Ecclesiastes 11

nyankole

← Chapter 10 Jump to: Chapter 12 →

1Tambika ebyokurya byawe aha maizi, haza oryabizimuurirwa hahingwireho ebiro.

2Ha emigabo yaawe abantu mushanju, nobu baakuba munaana; ahabw'okuba torikumanya kabi akaakubaho omu nsi.

3Ebicu ku biijura, enjura egwa, n'omuti ku gugwera aha bukiizi-bwa-buryo, nari aha bwa-bumosho, ei gugwera niyo guguma.

4Oreebereza omuyaga tabiba, ohanga amaisho ebicu tagyesha.

5Nk'oku otamanya muhanda gw'omuyaga, n'oku amagufa gakurira omu nda y'omukazi oine enda, nikwo otamanya byona ebi Ruhanga akora.

6Omu kasheeshe biba embibo zaawe, n'omu mwabazyo otagwisa emikono; ahabw'okuba torikumanya ebiriba gye, yaaba eki nari kiriya, nainga byombi.

7Omushana gunura, kandi okureeba eizooba kureetera amaisho kushemererwa.

8Omuntu ku araaramaare emyaka mingi akihuriire, agishemerererwemu yoona; kwonka amanye ku ebiro by'omwirima biriba bingi. Ebyo byona ebiribaho tibiine muhoho.

9Imwe minyeeto 'mwe, mushemerererwe omunyeeto gwanyu. Omutima gwanyu gugume nigwesiima omu biro by'okunyeeta kwanyu. Mutwaze nk'oku murikwenda, kandi nk'oku murikureeba. Kwonka mumanye ngu ahabw'ebyo byona, Ruhanga aryabacwera orubanja.

10N'ahabw'ekyo mwihe amaganya omu mitima yaanyu, n'obusaasi omu mibiri yaanyu; ahabw'okuba obutsigazi n'obuhangare ni busha.

← Chapter 10 Jump to: Chapter 12 →