Hebrews 5

nyankole

← Chapter 4 Jump to: Chapter 6 →

1Manya omuhongyerezi omukuru weena otoorainwe omu bantu, ateebwaho kubamarira eby'akakwate kaabo na Ruhanga, kuhayo emitoijo n'ebitambo eby'okuhongyerera ebibi.

2Naabaasa kutwaza gye abashema n'abahabire, ahabw'okuba nawe obweremwa bumuturukire oku n'oku.

3N'ahabw'ekyo aba ow'okuhonga ebitambo ahabw'ebibi bye wenka, n'ahabw'ebyabandi bantu.

4Kandi tihariho n'omwe oyeha obwo bukuru, atabweteirwe Ruhanga nk'oku Arooni yaabweteirwe.

5Na Kristo tareetungwire kuba omuhongyerezi omukuru, kureka akateebwaho Ogwo owaamugizire ati: Ori Omwana wangye; eri izooba naakuzaara.

6Kandi n'ahandi naagira ati: Ori omuhongyerezi ow'orugyero rwa Melikizedeki, kandi nikwo origuma ebiro byona.

7Yesu, omu biro bi yaamazire omu nsi, akashaba, yaayeshengyereza n'amarira, yaahoogyera Ruhanga owaakubaasize kumukiza okufa, kandi ahabw'okumutiina yaahurirwa.

8N'obu araabe yaabaire ari Omwana wa Ruhanga, kwonka ebi yaabonabonesiibwe bikamwegyesa okworoba.

9Ku yaaherize kuhikiiririzibwa kimwe, yaahinduka oreetera abamworobera boona kutunga okujunwa okutahwaho;

10obwo Ruhanga yaaherize kumurangirira ku ari omuhongyerezi omukuru ow'orugyero rwa Melikizedeki.

11Ekyo twine bingi eby'okukigambaho, kwonka biine eishoboorora, ahabw'okuba muhindukire abatarikurahuka kushoboorokyerwa.

12Omu bunaku obu, n'obu muraabe mushemereire kuba abeegyesa, kwonka nimwetenga kugira ow'okubeegyesa obundi ebigambo bya Ruhanga ebibandizibwaho. Nimwetenga amate, bitari byokurya bigumire.

13Manya weena otungwa amate, aba akiri mubisi omu kigambo ky'okuhikiirira, ahabw'okuba n'omwana.

14Kwonka ebyokurya ebigumire biba eby'abaahamire omu by'omutima, abaamanyire bukuru kutaanisa ekirungi n'ekibi.

← Chapter 4 Jump to: Chapter 6 →