Ecclesiastes 6

nyankole

← Chapter 5 Jump to: Chapter 7 →

1Hariho ekibi ki naareebire omu nsi kandi ekihingamira abantu,

2nikyo ky'omuntu ou Ruhanga ahaire obutungi n'eby'okutunga n'ekitiinwa, atabuzirwe kintu kyona eki arikwenda, kwonka Ruhanga atabimwikirize kumunanura; kureka bikananura owa hangahari. Ekyo ni busha, kandi n'okubonabona kw'obusaasi.

3Omuntu okuzaara abaana igana, akahangaara emyaka mingi, kwonka omu magara ge akaburwa kunanurwa ebintu birungi, akataho okubura kiziika; ningira ngu ogwo muntu naahitwa enda erugiremu.

4Manya egyo nda erugiremu eburira omu mwirima, kandi omuri ogwo mwirima nimwo eburiza obutsibyo.

5Nobu eba etakanyenyeerize nari okumanya ekintu kyona, kwonka etunga obuhuumure okukira ogwo muntu.

6Nangwa nobu yaakuhangaara emyaka rukumi emirundi ebiri, atagizire bu ananukire, mbwenu byombi tibirikuza omu mwanya gumwe?

7Byona ebi omuntu ayecurengyera aba naayehenengyera enda ye; kwonka tahaaga.

8Mbwenu obwo omunyabwengye naakiza ki omushema? Kandi omworo orikumanya kutwaza gye omu maisho g'abantu agasirwa ki?

9Okugira eki waareeba nikukira okukora oku n'oku nooyetenga. Ekyo nakyo ni busha; n'okubinga omuyaga.

10Ekintu kyona ekirabaireho kikeetwa eiziina, n'oku omuntu ari nikumanywa; kandi ku atabaasa kuhakanisa orikumukiza amaani.

11Ei ebigambo bigarukira kuba bingi, niyo bigarukira kubura omuhoho, kandi ekyo omuntu tikiine ki kimugasira.

12Mbwenu n'oha orikumanya ekirungi ekishemereire omuntu omu magara ge g'ebiro bikye, agataine muhoho, agahingura nk'ekicuucu? Kandi n'oha owaakugambira omuntu ebiribaho ahansi y'eizooba, yaaherize kufa?

← Chapter 5 Jump to: Chapter 7 →