Hebrews 10

nyankole

← Chapter 9 Jump to: Chapter 11 →

1Manya eiteeka rikaba riri ekinyimanyimi ky'ebirungi ebyabaire nibyenda kwija, bitari ebiriho ebya nyamazima. N'ahabw'ekyo tibibaasa n'akakye kuhikiiririza kimwe abarikuramya baine ebitambo ebyabaire biheebwayo buri mwaka.

2Ku kyakubaire kiri kityo, tibyakurekyeirwe aho kutambwa? Abarikuramya kuri baayeziibwe rimwe heza, tibaakubaire nibeemanya ku baine ekibi.

3Kwonka okuhayo ebyo bitambo kuba nikubaijutsya ebibi byabo buri mwaka.

4Manya tikirikubaasika eshagama y'enimi n'ey'embuzi kwihaho ebibi.

5Nikyo Kristo, obu yaija omu nsi, yaagiriire ati: Iwe torenzire kitambo na mpongano, kureka okanteekateekyera omubiri.

6Empongano zicwekize, n'ebitambo by'okukarabira ebibi torabisiimire.

7Naanye nikwo kugira nti: Ai Ruhanga, reeba, naija kukora eki okunda nk'oku kyampandiikirweho omu kitabo ky'eiteeka.

8Aharuguru ku yaagizire ati: Torenzire kandi torasiimire bitambo na mpongano, n'obu zaakuba empongano ezicwekize nari eby'okuhongyerera ebibi nibyo ebyo ebiheebwayo nk'oku eiteeka riragiira,

9akongyera yaagira ati: Reeba, naija kukora eki okunda. Atyo Kristo yaihaho ebitambo ebya ira: omu mwanya gwabyo yaatamu ekitambo eky'okwehonga kwe.

10Reero ahabwa Yesu Kristo kukora eki Ruhanga yaabaire naamwenza, twena tukeezibwa ahabw'ekitambo eki yaahongire rimwe heza, naahayo omubiri gwe.

11Manya buri muhongyerezi ayemerera buri izooba naakora eby'omwoga gwe kuhayo kaingi ebyo bitambo ebitabaasiza kimwe kwihaho ebibi.

12Kwonka Kristo, ku yaaherize kuhayo ekitambo kimwe kyonka eky'ebiro byona ahabw'ebibi, yaashutama aha rubaju rwa buryo orwa Ruhanga.

13Okwiha obwo atuura ategyereize, okuhitsya obu abazigu be barihindurwa endibatiro y'ebigyere bye.

14Manya omu kuhayo ekitambo kimwe kyonka, akahikiiririza kimwe ebiro byona abeezibwa.

15Na Mutima Orikwera ekyo naakituhamiza. Okubanza akagira ati:

16Nyakubaho naagira ati: Ebyo biro ku birihwaho, egi niyo ndagaano ei ndiragaana nabo: Ndyata amateeka gangye omu mitima yaabo, ngahandiikye omu biteekateeko byabo.

17Kandi yaagaruka yaagira ati: Tindiijuka bundi bibi byabo n'ebicumuro byabo.

18Manya ebibi ku bisaasirwa, haba hatakyetengyesa kubihongyerera.

19N'ahabw'ekyo, banyaruganda, twine obwesigye bw'okutaaha omu Mwanya Ogurikwera ahabw'eshagama ya Yesu;

20obwo nituraba omu muhanda omusya kandi ogw'amagara, ogu yaatucweraire omu mukingo nigwo mubiri gwe.

21Nk'oku twine omuhongyerezi omukuru orikutegyeka enju ya Ruhanga,

22ka twirire Ruhanga haihi n'omutima gw'amazima, twine okwikiriza okuhamiire kimwe, emitima yaitu eyogiibweho ebibi ebirikutushinja, n'emibiri yaitu eyogiibwe amaizi amarungi.

23Ka tuhamize kimwe amatsiko gaitu agu tugamba butunu tutarikunyiganyiga; ahabw'okuba owaaraganiise n'omwesigwa.

24Tuteekateekye oku twakwezirikisana kukundana n'okukora ebirungi.

25Haza tutarereera kuteerana hamwe nk'oku abamwe batwaza, kureka tugumyane, munomuno nk'oku murikureeba ngu ekyo kiro kiri haihi kuhika.

26Manya ku tukora ebibi nkana twaherize kumanya amazima, haba hatakiriho kitambo ky'okuhongyerera ebibi;

27kureka tutsigarira kutegyereza n'obwoba ebiribaho, nibyo okucwerwa orubanja, n'omuriro gw'ekibabo oguryokyeza kimwe abagomi.

28Omuntu ohenzire nkana eiteeka rya Musa ku ashinjwa baakareebi babiri nari bashatu, afa atagiriirwe saasi.

29Mbwenu nimuteekateeka omuntu ogayire Omwana wa Ruhanga, akahagaza eshagama y'endagaano eyaamwerize, akaitsa ekiniga Mutima otuhitsyaho emigisha ya Ruhanga, tashemereire kuheebwa ekifubiro ekirikukiraho?

30Ahabw'okuba nitumanya owaagizire ati: Niinye nshemereire kugira enzigu; niinye ndihoora. Kandi ati: Nyakubaho aryacwera abantu be orubanja.

31Ka n'eky'eihano omuntu kugwa omu mikono ya Ruhanga ohuriire!

32Kwonka mwijukye ebiro ebyahingwire, obu mwamurikiirwe, oku mwayemeire orugamba ruhango nimureebesibwa enaku.

33Obundi nimushungisibwa, nimujumwa, kandi nimubonabonesibwa; n'obundi nimubarirwa omu barikutwazibwa batyo.

34Mukaba mugirira embohe esaasi, kandi mwikiriza kunyagwa ebintu byanyu mushemereirwe, ahabw'okuba mukaba nimumanya ku mwine eitungo eririkukiraho oburungi kandi eririkugumaho

35Mutarinaga obwo bwesigye bwanyu oburimu ekihembo kihango.

36Manya nikibeetengyesa okugumisiriza, mubone kukora eki Ruhanga arikwenda, n'okutunga ebi yaaraganiise.

37Ahabw'okuba ekyahandiikirwe nikigira kiti: Hatsigaire omwanya mukye, Ogwo ow'okwija aije, kandi tarikwija kwikarayo.

38Owangye ohikiriire aryagira amagara ahabw'okwikiriza; kwonka ku arigaruka enyima tindimushemerererwa.

39Mbwenu itwe tituri muri abo abagaruka enyima bakahwerekyerera, kureka turi omuri abo abaguma baine okwikiriza, bakakiza amagara gaabo.

← Chapter 9 Jump to: Chapter 11 →