Ecclesiastes 12

nyankole

← Chapter 11 Jump to:

1Kandi guma oijukye Omuhangi waawe omu biro by'omunyeeto gwawe, ebiro bibi bitakaizire n'emyaka etakafundiriize, ei origiriramu oti: Yantama.

2Omwijukye eizooba n'okwezi n'enyonyoozi bitakashwekirwe mwirima, n'ebicu bitakagarukireho enjura yaatsya;

3omu biro ebi abarinzi b'enju baritetemeramu n'abashaija b'amaani bakabundabunda, abasi bakarereera ahabw'okuba bakye n'abarikuringuririza omu madirisa amaisho gakagiibwaho oruho;

4enyigi ezirikureeba omu mihanda zikakingwa, n'amaraka g'emengo gakagamba mpora; omuntu akasisiimurwa eiraka ry'enyoyi, n'ebirikujumeeza amaraka g'ebyeshongoro bikateerwa mpora;

5bakatiina kuza omu bibungo; ebirikutiinisa biri omu muhanda; omuyembe gukarabya, eseenene zikeekurura ziitsirwe omwiguto; omuntu akahura eki akunda, ahabw'okuba omuntu aba naaza owaabo ey'entuura; obwo abarikucura nibazengyerera omu mihanda;

6akahuuzi k'efeeza katakashazirwe nari orwabya rw'ezaabu rutakaatikire nainga enyungu etakaatikiire ha iziba nari enyamuziga etakacwekyeire ha kiziba;

7mpaho omucuucu gukagaruka omu itaka, nk'oku gwabaire guri; n'omutima gukagaruka owa Ruhanga owaaguhaire.

8Omurangirizi naagira ati: Byona buzimazima ni busha; tibiine muhoho.

9Bwanyima ogwo murangirizi, otabariiremu ky'okuba omunyabwengye, akeegyesa abantu ebi arikumanya, yaagyeragyeranisa enfumu, yaazeega, kandi yaazitebeekanisa ataireho omutima.

10Omurangirizi akateeraho kusherura ebigambo birikunurira abantu, yaabahandiikira eby'amazima abishorongize gye.

11Ebigambo by'abanyabwengye ni nk'emihunda; kandi ebigambo by'Omuriisa omwe wa boona, ebiteerainwe hamwe, ni nk'emishumaari ehamire.

12Mwana wangye, ka nkugambire ekindi ky'okwerinda; okuhandiika ebitabo bingi tikugira bugarukiro, n'okwega munonga kurusya.

13Okuhendera byona ebi waahurira: Guma otiine Ruhanga, okuratire ebiragiro bye, ahabw'okuba ekyo nikyo omuntu yaateereirweho kukora.

14Manya Ruhanga aryacwera orubanja ekintu kyona ekyakozirwe, n'ekintu kyona eky'omubonano, yaaba kibi nari kirungi.

← Chapter 11 Jump to: