Ecclesiastes 10

nyankole

← Chapter 9 Jump to: Chapter 11 →

1Eshohera zifiire zinuutsya amajuta g'omwotezi. N'obushema bukye bucwa busha obwengye n'ekitiinwa.

2Omutima gw'omunyabwengye gumutooza ahari buryo, kwonka ogw'omushema gumutooza ahari bumosho.

3Nangwa omushema nobu aba naagyenda omu muhanda, tayetegyereza, ou yaareeba weena amweta omushema.

4Omutegyeki ku arikugirira ekiniga, otariruga omu mwanya gwawe; ahabw'okuba okutabakirwa kwawe kuryagwisiriza ebicumuro bihango.

5Hariho ekibi ki naareebire omu nsi kiri ekishobyo ky'omutegyeki.

6Abashema kuteebwa omu myanya mikuru, abatungi bakateebwa omu myanya erikugaywa.

7Nkareeba abahuuku batembire embaraasi; n'abategyeki nibagyendesa ebigyere nk'abahuuku.

8Otimba ekiina akigwamu, n'ofumura orugo arumwa enjoka.

9Ohigura amabaare gamuhutaaza, n'oshatura empimbi aba ayogire amagara.

10Ekyoma ku kiba kitaine bwogi, omuntu ataakityaza, agyemeserezibwa kutemesa amaani; kwonka obwengye buhwera omuntu kuhitsya eki arikukora.

11Enjoka ku eruma omuntu etakagomboirwe, omurumuuzi aba naayeruhiza busha.

12Ebi omunyabwengye agamba bimureetera kusiimwa, kwonka ebi omushema agamba bimwita.

13Ebi atandika kugamba biba obufamutima, n'ebi ahereeruka kugaaniira biba obushazi.

14Omushema agamba maingi, kwonka omuntu tamanya ebiribaho n'ebiribikurata. Mbwenu n'oha orikubaasa kubimushoboororera yaarugireho?

15Ebi omushema ayehenengyera bimurusya, abura kumanya omuhanda gurikuza omu rurembo.

16Iwe nsi 'we, ebishi ori omugwerwa kagwe, omugabe waawe ku araabe ari muto n'abategyeki baawe nibaimukira aha magyenyi!

17Iwe nsi 'we, ebishi oine mugisha, omugabe waawe ku araabe ari omwana w'abantu, n'abategyeki baawe nibarya amagyenyi omu bunaku bwago, kutunga amaani, kutari kusinda!

18Obwegande bubonza orukanga, obweremwa bureetera enju kutura.

19Obugyenyi buteebwaho ahabw'okusheka, viino enanura amagara; kwonka empiiha niyo ebimara omukyeno.

20Otarijuma omugabe, nobu kwakuba okumujumira aha mutima, kandi otarijuma omutungi, nobu kwakuba okumujumira endugu; ahabw'okuba enyonyi y'omu kaabunga eryatwara egyo nkuru, entumwa y'amapapa ebuzye eki waagamba.

← Chapter 9 Jump to: Chapter 11 →