Hebrews 8

nyankole

← Chapter 7 Jump to: Chapter 9 →

1Mbwenu omu bi turikugamba, ekikuru nikyo eki: Omuhongyerezi ogwo omukuru ou twine ayemi ati: ashutami aha rubaju rwa buryo orw'ekitebe ky'obugabe ekya Nyakusinga omu iguru.

2N'omuheereza w'omu mwanya ogurikwera, kandi ow'omu ihema nyakabara, eritaratairweho muntu, kureka Mukama.

3Manya omuhongyerezi omukuru weena ateebwaho kutoija emitoijo n'okuhonga ebitambo. N'ahabw'ekyo ogu Muhongyerezi mukuru waitu nawe ashemereire kugira eky'okuhonga.

4Mbwenu kuri yaabaire ari omu nsi, takubaire muhongyerezi n'akakye, ahabw'okuba hariho abahongyerezi abahayo emitoijo nk'oku eiteeka riragiira.

5Bo ebi bakora biba eky'okureeberaho, n'ekinyimanyimi ky'omwanya ogurikwera ogw'omu iguru. Manya Musa ku yaabaire naaza kutaho eihema, Ruhanga yaamuhabura naamugira ati: Oreebe ngu byona ebi oraakore, nibishushana n'ebi waayorekirwe aha rushozi.

6Kwonka omu mazima, Kristo akaheebwa obuheereza oburikuhita obw'abaira, nk'oku endagaano ei arimu ari omuteeranizi wa Ruhanga n'abantu erikuhitaho, ahabw'okuba ekakorwa neehamira aha byaraganisiibwe ebirikukirayo oburungi.

7Endagaano eyaabandize kuri yaabaire etaine kishobiremu, eya kabiri tekwetengirwe.

8Manya Ruhanga, ku yaareebire omu bantu be ekishobire, yaagira ati: Nyakubaho naagira ati: Obunaku buryahika ndagaane endagaano nsya n'enju ya Isiraeli, kandi n'enju ya Yuda.

9Egyo ndagaano ensya terishushana n'endagaano ei naaragaine na baishebo, obu naabakwata omukono nkabaiha omu nsi ya Misiri. Bo tibarahamiire ha ndagaano yangye, naanye nikyo ntarabeeteereireho; nikwo Nyakubaho arikugira.

10Nyakubaho naagira ati: Ebiro ebyo ku birihwaho, egi niyo ndagaano ei ndiragaana n'enju ya Isiraeli: Ndyata amateeka gangye omu biteekateeko byabo, ngahandiikye omu mitima yaabo; kandi mbe Ruhanga waabo, nabo babe abantu bangye.

11Tibaryegyesana buri muntu na mugyenzi we, nari buri muntu na mwene ishe, bati: Manya Mukama. Ahabw'okuba boona baryammanya, okwiha aha muto okuta aha mukuru.

12Ndyabasaasira ebicumuro byabo, n'ebibi byabo tindibiijuka bundi.

13Ruhanga ku arikugamba aha ndagaano ensya, biri ahangwire eyaabandize; kandi kyona ekikura kikahanguura, kiba kiri haihi kuhwaho.

← Chapter 7 Jump to: Chapter 9 →