oyezirikye kubyegyesa abaana baawe, ogume obigaaniireho oshutami omu nju yaawe, nari noogyenda omu muhanda, kandi waaba nooza kubyama, kandi noimuka.

8Obikome aha mukono gwawe, bibe akamanyiso, obite aha buso bwawe ahagati y'amaisho gaawe.

9Oryabihandiika aha biti by'omuryango gw'enju yaawe n'aha nyigi z'amarembo gaawe.

10Bwanyima MUKAMA Ruhanga waawe ku arikuhitsya omu nsi ei yaarahiire kuha baashwenkuru, Abrahamu, Isaaka na Yakobo, yaakuha endembo mpango kandi nungi, ezi otarombekire,

11n'amaju agaijwire ebirungi byona, agu otaraijwize, n'amaziba g'amaizi agu otarafukwire, n'emisiri y'emizaabibu n'emizeituuni ei otarabyaire, waarya, waahaaga,

12oyerinde otaryebwa MUKAMA owaakwihire omu nsi ya Misri, omu nju y'obuhuuku.

13Ogume otiine MUKAMA Ruhanga waawe, omuheereze, n'eiziina rye obe niryo waarahira.

14Mutarikuratira baaruhanga abandi ab'abanyamahanga, abahereraine naimwe;

15ahakuba MUKAMA Ruhanga waawe obari ahagati ni Ruhanga w'eihato; MUKAMA Ruhanga waawe nyentsya atarikugirira ekiniga, akakuhwerekyereza, akakwiha omu nsi.

16Mutarigyeza MUKAMA Ruhanga waanyu, nk'oku mwamugyereize Maasa.

17Mugume mwezirikye kworobera ebiragiro bya MUKAMA Ruhanga waanyu, n'ebi yaahamize, n'ebiragiro ebyatairweho ebi yaabaragiire.

18Kandi ogume okore ebihikire n'ebirungi omu maisho ga MUKAMA, obone kuba gye, oze omuri egyo nsi nungi ei MUKAMA yaarahiire kuha baashwenkuru, ogikubuure,

19ahabw'okubinga abazigu baawe boona omu maisho gaawe, nk'oku yaagambire.

20Mutabani waawe ku arikubuuza omu biro ebiriija, naagira ati: Amakuru g'ebirikuhamya n'ebiragiro ebyatairweho n'ebyaragiirwe ebi MUKAMA Ruhanga waitu yaabaragiire n'enki?

21oryamugarukamu oti: Tukaba turi abahuuku ba Faraho omuri Misri; MUKAMA yaatwiha omuri Misri n'omukono gw'amaani;

22yaayoreka obumanyiso n'eby'okutangaaza eby'amaani ebirikusaasa, naabikora ahari Misri na Faraho n'eka ye yoona omu maisho gaitu;

23yaatwihayo, ngu atureete omu nsi ei yaaraganiise baatatenkuriitwe ku arigituha.

24Kandi MUKAMA yaaturagiira kworobera ebyo biragiro byona, n'okutiina MUKAMA Ruhanga waitu, ngu tubone kuba gye ebiro byona, kandi ngu akize amagara gaitu okufa, nk'oku kiri n'eri izooba.

25Ku turitaho omutima, twayorobera ebyo biragiro byona omu maisho ga MUKAMA Ruhanga waitu, nk'oku yaaturagiire, kiryatubarirwa kuba okuhikiirira.

← Chapter 5 Jump to: Chapter 7 →