Hebrews 11

nyankole

← Chapter 10 Jump to: Chapter 12 →

1Mbwenu okwikiriza nikwo kuhamiza kimwe ebi twineho amatsiko, kandi nikwo kutumanyisa ebibaho ebitarikureebwa;

2ahabw'okuba aba ira kukabareetera okusiimwa Ruhanga.

3Okwikiriza nikwo kutureetera okushoboorokyerwa ku ensi yoona yaahangirwe ekigambo kya Ruhanga; haza tukamanya ku ebirikureebwa byakozirwe nibiihwa omu bitarikureebwa.

4Ahabw'okwikiriza, Abeeli akatambira Ruhanga ekitambo ekyasiimirwe Ruhanga okukira ekya Kaini. Haza kyamureetera kuhamibwa ku ari ohikiriire. Ekyo Ruhanga akakihamya naikiriza ebi Abeeli yaamutoijeire. Abeeli ogwo nobu araabe yaafiire, kwonka ahabw'okwikiriza kwe, na hati naakigamba.

5Ahabw'okwikiriza, Enoka akatwarwa atafiire, kandi tiyaareebwa bundi ahabw'okuba Ruhanga akamutwara. Kwonka ekyahandiikirwe nikigira ngu, Enoka ogwo atakatwairwe, akaba asiimwa Ruhanga.

6Haza ahu okwikiriza kutari tikibaasika kusiimwa Ruhanga. Manya weena orikwenda kwiririra Ruhanga, ashemereire kwikiriza ku ariho, kandi ku aha ebihembo abamusherura.

7Ahabw'okwikiriza, Noa ku yaaherize kuhaburwa Ruhanga ebiribaho ebitakareebirwe, yaataho omutima, yaakora obwato bw'okujuna ab'eka ye. Okwo kwikiriza kukareetera ensi kusingwa orubanja, kandi Ruhanga yaamuha okuhikiirira okureetwa okwikiriza.

8Ahabw'okwikiriza, Aburahamu, Ruhanga ku yaamweetsire kuruga owaabo, kuza omu nsi ei yaabaire naaza kuheebwa kuba empungurano, yaikiriza, atyo yaagyenda atarikumanya i arikuza.

9Haza okwo kwikiriza kwamureetera kuguma naafurukira omu nsi ei Ruhanga yaamuraganiise, ari omunyaihanga. Akaba araara omu mahema hamwe na Isaaka na Yakobo, abaahungwire nawe ebi yaaraganisiibwe;

10ahabw'okuba Aburahamu akaguma ategyereize orurembo orwine emisingi, oru Ruhanga yaabaire acumire kandi arwombekire.

11Ahabw'okwikiriza, Saara kikamubaasikira kubaka enda, nobu araabe yaabaire akaikwire; ahabw'okuba akeesiga owaamuraganiise ku ari omwesigwa.

12N'ahabw'ekyo ogwo muntu omwe Aburahamu, nobu yaabaire ari aha ncwamba za rufu, akakomookwamu abaijukuru baingi nk'enyonyoozi z'omu iguru, kandi bari nk'omusheenyi gw'aha rubaju rw'enyanja, ogutarikubaasa kubarwa.

13Abo boona bakafa nibaikiriza, batakatungire ebi Ruhanga yaaraganiise. Kwonka baabiranzya kandi baabigirira ekihika, haza baabaire nibeemanya ku bari abanyamahanga kandi abahinguzi omu nsi.

14Manya abantu abagamba ebintu nk'ebyo, baba nibooreka ku barikusherura obutaka bwabo.

15Kuri baajuzire ensi ei baabaire barugiremu, bakaabaasize kugarukayo.

16Kwonka hati nibeetenga ensi erikukiraho oburungi, niyo y'omu iguru. N'ahabw'ekyo Ruhanga tikirikumwitsa nshoni kwetwa Ruhanga waabo, ahabw'okuba niwe yaabateekateekyeire orwo rurembo.

17Ahabw'okwikiriza, Aburahamu ku yaagyeziibwe Ruhanga, yaahayo omutabani Isaaka kuba ekitambo. Aburahamu ogwo, ou Ruhanga yaaraganiise, akeemera kuhayo omwana we ogwo omwe wenka nyamunegyere kuba ekitambo;

18haza Ruhanga yaabaire omugizire ati: Omuri Isaaka nimwo baijukuru baawe baryeteerererwa.

19Manya Aburahamu akamanyira aha mutima, ku Ruhanga aine obushoboorozi bw'okuzoora Isaaka omu bafiire. Na Ruhanga nikyo yaamugaruriire Isaaka nk'orugire omu bafiire.

20Ahabw'okwikiriza, Isaaka akashabira Yakobo na Esau naabatengyera emigisha.

21Ahabw'okwikiriza, Yakobo, atakafiire, akashabira abaana ba Yosefu omugisha, ayehigikire eifundo ry'enkoni ye naaramya Ruhanga.

22Ahabw'okwikiriza, Yosefu ku yaabaire ari haihi kufa, yaagamba aha by'Abaisiraeli kuruga Misiri, kandi yaaragiira oku baritwaza omutumbi gwe.

23Ahabw'okwikiriza, Musa ku yaaherize kuzaarwa, abazaire be baamusherekyera ameezi ashatu, ahabw'okuba bakareeba ku ari omwana murungi omu kureebwa, haza tibaatiina kiragiro ky'omugabe.

24Ahabw'okwikiriza, Musa ku yaakuzire, yaayanga kwetwa mutabani wa muhara wa Faraaho.

25Akasiima kwitwa kubi hamwe n'abantu ba Ruhanga, okukira okunanurwa amashemererwa g'ekibi ag'akaanya bwanya.

26Akateekateeka okujumwa ahabwa Kristo ku kurimu eitungo ringi okukira amatungo ga Misiri; ahabw'okuba akaba naaranzya ekihembo eki ariheebwa.

27Ahabw'okwikiriza, Musa ogwo akaruga Misiri atarikutiina kiniga ky'omugabe, atyo yaagumizamu, amaisho agahangire Ruhanga otareebwa.

28Ahabw'okwikiriza, akakora omugyenzo gw'Okuhingurwaho, yaamiisiira eshagama, ngu Omuhwerekyereza w'emijigaijo atakaabakoraho.

29Ahabw'okwikiriza, Abaisiraeli bakambuka Enyanja Erikutukura, nk'abarikuraba ahoomire; kwonka Abanyamisiri ku baateireho kugira batyo, baamirwa amaizi.

30Ahabw'okwikiriza, ebigo bya Yeriko bikagwa, byaherize kumara ebiro mushanju nibyeziguurukwa Abaisiraeli.

31Ahabw'okwikiriza, Rahabu maraaya taracwekyereeziibwe hamwe n'abagomi, ahabw'okuba akakunira ziri ntatsi.

32Mbwenu ebindi ngambe ki? Manya omwanya gukampwaho naaza kutebya ebya Gideoni, Baraki, Samusooni, Yefuta, ebya Daudi na Samueli kandi n'eby'abarangi.

33Ahabw'okwikiriza, aba bantu bakasingura ensi z'abagabe, bakakora ebihikire, bakatunga ebi Ruhanga yaaraganiise. Entare bakaziigara akanwa,

34bakaraaza omuriro gurikubuguma, bakakira zaarurara z'obwogi. Bakatunga amaani, haza kunu baabaire batagaine; bakaba amamanzi omu rugamba, bakabinga amahe g'abanyamahanga.

35Abakazi abamwe bakagarurirwa abaabo bazoirwe omu bafiire. Abandi bantu bakaitwa kubi, bangire kurekurwa, ngu babone kuzooka baine amagara agarikuhitaho.

36N'abandi bakagaaniizibwa, kandi baayashwa, baataho n'okubohesibwa enjegyere n'okuteebwa omu kihome.

37N'abandi bakateerwa amabaare, baahirimburwa n'emishumeeno, baitwa na rurara. Bakazengyerera bajwaire empu z'entaama n'ez'embuzi baconcoboize nibabonabonesibwa, nibaitwa kubi

38bakaba abu ensi etashemereire baazengyerera omu mahamba n'omu nshozi, nibaraara omu maaya n'omu nyanga z'omu itaka.

39Kandi abo boona, n'obu baraabe baasiimirwe ahabw'okwikiriza kwabo, tibaratungire ki Ruhanga yaaraganiise.

40Manya Ruhanga akaba atuteekateekyeire ekirungi ekirikuhitaho, ngu bo barekye kuhikiiririzibwa kimwe, itwe tutariho.

← Chapter 10 Jump to: Chapter 12 →