Ecclesiastes 4

nyankole

← Chapter 3 Jump to: Chapter 5 →

1Nkagaruka naareeba emigango ei abantu baine omu nsi. Naareeba oku abarikureebesibwa enaku barikurira, hatariho orikubahuumuriza; obushoboorozi bwinwe abarikubaita kubi, kandi hatariho orikubahuumuriza.

2Naateekateeka nti: Abafu abaafiire bahiiriirwe okukira abahuriire abakiriho;

3kwonka orikubakira bombi ku ari otakabahoga, otakareebaga bibi birikukorwa omu nsi.

4Ntyo ndeeba eby'okwehenenga byona ebikoresibwa oburyo bwona ku nibyo bireetera omuntu kugirirwa mutaahi we eihari; n'ekyo nakyo ku kitaine muhoho, kandi ku kiri okubinga omuyaga.

5Omushema ohinya emikono ayeitsa enjara.

6Eigaro rimwe eriijwire obusingye nirikira amagaro abiri agaijwire emirabanamu, ekyo n'okubinga omuyaga.

7Kandi nkareeba ebitaine muhoho omu nsi;

8omuntu otaine waabo, yaaba mutabani nari mweneishe, kwonka ebi ayehenengyera bitarikuhwa; n'amaisho ge gatakahaagaga itungo; haza atakeebuuzaga ati: Beitu ou mpendekyera nkeebuza okushemererwa n'oha? Ekyo nakyo ni busha, kandi n'omurimo gwijwire obujune.

9Ababiri nibakira omwe, ahabw'okuba bazimuurirwa ebi bahendekyeire.

10Manya ku bagwa, omwe aimutsya mugyenzi we. Kwonka bambe, ori omwe ku agwa, yaabura ow'okumwimutsya, areeba enaku.

11Ekindi, ababiri ku babyama kumwe batagatirana. Kwonka ori wenka naabaasa ata kutagatirwa?

12Kandi omuntu akaabaasa kusingura omuntu ori omwe; kwonka ababiri bakaamurema. Omurunga gw'enyabushatu tigurahuka kucweka.

13Omutsigazi omworo kwonka ow'obwengye naakira omugabe okuzire kandi omushema otakyenda kuhaburwa;

14ogwo mugabe, nobu yaakuba yaarugire omu kihome akaba omugabe, nari yaazairwe ari omworo omu ihanga rye.

15Nkareeba abantu boona abarikugyendera omu nsi naareeba n'ogwo mwojo owaabaire ari ow'okuza omu bigyere bye.

16Abantu abu arikutegyeka bari baingi munonga. Kwonka abarikurataho tibarimujura. Buzimazima ekyo nakyo ni busha, kandi n'okubinga omuyaga.

← Chapter 3 Jump to: Chapter 5 →